سه‌رۆك بارزانى:عه‌لى عه‌بدوللا خه‌باتكه‌ره‌كێ مه‌زن يێ گه‌لێ مه بوو
ئه‌ڤرۆ نيۆز:
ئه‌ڤرۆ درێ وره‌سمێن چلى يا وه‌غه‌ركرنا عه‌لى عه‌بدوللا ئێك ژ دامه‌زرێنه‌رێن پارتى ديموكراتى كوردستان ل سالا 1946 وجێكرێ سه‌رۆكێ پارتى بۆ ده‌مه‌كێ درێژ، سه‌رۆك بارزانى گۆتاره‌ك خواند وتێدا په‌سنا عه‌لى عه‌بدوللاى وخه‌باتا وى يا دوور ودرێژ ودلسۆزى ووه‌فاداريا وى بۆ ملله‌ت ووه‌لاتى كر، وبيره‌وه‌ريه‌كا خوه ژى ل گه‌ل به‌حسكر.
سه‌رۆك بارزانى د گۆتارا خوه دا گۆت، يا ب ساناهى نينه مرۆڤ به‌حسێ خه‌باتكه‌ره‌كێ وه‌كو عه‌لى عه‌بدوللا بكه‌ت، هه‌ر چ سيفه‌ته‌كا باش هه‌يه دڤى مرۆڤى دا هه‌بوو ، ئێكه‌م جار كو من عه‌لى عه‌بدوللا نياسى ل سالا 1964 بوو ل ده‌ڤه‌را رانيا وقه‌لادزێ، پشتى وه‌غه‌ركرنا جه‌نابێ بارزانى زێده‌تر وژنێزيكتر ورۆژانه ئه‌م پێكڤه بووين.
سه‌رۆك بارزانى ئاماژه دا كو عه‌لى عه‌بدوللا دژيانا خوه‌دا وه‌كو خه‌باتكه‌ره‌ك ووه‌كو سومبۆله‌ك يێ كه‌فتيه ل به‌ر ئه‌زموونێن گه‌له‌ك ب زه‌حمه‌ت، به‌لێ هه‌ميشه خه‌بات وپێشمه‌رگايه‌تى ودلسوزى ووه‌فا هه‌لبژارت ل سه‌ر هه‌ر تشته‌كى دى.
گۆت ژى، پشتى وه‌غه‌ركرنا جه‌نابێ بارزانى، ئه‌م ل سه‌رده‌مه‌كێ ب زه‌حمه‌ت دا ده‌رباز بووين، به‌لێ عه‌لى عه‌بدوللا براگه‌وره‌ييا خوه دياركر وبۆمه برا گه‌وره ومامۆستا بوو وئه‌ز وه‌كو كه‌س گه‌له‌ك تشتان ژ وى يێ فێربوويم، دژيانا خوه‌دا گه‌له‌ك يێ رێكخستى ورێكوپێك بوو، گه‌له‌ك يێ ب هه‌داربوو، گه‌له‌ك يێ ڤه‌كرى ژى بوو، گه‌له‌ك يێ دلسۆز بوو بۆ حزبا خوه ووه‌لاتێ خوه و ملله‌تێ خوه.
بارزانى به‌حسێ بيره‌وه‌ريه‌كا خوه ل گه‌ل كر وگۆت، ل سالا 1982 ئه‌م پيكڤه بووين ل ده‌ڤه‌ركێ ل پشتا سيده‌كان، من پرسياره‌ك ژێ كر وگۆتێ (كاك عه‌لى هه‌كه خودێ ده‌ليڤه دا وئه‌م ب سه‌ركه‌فتين وزڤرين ورژێم ژناڤ بچيت، باره‌گايێ مه‌كته‌با سياسى ل كيرێ دانين؟ وي ژى ئێكسه‌ر گۆت ، كاك مه‌سعود، مه‌سيف ژ هه‌موو جهه‌كى خوه‌شتره) .. سه‌رۆك بارزانى ئاماژێ دده‌ت كو پشتى 1991 جاره‌كێ عه‌لى عه‌بدوللاى گۆته من ( ل بيرا ته‌يه ده‌مێ من وه‌گوتى، من ژى به‌رسڤا وى دا وگۆت به‌لێ باش بيرا من دهێت).
ل دووماهيێ سه‌رۆك بارزانى خوياكر، ديرۆكا عه‌لى عه‌بدوللا گه‌له‌ك يا پاقژه وئه‌ز وێ شاهده‌يێ بۆ دده‌م وئارمانجا وى تنێ خزمه‌تا حزبا خوه وملله‌تێ خوه بوو، نوكه ژى باشترين وه‌فا بۆ عه‌لى عه‌بدوللا وهه‌موو شه‌هيدان وسه‌ركردێن مه ئه‌وه، درێژيێ ب خه‌باتێ بده‌ين ل سه‌ر رێبازا وان وعه‌لى عه‌بدوللا به‌رده‌وام دێ ب ساخێ دناڤ مه‌دا مينيت وه‌كو برا گه‌وره ومامۆستا وخه‌باتكه‌ره‌كێ مه‌زن ووه‌كو سومبۆله‌كێ مه‌زن بۆ ملله‌تێ مه.
