ئیراقا شهندیلا مهندیلا و بهختێ مه یێ رهش!
دهمێ مرۆڤێ بچویك گهلهك رهنگێن یاریان دكهت، ئهو یارى پتر ب بهختیڤه دگرێداینه، بهحسێ خهبهرى: شهندیلا مهندیلا ئهو یاریه كو لایهكێ دهستێ خوه دیاردكهت ههكه ئێك یێ جودابیت دێ ئهو ب سهركهڤیت، دیساڤه حاجى ماجى و یاریا ئێلهڤهن دولهڤهن كا دێ دۆر كهفته كێ دێ ئهو بیته یێ سهركهتى. مهتهلا مه و ئیراقێ یا ب ڤى رهنگیه، ئهڤه نێزیكى چهڕخهكى بۆرى، چهرخهك ژ خوینرێتنێ، چهڕخهك ژ بێبهاكرنا مرۆڤا، كوشتنێ و تهرابهركرنێ، ههمى ئالاڤێن ژیانێ بۆ نههێلانا مرۆڤا دهاتنه بكارئینان.
ئهڤ شهندیلا مهندیلا یێن سهد سالێن بۆرى دا هاتینه كرن، د ههمى قهومینان دا پهحنیا دهستێ مه یێ ڤهكرى بوو، بهلێ ههردو دهستێن دى پشتا وان یا دیار بوو، نه ب تنێ ژى پشتا وان یا دیاربوو، بهلكى دهمارێن خوینێ ژى ل سهر دیاربوون، ئهو دهمار د شین و كهسك و رهش بوون، بهختێ مه و وان رهنگا گهلهكێ رهش بوو، چ تشت بۆ مه پێڤه نههاتن، مه گۆت دا پشتا دهستێ خوه دیاركهین، بهلكى ڤێجارێ بهختهكێ سپى بدهته مه و باشتربیت، بهلێ دهمێ مه پشتا دهستێ خوه دیاركرى، گهلهك شفتانێن تهڕ ڤێكهفتن و خوین ژێ هاته خارێ.
دبیت پرسیار كهین كو دڤان سهدسالێن بۆرى دا مه چ ل ئیراقێ دیتیه، بهلێ ئهز دێ بێژمه ههوه، مه ئهڤ تشتێن دیتین:
1ـ كوشتن و تهرابهركرن و ئهنفال و سێدارهدان و وێرانكرنا گوندا و سوتنا ئهردى و رهڤ و ترس و برس و چهل و دهشتان و پێچولكا مه ب ملێ مه ڤهبوو ل ڤى تخویبى بۆ وێ ههنێ و ژڤێ نهالێ بۆ وان ههنێ.
2ـ وهلاتیێن ب هژمار و كریار لۆكه (2) بووین یان ژى سێ و چار بووین، ههر وهختێ ئهرهب ل سهر ڤێ ئاخێ ههبن، ئهو وهلاتیێن بژاره و ژێگرتى و تهخا سهرینه، وهكى دى یێن دى ژى تنێ ئالاڤهكن د ناڤ ئیراقێ دا دێ ل بن كهفشێ ئهرهبان ژین ههكه نه د خالا ئێكێ دا مه رۆهن كربوو.
بهلێ سحبهت ل ڤێرێ ژى ب دووماهى نههات، دهمێ شهندیلا مهندیلا یا دووماهیێ هاتیه كرن، پهحنیا ههر سێ دهستا یا دیار بوو، بهلێ دهستهكێ كهسك بوو، دهستهكێ دى ژى یێ رهش بوو، تنێ دهستێ كوردان یێ سپى بوو، ئهوى دهستێ رهش داعش ب مهرا بهردا، وى دهستێ كهسك قویتێ خهلكى برى و هێلاینه برسى، من دڤێت بزانم دێ ل هیڤیا چ مینین، پشتى سهدسالا دێ ل هیڤیا حهقێن مرۆڤا و مرۆڤاهیێ بین، وهى خهون بیت، پشتى سهدسالا دێ ل هیڤیا قانونهكێ بین كو ئهم ههمى وهكى ئێك بین، ئێكجارى ئهڤ پرسیاره یا بكهنیه، پشتى سهد سالان دێ ل هیڤیا محهمهد مههدیهكى بین كو گورگ و مهـ پێكڤه بژین، ئهزێ ل هزرێ ژ خیالێ وێڤهتره، ئهز نزانم دێ ل هیڤیا چ بین! ئهڤێ پرسیارێ دێ كهینه بهخت یان ژى دێ ب ئهقلى ل سهر شۆلكهین، ئهوێ ل هیڤیێ بن كو دێ جارهكێ لهزهتهكێ ب ئیراقێ بهن، ب دیتنا من ئهوان هاى ژ چ تشتێن ئیراقێ نینه یان ژى چ ژ دیرۆكا وێ نزانن.
ئهڤه دهستۆدانێ ئیراقێ یێ سهدسالێن بۆرى بوو، چ سیناهیهكا ژیانهكا خۆش لێ دیار نینه، چ جارا ژى بهارهكا پێكڤهژیانێ لێ پهیدا نابیت، بهلكى ههمى با و بارۆڤێن كهربوكینى و نههێلانێنه، دو رویى (نفاق) ژى رۆژ ب رۆژێ یا پتر لێدهێت، هندهك جارا ئهم كراسهكێ درێژ بۆ سهركێشهكێ ئهرهبا كهردكهین، بهلێ بۆرینا دهمى ئهو كراسه هند كورت لێدهێت ئێدى ههمى تشتێن د هزرا مه دا دبنه بهرۆڤاژى. ڤێجا ل هیڤیا چ بمینین، دا دهلیڤهكێ بدهینه خوه، ههیامهكى بۆ خوه بژین، بهلكى چێتر بیت!.
