6 پهرتوك = نیف نهفهر كهباب !
ب دروستى ژبهریا دو حهفتیان بو , دهما كو بهرێز كاك دلخاز موساى(وهك رێڤهبهرێ رێڤهبهریا رهوشهنبیرى وهونهرى ل زاخو ) تلفونا مه كرى كو سوباهى ل گۆرهپانا باخچێ پرا دهلال ل زاخو دێ پیشانگهههكا پهرتوكان هێَته نمایش كرن ,و ژمه خواست بۆ ڤهكرنا پیشانگههێ ئامادهبین ( ئهڤ پیشانگههه ژئالیێ پیشانگهههكا ناڤدارا دهوكێ ڤه ب ههڤكارى دگهل رێڤهبهریا رهوشهنبیرى و هونهرى ل زاخو هاتیه ڤهكرن و ببهایێ بتنێ ئێك ههزار دینار بۆ ههر پهرتوكهكێ و بۆ ماوێ دهه رۆژان بهردهوم دبیت ) ..
ههلبهت ئهڤه بۆ پتر ژجارهكێ یه دماوێ ئهڤان چهند ساڵان دا ئهڤ چالاكى یه دهێته ئهنجام دان , وتشتێ بهرچاڤ ل پیشانگهها ئهڤ ساله دانانا ئهڤێ بهایێ كێم ( ههزار دینار بۆ پهرتوكهكێ ) كو ب سهدان جۆرێن پهرتوكان تێدا هاتبون نمایش كرن ب شێوهیهكێ رێك و پێك و دپتریا بیاڤێن ئهدهبى ,زانستى ,هونهرى ,سیاسى ,
دیرووكى… یێن جۆراو جۆر و ب زمانێن كوردى , عهرهبى, ئینگلیزى … ههر ژ چاپێن سالێن حهفتیان و ههتا یێن ئهڤرو .. ههلبهت ناڤ و نیشانێن پهرتوكێن گهلهك ژێهاتى و ب مفا دكهفتن بهر چاڤ وهك میناك پهرتوكا ( مهد البشریه – لاندكا مرۆڤایهتیێ ) َكو ژئالیێ ههردو برایێن گهرَوك یێن ئینگلیز ( ویگرام ) ڤه هاتیه نڤیسین لدور گهڕیانا وان ل كوردستانێ ل دهستپیكا چهرخێ بورى .. و ژئالیێ نڤیسهرێ ناڤدار جرجیس فتح ألله هاتیه وهرگێران بۆ زمانێ عهرهبى كو ژ ( 350 ) بهرپهران پێك دهێت ب چاپ و دیزایینهكا گهلهك جوان و ژێهاتى ( ئهڤ پهرتوكه ژى ئێك بۆ ژ ئهوان دوازده پهرتوكێن مه ههر ئێك ب هزار دینارهكێ كرى )!
پیشانگهه هاته ڤهكرن بئامادهبونا ههژمارهكا نڤیسهر و رهوشهنبیر و رۆژنامهڤانێن باژێرى ( بێى ئامادهبونا هیچ بهرپرسهكێ دامو دهزگههێن ئیدارى )!
وهكو گهلهك ئێڤاریان و چونا پرادهلال , ئهڤێ جارێ ژى كۆرێ من ( دیار) یێ دوازده سالى دیساڤه دگهل من هات و لدهمێ من هندهك پهرتوك ژێ دگرتن ودكرین ئهوى ژى هندهك ژمن ههلدگرتن وههتا من دیت ههژمارا پهرتوكان گههشتى یه دوازده پهرتوكان,(دیارى)ل من نێرى و بههمى بهرائهتا زارۆكان گوته من باب ئهڤه ههمى بۆ چنه مه گهلهك كتێب یێت ل مال ههین !
بههر حال مه ههر دوازده پهرتوكێن خۆههلگرتن و دوازده ههزار دینارێن خۆ دانه ئهوى گهنجێ ددهرگههێ پیشانگههێ دا ..
ئهڤ جۆره چالاكى یه و دهستپێشخهرى یه جهێ رێزگرتنێ یه ب تایبهت دهست نیشان كرنا ئهوى بهایێ ( ههتا رادهیهكى رهمزى )
بۆ كرینا ههر پهرتوكهكێ نهخاسمه دئهڤێ رهوشا ئالوز و قهیرانا ئابوورى وبێكاریێ كو خهلكێ مه تێدا دهرباز دبیت نهخاسمه تهخا گهنجان وقوتابیان بپلا ئێكێ كو بهروكێ خواندنێ و خۆ رهوشهنبیر كرنێ پتر ب بههرا ئهوان دهێته ههژمارتن ..
ههلبهت كهلتورێ خواندنێ ئێكه ژپیڤهر وبنهمایێن پێشكهفتنا ههر جڤاكهكى ,و ههتا ژبهرى یا چهند ساڵان ژى ( جڤاكێ ئیراقێ ب كوردستان ڤه) ژ وهڵاتێن ئێكێ یێن دبیاڤێ خواندنا پهرتوكێدا لسهر ئاستێ وهڵاتێن رۆژههلات دهاته ههژمارتن ههتا رادهیهكى دئهڤى بیاڤى دا گوتنهكا بهربهلاڤ ههبو دگوت ( هزر ژ وهلاتێ مصرێ دهێت و ل بهیروتێ چاپ دبیت و ل ئیراقێ دهێته خواندن ) ..
لێ ل دهمێ زڤڕینا مه ژ پیشانگههێ و دویركهتنا مه ب دوو سهد مهترهكان كو راسته راستى خوارنگهههكا نیمچه نورمال هاتین ( كو ههژمارا نهفهرێن وێ پتر بون ژیێن ڤهكرنا پیشانگههێ !) ئهو راستیا تهحل هاته بهرچاڤ كو ئێدى ئهو گوتنهژى ئێخستیه یه بهر گومانێ یاكو دگوت ( پهرتوك باشترین ههڤاله ) یان ژى هاوڵاتیێ ئهڤێ دهڤهرێ باشترین خواندهڤانه بۆ پهرتوكێ ( ههر چ نهبیت د ئهڤێ قوناغا ئهم تێڕا دهرباز دبین)..بتایبهت پشتى (دیارێ زارۆ) ژ من خواستى ئهڤ جاره شیڤا خۆ ل خوارنگههێ بخۆت .. ودهمى نیف نهفهرێ خۆ یێ كهبابا خوارێ و پسولا بهایێ خوارنێ هاتى لسهر نڤێسى بو شهش ههزار دینار…ئانكو بهایێ شهش پهرتوكان!
