پەرلەمان دێ روونشتنەکا تایبەت ل دۆر کەیسا ژنێن شنگالێ گرێدەت
ئەڤرۆ:
پشتی وەرگرتنا ھەموو دکیۆمێنتان ل دۆر ژنێن ھاتینە رەڤاندن، پەرلەمانێ کوردستانێ دێ روونشتنەکا تایبەت ل دۆر کەیسا ژنێن شنگالێ گرێدەت.
د کومبوونەکێ دا ل ناڤبەرا لژنا داکوکی کرنێ ژ مافێن ژنان و رێکخراوا بزنسس ومێن ل گەل رێڤەبەریا گشتی یا ساخلەمیا پارێزگەھا دھۆکێ کو دوھی 28\10\2014 ھاتیە ئەنجام دان، ئێڤار ئیبراھیم سەرۆکا لژنا ناڤبری دیارکر وان خواستیە پەرلەمانێ کوردستانێ روونشتنەکا تایبەت ب کەیسا ژنێن شنگالێ ڤە گرێدەت، ژ بەر کو د سێ ھەیڤێن بۆری دا راپۆرتەک ژ لایێ لژنا وان ل دۆر رەوشا ژنێن شنگالێ ھاتیە ئامادەکرن و گۆت ئەم پێشبینی دکەین دۆرێن پێنج ھزار ژن و زارۆیان ل ژێر دەستێن داعش دانە و ژ بەر کو ھەر کارێ ل گەل ھاتبیتە کرن ل دووڤ ئارەزویا وان نەبوویە، لەورا ساخلەمی و دەروونیا وان د رەوشەکا ئالوز دایە و دێ داخواز ژ پەرلەمانێ کوردستانێ ھێتە کرن پشتەڤانیا دارایی و جەستەیی بۆ وان ژنان بھێتە کرن.
د. نزار عسمەت رێڤەبەرێ گشتیێ ساخلەمیا پارێزگەھا دھۆکێ دیارکر کو بابەتێ رزگاربوونا ژنان گەلەک یێ ھەستیارە و گۆت ژ ئەنجامێ گەلەک کۆمبوونان بڕیار ھاتیە دان ب باشترین شێوە بەرژوەندیێن وان بھێنە پاراستن و نابیت چو رێکخراو خوە ل ڤی بابەتی بکەنە خودان، چونکو ئەڤە کارێ دەزگایێن حوکمەتێ یە و ھەکە رێکخراو بزانن ژنێن قورتالبووی ھەنە دشێن رێنیشاندەرێن وان بن بۆ رەوانەکرنا وان بۆ دەزگەھێن حوکمەتێ داکو پشتەڤانی و چارەسەریا وان بھێتە کرن.
دیارکر ژی ئەو دێ راپۆرتەکێ ل دۆر رەوشا ساخلەمیا ژنان و چاوانیا چاڤدێری و پشتەڤانیا وان پێشکێشی لژنا داکوکی کرنێ ژ مافێن ژنان کەن داکو یا پێدڤی بھێتە کرن.