چۆپى سۆزا خوە ژبیر ناکەت
ئەڤرۆ نیوز:
جارەکا دی سترانبێژا دەنگ خۆش چۆپی فەتاح داکوکی ل سەر وێ چەندێ کر، کو ئەو دێ سۆزا خوە بجهـ ئینیت و ل دەمێ بھێت ئەلبۆمەکا تایبەت کو ھەموو (مەوال) بن بۆ حەزژێکەرێن دەنگێ خوە تۆمارکەت.
ناڤھاتیێ د بەرنامەکێ ھونەری دا گۆت: بۆ دەمێ چەند سالانە ئەڤ داخوازە ب ریێن جۆدا جۆدا ژ من دھێتە کرن و من ژی سۆزا دایە وان کەسان یێن گوھداریا دەنگێ مە دکەن کو ئەلبۆمەکا تایبەت ب مەوالانڤە بۆ وان تۆمار بکەم، و بۆ ڤێ چەندێ مە بەرھەڤیەکا کری، لێ جارێ نەشێم دیاربکەم دێ کەنگی بیت، چونکو ئەو ل دووف کاودانان دمینیت.
ل دۆر نووترین ئەلبۆما خوە ژی گۆت: ئەلبۆم یاحازرە، لێ ھندەک کارێن تەکنیکی یێن ماین، دووڤدا کۆمپانیەک دێ ب کارێ بەلاڤکرنا وێ رابیت، و مە بزاڤا کری ئەڤ کارێ مە یێ جۆدابیت ل گەل یێن بەرێ، و مە پتر مفا ژ تەکنیکا سەردەم وەرگرتیە.
ل دووماھیێ گۆت: ئەز ب خوە چو جاران ل گەل وێ چەندێ نینم کو لەز دکارێن ھونەری دا ب تایبەت ژی سترانان بھێتە کرن، چونکو کارێن بلەز دێ دخاڤ و لاواز بن، ل دووماھیێ ھەر سترانبێژ ب خوە دێ پەشیمان بیت.
