چه‌ند جوتیارێن كوردستانێ ل هوله‌ندانه
ئه‌ڤرۆ نیوز، ره‌وان نهێلى:
شانده‌كێ جوتیارێن باشوورێ كوردستانێ بۆ وه‌رگرتنا پێزانینان ل دۆر ئه‌زموونا چاندن و به‌رهه‌مێ پتاپان ماوێ دو رۆژانه ل سه‌ر ئه‌ركێ كۆمپانیا agro plant چووینه هۆله‌ندا و دێ بۆ ماوێ 10 رۆژان ل وێرێ مینن.
حسێن عوسمان عارف نوونه‌رێ كۆمپانیا ئه‌گرۆپلانت ل باشوورێ كوردستانێ و عیراقێ بۆ ئه‌ڤرۆ دیاركر كو ئه‌و هه‌ر سال چه‌ندین جوتیارێن باشوورێ كوردستانێ دبه‌نه وه‌لاتێ هوله‌ندا ب مه‌ره‌ما وێ یه‌كێ ئه‌و پێزانینان ل دۆر توڤێ پتاتا یێ ل هوله‌ندا دهێته چاندن وه‌ربگرن و باشترین توڤ بۆ خوه هه‌لبژێرین و ل كوردستانێ به‌رهه‌م بینن و گۆت” ماوێ دو رۆژانه مه 11 جوتیارێن هه‌رێما كوردستانێ برینه وه‌لاتێ هوله‌ندا چونكه نوكه وه‌رزێ ده‌رئینانا به‌رهه‌مێ پتاتایه ل هوله‌ندا بۆ وێ یه‌كێ بۆ خوه مفاى ژێ وه‌ربگرن”.
حسێن عوسمان عارف نوونه‌رێ كۆمپانیا ئه‌گرۆپلانت ل باشوورێ كوردستانێ و عیراقێ كو كۆمپانیا وان توڤێ پتاتا بۆ 51 ده‌وله‌تان دهنێریت.
مه‌روان عومه‌ر خورشید وه‌كو جوتیاره‌كێ پارێزگه‌ها دهۆكێ و به‌شداربوو ل گه‌ل شاندێ جوتیارێن كوردستانێ كو ل سه‌ر ئه‌ركێ كۆمپانیا ئه‌گرۆ پلانت چوویه هوله‌ندا بۆ ئه‌ڤرۆ نیوز گۆت” كۆمپانیا ئه‌گرۆ پلانت به‌رده‌وام بزاڤ كرینه باشترین توڤێ پتاتا بۆ جوتیاران هه‌لبژێریت و نوكه سێ توڤان سه‌ركه‌فتن ئینایه ئه‌وژى توڤێ ئه‌كترێس و دیدو و بلۆ، بۆ نموونه ل سالا 2009 من 150 كلیو ل پارێزگه‌ها دهۆكێ چاندن و پشتى سه‌ركه‌فتن ئیناى نوكه جوتیار سالانه داخوازا دو هزار ته‌نان دكه‌ن بۆ بهێنه دابینكرن”.
مه‌روان عومه‌ر خورشید دیاركر ئه‌گه‌ر پشته‌ڤانى هه‌بیت و نه‌هێلن پتات ل ده‌رڤه بهێته كوردستانێ وان شیان هه‌نه ب تنێ ل كوردستانێ پتاتا بۆ عیراق و وه‌لاتێ كوێت و سعودیه دابین كه‌ن و گۆت” مخابن پتاتا ئیرانى و توركى و پاكستان دهێته كوردستانێ و ئاریشه بۆ به‌رهه‌مێ مه دورست دبیت”.
مه‌روان عومه‌ر خورشید ئاماژه ب وێ یه‌كێ ژى كر پشتى توڤێ ئه‌كترێس سه‌ركه‌فتن ئیناى، نوكه ئه‌و سالانه دو هزار ته‌نا توڤێ پتاتا دچینیت.
