پێشمه‌رگه د پێشڤه‌چوونێ دايه و ترۆمبێله‌كا مينرێژكرى ژناڤبر
ئه‌ڤرۆ نيوز:
ئه‌ڤرۆ سپێدێ پرۆسا رزگاركرنا 9 گۆندان ب درێژاهيا 40 كيلۆمه‌تران ل سنورێ ده‌ڤه‌رێن خازر بۆ چيايێ زه‌ركى ده‌سپێكر و هێزێن پێشمه‌رگه‌ى يێ د پێشڤه‌چوونێ دا.
په‌يامنێرێ ئه‌ڤرۆ نيوز ل به‌ره‌يێن شه‌رى، ئۆمێد وه‌لاتى، راگه‌هاند كو ل به‌ده‌نا بچووك چه‌كدارێن داعش ب ترۆمبێله‌كا مينرێژكرى هێرش كره سه‌ر هێزێن پێشمه‌رگه‌ى، به‌لێ خۆشبه‌ختانه ژ لايێ فه‌رماندا هێزا پشته‌ڤانيا ئێك هاتنه ژناڤبرن.
ژ لايه‌كێ دى ڤه دا زانين كو هێزێن پێشمه‌رگه‌ى سپێدێ به‌ره‌يێن خوه ڤه‌كرينه و د پێشڤه‌چوونێ دانه و زێده‌ترى پێنج كيلۆمه‌تران هه‌تا نوكه برينه و چو به‌ره‌ڤانيه‌كا به‌رچاڤ نه‌هاتيه كرن و دهێته پێشبينيكرن د ماوه‌كێ كێم دا هه‌ر ئێك ژ گۆندێن به‌ده‌نا بچووك و به‌ده‌نا مه‌زن بهێنه كونترۆلكرن.
فه‌رماندا گشتى يا هێزێن چه‌كدارێن هه‌رێما كوردستانێ به‌ياننامه‌ك به‌لاڤكر و تێدا راگه‌هاند كو نێزيكى ده‌مژمێر 6:00ى 17ى چريا ئێكێ 2016، پرۆه‌سه‌يه‌كا به‌رفره‌ها هێزا پێشمه‌رگه‌ى ل خازرى ل رۆژهه‌لاتا مووسل، ب هه‌ڤكاريا هێزێن سۆپايێ عيراقێ ل گوێر و گه‌ياره ل باشوورێ مووسل ده‌سپێكر وه‌كو قووناغا ئێكێ يا رزگاركرنا مووسل ژ ده‌ستێ تيرۆرستێن داعش.
دايه زانين ژى كو د ڤێ ئۆپه‌راسيۆنێ دا زێده‌تر ژ چار هزار پێشمه‌رگه دێ رابن ب پاقژكرنا گۆندێن ده‌وروبه‌رێن ده‌ڤه‌را خازرى ژ تيرۆرستێن داعش ب گۆره‌ى وێ رێكه‌فتنا د ناڤبه‌را حوكمه‌تا هه‌رێما و حوكمه‌تا عيراقا فيدرال دا هه‌ى.
هه‌ر د ڤێ به‌ياننامێ دا ئاماژه دايه وێ چه‌ندێ ل 16ى چريا ئێكێ هێزێن هه‌ڤپه‌يمانان بۆردۆمانا وان ده‌ڤه‌ران كريه و بڕياره د به‌رده‌وام بن د هاريكاريكرنا هێزێن پێشمه‌رگه‌ى دا.