جه‌نه‌راله‌كێ ئيسرائيلى:ئه‌م دزانين دێ چاوان قاسم سلێمانى كوژين
ئه‌ڤرۆنيۆز:
جه‌نه‌راله‌كێ به‌رێ يێ ئيسرائيلى ئاشكرا دكه‌ت كو قاسم سلێمانى فه‌رماندێ له‌شكرێ قودس يێ ئيرانى ئارمانجا ئيسرائيلێ يه وئه‌و دزانن دێ چاوان وى كۆژن.
جه‌نه‌رال گيرشۆن هه‌كوهين بۆ كه‌نالێ (i24) يێ ئيسرائيلى راگه‌هاند، قاسم سلێمانى يێ بوويه ئارمانجا ئيسرائيلێ بۆ ژناڤبرنا وى وده‌مێ سه‌رێ هه‌ره‌مێ دهێته ژناڤبرن، ئێدى هه‌موو دلخوه‌ش دبن.
وى جه‌نه‌رالێ ئيسرائيلى گۆت ژى، ب پشتراستى ڤه دبێژم سلێمانى ئارمانجا ئيسرائيلێ يه وپێشتر ژى ئيسرائيلێ چه‌ندين كريارێن كوشتنێ ب ڤى شێوه‌ى يێن ئه‌نجامداين و ئه‌م دزانين دێ چاوان ئه‌نجام ده‌ين، به‌لێ پرسيار ئه‌وه ئايا ئه‌ڤه باشترين چاره‌سه‌ريه بۆ ئيسرائيلێ؟
گۆت ژى، يا باشتر ئه‌وه بۆ ئيسرائيلێ وله‌شكرێ وێ، وى دوژمنى بپارێزيت يێ باش دنياسيت، ل شوونا سه‌ره‌كێ دى بۆ هه‌ره‌مێ بهێته دانان.
دياركر ژى، لۆژيكا ئيرانێ نوكه يا گه‌هشتيه دووماهيێ، ته‌هران يا ل سه‌ر كنارێ قۆناغه‌كا نوو، له‌وما پێدڤيه ل سه‌ر وان كو ب شێوازه‌كێ نوو هزر بكه‌ن.
قاسم سلێمانى، فه‌رماندێ له‌شكرێ قودس يێ ئيرانى يه، كو سه‌رپه‌رشتيا هێزێن ئيرانێ ل ده‌رڤه‌ى سنورێ وهه‌موو ميليشيايێن كريگرتى يێن ئيرانێ ل عيراقێ وسووريێ ولوبنانێ ويه‌مه‌نێ دكه‌ت.
