گۆڕان پشتی ژ دهستدانا نوشێروان مستهفا بهر ب كیڤه؟
تهڤگهرا گۆڕان یا ژ ئهنجامێ وێ ژ ههڤدووریا د ناڤا سهركردایهتیا ئێكهتیا نیشتمانی دا كو دبهت ئهو رێكهفتنا ستراتیجا د ناڤبهرا ئێكهتی و پارتی دا یهك ژ ئهگهرێن ههری سهركی یێن پهیدابوونا وێ تهڤگهرێ بیت، پشتی بۆرینا نێزیكی نهه سالان ئهو رێكخهرێ خوه یێ كو د چاڤێن وان دا مرۆڤهك كاریزما و پێشهنگ بوو ژ دهست دا و نها مینا زارۆیهكێ بێ باب د مینیت ئهو بابێ كو زۆربهیا لایهنگرێن گۆڕان د وێ باوهرێ دانه كهس نهشێت وێ ڤالاتیا وی ل پشت خوه هێلای پڕ بكت ههر چهنده ئهڤ هزرا وان دژی گۆتنێن وان بخوهنه كو دهربارهی سهركردێن پارتێن دی دا دگۆتن، لێ نها ئهو بخوه یێن تووشێ وێ لێهمشتێ بووین و ئهو بخوه ل سهر خوه بووینه دیدهڤان كو نهشین جهێ نوشیروان مستهفای پڕ بكن..
نوشێروان مستهفا ب جدابوونا خوه ژ ئێكهتیا نیشتمانی شیا كۆمهكا ئهندام و لایهنگرێن وێ پارتێ كو زۆربهیا وان كهسێن یاخی بوون ژ سیاسهتا ئێكهتی نیشتمانی و ئهگهرێ وێ یێ سهرهكی ژی مه ل سهری باسكر ل دۆر خوه كۆم بكت و ب هزر ئایدیایهكا نوی پشكداری پرۆسا سیاسیا ڤێ ههرێمێ ببیت ب تایبهت ژی پشتی كو كۆمهكا بانگهشێن بریقهدار و كریارێن رۆكهش كری د ناڤا خهلكی دا شیا مهیلا زۆر ژ خهلكی بۆ خوه راكێشیت لێ ئهڤ چهنده زۆر نهڤهكێشا، ههر چهنده تهڤگهره ب ئاشكهرا باس ل ههبوونا كێش و ناكۆكیا د ناڤا خوه دا ناكت، لێ ب راستی ژی كریار د دیار و روۆن كو بال بالێن چهقێن خوه ب سهر بزاڤا گۆڕانێ ژی دا گرتیه و ئهڤ چهنده زۆرتر پشتی دووركهفتنا نوشێروان مستهفا ژ مهیدانا سیاسی و نهخوهش كهفتنا وی دیار دبیت ههر چهنده ئهو وهك بالهكێ ریفۆرمخواز ژ ئێكهتیا نیشتمانێ ڤهبوون، لێ نها گۆڕان بخوه د ناڤ خوهدا بالێ ریفورمخوازان ههیه و دژی زوهرك ژ سیاسهتا سهركردایهتیا گۆرانێ نه ل ههمبهری كێشه و بویهرێن ڤێ داویێ ل كوردستانێ و ب تایبهت ئهوا گرێدای ب سیاسهتا گۆڕان د گهل هندهك پارتێن دی ب تایبهت ژی پارتی دیمۆكراتی كوردستان و تهگهره خستن ل ههمبهر بهر ب پێشچوونا پرسا ههرێمێ ل ناوچێ و نێزیكبوونێ ژ مالكی ههلبهته ل ههمبهری ڤێ رهوتا ریفورمخواز ژی رهوتهكا توندرهو كو ب راستی ژی زۆر د دیار و ئاشكهرانه پری كینه ب دلن ل ههمبهر پارتی و تهنانهت دهستێ خوه ژ چو كریارهكێ ژی نادن پاش بۆ كێمكرنا رۆلێ پارتی د ناڤبهرا ڤان ههردو رهوتان دا رهوتهكا میانرهو خۆیا دكت كو مهرهمێن وان تنێ جێ بهجێكرنا وان ئامانجێن بریقهدارن كو ل دووڤ وێ ئامانجێ دهست ژ لایهنێن خوه بهرداینه و نها خهباتێ پێخهمهت وێ یهكێ دكن ههر چهنده ئهڤ رهوهته زۆر لاوازتر دیار دكت ژ ههر دوو رهوتێن دی لێ ههر چاوا بیت نوشێروان مستهفا ههتا راددهیهكێ شیابوو ڤان وهرتان ل ژێر یهك خیڤهك كۆم بكن و نههێلیت ئهڤ چهنده گهشه بكت و ئهنجامێن خراب لێ بكهڤن، لێ ئهوا جهێ پرسێ یه ئهرێ تهڤگهرا گۆڕان دێ پشتی نهمانا نوشێروان مستهفای چاوا شێت ڤێ خیڤهتێ ب ههمی رهنگێن خوهڤه ڤهدای راگریت؟ دبیت ئهوا مه باس لێ كری هندهك لایهنان باش خواندبیت و ههست پێ كربیت و گۆڕان وهك زهلامێ نهساخ دیت بیت، لهوما ههر زۆر پێشنیازا ههڤگرتنێ ئاراستهی تهڤگهرێ كر، لێ ب باوهرا من ئهڤ یهك هند ئاسان نابیت و بزاڤا گۆڕان سهررای ههمی كێش بێشێن خوه ڤه چو ههڤگرتنهكێ ل گهل هیچ لایهنكێ ناكت لێ یا ژ وێ گرنگتر ژی ئهوه دڤێت گۆڕان بزانیت ئهو قاعیدێ وێ یێ جهماوهری ل دۆر نوشێروان مستهفای كوم ببوو ههر چهنده ئهو د داخۆیانیێن خوهدا وێ یهكێ رهد دكن، لێ ئهڤه راستیهكا حاشا ههلنهگره و دڤێت ئهو ژی ڤێ یهكێ بزانن یا ژ وێ ژی گرنگتر ئهڤ ئهڤ تهڤگره یا ل ناڤا كهدوارهكێ كوردهواری و رۆژههلاتا ناڤهراست دا كو رولێ بنهمالێ زۆر گرنگه و كهسێن نێزیكی نوشێروان مستهفای وهك مالبات هند ب ئاسانی دهست ژ جهێ وی بهرنادهن و ئهڤ یهكه ژی دێ گۆڕان تووشی كێشهیان كت، لهوما ژی ژ ئهوا مه باس كری گۆران پشتی نوشێروان مستهفای دوور نینه تووشی قهیرانێن مهزن ببیت و ئهنجامێ وێ ژی دابهشبوونا لایهنگرێن وێ بیت ل سهر پارتی و ئێكهتی دا، لێ دوور دبینم گۆڕان وهك تهڤگهر بریارا حهلكرنا خوه بدهت گۆران وهك تهڤگهر دێ مینیت لێ ئهو پیگهیا خوه یا جهماوهری نابیت و ئهو گۆرانا دمینیت دێ زۆر توندتر بیت ژ ئهوا نها دبینین …
