ئاگرێ بێتفاقیێ به‌س خوه‌ش بكه‌ن!!
د رۆژه‌كا وه‌كو ئه‌ڤرۆ دا ل ساڵا 1828 قه‌یسه‌رێ رۆسیا نیكۆڵایێ ئێكێ(1796-1855) بڕیارا چاڤدێریكرنا كوردان ده‌ركر و ئه‌ڤ ئه‌ركه سپارته ئه‌رمه‌نیان، هه‌ژیه بێژین ل وى ده‌مى گه‌له‌ك ده‌ڤه‌رێن كوردستانێ ل بن فه‌روه‌ریا رۆسیا قه‌یسه‌رى دا بوون وه‌ك ڤان ده‌ڤه‌ران: ئه‌رمینیا نوكه، ناگۆرنۆ قه‌ره‌باغ، گه‌له‌ك ده‌ڤه‌رێن ویلایوتا قارس و هنده‌ك ده‌ڤه‌رێن ماكۆ و خۆى ل كوردستانا رۆژهه‌ڵات، ئه‌ڤ ده‌ڤه‌رێن هان ژبلى ئه‌رمینیا پرانى كوردن و ژ لایێ ئۆلیڤه مۆسڵمانن. هه‌لبه‌ت مه‌ره‌ما قه‌یسه‌رى دیاره ب “به‌ره‌كى دوو چووكا “نێچیر بكه‌ت و تۆڤێ دووبه‌ره‌كیێ بێخته نابه‌ینا دوو گه‌لێن هه‌ڤ تووخیب و ئه‌و ژى ل سه‌ر داگیركرنا كوردستان و ئه‌رمینیا به‌رده‌وام بیت. به‌رهه‌مێ وێ بزاڤا نه‌گریسا قه‌یسه‌رى پشتى هینگێ دیاربوو و گه‌له‌ك گران ل سه‌ر كوردان و ئه‌رمه‌نیان راوه‌ستا.
هه‌لبه‌ت مه‌ره‌ما من ژ ڤێ نموونێ نه نووژه‌نكرنا تۆڤێ دووبه‌ركیێیه یان ژى ڤه‌دیتنا پاساوانه بۆ جینۆسایدا گه‌لێ ئه‌رمه‌ن ل سه‌ر ده‌ستێ ده‌وله‌تا ئۆسمانى و ده‌ستكیسیا كوردان د وێ جینۆسایدێ دا به‌لكو مه‌ره‌م ژێ ئه‌وه ده‌وله‌تێن داگیركه‌ر ب هزار ره‌نگ و ئۆینان تۆڤێ دووبه‌ركیێ د ناڤ گه‌لان دا به‌ڵاڤ دكه‌ن و بۆ هه‌ر لایه‌نه‌كى گورزه‌كا پاساوان به‌رهه‌ڤ دكه‌ت دا ل سه‌ر هه‌لویستێن داگیركه‌رى ده‌ستنیشانكرین، درژدبن.
ئه‌گه‌ر هه‌ما ئاڤڕووه‌كا سڤك ل ره‌وشا نهۆیا هه‌رێما كوردستانێ و په‌یوه‌ندیێن لایه‌نیێن سیاسى بده‌ین دێ سه‌ده‌مێن ڤێ ژ هه‌ڤ دووریێ و ل هه‌ڤ نه‌كرنێ وه‌ك رۆژا رۆهن دیار دبن، مرۆڤ هه‌وجه‌ى چ خێڤزانك و فالڤه‌گران نابیت.
ته‌ڤ لایه‌نێن سیاسى ل سه‌ر وێ چه‌ندێ دكۆكن(وه‌ك دیار و بانگه‌شه) كو رۆژهه‌ڵاتا ناڤین ب ساسیا شه‌رێ دژى تیرۆرێ ل سێریانا وه‌رچه‌رخێنه‌ره‌كا دیرۆكیدا ڕاوه‌ستایه و هێزێن پشكدا د شه‌رێ دژى تیرۆرێ دا هه‌موو چاڤه‌ڕێى ده‌ستكه‌فتیانه و هه‌ر كه‌س ل گۆڕه‌ى به‌ر و منێن خوه، خوه بۆ لێكڤه‌كرنا كێكێ به‌رهه‌ڤ كرنه و دچاڤ زیقن!! لێ چ جارا وه‌كو نها هێزین سیاسیێن كوردستانێ ل سه‌ر پرسا سه‌رخوه‌بۆنێ دوورى هه‌ڤ نین و رێزه‌كا هێجه‌تان دده‌ن پاڵ هه‌ڤ تنێ دا وێ چه‌ندێ بده‌ن دیاركرن كو نه ده‌مێ ڕاگه‌هاندنا سه‌رخوه‌بۆنێیه و ئاگرێ بێتفاقیێ خوه‌ش دكه‌ن!! د سه‌ر هندێ ڕا ژى هه‌ر لایه‌نه‌كى گلوازه‌كێ نه‌خشه‌ڕێیان دایه به‌ر ملێ خوه و خوه پێ با دده‌ن لێ، ژبیرا لایه‌نێن سیاسى چوویه كو په‌یڤێن: سازان، كۆمبوون، نه‌خشه‌ڕێ، پێكئینانا لیژنان … و پرۆژێن چاكسازیان وه‌لاتیێن كوردستانێ ئێدى ب دوو عانێن قه‌لپ ناكڕن چنكو به‌رهه‌مێ ڤان هه‌موو په‌یڤان ژێك دووركه‌فتنا لایه‌نێن سیاسى هاتیه شكه‌فا وه‌لاتیان و كێشه مینا خوه ماینه به‌لكو ئالۆزتر لێهاتینه. د ره‌وشه‌ك هوسا ئالۆز دا كو لایه‌ینێن سیاسى نه‌شیاینه ل سه‌ر نه‌خشه‌ڕێیه‌كێ ل هه‌ڤ بكه‌ن، پاپۆڕا ئه‌فسانا داعش نێزیكه دێ ل ڕاوه‌ستگه‌ها(ستاسیۆنا) دواى ڕاوه‌ستیت و داگیركه‌رێن كوردستانێ ژى چ جار مینا نوكه ل دوورى هه‌ڤ نه‌بووینه و ترسا كێرا سایكس-پیكۆیه‌كێ دن ل هنداڤى سنۆرێن وان بیڤه‌له‌رز ئێخستیه دلێ وان و ئه‌و ژ كارخستنه. بۆ ده‌رباز بوون ژ ڤێ ره‌وشا خراب و هه‌ڤ تۆمه‌تباركرنا بێ مانا، فه‌ره لایه‌نێن سیاسى ل پێنگاڤا هلدانا ئاڵایێ كوردستانێ ل پاریًَزگه‌ها كه‌ركووكێ مێزه‌بكه‌ن و كانێ چه‌وان ل سه‌ر جوداهیا دیدو بۆچوونا و هه‌ڤ تۆمه‌تباركرنا بێ ڕامان ڕا ته‌ڤان ئه‌ڤ پێنگاڤه پیرۆزكرن و خوه‌دى لێ ده‌ركه‌فتن!! ب هه‌مان گیان ئه‌گه‌ر سۆبه‌هى بریارا سه‌رخوه‌بۆنێ بهێته‌دان ب هه‌مان گیانى ته‌ڤ لایه‌نێن سیاسى دێ خوه‌دى لێ ده‌ركه‌ڤن و مانێ درووشمێ هه‌موو كوردان: یان كوردستان یان كورد نه‌مانه. ب جان و دل هه‌ر كورده‌ك ل به‌ندا ڤێ بڕیارێیه.
