ل زاخۆ کەوەک ب بھایەکێ گەلەک گران ھاتە فرۆتن
ئەڤرۆ نیوز:
ل ڕۆژین شەمبیان زیدەتر ژ 400 گەوگیران ژ ھەمو دەڤەرێن کوردستانێ قەست دکەنە مەیدانکا کەوان ل زاخۆ بۆ ھندێ شەڕێ کەوان تێدا بھێتە کرن وھەر کەسەکێ بچێتە دمەیدانا کەوان دا، دێ ھزار دیناران دەت، ل ڤێ مەیدانێ بھایێ فرۆِتنا کەوێ شەڕکەر وخورت، گران دبیت
سەربەست حسێن ئێک ژ کەوگیرێن زاخۆیە بۆ رۆژناما ئەڤرۆ دبێژیت” ل ڕۆژین شەمبیان ، مە چ کار ژی ھەبیت، دڤێت ئەم قەستا ڤێ مەیدانکێ بکەین وکەوگێر ژ ھەولیرێ ودھۆکێ قەستا ڤێ مەیدانکێ دکەن وبھایێ کەوان بلند دبیت ھەتاکو جارەکێ کەوەک ب 4200 دۆلاران ھاتە فرۆتن کو زێدەتر ژ 40 خۆلەکان شەڕ کریە، ئەو کەوێ شەڕی دکەت بھایێ وی بلند دبیت و ھەتا 300 و 400 دۆلاران ژی دھێتە فرۆتن”.
سەربەستی دیارکر” گەلەک جاران کەوەک ل زاخۆ چو کەوێن دی نەشێنێ د شەڕی دا، دێ خودانێ وی قەستا دھوکێ کەت و پاشی ھەولیرێ، ئانکو وەکو بەریکانێ لێ دھێت ودەمێ کەوەک شکەستنێ دئینیت، خودانێ وی گەلەک تورە دبیت، گەلەک جاران یا چێبووی دەمێ کەو دھێتە دۆراندن، خودانێ وی ئێدی نابەتە مالا خوە و دفرۆشیت”.
ڕەمزی حەسەن، کەوگێرە، گوت”خزمەکێ مە یێ چویە ئێرانی دوو کەو ب گوژمێ 3600 دۆلاران یێن کڕین وپشتی شەڕ ل مەیدانکی بێ ھاتیە کرن وکەوێ وی ھاتیە دۆراندن، کەوێن خوە ب 400 دۆلاران فرۆتن”.
ل دۆر دەمێ شەڕێ کەوان، دبێژیت” من کەوێن دیتین ھەتاکو دەمژمێرەکێ ژی شەڕ یێ کری”.
