وه‌زاره‌تا ساخله‌ميێ: به‌غدا ده‌رمان ژ كوردستانێ برِين
ئه‌ڤرۆنيۆز:
وه‌زاره‌تا ساخله‌ميێ ل هه‌رێما كوردستانێ،ل دووڤ رووداو، راگه‌هاند، ده‌مێ هه‌فتيه‌كێ يه به‌غدا پشكا ده‌رمانێ هه‌رێما كوردستانێ نه هنارتيه وب ڤێ چه‌ندێ ژى هه رێم تووشى كێمى و نه‌بوونا ده‌رمانان بوويه، ب تايبه‌تى ده‌رمانێن نه‌خوه‌شيێن دوم درێژ.
ل هه‌رێما كوردستانێ 3 كۆمپانيێن دروستكرنا ده‌رمانان و180 كۆمپانيێن ئينانا ده‌رمانان يێن هه‌ين، وه‌زاره‌تا ساخله‌ميێ ژى دبێژيت بۆ دابينكرنا پێدڤيێن خوه مفاى ژ وان كۆمپانيان وه‌ردگريت.
پشتى 25 ئه‌يلۆلێ نه‌خوه‌شخانێن جكومى ل هه‌رێما كوردستانێ تووشى نه‌بوون و كێميا ده‌رمانان بووينه، ل دووڤ راپۆرته‌كا رووداو، بتايبه‌تى ده‌رمانێن نه‌خوه‌شيێن دوم درێژ، پشتى وێ رۆژێ به‌غدا تنێ ب سێ قۆناغان 160 جۆرێن ده‌رمانان يێن هنارتين، ده‌مێ هه‌فتيه‌كێ يه ژى چو جۆره ده‌رمانه‌ك بۆ هه‌رێمێ نه هنارتيه.
بۆ ده‌ربازبوونێ ژ وێ قۆناغێ، وه‌زاره‌تا ساخله‌ميێ دخوازيت مفاى ژ شيانێن 180 كۆمپانيان و سێ كارگه‌هێن دروستكرنا ده‌رمانان وه‌ربگريت، ل گه‌ل وێ چه‌ندێ ژى حكومه‌ت ب گۆژمێ 100 مليۆن دۆلاران كو پارێ سێ سالان يێ كۆمپانيێن ئينانا ده‌رمانان يا قه‌رداره، سه‌ره‌راى وان قه‌ران ژى، كۆمپانى ناخوازن پشتا خوه بده‌نه حوكمه‌تێ.
بۆ كرِينا ده‌رمان وپێدڤيێن نوژدارى، هه‌رێما كوردستانێ سالانه پێدڤى ب 100 مليۆن دۆلاران هه‌يه، ژ وێ رێژێ هه‌يڤانه حوكمه‌ت دشێت تنێ 6 مليار ديناران داين بكه‌ت، هه‌كه ره‌وش ب ڤى شێوه‌ى به‌رده‌وامبيت دێ قه‌يران كوورتر بيت.