ھژمارەکا بەرپرسان ل سه‌ر گه‌نده‌ليێ دھێنە دەستەسەرکرن
ئەڤرۆ نیوز:
پڕۆسا چاکسازیێ دناڤ حوکمەتا ھەرێما کوردستانێ دا یا دەستپێکری و د قۆناغا ئێکێ دا ھەشت بەرپرسێن حوکمەتا ھەرێما کوردستانێ ژلایێ دادگەھێ ڤە یێن ھاتینە دەستەسەرکرن و پەرلەمانتارەکێ پارتی ژی دبێژیت، چارسەد بادەکێن گەندەلیێ ل دەستەیا دەستپاکیێ (نەزاھێ) نە و بڕیارە ل ڕۆژێن داھاتی ژی ھژمارەکا کەس و بەرپرسان ب تۆمەتا گەندەلیێ بھێنە دەستەسەرکرن.
فەرحان جەوھەر، ئەندامێ پەرلەمانێ کوردستانێ ژ فراکسیۆنا پارتی دیموکراتی کوردستان بۆ ڕۆژناما ئەڤرۆ گۆت” پشتی سەرۆک بارزانی بڕیار ل دۆر چاکسازیێ دناف پارتی دیموکراتی کوردستان و حوکمەتا ھەرێما کوردستانێ دا دەرکری، نوکە پڕۆسا چاکسازیێ یا کەفتیە دوارێ بجھئینانێ دا و ھژمارەکا بادەکان یێن ھاتینە بەرھەڤکرن و چارسەد بادەکێن گەندەلیێ نوکە ل دەستەیا دەستپاکیێ (نەزاھێ) دبەرھەڤن و کار یێ ل سەر دھێتە کرن و ھەتاکو ناڤێ ھژمارەکا تۆمەتباران ب تۆمەتا گەندەلیێ یێن گەھشتیە دادگەھێن ھەرێما کوردستانێ و ل ڕۆژێن بۆری ژی ھژمارەکا کەسان ب تۆمەتا گەندەلیێ ل ھەولێرێ یێن ھاتینە دەستەسەرکرن و ڕاگرتن ژلایێ دادگەھێ ڤە، بڕیارە ل ڕۆژێن داھاتی ژی ھژمارەکا کەس و بەرپرسێن دی ب تۆمەتا گەندەلیێ بھێنە دەستەسەرکرن و ڕگرتن ھەتاکو بچنە بەرامبەر دادگەھێ و ڤەکۆلین دگەلدا دھێتەکرن”.
فەرحانی دیارکر” ھەتا نوکە ھەشت کەس ب تۆمەتا گەندەلیێ یێن ھاتینە دەستەسەرکرن، کو ڕێڤەبەرێن بانکانە ل ھەرێما کوردستانێ، پارێزبەندی بۆ چو کەس و بەرپرسەکی نینە و ھەر کەسێ دەست د گەندەلیێ دا ھەبیت کو دھەر پلە و پۆستەکی دا بیت، دێ چیتە ھەمبەر دادگەھێ و دێ ھێتە دەستەسەرکرن.
ڤی پەرلەمانتارێ پارتی خویاکر ژی ” دەستپێکرنا پڕۆسا چاکسازیێ داخوازا خەلکێ ھەرێما کوردستانێ یە و بڕیارا سەرۆک بارزانی یە، لەوما چو کارڤەدان نینە ھەمبەر حزب و لایەنێن سیاسی، ئەوا دھێتە بەلاڤکرن و گۆتن ژلایێ ھندەک کەس و لایەنان ڤە تشتەکێ شاشە، ئەڤ پڕۆسە یا ب ڕێڤەدچیت و ل دەستپێکێ دناف حوکمەتێدا یا دەستپێکری و بڕیارە ئەڤ پڕۆسا چاکسازیێ دناف ئورگانێن پارتی دیموکراتی کوردستان دا ژی بھێتەکرن”.
ڕۆژناما ئەڤرۆ ل دۆر دەستەسەرکرنا ھەشت ڕێڤەبەرێن بانکان ب تۆمەتا گەندەلیێ، پەیوەندی ب دادوەر موشیر رەشید ل دەستەیا دەستپاکیێ کر و گۆت” ڕاستە ھژمارەکا ڕێڤەبەران ب تۆمەتا گەندەلیێ یێن ھاتینە گازیکرن بۆ ڤەکۆلینێ و یێن ھاتینە دەستەسەرکرن، بەلێ ژ بەر کو دێ کاریگەری ل سەر ب ڕێڤەچوونا بادەکا ڤەکۆلینێ ھەبیت، نەشێم چو داخویانیان ل دۆر دەستەسەرکرنا وان بدەم”.
