یان گۆڕان یان نهمان؟!
وهك كهسهك ل ڤى وهلاتى دژیم و تا رادهكێ چاڤدێریا روودان و پێشهاتێن سیاسی و ئابوورى و هندهك لایهنێن دى یین ژیانێ دكهم. بۆ من یا سهیر و تشتهكێ نوو نهبوو ئهو ئاخفتن و لێدوانێن جێگرێ سهرۆكێ پهرلهمانێ عیراقێ ژ لیستا گۆڕان (ئارام شێخ محهمهد) دهمێ وهك ههر جار خوه دكهنه خودانێن جهماوهرى و ب ناڤێ جهماوهرى دئاخفن. ئاخفتنێن ئارم شێخ محهمهدى كو ل رۆژا (12/11/2016) بۆ ژمارهكا مامۆستایێن كو ل پارێزگهها سلێمانیێ بایكۆتا پرۆسا خواندنێ كرى ژ ڤالاتیهكێ نههاتینه. كو بۆ پهرلهمانێ عیراقی بهحسێ پرۆژهكى نوو دكهت و دخوازیت ئێدى حكوومهتا عیراقێ راستهوخۆ رهفتارێ دگهل پارێزگههان بكهت و ئێدى وهك حكوومهتا ناڤهندى و حكوومهتا ههرێمێ كار نههێته كرن.
ب راستى ژى ئهڤ ئاخفتنه درێژی پێدانا وان بزاڤ و سهرهدان و كۆمبوونێن جودا جودایه یێن كو د ناڤبهرا بزاڤا گۆڕان و بالێ هێرو خانێ دا دگهل دوژمن و نهحهزێن ملهتێ كورد ل بهغداد هاتینه كرن. سهرهدانا سهرۆكێ لیستا دهولهتا قانوونێ (نورى المالكى) بۆ سلێمانیێ و ئهو پێشوازیا گهرما لێ هاتیه كرن و كۆمبوونێن تایبهت دگهل ئێكهتى نشتیمانى كوردستان و بزاڤا گۆڕان و هندهك لایهنێن دى ل سلێمانیێ كرین، پاشان سهرهدانا (حهنان فهتلاوى) سهرۆكا لیستا (الاراده) بۆ سلێمانیێ و ههلبجه و دیسان پێشوازیهكا گهرم لێ هاتیه كرن و چهندین كۆمبوون و دیدارێن تایبهت دگهل گۆڕان و هێرو خانێ كرن. دیسان سهرهدانا ژمارهكا كهساتیێن سونه مهزههب، وهك سهلیم جبورى سهرۆكێ پهرلهمانێ عیراقێ كو ب سونهیێ مالكى دهێته نیاسین بۆ سلێمانیێ. ژلایهكێ دی ڤه سهرهدانا شاندێن ئێكهتیێ بالێ هێرو خانێ بۆ بهغداد و كۆمبوونێن فراكسیۆنێن گۆڕان و ئێكهتیێ ل پهرلهمانێ عیراقێ دگهل چهندین لایهنێن كو بهرنیاسن ب دژاتیا وان بۆ مللهتێ كورد ب شێوهكێ گشتى و پارتى دیموكراتى كوردستان ب شێوهكێ تایبهت. ههروهسا دیدارێن هندهك پهرلهمانتهرێن گۆڕان و ئێكهتى ل بهغداد وهك (سروا عهبدولواحد و هشیار عهبدولا/گۆڕان و ئالا تالهبانى/ ئێكهتى بالێ هێرو خانێ و چهندین پهرلهمانتهرێن دى) دگهل كهنالێن راگههاندنێ وهك (ئافاق، مهسار، بیلادی، عههد و سومهریه) و چهندین كهنالێن دى كو ب سهر دهولهتا قانوونێ ڤهنه یان نێزیكن ژ مالكى كو بێ وژدانانه هێرش و ئاخفتنێن بێ بنهما دژى حكوومهتا ههرێما كوردستانێ و پارتى دیموكراتى كوردستان كرینه و وهكو ئهندامێن دهولهتا قانوونێ خوه دیار دكهن.
ژ ئالیهكێ دى ڤه ڤان لایهنان دهستهكێ بلندا د ئیقالهكرنا (هشیار زێبارى) وهزیرێ دارایی یێ عیراقێ دا ههبوویه. ئهڤ كاره ههمى دهێنهكرن و دبهردهوامن بۆ هندێ كو ئێدى ههرێما كوردستانێ وهك قهبارهكێ سیاسی نهمینیت. ئێدى بهحس نههێتهكرن كو ل عیراقێ ههرێمهك ههیه ب ناڤێ كوردستانێ!
عزهت شابهندهر، كو ئێكه ژ كهساتیێن عیراقى یێن بهرنیاس و چهندین سالان سهركردهكێ دهولهتا قانوونێ بوو، لێ نوكه وهك كهسهكێ سهربخۆ كار دكهت دبێژیت (نوكه كارهكێ مهزن دهێته كرن كو عیراق ب شێوهكێ ستوونى ( عمودى) بهێته پارچه كرن یان ئهو ژى ب ڤى رهنگى، سلێمانى، كهركووك، دیالا، واست، میسان، بهسره و دگهل نیڤا بهغدا، كو ببنه ههرێمهكا سهر ب ئیرانێ ڤه كو ئیران تێدا بالا دهست بیت و مالكى حوكمران بیت، ئانكو مالكی سهرۆكێ وێ ههرێمێ بیت و لایێ دى یێ عیراقێ پێك بهێت ژ دهۆك، ههولێر، نهینهوا، سهلاحهدین، ئهنبار و سهماوه، ببنه ههرێمهك كو ناهێنه بن بارێ ئیرانێ، ئانكو ب ڤى شێوهى عیراق بهێته پارڤهكرن و ئێدى هیچ تشتهك نهمینیت ب ناڤێ كوردستان و ئهو ههمى خهبات و قوربانیدانا ملهتێ كورد و خوینا هاتیه رێشتن و ئهو گهنج و خۆرتێن ملهتێ كورد بووینه قوربانى ئاخا ڤى وهلاتى بهێنه ژبیركرن و ئهو شۆرهشێن كوردى ئهوێن ژ پێخهمهت دۆزا رهوایا گهلێ كوردستانێ هاتینهكرن ب سهناهى ژناڤ بچیت و حزب و لایهنێن كورد و كوردستانى ب ڤى كارێ خیانهتكارى راببن. ژبهر ڤێ چهندێ پێشنیارا (ئارام شێخ محهمهد و ئهو نهه پهرلهمانتارێن دهوروبهرێن وى ژ ڤالاتیێ نههاتیه. كارهكێ مهزن بۆ ڤێ چهندێ هاتیه كرن و یێ بهردهوامه.
بلندكرنا كارتێن سۆر ل ناڤ خوه پیشاندانا ژمارهكا مامۆستایان. درووشمێن ب ناڤێ (عهبادى) و پهسنا وى ههمى دچنه د ڤێ خانێ دا.
ئهگهر مرۆڤ ژ نێزیك نێرینهكێ ل سهربۆرا بزاڤا گۆڕان و سهرێن ڤێ بزاڤێ بكهت، كانێ وان د ماوێ چێبوونا خوه دا و تا نوكه چ گۆتیه و چ كریه دێ بۆ مرۆڤى وێنهكێ راست و زهلال دیار بیت. و پشتى ژ ئهگهرێ وێ پیلانا مهزنا سهرۆكێ پهرلهمانى كرى و شكهستن خاری و ژ حكوومهت و پهرلهمانێ كوردستانێ هاتینه دوورخستن. پاشى رێكهفتن ل گهل ئێكهتى نشتیمانى كوردستان كرى كو نهشیاینه ئێك خالا ڤێ رێكهفتنێ بجه بینن و نهشیاینه پارێزگارهكى بۆ سلێمانیێ بدانن و رۆژ بۆ رۆژێ راستیا ڤان كهسان دیار دبیت ئێدى ب تنێ ماینه، ههتا كو نهشێن بریارا خوه ڤهكێشانێ ژ حكوومهتێ بدهن. و ههمى هه ولێن وان بو هندێ نه كو ئێدى ههمى سهربورا كوردستانێ ژناڤ ببهن. ئهگهر نه مانێ (ئارام شێخ محهمهد) باش دزانیت كو دستوورێ عیراقێ ئهوێ ههمى ملهتێ عیراقێ دهنگ بۆ داى، كو دان ب ههرێما كوردستانێ دایه و د ڤى دستوورى دا چهندین برگه و خال ههنه دیار كریه كانێ دێ چهوا حكوومهتا ناڤهندى رهفتارێ ل گهل ههرێما كوردستانێ كهت و دێ چهوا رهفتارێ ل گهل وان پارێزگههان كهت، كو نه ب سهر ههرێمێ ڤهنه. ژبۆ بجهئینانا پێشنیارا ئارامى دڤێت دستوور بهێته گوهۆرین و دڤێت ههرێم وهك قهبارهكێ سیاسى واقعى نهمینیت و دڤێت ههمى ئهو دهستكهفتێن كوردستانێ بدهست خوهڤه ئیناین ببنه قوربانى ( بزاڤا گۆڕان) و سهرێن ڤێ بزاڤێ!.
كوردستان و سهرۆكێ كوردستانێ ئهڤرۆكه ل ههمى جیهانێ وهك سهرۆك وهلات پێشوازى لێ دهێتهكرن، ئهڤرۆكه ناڤێ كوردستانێ و ناڤێ قارهمانێن پێشمهرگه ل سهر زارێ ههركهسهكیه. ناڤێ كوردستانێ و سهرۆك بازرانى و پێشمهرگهى مانشێتێن ههمى رۆژنامه و كهنال و میدیایێن جیهانێ یه ئێدى دۆزا ملهتێ كورد بهر ب پاشڤه نازڤریت و كوردستانێ ئهڤرۆكه ژ ههر دهمهكێ دى پتر پێدڤى ب ئێكرێزیێ. ئهڤرۆكه دۆزا ملهتێ كورد گههشتیه قووناغێن گهلهك پێشكهفتى و هێدى هێدى ئهم یێ بهر ب سهربخۆیێ ڤه دچین، ئاسوویێن رۆن ل پێشیا كوردستانێ ههنه. سلێمانى باژێرێ كوردایهتى و بهرخودانێ یه و گۆڕان و سهرێن گۆڕان نهشێن ژ كوردستانێ ڤهقهتینن. ملهتێ كورد چهندین ساله خهباتێ دكهت ژ پێخهمهتى زڤڕاندنا كهركووكێ و دهڤهرێن دى یێن كوردستانێ، ئهڤجا چهوا ئهڤرۆكه گۆڕان دخوازیت سلێمانیێ ژدهست بدهین، لهورا گۆڕان یا ههناسێَن خوه یێن دووماهیێ دههلكێشیت و یا ئامادهیه ههمى تشتهكى بكهت ژ پێخهمهتى مانا خوه.
