مەزنترین بادەکێن گەندەلیێ ل سەر کرێکرنا ئاڤاھیان بۆ حەجیان ئاشکرادبن
ئەڤرۆ نیوز:
جێگرێ سەرۆکێ لژنا دەستپاکیێ (نەزاھێ) ل پەرلەمانێ کوردستانێ دیارکر کو ب فەرمانەکا جڤاتا وەزیران، وەکو نوونەرێ پەرلەمانێ کوردستانێ ل گەل پێنچ کەسان و ب مەبەستا کرێکرنا ئاڤاھیان بۆ حەجیێن کوردستانێ بۆ ئەڤ سالە ل ڕێکەفتی 2/3/2016 ێ، قەستا وەلاتێ سعودی کربوو و ل ڕۆژێن بۆری ڤەگەریاینە کوردستانێ و چەند جە ھاتینە گرتن و د دوڤچوونەکا ھوور دا مەزنترین بادەکێن گەندەلیێ ل سەر کرێکرنا ئاڤاھیان بۆ حەجیان ئاشکرا دبن.
مەلا ئەنس محەمەد شەریف دۆسکی جێگرێ سەرۆکێ لژنا دەستپاکیێ (نەزاھێ) ل پەرلەمانێ کوردستانێ بۆ ڕۆژناما ئەڤرۆ گۆت” فەرمانەک ژ جڤاتا وەزیرێن ھەرێما کوردستانێ دەرکەفت بوو ب مەبەستا سەرەدانا وەلاتێ عەرەبستانا سعودیێ بکەت ب مەرەما دیتنا جھێ ڤەحەواندنا حەجیێن ھەرێما کوردستانێ، وەکو نوونەرێ پەرلەمانێ کوردستانێ ل گەل ڤێ لژنێ بووم کو ل ھەیڤا ئادارێ دەست ب کارێ خوە کر و ب دو قۆناغان، ھەلبژارتنا جھان ب دابینکرنا فورمەکێ ھاتبوو دانان و دیسا چەندین پێزانین و سالۆخەتێن جھێ دھێتە دابینکرن تێدا ھەبوون وەکو نێزیکبوونا حەرەمێ ژ جھی و نێزیکبوونا بازاری، تێ پەربوونا جادا و پشتی (25) جە ھاتینە دەست نیشانکرن، (4) جە ھاتینە دەست نیشانکرن بۆ ڤەحەواندنا حەجیێن کوردستانێ بۆ ئەڤ سالە کو ئەڤ جھە نێزیکی حەرەمێ نە ب دووراتیا (20) خۆلەکان حەجی دشێت ب پیان بگەھیت و ب ترومبێلێ ب (5) خۆلەکان، دیسان چەند خزمەتگوزاری ژی ل سەر ھاتنە زێدەکرن کو پێشتر ئەو خزمەتگوزاری نەھاتبوونە کرن بۆ حەجیان، مێھڤانداری د ھەر ژورەکێ دا ھەبیت وەکو چا و قەھوە، ھەر حەجیەک ڕۆژانە دێ ھەشت بتلێن ئاڤێ، دیسا ترومبێل بۆ ھاتنوچوونا حەجیان و تایبەت ئەوێن پەککەفتی ھاتینە دابینکرن بۆ ھاتنوچوونێ، دیسا مە ل سەر سەپاندیە کو کەنالێن کوردی ل ھەر چار جھان بھێنە پەخشکرن کو حەجیان ئاگەە ژ کاودانێن کوردستانێ ھەبیت و دیسا مفای ژ خزمەتگوزاریێن ئەنترنێتی ب بینیت”.
مەلا ئەنەسی دیارکر کو ئاریشا سالانە حەجیێن کوردستانێ دکەفتنە تێدا خوارن بوو، چونکی خوارنا کوردستانێ ل گەل یا سعودیێ جوداھی ھەیە و ژبەر ڤێ چەندێ ژی مە خوارنگەھەکا تورکی بۆ چێکرنا خوارنێن کوردی و دابینکرنا خوارنێ ل ھەرسێ دانا دەستنیشانکر، دیسا خودانێ خوارنگەھێ ھاتیە کوردستانێ بۆ دیتنا خوارنێن کوردستانێ و ئەو جۆرێن خوارنا دھێتە بکارئینان دا ھەمان جۆرێن خوارنا کوردستانێ ل سعودیێ بھێتە دابینکرن، دیسا دێ ل سەر چەندین ترومبێلان ھێتە نڤیسین کو حەجیێن کوردستانێ نە، ئەڤ جھە ھەموو چار ستێرەیی نە، سەرەرایی ئەڤی جھێ پێشکەفتی و ب خزمەتگوزاریێن باش، ملیۆن دۆلار بھا جوداھی ھەیە ژ بھایێ سالا بوری. ”
ئەندامێ لژنا دەستپاکیێ ل پەرلەمانێ کوردستانێ ئاشکراکر کو دووڤچوونەکا ھوور من ل بابەتی کریە کو ئەو جھێن سالا بۆری ھاتینە گرتن و ل دووڤ ئاستێ وان جھان و یێن دەور وبەر نەبوو، حەجی ژ چار ھزار و 500 ریالان زێدەتر بدەت، ئەوان ب (5600) ریالان گرتیە، ھەموو حەجی (3750) بووینە، ملیۆنەک و 100 ھزار دۆلار زێدە چوویە، ئەڤ سالە ملیۆن دۆلار جوداھی د ناڤبەرا بھایێن مە گرتین و یێن سالا بۆری ھاتینە گرتن و ئەڤە دکەڤیتە خانا گەندەلیێ دا و ب ڤێ مەبەستێ مە نڤیسارەک دایە دەستەیا دەستپاکیێ ل ھەرێما کوردستانێ و چاڤدێریا دارایی و جڤاتا وەزیران کو دووڤچوونەکا ھوور ل سەر بابەتی بکەن “.
مەلا ئەنس زێدەتر گۆت” تیرۆپشکا ناڤێن حەجیان بۆ ئەڤ سالە یا ھاتیە کرن و ئێدی ئەو ناڤێن مای ناھێنە کێشان و دێ میکانیزمەکا نوو ھەبیت بۆ تۆمارکرنا ناڤێن حەجیان و ئالیەتا ھەلبژارتنا حەجیان و چەندین ڕێنمایێن نووتر دێ ھەبن. ”
ناڤبری ھێشتا گۆت” ل سالا بۆری لژنەکا شەش کەسی ھاتبوو پێکئینان و لژنە ب سەرۆکاتیا وەزیرێ ئەوقافێ ب خوە بوویە و ل گەل دەستەیا حەجێ و ئەڤێ لژنێ ئەڤ جھە دەستنیشانکربوون بۆ حەجیان”.
دیسا گۆت” بھایێ ئەڤ سالە بۆ ھەر حەجیەکی 4760 ریالن و ژ سەرجەمێ 3750 حەجیان دبیتە 17 ملیۆن 850 ریال، ل دووڤ بھایێ دۆلاری ھەر حەجیەک 1269 دۆلاران بۆ ھەر تەختەکی دێ دەت، گرێبەستا ئەڤ سالە ھاتیە گرێدان ب چار ملیۆن و 760 ھزار دۆلاران، پشتی مە دووڤچوون ل سەر سالا بۆری کری، بڕیار ھاتە دان کو نابیت بۆ ھەر تەختەکی وی جھی ژ 4500 ریالان ببۆریت، ئەوان ب 5600 ریالان گرت بوو، ئانکو 1493 دۆلاران، جوداھیەکا مەزنە ل گەل جھێ دروست و گرێبەستا ھاتیە ئیمزاکرن کو ملیۆنەک و 100 ھزار دۆلار جوداھی ھەیە. ”
مەلا ئەنەسی خویاکر ژی”دووڤچوون و بەلگە و گرێبەست یێن ھەین و ئەڤە پار ھاتینە دەستنیشانکرن، بەلێ یێن سالێن پێشتر ھەمان جە ب دەست مە نەکەفتینە، سالا بۆری 3750 حەجی ھەموو دئێک ئاڤاھی ڤەبوون و گەلەک قەرەبالغ بوو و ئەڤ سالە ل سەر چار ئاڤاھیان یێن ھاتینە دابەشکرن و ئەو کێشا سالا بۆری ھاتیە چارەسەرکرن و خزمەتێن ئەڤ سالە بۆ حەجیان ھاتینە دابینکرن د چو سالان دا بۆ نەھاتینە کرن”.
