سه‌رۆك بارزانى: ل شوونا مژوولى دروستكرنا گرفتان بین بۆ هه‌ڤدو بلا هزر ل هه‌له‌بجه بكه‌ین
ئه‌ڤرۆ نیوز:
مه‌سعود بارزانى سه‌رۆكێ هه‌رێما كوردستانێ ئه‌ڤرۆ پێشوازى ل وان ئێكانێن باژێرێ هه‌له‌بجه كر یێن كو هه‌موو كه‌سوكارێن وان د كاره‌ساتا كیمیابارانكرنا هه‌له‌بجه دا شه‌هید بووین.
د دیداره‌كێ دا، ئێكانێن هه‌له‌بجه سه‌رۆك بارزانى دۆر كێشێن خه‌لكێ هه‌له‌بجه و بابه‌تێ به‌رزه‌بوویێن باژێرێ وان و ره‌وشا برینداران و قه‌ره‌بووكرنا خه‌لكى ئاگه‌هدار كر و داخواز ژى كر كو ژ ئالیێ قانوونى ڤه ب رێیا پرۆژه قانوونه‌كێ پێرابوونێن پێدڤى بۆ پاراستنا مافێن كه‌سوكارێن قوربانیێن هه‌له‌بجه بگرنه به‌ر. هه‌روه‌سا سوپاسیا سه‌رۆك بارزانى كر بۆ خزمه‌تكرنا هه‌له‌بجه و داخواز كر كو بارزانى پشته‌ڤانیێ ل ماف و داخوازیێن وان بكه‌ت.
د هه‌مبه‌ر دا، سه‌رۆك بارزانى راگه‌هاند، كو ئه‌و ئێكانه و بێ كه‌سوكار نینن و هه‌موو كوردستانى خووشك و برا و كه‌سوكارێن ئه‌وانه و به‌رچاڤكر كو د خه‌م و ئازار و ئێشێن وان دگه‌هیت و گۆت:(دڤێت ب هه‌موو شیانان بزاڤێ بكه‌ین، ئێدى كاره‌سات ب سه‌ر ملله‌تێ مه دا نه‌هێن).
ل دۆر ره‌وشا ناڤخوه یا هه‌رێمێ ژى سه‌رۆك بارزانى به‌حسێ چاره‌نڤیسێ هه‌ڤپشكێ گه‌لێ كوردستانێ كر، كو دڤێت هه‌موو ئالیه‌ك وانا ژ هه‌له‌بجه و قوربانیدانا وێ وه‌ربگریت و ئێكگرتى بین و ل شوونا وێ چه‌ندێ مژوولى دروستكرنا گرفتان بین بۆ هه‌ڤدو بلا بهێین و هزر ل هه‌له‌بجه بكه‌ین و گۆت:( دوژمن و نه‌یارێن كوردستانێ ب ئێك چاڤ به‌رخوه دده‌نه مه هه‌موویان).
سه‌رۆك بارزانى ل گه‌ل ئالیێن په‌یوه‌ندیدار دێ هه‌موو بزاڤان كه‌ت بۆ ئینانا بێ سه‌روشوونێن كاره‌ستا هه‌له‌بجه و به‌رده‌وام بوون ل سه‌ر چاره‌كرنا برینداران.
