بەنکا ناڤەندی دێ لقێن خوە لھەرێما کوردستانێ ڤەکەت

ئه‌ڤرۆ نيوز:

ئەندامەکێ لیژنا دارایی و وەبەرھێنانێ ل جڤاتا نونەرێن عێراقێ تەکەسکر، ئاریشەیێن بەنکی دناڤبەرا حوکمەتا ھەرێما کوردستانێ و بەنکا ناڤەندا عێراقێ ھاتینە چارەسەرکرن و بڕیارە ل ھەیڤێن داھاتی لقێن بەنکا ناڤەندی لھەرێما کوردستانێ بھێنە ڤەکرن، ھەروەسا دیارکر، فەرمانبەرێن ھەرێمێ یێن سەر ب عێراقێ ڤە دێ مفاداربن ل قەڕەکێ دەھە ملیۆن دیناری ل بەنکا ناڤەندیا عێراقێ.
مەسعود حەیدەر، ئەندامێ لژنا دارایی و وەبەرھێنانێ ل جڤاتا نونەرێن عێراقێ بۆ رۆژناما ئەڤرۆ گۆت” ھەرێما کوردستانێ و عێراقێ لسەر کەرتێ بەنکێ ئاریشە ھەیە، ئاریشە ئەڤەبویە ھەتا نوکە بەنکا ناڤەندیا عێراقێ چو لقێن خوە لھەرێما کوردستانێ نەبووینە، راستە دو بەنکێن ناڤەندی لھەرێما کوردستانێ ھەنە بەلێ ئەو بەنکە سەر ب وەزارەتا دارایی و ئابووریا ھەرێما کوردستانێ نە چو پەیوەندی ب بەنکا ناڤەندیا عێراقێ ڤە نینە، چونکە ل دەولەتا فیدرالدا سیاسەتا نەغدی ل ئێک بەنکدایە ئەوژی بەنکا فیدراڵ ئانکۆ مەرکەزیە، گورەی زانیاریێن من ھەی ئەف ئاریشە دناڤبەرا ھەرێم و بەغدا ھاتیە چارەسەرکرن و بڕیارە ل ھەیڤێن داھاتی، لقێن بەنکا ناڤەندی ل ھەولێرێ بھێنە ڤەکرن و چەند کۆمبوونەک دناڤبەرا حوکمەتا ھەرێمێ و بەنکا ناڤەندی ھاتینە کرن بۆڤێ مەرەمێ، ھەبوونا لقێن بەنکا ناڤەندی دێ مفایێن زۆر ھەبن بۆ ھەرێما کوردستانێ، ژبەرکو دێ سیاسەتا بەنکی گرێدای بەنکا ناڤەندی بن و دڤێت پێگیریێ پێڤە بکەن، ھەتا دێ کەرتێ ڤەگوھاستنا پارەی ب رێیا بەنکا ناڤەندیڤە ل ھەولێرێ بیت.
مەسعود حەیدەر گۆتژی” ب ئەگەرێ نەبوونا لقێن بەنکا رەشید و رافیدەین و بەنکا ناڤەندی، حوکمەتا عێراقێ باوەری ب بەنکێن ھەرێمێ نەبوویە و فەرمانبەرێن ھەرێما کوردستانێ ل قەڕێ 10 ملیۆن دیناری ھاتینە بێ بەھرکرن، نوکە رێنمایێ بۆ قەڕێ دەھە ملیۆن ژلایێ بەنکا ناڤەندیا عێراقێ ھاتینە دەرکرن و ئەو فەرمانبەرێن ھەرێمێ یێن سەرب عێراقێ وەکی زێرەڤانێن سنوری و پاسپۆرت و کارتا زانیاری و ھندەک دەزگەھێن دی دێ مفاداربن لڤی قەڕی، فەرمانبەرێن ھەرێمێ ب ئەگەرێ نەبوونا لقێن بەنکا ناڤەندی نەشێن مفادار ببن، ئەگەر لقێن بەنکا ناڤەندی ژی ھاتنە ڤەکرن و مووچێ فەرمانبەرێن ھەرێمێ وەکی بەرێ لێھات ئەڤە بێگومان دێ مفاداربن، چونکە نوکە بەنکا ناڤەندی گەرەنتی دڤێت ئەگەر فەرمابنەرێن ھەرێمێ مووچەی وەرنەگرن دێ چاوا قەڕی ل بەنکا ناڤەندی وەرگرن، ھیڤیدارین ئەف ئاریشەیێن بەنکی بھێنە چارەسەرکرن و فەرمانبەرێن ھەرێما کوردستانێ ژی مفاداربن لڤان مفایێن بەنکی.

کۆمێنتا تە