ڤهگهریانا نهوشیروان مستهفا و هیڤیهكا دوور
جارا پێشین پشتى وهرگرتنا چارهسهریێ ل لهندهنا سهرباژارێ ئنگلتهرا نهوشیروان مستهفا رێكخهرێ گشتى یێ تهڤگهرا گۆڕان كهته بزاڤهك ب لهز ژبۆ رێخستنا ههڤپهیمانیهكێ ل گهل یهكهتیا نیشتمانیا كوردستانێ پشتى دهمهكێ ژ پێكۆلان و ههولێن بهردهوامێن ههردو ئالیان كارین رێكبكهڤن و ل سهر ههڤپهیمانیێ ئیمزا بكن (ل ڤێره ئهم نا خوازین بكهڤینه ناڤا برگه و خال و مهرجێن كو ههردو ئالى ل سهر لههڤهاتین) ههتا چهند ههموو برگه و خالێن ههڤپهیمانیێ كهتن بوارێ جێ بجێ كرنێ، ئهو ژى ل ڤێرێ نه ئهركێ مهیه ل سهر راوهستین، لێ تشتێ كو گرنگ ل ڤێره ئهم ئاماژێ پێ بدین ئهوه ل دهمێ ئیمزاكرنا ڤێ ههڤپهیمانیێ كانێ چاوا خهلكێ مه ب ههمى تهخوچینێن جودا جودا یێن خوهڤه بجۆش و كهیفخوهشیهكا مهزن پێشوازى ل ئهڤێ پێنگاڤێ كرن …. گهلێ مه گهلهكى دلبێش و وهلاتپارێز و دلسۆزێ دۆزا رهوایا كوردیه، لهو ماژى ل دهما دو یان سێ یان چهند ئالیهكێن كوردى ل ههڤنێزیك دبن ئهڤ گهله ههموو ههژارى و دهردهسهریا خوه ژ بیر دكهن ب هیڤیا وێ یهكێ كو د نێزیكبوونا ڤان ئالیان نێزیكبوونهكا سهرتاسهرى و پاشێ لههڤ هاتنهكا مۆكم دناڤا ههموو ئالیاندا وهره ئیمزاكرن وئهڤ پێنگاڤه ژى ببه ئهگهرێ گههاندنا گهمیا هیڤى و ئو مێدێن گهلێ كورد بۆ بهراڤهكا ئارام و دهردهسهریێن ڤى گهلى ب داوى وهرن. ههرچهنده ئهڤێ یهكێ روو نهدا لێ گهلێ مه بێ هیڤى نهبوو و ل بهندا ههر ئهگهرهكێ یان ههلكهفتهكێ یه كو ببه ئهگهرێ نێزیكبوونا ئالیێن كوردى من ل بیره بهرى دهمهكێ نه ژ مێژه ل دهما مالئاڤاهیكرنا داویێ یا ههڤژینا برێز نوشیروان مستهفا ل دهما دیدارێن مهدیایا كوردى ل گهل وهلاتیێن كورد ههموویان یه ك تشت دگۆتن و ئهڤ رسته دوباره دكرن خهمبارین ب مالئاڤاهیا ڤێ خانمێ، لێ هیڤیدارین ئهڤ ههلكهفته ببه ئهگهرێ نیزیكبوونا ئالیێن كوردى و ههڤگرتنا وان و دلخوهشین كو سهروكێ ههرێما كوردستانێ برۆسكا سهرهخوشیێ بۆ رێكخهرێ گشتى ب ڤێ ههلكهفتێ رێكرى)، كهواته گهلێ مه ناخوازه هیچ دهرفهتهكێ ژ دهست بدهت بێى كو ڤى دهرفهتێ بكاربینه یان ههر چو نهبیت هنك هیڤى و ئۆمێدان ل سهر ئاڤا بكهت ژبۆ نێزیككرنا ئالیێن ناكۆك و نارێكێن كوردى ب مهرهما چارهسهریهكا یهكجارى ژبۆ دۆزا رهوایا كوردى و بداوى هاتنا كارهسات و رۆندكێن دایكان. یا كو من دڤیا د ئهڤێ گۆتارێ دا بێژم و مهرهما من یا سهرهكى ئهوه بێژم: رێكخهرێ گشتى كاك نهوشیروان مستهفا تو دیسا ڤهگهریاى بۆ ئاخا وهلاتى تو بخێرهاتى و دیسا خهلك بئومێده كو ئهڤ ڤهگهره ببیته ئهگهرێ لههڤ نێزیكبوونا كوردان و پێداچوون ب ههلوێستان و دیسا ببیته ئهگهرێ نیشاندانا سیاسهتهكا نهرم چونكو وه ئهزموونهك درێژ یا ههى ل گهل پۆلهتیكا هشك و هوون باش دزانن ئهڤ جۆرێ پۆلهتیكێ ل سهر ئاستێ جیهانێ سهركهفتى نهبوویه و ههرتم كارهسات ل پهى خوه هیلاینه و بۆیه ئهگهرێن رووبرووبونان و ململانا دژوار و هوون باش دزانن پرێزا نها ژ ئهنجامێ وێ پۆلهتیكا هشكه و نهقهبولكرنا ههڤدو دیسا هیڤیدارم جهنابێ وه بزانیت كو رژدبوون و گوهنهدانا كوردان و نهتهوێن ههڤگرتى و كونسولسێن بیانى ل ههرێمێ ژبۆ پاشخستنا رونشتنا پهرلهمانێ كوردستانێ ل 23 خزیرانا سالا دهربازبوى ئیرۆ و رهوشا ئیرۆ ئهنجام ئینا دیسان سازشكرن ل سهر هنك دۆزێن گرێداى ئارمانجا كوردان یا سهرهكى كارهكى پیرۆزه و ژ ههلوێستێن دیرۆكى تێنه هژمارتن و رژدبوون ژى ل سهر دیتنێن شاش نه د بهرژهوهندیا كهسێ دایه و هوون ڤێ یهكێ ژ ههر كهسهكێ باشتر دزانن، دیسا ژى ژ من باشتر هوون دزانن رهوش چهند نازكه و ها شهرێ تیرۆرستێن دهولهتا خیلافهتا ئیسلامى یا بهر ب داویێ دچیت كو پێشمهرگێن كوردستانێ رۆلهك ههرى بهرچاڤ د ئهڤى شهریدا دیت ههروههاژى قۆربانیهك مهزن هاتیه دان بلا ئهم ههموو پێكڤه بزانین پشتى ئهڤ شهره ب دروستى ب داوى وهره بهرژهوهندیێن هنك هێزان ژى وێ ل گهل مه ب داوى بهێن و وهكى نها قهستا مه ناكن و ئهم و دهڤهرا مه نامینه ئهو روگهها ئهڤه دو ساله هێزێن ههڤپهیمانان قهست دكرنێ. دیسا دێ مینین ئهم كورد ب تنێ د كهلهكا خوه دا ل سهر دهریایهكێ كو خوهدى پێلێن مهترسیداره دێ و دیسا چارهنڤیسێ مه تهڤان یهكه ركمانه و بالبالێن حزبایهتى مه ناگههینه چو كهنارهكێ ئارام تنێ ههڤگرتنا كوردان چارهسهریه و ئهڤ رسته و ههڤۆكێن قالا ههڤگرتنا كوردان دكن، دیسا مه ژ ههوه گوه لێ بووینه و دڤیا هوون بێخنه د وارێ پرهكتیكێدا ئهگهر نه دێ مینن وهكو مرهكهبێ ل سهر كاغهزێ و دئێته وێ واتهیێ وه تهڤان ژبۆ رێكلام بكاردئینا…. تنێ جارهكێ بهرژهوهندیا گهلێ خوه دهینن پێشیا بهرژهوهندیێن حزبێن خوه ل داویێ گۆتنهكا كوردان هاته بیرامن دبێژن: ل بهریستانهكێ دهوارا كابرایكێ ما برسى، وی ژى ژ بێ ئۆمێدیا خوه دهستێن خوه سهر ئهڤراز كرن و گۆت: (خوداو تو خودایهكى چاكى ..تو ب مهزناهیا خوهكی تو جهورێ دهوارامن تژى كاكى…. لێ دزانم ته وهنهكریه و تو وهناكى.
