هه‌وه‌كا هشیاركرنێ ژ نه‌خۆشیا كۆلێرایێ ل كه‌مپێن ئاواران ده‌ستپێكر
ئه‌ڤرۆ نیوز:
رێڤه‌به‌ریا كاروبارێن خوه‌پاراستنا ساخله‌میێ یا سه‌ر ب رێڤه‌به‌ریا گشتیى یا ساخله‌میا پارێزگه‌ها دهۆكێ ڤه ب هه‌ڤكارى ل گه‌ل رێكخراوا یونیسێف ده‌ست ب هه‌وا هشیاركرنێ ژ نه‌خۆشیا كۆلێرایێ ل ناڤ هه‌موو كه‌مپێن ئاواره و پانه‌به‌ران كر و دێ بۆ ده‌مێ حه‌فتیه‌كێ یا به‌رده‌وام بیت.
حه‌مزه ره‌زیكى، به‌پرسێ پشكا راگه‌هاندنێ ل رێڤه‌به‌ریا گشتى یا ساخله‌میا پارێزگه‌ها دهۆكێ دیار كر كو هه‌وا خوه پاراستنێ ژ نه‌خۆشیا كۆلێرایێ د ناڤ قوتابخانێن بنه‌ره‌ت دا ل كه‌مپێن ئاواره و پانه‌به‌ران ده‌ستپێكر و گۆت: “ئه‌ڤ جاره ب نیشادانا شانۆگه‌ریان و به‌لاڤكرنا پوسته‌ران رێنمایێن خوه پاراستنێ دێ گه‌هنه قوتابیان”.
ناڤهاتى ئاماژه دا وێ چه‌ندێ ژى كو مه‌ترسیا نه‌خۆشیا كۆلێرایێ ل سه‌رانسه‌رى پارێزگه‌ها دهۆكێ نه‌مایه و چو حاله‌تێن ڤێ نه‌خۆشیێ ل پارێزگه‌هێ په‌یدانه‌بووینه و گۆت: “ئه‌ڤ هه‌وا خوه‌پاراستنێ به‌رده‌وامى دانه ب گه‌هاندنا رێنمایێن پاقژیێ بۆ ئاواره و په‌نابه‌ران، چونكى پاقژى مرۆڤى ژ هه‌مووو نه‌خۆشیان دپارێزیت”.
مامۆستا محسن یوسف، رێڤه‌به‌رێ قوتابخانا عه‌فرین یا بنه‌ره‌ت ل كه‌مپا دۆمیز دیار كر كو گه‌هاندنا رێنمایێن ساخله‌میێ ب ڤى شێوێ سه‌رده‌مانه و ب رێیا نیشادانا شانۆگه‌ریان قوتابى زێده‌تر مفای ژێ وه‌ردگرن.