دهولهت یان ریفراندوم یان ههردو پێكڤه؟
ههكه ئهم ل دیرۆكا خوه بزڤرین دێ گهلهك ب رۆهنی بۆ مه دیاربیت كا ئهگهرێن نهبوونا دهولهتێ بۆ رهسهنترین و كهڤنارترین مللهتێ رۆژههلاتا ناڤین كو ئهو ژی كوردن چ نه، ل ڤێرێ ئهم ناچینه ناڤهرۆكا دیرۆكێ ب تنێ هند ژ ئهگهرێن سهرهكى یێن نهبوونا دهولهتێ ب كورتى, نهبوونا ئێكگرتنێ, نهبوونا هێزهكا لهشكرى یا رێكخستى، جوگرافیا وهلاتێ كوردان، پێكهاتێن جۆراوجۆر یێن د ناڤا كوردستانێ دا دژین، دهولهمهندیا وهلاتێ مه ژى ژ وان ئهگهرانه كو بهردهوام دوژمنێن مه چاڤ لێ یه و گهلهك ئهگهرێن دى…
ل پشتى سهرههلدانا سالا 1991 دهرهفهتهك زێرین ل باشۆر هاته پێش و ئهم بووین خودان پهرلهمان و حوكمهت، لێ دیسا دیاربوو كو مه پهند ژ دیرۆكێ نهوهرگرت بوون و پهنا بهر ب بهر شهڕێ براكۆژیێ و دو ئیدارهیێ و دو ئارمانجێن جودا و بوونه ئهگهرێ هندێ كو ههر نهبیت 10 سالان ئارمانجێن كوردان هاتنه پاشخستن.. هتد.
ئهڤ بهحس و درووشمێن نها ل باشۆر دهێنهكرن سهبارهت سهربهخوهیێ و دهولهت و ریفراندۆم ب راستى گرنكه مرۆڤ د چهند خالهكان دا ل سهر راوهستیت…
1ـ ههتا نوكه یا دیار نینه كا ئهوا دهێتهكرن دهولهته یان رفراندومه و یان كۆنفیدرالى یه.
2ـ هێشتا دیارنینه كا ئهرێ ئامادهباشى هاتینهكرن بۆ پرۆژهكێ هۆسا یان نه.
3ـ ههتا نها مه لهشكرهكێ ئێكگرتى نینه كو ئهڤه دێ مهزنترین مهترسى ل پاشهرۆژێ پهیدا كهت.
4ـ بریارێن ههولێرێ ل سلێمانیێ و كهركووكێ ناهێنه جێبهجێكرن و بهروڤاژى یێن وان ژى ل دهۆك و ههولێرێ ناهێنه جێبهجێكرن.
5ـ ههكه دهولهت بیت چ جۆرێ دهولهتێ یه؟ دیمۆكراسى, ئیسلامى، مهدهنى، علمانى ..هتد.
6ـ ههكه دهولهت بیت دێ ل سهر چ سیستهم بیت، پهرلهمانى یان، سهرۆكاتى؟.
7ـ بنهمایێن دهستههلاتێ, هێز، ئابوور، زانین! ئهڤ ههر سێكوچكێن دهستههلاتێ ل دهف مه جهێ گومانێ نه دبیت زانین ههبیت لێ زانین بێ هێز و ئابوور نه د بهرژهوندیا مللهتێ مه دایه.
من نه باوهره كوردهك ههبیت ئهڤجا ل ههر جههكێ دونیایێ بیت حهز ژ دهولهتێ نهكهت و یان دژى دهولهتبوونێ بیت، لێ گرنكه ژ بۆ وهرگرتنا بریارهكا چارهنڤیساز خهلك خوهدى ههلویست و بریار بیت و ب زانابوون بریار بهێتهدان نه ب دلینى (عاتیفى)
ئهڤا نوكه ل باشۆر بهحس لێ دهێتهكرن ب دیتنا من پشكهكێ مهزن یێ بریارێ كارتێكرنا دلینیێ یه ل سهر ڤێ بریارێ، چونكى هینگى هند بهحس ل دهولهتێ دهێتهكرن هند بهحس ل پرۆژه و ناڤهرۆك و ئامادهكاریێن دهولهتێ ناهێتهكرن ئانكو زێدهتر یا بوویه بابهتهكێ مزایداتێن سیاسى! دهولهتێ پێدڤى ب پرۆژهكێ گرنك ههیه ههتا سوبه ئهم بێژین مه قوربانیێن مهزن یێن داین تێرا هندێ ناكهت و نابیته ب گۆرێ هندێ كو مه پرۆژهكێ نهتهوهیى یێ ئێكگرتى و دیبلۆماسى و ئابوورى نهبیت.
د ڤێ قووناغێ تازه مللهتێ ل شهرێ داعش دهرباز بوویه و بارێ ئابوورى و سیاسى یێ ناڤخوهیى ل باشۆرێ كوردستانێ د ئاستهكێ لاواز دایه لهوما ل گۆرى دیتنا من دهولهتبوون گرنكه لێ پرۆژه و كاركرن و بهێنفرههى گرنكتره ههر چ نهبیت ڤان دو ههتا سێ سالێن بهێت ل ژێر پرۆژهكێ بهرفرهه ئهڤ پێنگاڤه بهێته هاڤێتن.
