نەتەوێن ھەڤگرتی: ئێک ملیۆن مرۆڤ ل سووریێ ھاتینە دۆرپێچ کرن
ئەڤرۆ نيوز:
رێکخراوا مافێ مرۆڤی یا سەر ب نەتەوێن ھەڤگرتی دوھی راپۆرتەک ل دۆر رەوشا ژیانا خەلکێ سووریێ بەلاڤ کر و د راپۆرتێ دا ھاتیە دیار کرن کو ژ بەر شەرێ ل سووریێ و دۆرپێچا ل سەر چەندین باژێران ب تایبەتی ژی حەلەبێ مەترسیێ مرنێ ل سەر ئێک ملیۆن مرۆڤان یا ھەی، ئانکۆ ئێک ملیۆن مرۆڤ نھا ل سووریێ برسی نە و ھەروەسا پێدڤیا وان ب دەرمان و ھاریکاریێن سەرەتایی یێن ژیانێ ھەنە، لێ ژ بەر شەری و ب تایبەتی ژی ھێرشێن بەردەوام یێن فرۆکێن رژێما ئەسەدی ئەم نەشێین ھاریکاریێن مرۆڤی بگەھیننە وان دەڤەران.
رێکخراوا مافێ مرۆڤی د بەردەوامیا راپۆرتا خوە دا دیار کریە کو ژ بەر شەری ھەتا نھا ب سەد ھزاران کەسێن مەدەنی ھاتینە کوشتن، لێ بەردەوامیا شەری و نەبوونا رەوشەکا ئاسایی وەسا کریە کو تیمێن مە نەشێن سەرەدانا دەڤەرێن شەری بکەن دا کو ئەم ژی بشێین ئامارێن دروست بۆ رایا گشتی ئاشکرا کەین. لێ د ناڤا کەسێن کو ل سووریێ ھاتینە کوشتن ھژمارەکا بەرچاڤ یا ژن و زارۆیان ھەیە، ھەروەسا گەلەک کەس ژی ژ بەر برسیبوونێ و ھەروەسا نەخوەشیان جانێ خوە ژ دەست داینە.
د پشکەکا دی یا راپۆرتێ دا ئەو یەک ژی ھاتیە دیار کرن کو نەخوەشی ب رەنگەکێ بەربەلاڤ ل دەڤەرێن شەری ل سووریێ بەلاڤ بووینە و دەرمان ژی ناگەھیتە دەستێ خەلکی، ژ بەر ھندێ ژی رۆژانە ژ بەر نەخوەشیان ژن و زارۆ و کەسێن دانعەمر جانێ خوە ژ دەست ددەن و خوارن ژی ناگەھیتە دەستێ وان و ئەو یەک ژی کارەسات و شەرمەکا مەزنە بۆ ھەموو مرۆڤاتیێ.
ل گۆر راپۆرتا رێکخراوا مافێ مرۆڤی یا سەر ب نەتەوێن ھەڤگرتی نێزیکی ئێک ملیۆن مرۆڤ ل سووریێ ژ بەر رەوشا نھا یا شەری د مەترسیێ دانە و ھەکە ھاریکاریا وان نەھێتە کرن دێ رۆژ ب رۆژێ رێژا مرنا مرۆڤان ل سووریێ زێدە بیت.