نووترين پێزانين ل سه‌ر دانا پارێن كارمه‌ندێن كۆمسيۆنێ
ئەڤرۆ نيوز، نیوار محەمەد سەلیم:
ئاخفتنکەرێ ب ناڤێ کۆمسیۆنا بلندا سەربەخۆیا ھەلبژارتن و راپرسیێ ل ھەرێما کوردستانآ رادگەھینیت کو کۆمسیۆن دێ د رێیا پەیرەوێ تۆمارا دەنگدەران دا د ماوێ ھەیڤەکێ دا تۆمارا دەنگدەران پاقژ کەت. ئاشکەرا ژی کر کو پارێ سەر سندوقێن دەنگدانێ ل ھەلەبچە ھاتیە بەلاڤکرن و ل ڤان نێزیکان دێ ل پارێزگەھێن دی ژی ھێتە بەلاڤکرن.
شێروان زرار ئاخفتنکەرێ ب ناڤێ کۆمسیۆنا بلندا سەربەخۆیا ھەلبژارتن و راپرسیێ ل ھەرێمێ گۆت: “ل سەر داخوازا لایەنێن سیاسی و رێکخراوێن جڤاکێ مەدەنی و نەتەوێن ئێکگرتی، د ماوێ حەفتیا بۆری دا کۆمسیۆنێ لژنەک پێک ئینایە، ب مەرەما دارشتنا پەیرەوێ پاقژکرا تۆمارا دەنگدان”.
زێدەتر گۆت: “نوکە ئەو پەیرەو یێ ب دووماھی ھاتی و چاڤەرێ دھێتە کرن ژ لایێ کۆمسیاران ڤە بھێتە پەسەندکرن، ب گۆرەی وی پەیرەوی د ماوێ ھەیڤەکێ دا تۆمارا دەنگدەران دێ ژ ناڤێن مریان و دووبارە و ئاواران ھێتە پاقژکرن”.
ئاماژە ب وێ چەندێ ژی کر کو بەری حوکمەت و پەرلەمان کۆمسیۆنێ راسپێرن ئەو دێ بزاڤێ کەن تۆمارا دەنگدەران پاقژ کەن، پاشان دێ ل گەل روونن ب مەرەما دانانا ژڤانەکی بۆ ھەلبژارتنێن بھێت یێن کوردستانێ.
نەڤەشارت ژی کو د ماوێ داھاتی دا کونفرانسەک دێ دەربارەی پاقژکرنا تۆمارا دەنگدەران ب ئامادەبوونا پەرلەمانتار و رێکخراوێن جڤاکێ سڤیل و لایەنێن پەیوەندیدار ھێتە ئەنجامدان.
ئاخفتنکەرێ ب ناڤێ کۆمسیۆنا بلندا سەربەخۆیا ھەلبژارتن و راپرسیێ ل ھەرێما کوردستانآ خۆیا ژی کر کو کۆمسیۆن ھەموو بزاڤان دکەت کو گازندێن لایەنێن سیاسی نەھێلیت و تۆمارەکا دەنگدەران یا پاقژ ھەبیت، دا کو د ماوەکێ نێزیک دا ھەلبژارتنێن پاقژ بھێنە کرن.
دەربارەی پارێ کارمەندێن سەر سندوقێن ھەلبژارتنێ شێروان گۆت: “ل ھەلەبچە پارێ کارمەندان ھاتیە بەلاڤکرن و نوکە ل کۆمسیۆنێ کار بۆ وێ چەندێ دھێتە کرن کو ب زووترین دەم ل ھەرسێ پارێزگەھێن دھۆک و ھەولێر و سلێمانیێ ژی بھێتە بەلاڤکرن”.
