وەزارەتا پەروەردێ ھۆشداریێ ددەتە قوتابیێن 12 ئامادەیی
ئه‌ڤرۆ نيوز:
وەزارەتا پەروەردێ بەرھەڤی بۆ ئەنجامدانا پرۆسا ئەزموونێن پۆلا 12 ئامادەیی کرینە و پەیڤدارێ وەزارەتێ ژی دیارکر، ھەر کەسەکێ قوپیایێ بکەت ب توندترین شێوە دێ ھێتە سزادان و دبێژیت: بلا قوتابی گرەنتیێ ژ چو مامۆستایەکی وەرنەگرن بۆ ب دەستڤەئینانا نمران، چونکو ئەو مامۆستا د بەرھەڤکرنا پرسیاریان دا د پشکدار نینن.
سامان سیوەیلی، پەیڤدارێ وەزارەتا پەروەردێ یا حوکمەتا ھەرێما کوردستانێ بۆ رۆژناما ئەڤرۆ خویا ژی کر، ئەڤ سالە وەزارەتا پەروەردێ ھەموو بەرھەڤیێن پێدڤی بۆ ئەنجامدانا ئەزموونێن پۆ 12 ئامادەیی ب رەنگەکێ رێکوپێک کرینە و گۆت: “ھەر قوتابی و کەسەکێ قوپیایێ بکەت دێ ل گۆرەی قانوونێ ھێتە سزادان و چاڤێن خوە ل چو کەسەکی ناگرین، یێ بڤێت ب ھەر شێوەیەکێ بخوازیت قوپیایێ بکەت، ھەروەکی سالا بۆری چەند حالەتەک چێبوون و وەزارەتا پەروەردێ چەندین کەس دەستەسەرکرن و لێپرسین د گەل دا ھاتەکرن، دیسا بکارئینانا ئامیرێن پێشکەفتی و سەردەمیانە دێ رێگری ل دیاردا قوپیایێ ھێتە گرتن و بۆ ڤێ مەرەمێ ژی چەندین بەرھەڤی ھاتینەکرن”.
ل دۆر وان مامۆستایێن تایبەت یێن ب مەرج وانا دبێژنە قوتابیان، سامان سیوەیلی گۆت: “راستە ھژمارەکا بەرچاڤا مامۆستایان پەیدابووینە و بەری ئەنجامدانا تاقیکرنان وانەیان ب پارە دبێژنە قوتابیان و ھندەک جاران دبێژنە قوتابیان کوژمەکێ پارەی بدەنە مە دێ ھندە نمران ب دەستخوەڤە ئینی، بەلێ ئەڤێ چو بنەمایێن زانستی بۆ نینن و ئەو مامۆستا نەشێن مەرجێ خوە بجە بینن، چونکو ئەو مامۆستا پرسیاران دیار ناکەن ھەتا گرەنتیێ بدەنە قوتابیان”.
