بەلگەنامێن ” ئابوت ئاباد” پەیوەندیێن ئیرانێ و قاعیدە پتر ئاشكراكرن
ئەڤرۆنیۆز، ئەیاد بەرواری
پشتی ئاژانسا هەوالگیریا ئەمریكی (CIA) بەلگەنامێن “ئەبوت ئاباد” بەلاڤكرین كو هێزێن ئەمریكی ژ جهێ نهێنیێ سەرۆكێ رێكخستیا قاعیدە یا تیرۆرستی (ئۆسامە بن لادن) ل پاكستانێ دەست ب سەردا گرتبوو ل دەمێ كوشتنا وی ل سالا 2011 وتێدا پەیوەندیێن دەستهەلاتا ئیرانێ ل گەل قاعیدە ئاشكرا دكەت.
ئاشكراكرنا وان بەلگەنامان ژلایێ هەوالگیریا ئەمریكی ڤە، كارڤه‌دانا خوه هه‌بوو ژلايێ بەرپرسێن ئیرانێ ڤه. محەمەد جەواد زەریف وەزیرێ دەرڤەیێ ئیرانێ دتویتەكی دا ل سەر تۆرا جڤاكی یا تویتەری دبێژیت (ئەو چەندا دوان بەلگەنامان دا هاتی دەنگوباسێن چێكرینە وب چو شێوەكی رۆلێ هەڤپەیمانێن ئەمریكا دروودانا 11 سپتێمبەرێ دا نا هەلوەشینیت).
ژ 470 هزار بەلگەنامێن ژ جهێ نهێنیێ ئۆسامە بن لادنی هاتینە دیتن، 19 بەرپەر ل دۆر پەیوەندیێن ب هێز یێن رێكخستیا قاعیدە یا تیرۆرستی ل گەل حوكمەتا ئیرانێ بوون، د ئێك ژ وان بەلگەنامان دا، بەرپرسەكێ دیار یێ قاعیدە بەحس دكەت كو ئیران یا بەرهەڤە هەر تشتەكێ رێكخستیا قاعیدە پێدڤی پێ هەی بۆ دابین بكەت ژوان ژی دراڤ و چەك وسەربازگەهێن مەشقكرنێ یێن (حزبوللاه) ل لوبنانێ، ل بەرامبەر هێرشێن وێ رێكخراوا تیرۆرستی ل سەر بەرژەوەندیێن ئەمریكا ل سعودیێ و كەنداڤی ل دووڤ ڤەكۆلینەكا هاتیە ئەنجامدان ژلایێ تۆماس جوسلین و بیل راجیف هەردو ڤەكۆلەرێن ب سەر (پەیمانگەها بەرگریێ ژ دیموكراسیەتێ) ڤە ل دۆر هووردەكاریێن وان 19 بەرپەرێن بەلگەنامێن “ئەبوت ئاباد” یێن گرێدای پەیوەندیێن قاعیدە و ئیرانێ ژ وان بەلگەنامان.
وان بەلگەنامان ئاشكرا كریە ژی كو هەوالگیریا ئیرانی دهندەك حالەتان ئاسانكاری كرینە ددەركرنا ڤیزا بۆ ئەندامێن قاعیدە یێن راسپاردی ب ئەنجامدانا كریارێن تیرۆرستی، زێدەباری حەواندنا چەندین ئەندامێن وێ رێكخراوا تیرۆرستی وقاعیدە دانوستاندن ل دۆر وێ رێكەفتنێ ب رێیا (ئەبو حەفس موریتانی) ئەنجامدابوون كو ئێك ژ ئەندامێن قاعیدە یێن كاریگەربوو بەری هێرشێن 11 سبتمبەرێ.
دەزگەهێن راگەهاندنا ئیرانی یا فەرمی ئەو بەلگەنامە پشت گوه هاڤێتینە وب پشكەك ژ هەوا سەرۆكێ ئەمریكی دونالد ترامپ ومەزنە بەرپرسێن هەوالگیریێ دژی ئیرانێ هژمارتینە.
ل دۆر ڤێ پرسێ،رزگار خالد بسپۆرێ په‌يوه‌نديێن نێڤده‌وله‌تى بۆ (ئه‌ڤرۆ نيۆز) گۆت( پەیوەندی دناڤبەرا ئيیرانێ و رێکخراوا “قاعيدە” یا تیرۆرستى ل سەرچەند خالێن هه‌ڤپشك پێکهاتی یە ئه‌وژى” دوژمنێ دوژمنێ من دوستێ منە” یا خۆیایە ئەمریکا دوژمنێ سەرەکی یێ هەردو رەخایە، لەوما تەهرانێ سەرکردە وکەسانێن کاریکەر يێن قاعدە ڤەحەواندن و راهێنان و مەشق کرن دناڤ ئاخا خوه دا بەری و پشتى 11 سبتمبرێ ژبۆ تێکدانا بەرژەوەندیێن ئەمریکا بتایبەت ل وەلاتێ سعودیێ. هەروەسا رێخوه‌شکرنا هنارتنا قاعيده بۆ عيراقێ وسووریێ ویەمه‌نێ).
رزگارى خوياكر( هاریکاریا قاعيدە ب دراڤ وچەک دیسا مەشق کرن دناڤ مه‌يدانێن لەشکری يێن حزبوللا يا لوبنانی کارەکێ نورمالە. هەروەسا ب دیتنا ئيرانێ دڤێت قاعيدە بکاربینیت دژی یەپەکێ ل رەقە ودێرلزور، چونکى لاینه‌گرێن ئەمریکانە. بەلێ پێدڤيه دهەمان ده‌مدا ژبیر نەکەین ئارمانجا ئيرانێ به‌لاڤکرنا هزرا شیعە گەری یە و پرنسیبێن شۆرەشا ئیسلامی يا ئيرانی و قاعيدە بەرامبەر به‌لاڤکرنا هزرا وەهابی و دژایەتیا رژێمین ئیسلامی يێن لاینه‌گرێن رۆژئاڤاى).
ئاماژه دا ژى( ل دووڤ راپۆرتا 19 به‌رپه‌رى ئه‌وا هاتیە به‌لاڤکرن سەبارەت پەیوه‌ندیێن ئیرانێ وقاعيدە، دیسا ب هزاران ڕاپۆرت ودوکیومنتێن دی، ب دیتنا من ناکوکی ونەبوونا باوەریێ دناڤبه‌را دو ئایديولۆژيێن جودا یا بەردەوامە، بەلێ بەرژەوەندیێن هەڤپشك يێن ده‌مكى ژی بەردەوامن).
ل دووماهيێ رزگارى گۆت ( رێکخراوێن تیرۆرستى وەکو پاسدارێن ئيرانێ وقاعيده و داعش وبه‌ره‌يێ نوسره وحزبوللا يا لوبنانى وحزبوللا يا عيراقيى و عه‌سائب اهل الحق، ژلایێ ئيرانێ ڤه يێن هاتینە بکارئینان چ ب شيێوه‌كێ راستەوخوه يان نه‌راسته‌وخوه دژی ئە مریکا وهه‌ڤپه‌يمانێن وێ ل رۆژهەلاتا ناڤەراست).
ل سالا 2016 ێ، دادگەهەكا ئەمریكی ل نیویۆركێ، ئیران ب ئەداكرنا گۆژمێ 10 ملیارا دۆلاران سزادابوو ب تۆمەتا هەڤكاریكرن ل گەل قاعیدە دهێرشێن 11 سپتمبەرێ دا، زێدەباری سەپاندنا سزایێن ئەداكرنا 21 ملیار دۆلاران بۆ خێزانین قوربانیێن ئەمریكی ئەوێن ل پەقینان ل سعودیێ و لوبنانێ و كوێتێ دهێرشێن تیرۆرستی ئەوێن ژلایێ شانێن زێرەڤانێن شۆرەشا ئیرانێ (پاسداران) ڤە هاتینە ئەنجامدان.
دادگەها ئەرۆپی ل لوكسومبورغ ژی بریارەك دەركربوو ل دۆر دەست ب سەرداگرتنا گۆژمێ ملیار و 600 ملیۆن دۆلارێن بەنكا ناڤەندیا ئیرانی ل ئورۆپا بۆ خێزانێن قوربانیێن هێرشێن 11 سپتمبەرێ.