كهرنهڤالا دهۆكێ
كهرنهڤال پهیڤهكا دیرۆكیا رهسهنه ژ ههردوو پهیڤێن لاتینى (carnem levare) هاتیه وهرگرتن و د كهڤندا بۆ دوورئێخستنا مرۆڤان ژ گۆشتى هاتیه بكارئینان و دێرێن مهسیحییان بۆ رۆژى یێن ئایینى بكارئینایه، پشتى بۆرینا دهمى بۆیه زاراڤهك بۆ رۆژیگرتنێ ژ خوارنا گۆشتى، رۆژیگرێن مهسیحى د دهمێ 50 رۆژاندا گۆشتى و هندهك جۆرێن دى یێن خورانێ ناخوون، پاشى رامانا خرڤهبوون و فیستهڤال ڤهگرتیه و ب هلكهفتهكا دهست نیشانكرى ئاههنگ و رێپیڤان و سهما و ستران و یارى و كارێن خۆمژوولكرنێ تێدا دهێنه گێران. ل سهر دهمێن نوو ژى زاراڤ ب زمانێ ئینگلیزى بوویه (Carnival) كارنیڤال و تێدا ئاههنگ و خونیشادان و یاریێن سێرك و دهركهفتنێن مللى ل جاددهیێن ڤهكرى دهێنه كرن.
ئهڤ جۆرێن كهرنهڤالان و ب تایبهت ب هلكهفتا رۆژا پارێزگههبوونا دهۆكێ مێژۆیهكا دێرین ههیه و ل دووماهیا سالێن ههفتێیان ل جادهیێن سهرهكى یێن دهۆكێ دهاتنه كرن و تێدا كۆمێن كهسێن خودان پیشه رێپیڤان دكرن و ترۆمبێل دهاتنه خهملاندن و ههر كۆمهكێ یان ترۆمبێلهكا خهملاندى دهربڕین ژ تهخهكێ یان سازیهكێ یان پیشهیهكێ كر و دهستپێكا وێ ژ رێكا گهلیێ دهۆكێ ههتا جاددا سهرهكییا دهۆكێ و پرا مهزن و جاددا زانكۆیا دهۆكێ ڤهدگرت كو نزیكى سێ كیلومتران بوو و ل مهیدانا ساخلهمیا دهۆكێ ئهوا نوكه دكهڤیته بهرامبهر سهرۆكاتیا زانكۆیا دهۆكێ ب دووماهى دهات.
ل ڤان پێنج سالێن بۆرى (2013 ـ 2017) و ب دهستپێخهریا رێڤهبهریا گشتییا رهوشهنبیرى و هونهرى ل پارێزگهها دهۆكێ جارهكا دى ئهڤ نهریته هاته زیندیكرن و جهێ شانازى و دهست خۆشیێ یه، و دگهل زیندیكرنا رۆژا پارێزگههبوونا دهۆكێ كو دكهڤیته 27 ى گولانێ ژ ههر سالهكێ ئهڤ كهرنهڤاله جوانتر و رێكوپێكتر دهێته گێران و ب سهدان چالاكییان ڤهدگریت، ژبلى نیشادانا كۆمێن تهخێن خزمهتكار ژ ههمى چینان ترۆمبێلێن مهزنێن بارى دهێنه خهملاندن و چهند چالاكیێن دى یێن هونهرى و رهوشهنبیرى و پیشهیى ژى دهێنه ئهنجامدان و تشتێ سهرنج راكێش ئاههنگێن ئیمزاكرنا پرتووكانه نهخاسم كو ئهو بهرههم گرێدایى مێژۆ و دیرۆكا دهۆكێ نه و دبیته بهرههمهكێ دیترێ ئاڤاكرى ل سهر یا ههیى.
سهرهرایى گرفتا دراڤى و بهرتهنگیا رهوشا ئابوورى ل كوردستانێ ئهڤ نهریتێ سالانه بهردهوامبوو و ب شیانێن خوهیى یێن هندهك كهسێن شارهزا و خهمخۆر و سازیێن پشكدار و پشتهڤانیا راستهوخۆیا حوكمهتا ههرێما كوردستانێ و نهخشهدانان و رێبهریا رێڤهبهریا گشتییا رهوشهنبیرى و هونهرى ل پارێزگهها دهۆكێ و كهس و تیمێن خۆبهخشێن د گهل كاردكهن و هاریكارى و ههڤكاریا گشت لایهنێن پشكدار بووینه ئهگهرێ بهرچاڤكرنا ڤێ كهرنهڤالا سالانه كو ل سالێن بهێت دێ بیته ئێك ژ سیما و نهریتێن جوانێن دهۆكێ و خهلكێ بپارێزگهها دهۆكێ ب ههمى قهزا و ناحیه و كۆمهلگههـ و گوند ڤه شانازیێ پێبكهت و ببته خالهكا دیرۆكى د مێژۆیا دهڤهرا بههدینان ههمیێ دا.
