ئەڤ سالە دێ سیستەمێ بەلاڤکرنا کارەبا نشتيمانى دێ بيته ئه‌مپێر
ئه‌ڤرۆ نيوز:
وەزارەتا کارەبێ ل بەرە ئەڤ سالە پڕۆژەکێ نوو بۆ رەوشا کارەبێ بجهـ بینیت و پەیڤدارێ وەزارەتێ ژی دبێژیت، دێ گھۆڕین ب سەر بەلاڤکرنا کارەبێ دا ھێنەکرن و ل گۆر وەرزی دێ کارەب ب سەر وەلاتیان دا ھێتە بەلاڤکرن.
محەمەد ئەمین ھەورامی، پەیڤدارێ وەزارەتا کارەبا ھەرێما کوردستانێ بۆ رۆژناما ئەڤرۆ گۆت “ژبلی ئەڤ پڕۆژەیێن بۆ چێکرنا رەوشا کارەبێ دھێنە پێکێشکرن و بجھئینان، وەزارەتا کارەبێ پڕۆژەیەکێ نوو بۆ باشترکرنا رەوشا کارەبێ ھەیە و ئەڤ سالە دێ پڕۆژێ خوە ئێخیتە د وارێ بجھئینانێ دا، ئەگەر ئەڤ پڕۆژێ وەزارەتا کارەبێ ب دروستی ھاتە بجھئینان دێ رەوشا کارەبێ ل ھەرێما کوردستانێ زۆر باشتر بیت و نابێژم دێ ب ئێکجاری ھێتە چارەسەرکرن، بەلێ دێ دەمژمێرێن زۆرتر کارین کارەبا نشتیمانی بدەینە وەلاتیان”.
ھەورامی گۆت ژی “پڕۆژێ وەزارەتێ ئەوە کو جۆزەکێ کارەبێ بۆ ھەر مالەکێ بھێتە دانان و ھەر کەس ب کەیفا خوە کارەبێ نابەت، بەلکو دێ کارەب بۆ مالا ھێتە کۆنتڕۆلکرن، ھەر وەرزەکی چەند کارەبا ھەبیت دێ ل سەر وەلاتیان ھێتە بەلاڤکرن، چونکی ئەم دشێین ئەگەر وەرزێ ھاڤینێ کارەب یا کێم بوو ھەر مالەکێ 15 ئەمپێڕان بدەینێ، بەرۆڤاژی دەمێ رەوشا کارەبێ باشتر دێ ئەمپێرێن زۆرتر دەینە وەلاتیان، ژبەرکو ب ڤی دەست و داری بیت چ کارەب بەھرا وەلاتیان ناکەت”.