دو كيلۆيێن تڤران ل شێلادزى ب ڤى بهاى هاتن فرۆتن
ئه‌ڤرۆ نیوز ، نه‌وزاد هلۆرى:
قه‌یرانا دارایى و هاتنا به‌رهه‌مێن چاندنێ یێن بیانى بۆ هه‌رێما كوردستانێ بوویه ئه‌گه‌ر كو به‌رهه‌مێ جوتیارێن هه‌رێما كوردستانێ ب گشتى و ده‌ڤه‌را ئامێدیێ و شێلادزێ ب تایبه‌تى بێ بها ببیت ، بۆ نموونه ئه‌ڤرۆ دو كيلۆیێن تڤرێن سنوورێ شێلادزێ ب 250 دیناران دهاتنه فروتن.
جه‌بار موسته‌فا جوتیاریه‌كێ سنوورێ ناحیا شێلادزێ یه و رێژه‌یه‌كا باش یا تڤران چاندینه بۆ ئه‌ڤرۆ نیوز گۆت”ئه‌ڤه نێزیكێ سێ سالایه به‌رده‌وام ئه‌ز تڤران دچینم و هه‌موو ژى بۆ فروتنێ نه ، به‌لێ پشتى كو دهێنه به‌رهه‌مى و ره‌وانه‌یێ بازارى دكه‌م چو بهایێ خوه نینه ، ژبه‌ركو تڤرا بیانى دهێته ده‌ڤه‌رێ ، و ژلایه‌كێ دن ژى ڤه قه‌یرانا دارایى كوردستان ئێخسته د ره‌وشا خراپ دا و كارتێكرنه‌كا زور ل سه‌ر كارێ جوتیاران كریه و وه‌لاتى ژى نه‌شێن زوو ب زوو به‌رهه‌مێن جوتیاران بكرن”.
جه‌بارى زێده‌تر گۆت” ده‌ما كو به‌رهه‌مێ جوتیاران چو بهایێ خوه نه‌بیت ، ئێدى جوتیار نه‌شێن دووباره چاندنێ بكه‌ن ، ژبه‌رڤێ گرنگه حوكمه‌تا هه‌رێما كوردستانێ ب هه‌ر رێیه‌كا هه‌بیت دڤێت بزاڤێن خورت بكه‌ت كو به‌رهه‌مێ جوتیارێن ده‌ڤه‌رێ و خومالى به‌ر ئاڤ دا نه‌چیت”.
موئه‌یه‌د ئه‌حمه‌د ئێكه ژ فروشیارێن شێلادزێ، دیاركر كو به‌رهه‌مێ جوتیارێن ده‌ڤه‌رێ گه‌له‌ك يێ بێ بها بووى و بۆ ئه‌ڤرۆ نیوز گۆت”به‌رهه‌مێ خومالى ل ده‌ڤه‌رێ گه‌له‌ك يێ باشه و هنده‌ك جوتیاران ل ڤى َدوماهیێ به‌رێ خوه دایه چاندنێ ، به‌لێ پشتى كو به‌رهه‌مێ وان دگه‌هیت زور بێ بها دبیت ، هه‌ر بۆ نموونه ئه‌ڤرۆ تڤرێن جوتیاره‌كێ ده‌ڤه‌رێ ل نیڤا بازارێ شێلادزى َدهاتنه فروتن زور ب ئه‌رزانى ب ره‌نگه‌كێ كو زێده‌تر ژ دو كيلۆیێن تڤران ب 250 دیناران دهاتنه فروتن “.
دياركر”راسته ئه‌رزانبوونا بهایێ به‌رهه‌مێ جوتیاران بۆ وه‌لاتیان باشه، به‌لى َدێ بیته ئه‌گه‌ر كو جوتیار نه‌شێن به‌رده‌وامیێ بكارێ خوه بده‌ن ، به‌لێ هه‌كه حوكمه‌ت نه‌هێلیت به‌رهه‌مێن بیانى بهێنه كوردستانێ ب تایبه‌تى پشتى كو به‌رهه‌مێن خومالى دگه‌هن، ل وى ده‌مى دێ هه‌ڤسه‌نگى كه‌ڤیته بهایێن به‌رهه‌مێن خومالى و جوتیار ژى دێ مفادار بیت”.
