ئالتهرناتیڤ
ل ویلایهتا فلۆریدا ـ ئهمریكا،كهسهكی پارچهكا ئهردێ بازرگانی ب بهایهكێ گران كری، ههمی هیڤی و مال و سروهتا خوه كرنه د وێ پارچا ئهردی دا، ههمیان دزانی ئهو پارچا ئهردی ل وی تاخی گرانتره، پشتی ب فهرمی كاروبارێن وێ خلاسكرین و كهته ل سهر ناڤێ وی چو ببینیت، چوو سهحكرێ د وێ شهڤێ دا بارۆڤێ یا لێدای و یا كهفتیه ل بهر دوربا زهمانی و چو تێ نههێلایه، دهڤهر ههمی یا ل بهرههڕفینێ، نهب كێر چاندنێ دئێت و نه چهراندنێ، یا بوویه جهێ دار و گلوگیا و دوپشك و ماران و رێیا بهرهنگاریا وان ژی نهمایه.
كێم مابوو دین بیت، ههكه هزرهك بۆ نههاتبا، ئهو ژی چاڤدێری و مفادیتن ژ وان گیانهوهران، ب راستی ژی د هزرا خوه دا سهركهفت، ژههرا ماران دئینادهر دا كارگههێن دهرمانی بۆ (تریاق ـ Antidote)ێ دهرمانێ بهرهنگاریا ژههرێ یه و كهڤلێ وان دفرۆته بازرگانێن پێلاڤان ب گرانترێن بها، گۆشتێ وان فرێكره دهڤهرێن وی گۆشتی دخۆن، باغێ وی یێ خودانكرنا مار و دویپشكان ب ناڤودهنگ كهفت ژ ههمی دونیایێ دهاتن بۆ دیتنێ…
جڤاكێن وهكی جڤاكێ مه كو گوهێ وان یێ ڤهكری بۆ ههر بڤبڤهكێ، رۆژانه د خهما خوه وهردبوون، تشتێ دوهی مه گوهلێبووی یان سۆزا وێ وهرگرتی یان كار بۆ كری یان بۆ خوه كریه بهرنامه و جهێ هیڤی و ئۆمێدان دێ بینین بهروڤاژی هات، كهس ژ مه نهمایه نهكهفتبیته بهر پێلا زهمانی، كیژ مهیه ههمی هیڤیێن وی وهك وی هاتی؟ ژن، زارۆ، شۆل، كارمهندی، پله، باوهرنامه، دكان، خانی، پارچا ئهردی، پاره، سیاسهت، رێڤهبرن…هتد
ژیانه، ل سهرخاترا كهسهك ژ مه قانوونا خوه ناگوهۆریت، دێ د بهردهوامبین ل گهل سۆپرایزان، دمینیت ل سهر مه كا ئهم دێ چ و چهند مفا وهرگرین بۆ ههر پێشهاتهكا نهچاڤهرێكری و نه دلخواز، دێ بهردهوامیێ دهینه سروشتێ خوه یێ گازنده و پتپتێ و نهرازیبوونا بێكار ل مال و خوه بهردهینهڤه؟ یان ژی دێ وهك نموونا سهری دهست ژ وی عادهتی بهردهین ههر و گازنده و دبهرههڤ بین بو بویهرێن مه هزر بۆ نهكری؟، نه ههما مویێن سهری سپی بوون یان قورمچینهك كهته ناڤچاڤان یان نهساخیهك یان نهرازیبوونهك یان ژ دهستدانا تشتهكێ ب بها یان بجهنههاتنا هیڤیهكێ خلاس دڤێت خوه هار و دین بكهین، ژ بلی بێهیڤیبوون و بێ زهوقیێ، ئهم ههمی شۆفێرێن رێیێن خۆش و نهخۆشین، یێن كهیف ب سهیرانان و یێن بهلا و مقهدهران ژی، دڤێت بزانین هندی ئهم ههبین دێ د رێیا مه دا ئهگهرا روودانێن دلتهزین ژی ههبن، روودانێن جانی، خیزانی، مال، كار، كاودان…
ئهم نه رهنگهكێ دی یێ جانداراینه ل زهڤیا ئهردی مه خودانهكێ دی ههبیت د ههوارا مه بهێت و مه خلاسكهت ژ بهلایێن ئهم دكهڤینێ، ئهم مرۆڤین، ئێك ئێكه خودان و بهرپرسین ل ژیانا خوه و دهردورێن خوه، بلا مه بخوه پلانێن ب هشیاری ههبن بۆ ههمی بۆیهران.
