مهلاقی ژی فهن و فنونه!؟
ئهم و ئهو
مهلاقی ژی فهن و فنونه!؟
بهری چهند سالهكان ل ئێك ژ مۆلێن مهزنێن جنێڤ، ئهز و سهرۆكا جڤاتا سهرۆكاتیا سۆیسرا كو خهلكا جنێڤ بوو، پشتی من چهندهن جاران د تهلهڤزیۆنێ دا دیتی سبحان الله كهفتینه بهرئێك. دو كچێن زارۆ ل گهل بوون، من نهزانی كا كچێن وێنه یان نهڤیێن وێ نه؟ یا گرنك ئهو بوو كو من دیت، ب راستی ب دروستی بیرا من ناهێت كا ئهز و كی وێ رۆژێ ل گهل ئێك بووین، جرفهك من ب كهفت..ههواااار.. ئهڤه سهرۆكا سۆیسرا یه!! نهنه ئهزێ خهونان دبینم.. كورۆ خۆلیبسهر، خهونێن چ.. ههره ملێ خوه ل ملێ وێ بده دا بزانی كو راستیه.. نهنه شهرمه دێ ههتكا من چیت.. كورۆ خشیم ههره ما ئهڤه بدهست كێ دكهڤیت؟ ل ههوه ناڤهشێرم.. سۆتم بچم سلاڤ بكهمێ و بێژمێ ئهبهنی.. ئهز خولام.. ئهز قوربان..نه ب منه، ئهز هۆسا یێ فێر بوویم و مهزن بوویم!! خودێ ئهزێ دایم تنێ بۆ عیبادهتا وی و مهسئوولان، چونكی نانێ منێ كریه د دهستێن وان دا!! چاڤێن من ژێ ڤهنهبوون.. كیڤهدچوو بێی حهمدی من چاڤێن من ب دووڤ دچوون!! من كچا خوه یا ئێكانه ب تنێ هێلا سهر لهعبیكێن بچووكان و ههست و بیر و چاڤێن من ب دووڤ سهرۆكا سۆیسرا كهفتن!! حهلیام ئێك براوهستینیت و بێژیتێ زهحمهت نهبیت من دڤێت وێنهكی ل گهل تهبگرم (هینگی مودێلا سیلفیا هێشتا نهدهركهفتبوو)، ههكه دا برایێ ههوه ژ دوورڤه سیلفیهكی بۆ خوه گریت، بێی كو بزانیت و ل فهیسبۆك و تویتهر و ئهنستگرامی و سناب شات و واتسابێ بهلاڤ كهت (پهع پا دا لایك و كۆمێنت بۆ من هێن)، چونكی دزانم نه ئهز ب تنێ مهلاقم، مللهتێ من ههمی حهز ژ مهلاقیێ دكهت.. باوهر بكهن دا ئهو سیلفی رهقهم قیاسی شكێنیت.. بهلێ پا چ بكهم یێ بێ شانسم.. دێ بلا هینگی مه جهنابێ پایهبهرزێ سیلفی نیاسیبا.. وهعده بیت من میمۆریێ خو ب هسیلفیێن بهروپشت و گل و گل ڤهتژی سیلفیێن خوه و سهرۆكا مه كربا.. من خوه گرت.. و تهحهملهكا مهزن كر دا بهس ئێكی ببینم بچیت تهسۆیرهكی د گهل بگریت.. پا ب خودێ خوه ئێك نهچوو.. ئهز ژی مرۆڤهكێ ژ خوه شهرمم و من نهڤیا ئهز بچم بهراهیا ههمیان بێژمێ زهحمهت نهبیت قوربان، ل من ببوره.. من دڤێت تهسۆیرهكی د گهل جهنابێ تهیێ زۆر زۆر زۆر زۆر زۆر بهرێز بگرم.. نه وهكی دهمێ من سهرۆكێ حوكمهتا ههرێما كوردستانێ دیتی و ئێكسهر ئهز چووم من سلاڤكرێ و ئهزبهنی و ئهز خولام و ئهز قوربانا من گههشته عهسمانان، حهتا من ژبیر كری بێژمێ دا وێنهكی د گهل جهنابێ تهبگرم و ههجیێ من دگۆتێ بابۆ و الله من سهرۆكی حوكمهتا مه ب تنێ دیت و د گهل ئاخفتم ل سهر شارعی، كهسێ باوهر نهكر و دگۆته من كا وێنێ تهو و وی!!! بابۆ والله من دیت و د گهل ئاخفتم، بهلێ هندی زهر و شین و سۆر بووم و ئهزمانێ من بهروڤاژی بوو و ههستێن من نهمانه د بهریكێن من دا، ژبیرا من چوو بێژمێ دا وێنهكی دگهل ته بگرم.. لهوما من دڤێت ئهڤرۆ بێژمه ههوه كو ئهم كورد مللهتهكین گهلهك ژ خۆشهرمین و..، د ههمان دهم دا گهلهك بێ هش و بیر دبین دهمێ مهسئوولهكی دبینین!! بێی حهمدی مه، مهلاقی خوه ل سهرێ مه ددهت و شهپرزهدبین!! بۆچی؟ ئهڤه مهسئهلهكا فیسیۆلۆجی یه ئهم مرۆڤێن مهلاق و سادهباش تێدا د شارهزا نینین..
ل دووماهیێ.. و چونكی من نهدیت بهشهرهك چوویه بهر سینگێ سهرۆكا سۆیسرا، ئهوا ب تنێ و بێی حیمایه و زێرهڤان و شۆفێر و موفێر، دا بێژیتێ دێ شێم تهسۆیرهكی د گهل جهنابێ تهگرم.. كرمێ منژی هێدی هێدی د ناڤ من دا دهاته كوشتن و ب وان سهر و دلێن سۆتی ڤه، رۆژا خوه بۆراند و هندهك جاران من نهعلهت ل خوه دباراندن كا بۆچی ئهز نهدبوومه یێ ئێكێ بچم تهسۆیرهكی د گهل بگرم و دبیت گهلهك مهلاقێن دی ژی یێن وهكی من ل وارا ههبان و وانژی دگۆته خوه ئێك بچیت ئهزێ دووێ مه!!! بۆ زانینا ههوه..پشتی هینگی ب دو سالا من نههێلا كرمێ من بهێته كوشتن و د ئاههنگهكا تایبهت دا بۆ رۆژنامهنڤێسان من دیت و چوو مهدهف و من د دلێ خوهدا گۆتێ دێ وهره خاتین، ته بهری دو سالان مهلاقیا من رهزیلكر..ب ڤێ حالێ و ڤێ سویندێ ئهڤرۆ تو ژ مهلاقیا من نابۆری… چڕررررك..برایێ وه وێنه د گهل گرت و دهملدهست ل فیسبۆكێ بهلاڤكر.. هوون ب خودێ مهلاقیا من یا چاوایه؟ نهتۆپ تۆپه؟؟ د ئامادهینه خولێن مهلاقیێ ڤهكهین ل كوردستانێ..
