گرۆپێ چل كه‌زى كونسێرته‌ك گێرا
ئەڤرۆ نيوز، ژيمان سه‌عيد:
ئه‌ڤرۆ گرۆپێ چل كه‌زى كونسێرته‌كا هۆنه‌رى ل زانكۆيا دهۆك گێرا كو دبيته به‌رهه‌مێ ئێكێ يێ ڤى گرۆپى.
ڤیان مایی، رێکخەرا گرۆپێ چل کەزی راگه‌هاند كو ھەر گاڤا پێدڤیەک ھەبیت بیرۆکە بۆ مرۆڤی دروست دبیت، پێدڤیا ولاتی ئەز گەھاندمە وێ باوەریێ کو مە پێدڤی ب چل کەزی ھەیەو دڤێت ژن ب مێیاتیا خوە یا شاناز بیت و چل کەزی ستران و کلتۆرێ مە یێ کوردەواری ب ڤەژینیت.
ڤیان دبێژیت: ل دەمێ کو پێشمەرکە ب تڤەنگا خوە بەرسڤا تیرۆرا ل سەر مللەتێ مە ددەت، گرۆپێ چل کەزی ب ستران و ھونەرێ خوە دێ بەرسڤا ھەر تیرۆرەکا ب سەر مللەتێ مە و بتایبەت ژنێ ھەی دەت و دڤێت ئەم بۆ جیھانێ دیار بکەین کا تیرۆر ژنێ بۆ چ بکار دئینیت و ئەم وەک کورد د چ جوداھی داینە ل گەل وان، دایکێن کوردان زارۆیین خوە ب ستران و حەیرانوک و دلوڤانی ب مەزن کرینە.
ناڤێ چل کەزی وێ چەندێ ناگەھینیت کو ئەڤ گرۆپە چل کچن یان چل کەزی نە، ئەڤە بتنێ ناڤە ئەڤ گرۆپە نوکە ژ 50 کچان پێک دھێت یێن پارێزگەھا دھۆکێ نە و دەلیڤەیا ھەی رێژا وێ پتر لێبھێت.
