زانياريێن نوو ل سه‌ر شه‌رێ ميحوه‌رێ ره‌بيعه
ئه‌ڤرۆ نيوز، نيوار محه‌مه‌د سه‌ليم:
پشتى ئه‌ڤرۆ سپێدێ ل ده‌مژمێر 6:00 چه‌كدارێن داعش هێرش كريه سه‌ر پێشمه‌رگێ كوردستانێ، هێرشێن وان هه‌موو هاتنه تێكدان و ب گۆره‌ى سه‌ركرده‌كێ پارتى كو د هه‌مان ده‌م دا وه‌كو خۆبه‌خش ل به‌ره‌ى شه‌رى يه، دا زانين كو چو ژ وان كه‌سێن هێرش كرى، رزگار نه‌بووينه.
ئه‌ندامێ جڤاتا سه‌ركرداتيا پارتى ديموكراتى كوردستان و به‌رپرسێ لقا هه‌شت يا پارتى كو د هه‌مان ده‌م دا وه‌كو خۆبه‌خش ل سنورێ ميحوه‌رێ ره‌بيعه‌يه بۆ ئه‌ڤرۆ نيوز گۆت: “ئه‌ڤرۆ سپێدێ ل ده‌مژمێر 6:00 سپێدێ ل رۆژهه‌لاتێ ره‌بيعه داعش ب ئاماده‌كاريه‌كا باش ڤه كو خوه‌كوژ ژى ل گه‌ل بووينه هێرش كريه سه‌ر به‌ره‌يێن پێشيێ يێن پێشمه‌رگه‌ى و پاشان ژى هێزێن باش يێن پێشمه‌رگه‌ى د هه‌وارێ هاتن وه‌كو پێشمه‌رگێ ئه‌رز و ليوا هه‌شت يا ره‌بيعه و سۆپايێ بارزان و له‌شكرێ گۆلان و هنده‌ك ژ هێزێن ل زۆمار هه‌ين”.
سه‌ربه‌ست له‌زگين زێده‌تر گۆت: “شياين جهێن ئه‌وان د هێرشا خوه دا گرتى، ب هێرشێن پێشمه‌رگه‌ى و فرۆكێن جه‌نگى ژ ده‌ستێن وان بينينه ده‌ر و هنده‌ك ژ ترۆمبێلێن وان يێن سوتين و هنده‌ك ژى يێن كه‌فتينه ده‌ستێ پێشمه‌رگه‌ى و 18 ته‌رم ژى كه‌فتينه ده‌ستێ پێشمه‌رگه‌ى ژ سه‌رجه‌مێ 35 كه‌له‌خان، باوه‌رناكه‌م ژ ئه‌و هێزا هاتى كه‌س ژێ قورتا ببيت و ئه‌وێن خوه‌كوژ ژى يا خوه په‌قاندى”.
ئاشكه‌را ژى كر كو پێشمه‌رگه‌ى سه‌ركه‌فتنه‌كا باش يا ب ده‌ست ڤه ئينايى و گه‌له‌ك زيانێن مه‌زن ژى يێن ب داعش كه‌فتين و گۆت: “ئه‌و شه‌هيد و بريندارێن مه هه‌ين ژى ب گۆره‌ى ئه‌و چه‌ك و چه‌كدارێن وان ل گه‌ل خوه ئيناين، گه‌له‌ك نينن”.
سه‌ربه‌ست له‌زگين نه‌ڤه‌شارت ژى كو ل گه‌ل ئه‌و كه‌سێن ته‌رمێن وان كه‌فتينه ده‌ست پێشمه‌رگه‌ى، كه‌سێن ئه‌لمانى و فره‌نسى و بيانى گه‌له‌كێن دى ل گه‌ل هه‌بووينه.