ئەیوب رەمەزان: کەرنەڤالێ پێنجێ یێ رۆژا پارێزگەھبوونا دھۆکێ دێ ئێخینە د خزمەتا ریفراندۆمێ دا
ئه‌ڤرۆ نيوز:
ل ژێر درووشمێ (ریفراندۆم دێ مە گەھینیت دەولەتبوونێ) رێڤەبەریا گشتی یا رەوشەنبیری و ھونەری ل دھۆکێ ب ھەماھەنگی ل گەل سەرۆکاتیا باژێرڤانیا دھۆکێ دێ کەرنەڤالێ پێنجێ یێ رۆژا پارێزگەھبوونا دھۆکێ ل رۆژا 25ى گۆلانێ 2017ێ ل دەمژمێر 5 ی ئێڤاری ل پارکێن دھۆک مۆل گێڕیت.
ئەیوب رەمەزان، رێڤەبەرێ گشتیێ رەوشەنبیری و ھونەری ل دھۆکێ بۆ رۆژناما ئەڤرۆ ئاشکرا کر کو ب ھەلکەفتا رۆژا پارێزگەھبوونا دھۆکێ پیرۆزباھیێ ل ھەموو خەلکێ پارێزگەھا دھۆکێ دکەین و گۆت: “مەرەما مە ھەر ژ دەستپێکا کەرنەڤالێ پارێزگەھبوونا دھۆکێ ئەو بوو کو شیانێن سازی و تاک و داھێنەرێن پارێزگەھا دھۆکێ بەرچاڤ بکەین ژ بەر ڤێ چەندێ ئومێدەوارین بۆ سالێن داھاتی ھەکە قەیرانا دارایی ل ھەرێما کوردستانێ ب دووماھی ھات ھەموو بزاڤ بھێنەکرن ھەکە خوە ئەز د ڤی پۆستی ژی دا نەمینم شیانێن تاکێن پارێزگەھا دھۆکێ زێدەتر د کەرنەڤالێ پارێزگەھا دھۆکێ دا بھێنە بەرچاڤ کرن”.
ناڤھاتی ئاماژە دا وێ چەندێ کو رۆژا پارێزگەھبوونا دھۆکێ 27ی گۆلانێ یە، بەلێ ژ بەر کو رۆژا ئێکێ یا ھەیڤا رەمەزانا پیرۆز دێ کەڤیتە د وێ رۆژێ دا وان ب فەر دیت کەرنەڤالێ پێنجێ یێ رۆژا پارێزگەھبوونا دھۆکێ ل رۆژا 25ى گۆلانێ2017ێ ب گێڕن و گۆت: “ئەڤ سالە کەرنەڤالێ رۆژا پارێزگەھبوونا دھۆکێ دێ یێ جودا بیت ژ سالێن بۆری ب تایبەت ژ لایێ ستایل و دیزاینان ڤە، چونکی ھەڤڕکی یا ھەی”.
رێڤەبەرێ گشتیێ رەوشەنبیری و ھونەری ل دھۆکێ خویا کر کو وان ل بەرە ڤی کەرنەڤالی بێخنە د خزمەتا بەلێ بۆ ریفراندومێ دا و دێ پشتەڤانیەکا ب ھێز ل ئەنجامدان و سەرخستنا ڤێ پرۆسێ ھێتەکرن و گۆت: “باشترین کارێن کەرنەڤالی دێ ژ لایێ لیژنەکا بسپۆر ڤە ھێنە ھەلسەنگاندن و دێ سێ سەرکەفتی ھێنە ھەلبژارتن و سەرەرایی ڤێ چەندێ پێنج کەسێن ژ کەڤن دا ب کارەکی ل سەرانسەری پارێزگەھا دھۆکێ ناڤداربووین و خزمەتا پارێزگەھا ناڤھاتی کری دێ ھێنە خەلاتکرن”.
ژ ئالیێ خوە ڤە عوبەیدوللا داود، رێڤەبەرێ گشتی یێ گەشت و گۆزارێ ل پارێزگەھا دھۆکێ بۆ رۆژناما ئەڤرۆ خویا کر کو ئەو دێ بزاڤێ کەن گەشتیاران بیننە پارێزگەھا دھۆکێ بۆ دیتنا کەرنەڤالێ پێنجێ یێ رۆژا پارێزگەھبوونا دھۆکێ، چونکو رێڤەبەریا وان چالاکیێن ب ڤی رەنگی ب دەلیڤە دبینیت بۆ مفا وەرگرتن و خورتکرنا بازارکرنا گەشتیاری و گۆت: “رێڤەبەریا مە ب کردوسەکی کو یێ پێکھاتیە ژ ترۆمبێلەکا مەزن یا خەملاندی ب ھێمایێن گەشتیاری دێ پشکداریێ د کەرنەڤالێ پێنجێ یێ رۆژا پارێزگەھا دھۆکێ دا کەت”.
ئیسماعیل مستەفا، رێڤەبەرێ راگەھاندنێ ل سەرۆکاتیا باژێرڤانیا دھۆکێ بۆ رۆژناما ئەڤرۆ ئاشکرا کر کو ئەو ب ھەلکەفتا 48 سالیا رۆژا پارێزگەھبوونا دھۆکێ پیرۆزباھیێ ل ھەموو خەلکێ پارێزگەھا دھۆکێ دکەن و گۆت: “ئەم ھیڤیدارین بشێن زێدەتر خزمەتا وەلاتیێن خوە بکەین، چونکی د ڤی دەمێ درێژێ دھۆک تێدا بوویە پارێزگەە رەنگە گەلەک خزمەت بۆ وەلاتیێن ڤێ پارێزگەھێ ھاتبەنەکرن ب تایبەتی پشتی سەرھلدانا 1991 ێ، بەلێ باژێرڤانیا دھۆکێ ھیڤی یێن مەزنتر یێن ھەین بۆ وێ چەندێ کو بشێن پتر خزمەتا وەلاتیێن خوە بکەین و پتر ژیارا وان ب ئەنجامدانا پرۆژان خوەش بکەین وەکو ڤەکرنا پارک و جادە و ھتد… ژ بەر کو وەلاتیێن پارێزگەھا دھۆکێ ژ ھەژی خزمەتەکا مەزنترن”.
ناڤھاتی ئاماژە دا وێ چەندێ کو ئەو د وێ باوەرێ دایە ئەڤ سالە دێ کەرنەڤالێ رۆژا پارێزگەھبوونا دھۆکێ ژ سالێن بۆری جودا تر بیت، چونکی رێژەکا مەزن یا سازی و کۆمپانی و بەھرەمەندا تێدا د پشکدارن و گۆت: “ھیڤیدکەم رێژەکا مەزنا خەلکی پشکداریێ د ڤی کەرنەڤالی دا بکەن”.
ھەژی گۆتنێ یە کو کەرنەڤالێ پێنجێ یێ رۆژا پارێزگەھبوونا دھۆکێ دێ ب کردوسێن خەملاندنا ترۆمبێلان و رووپیڤانێن جەماوەری و ب پشکداریا بەھرەمەند و سازی و ھونەرمەندان (عەبدولقەھار زاخۆلی، بلند ئیبراھیم، دیلانار یلدز، عەبدوللا ھەرکی) ھێتە گێڕان.
