بزاڤه‌كا داعش بۆ شكاندنا ئابلۆقه‌يا سه‌ر باشيك سه‌ر نه‌گرت
ئه‌ڤرۆ نيوز:
فه‌رمانده‌كێ پێشمه‌رگه‌ى راگه‌هاند كو داعش بۆ شكاندنا ئابلۆقا ل سه‌ر باشيك شڤێدى هێرش كره سه‌ر سه‌نگه‌رێن پێشمه‌رگه‌ى، به‌لێ تووشى شكه‌ستنێ بوون.
ئه‌ڤى فه‌رماندێ پێشمه‌رگه‌ى ژ فه‌رماندا هه‌لگۆرد بۆ ئه‌ڤرۆ نيوز گۆت: “شڤێدى هه‌ينى 28ى چريا ئێكێ 2016 داعش ب مه‌ره‌ما شكاندنا ئه‌و ئابلۆقه‌يا ل سه‌ر هێرش كره سه‌ر سه‌نگه‌رێن پێشمه‌رگه‌ى، به‌لێ تووشى شكه‌ستنێ بوون و پێشمه‌رگه ب سلامه‌تن”.
نێزيكى حه‌فتيه‌كێ يه، باشيك ژ لايێ هه‌ر ئێك ژ هێزا پياده يا سۆران و فه‌رمانده‌يا هه‌لگۆرد و ليوا پێنج يا زێره‌ڤانى هاتيه ئابلۆقه‌دان و چو رێيه‌ك ل هه‌مبه‌ر وان نينه چ هاريكارى بگه‌هنێ و چ ژى بشێن خوه رزگار بكه‌ن.
د كۆنگره‌كێ رۆژنامه‌ڤانى دا ل 27ى چريا ئێكێ 2016 مه‌سعود بارزانى سه‌رۆكێ هه‌رێما كوردستانێ راگه‌هاند بوو كو ژ لايێ له‌شكرى ڤه باشيك يا كه‌فتيه ده‌ستێن پێشمه‌رگه‌ى، به‌لێ دا كو ب كێمترين زيان وى باژێرى بێخنه بن ده‌ستێ خوه، هێشتا نه‌چووينه تێدا.