سه‌رۆك بارزانى:به‌رده‌وام ديالۆك وچاره‌يا ئاشتيانه بژارده‌يا گه‌لێ كوردستانێ بوو
ئه‌ڤرۆنيۆز:
سه‌رۆك مه‌سعود بارزانى ئه‌ڤرۆ سێشه‌مبى 28/11/2017 ل گه‌ل جڤاتا سه‌ركردايه‌تيا هه‌ولێرێ وبه‌رپرس وكارگێرێن لق وناوچێن پارتى ديموكراتى كوردستان ل سنۆرێ پارێزگه‌ها هه‌ولێرێ وئه‌ندامێن په‌رله‌مانى وئه‌ندامێن جڤاتا پارێزگه‌هێ وهژماره‌كا به‌رپرسێن سياسى وئيدارى ل پارێزگه‌ها هه‌ولێرێ كۆمبوو.
دوێ كۆمبوونێ دا، سه‌رۆك بارزانى به‌حسێ دووماهى پێشهاتێن سياسى وريفراندۆمێ وقۆناغا پشتى ريفراندۆمێ كر و روودانێن كه‌ركووكێ ووێ خيانه‌تێ ژى كر ئه‌وا ل به‌رامبه‌رى گه‌لێ كوردستانێ وكه‌ركووكێ وده‌ڤه‌رێن ده‌رڤه‌ى ئيدار هه‌رێما كوردستانێ هاتيه كرن.
سه‌رۆك بارزانى دووپاتى ل وێ چه‌ندێ كر كو به‌رده‌وام ديالۆك ودانوستاندن وچاره‌سه‌ريێن ئاشتيانه ودستوورى بژارده‌يا گه‌لێ كوردستانێ بوو، وپێشيلكرنا به‌رده‌وام يا دستوورى ونه‌هێلانا هه‌ڤپشكيێ ژلايێ حوكمه‌تێن عيراقێ ڤه وه‌كر كو ئه‌ڤ ره‌وشه بهێته رۆژه‌ڤێ، نوكه ژى حوكمه‌تا هه‌رێما كوردستانێ يا به‌رهه‌ڤه بۆ روونشتن وديالۆكێ ل گه‌ل به‌غدا وئه‌وا پێدڤى بۆ رێخوه‌شكرن بۆ دانوستاندنێ يا ئه‌نجامداى وسه‌رگرتنا وێ پرۆسێ دێ ل سه‌ر حوكمه‌تا به‌غدا مينيت كو ده‌ست ژ مه‌رجێن ته‌عجيزى به‌رده‌ت.
بارزانى دياركر كو سه‌پاندنا ئه‌مرێ واقع ب زۆرى، چه‌ك وخيانه‌ت جهێ قه‌بوولكرنێ نينه وئه‌ڤ ره‌وشا نوكه يا ده‌مكى يه ويا به‌رده‌وام نابيت.
