ئه‌ڤین بارزانی
رۆژا ١٦ ئادارێ رۆژه‌كا ره‌شه نه تنێ د دیرۆكا كوردستانێ دا به‌لكو د دیرۆكا مرۆڤاتیێ دا، رۆژا كو رژێما ژناڤچوویی ب چه‌كێن كیمیاوی ئێرشی خه‌لكێ سڤیل كری و د ئه‌نجام دا چه‌ندین هزار وه‌لاتیێن سڤیل كو پڕانیا وان ژن و زارۆ بوون شه‌هید كه‌فتن، لێ مخابن د ئاستێ هه‌رێمایه‌تی و نێڤده‌وله‌تی دا وه‌كو پێدڤی به‌حسێ كاره‌ساتا هه‌له‌بجه نه‌هاته كرن.
ئه‌و یه‌ك ژی نیشا دده‌ت ده‌مێ ته ده‌وله‌تا خوه هه‌بیت، ده‌مێ ته د ئاستێ هه‌رێمی و نێڤده‌وله‌تی دا ئیرادا خوه نه‌بیت هه‌كه هه‌می چه‌كێ قه‌ده‌غه‌كری ژی ل دژی ته بكاربینن كه‌س به‌حسێ ته ناكه‌ت، چونكی ل ڤێ جیهانێ هه‌ر كه‌س ژ بۆ به‌رژه‌وه‌ندیێن خوه كار دكه‌ت و ده‌مێ به‌رژه‌وه‌ندی ل گه‌ل ته نه‌بیت به‌حسێ ته ناكه‌ت، كاره‌ساتا هه‌له‌بجه ژی ڤێ راستیێ جاره‌كا دی باش نیشا دده‌ت.
راسته هه‌له‌بجه ئه‌ڤرۆكه وه‌كو تراجیدیه‌كا گه‌لێ كوردستانێ دهێته دیتن، لێ یا ل هه‌له‌بجه رووی دا ل جیهانێ نموونێن وه‌سا گه‌له‌ك كێم هه‌نه. یا ل هه‌له‌بجه رووی دای كێمتر نه‌بوو ژ وێ كاره‌ساتا مه‌زن یا ل یابانێ روو دایی، لێ ژ به‌ر كو ئه‌م وه‌كو كورد خوه‌دان ده‌وله‌تا خوه یا سه‌ربخوه نینین ژ به‌ر ڤێ یه‌كێ ژی ئه‌ڤرۆكه كه‌س به‌حس ناكه‌ت، وه‌لاتێن موسولمان یێن كو هه‌ر رۆژ به‌حسێ موسولمانه‌تیێ، زۆرداریا ل سه‌ر موسولمانان دكه‌ن وی ده‌می ژی ل هه‌مبه‌ر كوشتنا چه‌ند هزار كه‌سێن موسولمان ل هه‌له‌بجه بێده‌نگ مان و نها ژی به‌حسێ چ ناكه‌ن، ئه‌و یه‌ك ژی نیشا دده‌ت پیڤان و پیڤه‌رێن زۆرداریێ ژی ل ده‌ف هه‌ر وه‌لاته‌كێ ل گۆر به‌رژه‌وه‌ندیێن وان هاتینه پیڤان و مخابن چو رێزێ ل مافێن مرۆڤی ناگرن.
ئه‌ڤرۆكه ژی ده‌ستهه‌لاته‌كا دی یا ل به‌غدا ب هه‌مان نێرینا رژێما به‌عسا ژناڤچوویی یێ سه‌ره‌ده‌ریێ ل گه‌ل كوردان دكه‌ت، وان ژی دڤێت ب رێیا برسیكرنێ جاره‌كا دی كوردان نه‌چار بكه‌ن دا سه‌رێ خوه بۆ وان بچه‌مینن و هه‌موو داخوازیێن وان قه‌بوول بكه‌ن، لێ دڤێت ئه‌و باش بزانن یێن شۆرش كری و ب هزاران شه‌هید گۆری ڤێ ئاخا پیرۆز كری جاره‌كا دی زۆرداریێ، ته‌په‌سه‌ریێ و بنده‌ستیێ قه‌بوول ناكه‌ن.
هه‌له‌بجه بڕینه‌كا گه‌له‌ك مه‌زنه ل سه‌ر جه‌سته‌یێ كوردستانێ، بڕینه‌كا مه‌زنه د ناڤ دلێ گه‌لێ كورد دا و چ ده‌مه‌كێ ژی سارێژ نابیت، لێ د هه‌مان ده‌می دا هه‌له‌بجه خاله‌كا ره‌شه د ناڤ چاڤێن داگیركه‌ران دا، د ناڤ چاڤێن نه‌یارێن گه‌لێ كوردستانێ دا، هه‌له‌بجه نیشانا زۆرداریا داگیركه‌رانه ل سه‌ر خه‌لكێ كوردستانێ كو ب هه‌موو شیانێن خوه بزاڤا ڤێ یه‌كێ كرن كوردان ژناڤ ببه‌ن، لێ كورد هه‌ر مان و یێن بزاڤا ژناڤبرنا كوردان دكرن ئه‌ڤرۆكه ژناڤ چووینه.
د ڤێ بیره‌وه‌ریێ دا جاره‌كا دی سه‌رێ رێز و نه‌وازشێ بۆ هه‌موو شه‌هیدێن كورد و كوردستانێ دچه‌مینین و دبێژن، كورد ب كیمیابارانێ ژناڤ نه‌چوون و ژناڤ ناچن، دوژمنان هه‌موو جۆرێن چه‌كی ل دژی گه‌لێ مه بكار ئینان لێ ئه‌ڤرۆكه كورد هه‌نه و دێ هه‌ر هه‌بن ژی، پیلانێن ئه‌ڤرۆكه ل دژی گه‌لێ كورد دێ وه‌كو گه‌له‌ك پیلانێن به‌ری نها دیسان ژناڤ چن و دێ سه‌ركه‌فتن هه‌ر پارا گه‌لێ مه بیت.
نووترين نووچه
- مەسرور بارزانی پیرۆزباهیێ ل هەردو قوتابیێن ئێكێ و دویێ ل سەر ئاستێ ئیراقێ دكەت
- دخوازین رەوشا نە هنارتنا بۆدجەی و مووچەی ب شێوەیەكێ رێكخستی ژ بەغدا ب دووماهی بهێت
- سۆدانی بۆ فەرمانگەهێن حوكمەتا ئیراقێ: ناڤێ پەكەكێ ب رێكخستییەکا قەدەغەكری بینن
- كۆمسیۆن: هیچ بەربژارەكێ پارتی ژ هەلبژارتنان نەهاتییە دوورئێخستن
- سەگڤان سندی: داخوازیێن كوردان د دانوستاندنێن ئەمریكا و ئیراقێ دا یێن هاتینە بەرچاڤكرن
- هیومان رایتس ووچ: هەتا نوكە ئاوارەیێن شنگالێ نەهاتینە قەرەبووكرن
- نێچیرڤان بارزانی و مەسرور بارزانی بۆ پشكداریێ د گۆپیتكا سەركردەیێن جیهانی دا بۆ سەقای دهێنە خواندن
- ماجد سەید سالح: رەوشەنبیرییا نەتەوەیی و نیشتمانی ئەڤرۆ گەلەك پێدڤیترە ژ دوهی
- پارتی داخواز دكەت كوردەكێ بێلایەن ببیتە پارێزگار
- دڤێت كوردەك ببیتە پارێزگارێ كەركووكێ
ئه‌ڤین بارزانی
كابینه‌یا نه‌هێ د ناڤبه‌را گه‌فێن ده‌رڤه و فشارێن ناڤخوه‌یی دا
ئه‌ڤین بارزانی
كابینه‌یا نه‌هێ یا حوكمه‌تا هه‌رێما كوردستانێ ب سه‌رۆكاتیا به‌رێز مه‌سرور بارزانی ده‌مێ ده‌ست ب كارێ خوه كری، به‌رنامێ كارێ خوه ئاشكرا كر، كو بێگومان به‌رنامه‌ك گه‌له‌ك باش و بۆ خزمه‌تا خه‌لكێ هه‌رێما كوردستانێ یا گونجای بوو، لێ مخابن پیلانێن ده‌ره‌كی ب تایبه‌تی ژی پیلانێن دوژمن و نه‌یارێن گه‌لێ مه ل به‌غدا هه‌ر به‌رده‌وام بوون، هنده‌ك كرێگرتی ژی ل هه‌رێما كوردستانێ به‌رده‌وام ئێرشی كابینا نه‌هێ دكرن و به‌غدا ژی كرنه شاما شه‌ریف، د ره‌وشه‌كێ دا یا ل هه‌رێما كوردستانێ سه‌ره‌رای هه‌موو گه‌ف و فشاره‌كێ بۆ خه‌لكێ هاتیه كرن یا به‌رچاڤه و به‌رێ خوه بده‌نه به‌غدا و باشورێ ئیراقێ دێ باش بینن كا ره‌وشا وان ده‌ڤه‌ران چاوایه، ل جهه‌كێ وه‌كو به‌سرا كو پرانیا په‌ترۆلا ئیراقێ ژ وێ ده‌ڤه‌رێ یه خه‌لكێ ئاڤا پاقژ یا ڤه‌خوارنێ ژی نینه، كو ئه‌و یه‌ك مافه‌ك گه‌له‌ك سه‌ره‌كی یێ وه‌لاتیانه.
كابینا نه‌هێ ب سه‌رۆكاتیا مه‌سرور بارزانی هه‌ر زوو شیا ده‌ست ب پرۆژه‌یێن ستراتیژی بكه‌ت، سه‌رۆكێ حوكمه‌تێ گرنگیه‌كا مه‌زن دا پرۆژێن رێكان و گه‌له‌ك رێكێن ستراتیژی و گرنگ هاتنه دروست كرن، تا راده‌یه‌كێ باش ژیرئاخا ئابووری یا كوردستانێ بهێز كه‌فت، لێ مخابن ڤایرۆسێ كۆرۆنایێ و داكه‌فتنا بهایێ په‌ترۆلێ ئاسته‌نگی ل هه‌مبه‌ر پرۆژێن كابینه‌یا نه‌هێ دروست كرن، سه‌ره‌رای هه‌موو ئاسته‌نگیان ژی گه‌له‌ك كارێن باش و مه‌زن هاتنه كرن، د گه‌له‌ك كه‌رتان دا چاكسازی هاتنه كرن و حوكمه‌تێ شیا ئێدی د ده‌مێ خوه دا مووچه‌ی بده‌ت.
لێ مخابن پیلانێن به‌غدا و كرێگرتیێن وان به‌رده‌وام بوون، فرۆشتنا په‌ترۆلا هه‌رێما كوردستانێ هاته راگرتن، لێ ل هه‌مبه‌ر دا سه‌رۆكێ حوكمه‌تێ كار بۆ بهێزكرنا كه‌رتێ چاندنێ كر و بۆ جارا ئێكێ د دیرۆكێ دا به‌رهه‌مێن جۆتیارێن خوشتڤی یێن كوردستانێ گه‌هشتنه بازارێن جیهانێ، كابینا نه‌هێ گرنگیه‌كا گه‌له‌ك مه‌زن دا دروستكرنا به‌نداڤان و شیا تا راده‌یه‌كێ باش رێگریێ ل دروستكرنا قه‌یرانا ئاڤێ بكه‌ت، ب شیانێن گه‌له‌ك مه‌زن پرۆژێن مه‌زن هاتنه ئه‌نجام دان و هه‌موو وه‌لاتیێن هه‌رێما كوردستانێ ئه‌ڤرۆكه باش دبینن كا كابینا نه‌هێ زێده‌باری گه‌فێن ده‌رڤه و فشارێن ناڤخوه‌یی شیا كارێن مه‌زن بكه‌ت.
سه‌رۆكێ حوكمه‌تێ شیا ب رێیا په‌یوه‌ندیێن دبلۆماسی پێگه‌هێ هه‌رێما كوردستانێ بهێز بكه‌ت، رێگری ل گه‌له‌ك پیلانێن مه‌ترسیدار ل دژی هه‌رێما كوردستانێ هاتنه كرن، سه‌ره‌رای دۆرپێچا ئابووری و نه‌دانا بۆدجه‌ی ژ ئالیێ به‌غدایێ ڤه، لێ دیسا ژی كابینا نه‌هێ شیا به‌رده‌وامیێ بده‌ته كارێن خوه و نها ژی خزمه‌تا خه‌لكی دهێته كرن.
ئه‌و هێزێن د ناڤ خوه دا گه‌له‌ك ئاریشێن وان هه‌نه، هه‌ری زێده مفا ژ حوكمه‌تا هه‌رێمێ گه‌هشتیه وان، لێ دیسا ژی دخوازن ئاریشێن خوه ل ژێر ناڤێ كێماسیێن كابینا نه‌هێ په‌رده‌پوش بكه‌ن، خه‌لكێ كوردستانێ باش دزانیت كا كابینا نه‌هێ ب سه‌رۆكاتیا مه‌سرور بارزانی د مه‌رجێن گه‌له‌ك زه‌حمه‌ت و دژوار دا شیا وه‌لاتی برێڤه ببه‌ت، برێڤه‌برنا وه‌لاتان د قه‌یرانان دا كارێ هه‌ر كه‌سه‌كێ نینه، لێ پارتی دیموكراتی كوردستان بۆ هه‌ر كه‌سه‌كێ سه‌لماندیه ئه‌و هه‌رده‌م د قه‌یران و نه‌خوه‌شیان دا ل گه‌ل خه‌لكێ خوه بووینه و ژ به‌رپرسیاریێ نه‌ره‌ڤینه، به‌رێز مه‌سرور بارزانی ژی به‌ری نها گۆتبوو: هه‌كه ئه‌ز ب تنێ ژی بمینم دێ دیسا هه‌ر خزمه‌تا خه‌لكێ خوه كه‌م.
ڤێجا ب گۆتنا هنده‌ك كه‌سێن سڤك و خزمه‌تكارێن دوژمنان كارناما سه‌ركه‌فتی یا كابینه‌یا نه‌هێ ناهێته كێمكرن.
پتر ژ هه‌ر ده‌مه‌كێ پێدڤییا مه ب سه‌رۆك بارزانی هه‌یه
ئه‌ڤین بارزانی
سه‌رۆك و رێبه‌رێن هه‌ر نه‌ته‌وه‌كێ د دیرۆكێ دا ب كار و كریارێن خوه و ب هه‌لوه‌ستێن خوه بووینه دیرۆك و نه‌مر، ئه‌ڤرۆكه هه‌موو نه‌ته‌وه رێزێ ل سه‌ركردێن خوه یێن به‌ری چه‌ند سالان دگرن كو بووینه سیمبول و ئه‌ڤرۆكه ژی هه‌رچه‌نده گه‌له‌ك ژ وان سه‌ركردان نه‌ماینه لێ رێبازا وان بۆ نه‌ته‌وێن وان هه‌رده‌م زندی نه. هه‌كه ئه‌م ل گۆر ڤێ راستیێ به‌رێ خوه بده‌ینه بۆ مه دیار دبیت كا گرنگیا هه‌بوونا سه‌رۆك مه‌سعود بارزانی بۆ نه‌ته‌وا كورده چه‌نده و گرنگه ئه‌م چاوا نها مفایێ ژ هه‌بوونا سه‌رۆك بارزانی و ئه‌زموونا وی وه‌ربگرین.
سه‌رۆك مه‌سعود بارزانی تنێ سه‌ركردێ كورده نها دشێت د ڤێ قۆناغا هه‌ستیار دا وه‌كو سه‌رۆك و رێبه‌رێ نه‌ته‌وا كورد گه‌له‌ك كارێن مه‌زن ئه‌نجام بده‌ت، مخابن ناكۆكیێن نها د ناڤبه‌را هێز و ئالیێن سیاسی ل هه‌رێما كوردستانێ دا بووینه ئه‌گه‌رێ ڤێ یه‌كێ پێگه‌هێ هه‌رێما كوردستانێ گه‌له‌ك لاواز بوویه، دوژمن و نه‌یارێن گه‌لێ مه ژی یێ چاڤه‌رێ نه دا كورد پتر لاواز ببن، هه‌رێما كوردستانێ د ڤێ قۆناغێ هه‌ستیار دا پێویستیا خوه ب سه‌ركرده‌كێ هه‌یه كو بشێت هه‌موو هێز و ئالیێن سیاسی ل دۆر مێزه‌كێ كۆم بكه‌ت، سه‌رۆك بارزانی هه‌رده‌م ب گۆتار و هه‌لوه‌ستێن خوه یێن نه‌ته‌وه‌یی بوویه جهێ گرنگیا هه‌موو هێز و ئالیێن سیاسی ل هه‌رێما كوردستانێ و ئاشكرایه ئه‌ڤرۆكه ژی هه‌موو هێز و ئالیێن سیاسی رێزێ ل كار و خه‌بات و رۆلێ سه‌رۆك بارزانی دگرن.
ئه‌رێ هه‌كه ئه‌م ڤێ پرسیارێ ژ خوه بكه‌ن، كێ دشێت د ڤێ قۆناغێ دا هه‌موو هێز و ئالیێن سیاسی یێن كوردستانێ ل دۆر مێزه‌كێ كۆم بكه‌ت، مه ژبیر نه‌كریه كا چاوا سه‌رۆك بارزانی شیا سه‌ركردایه‌تیا مه‌زنترین روودانا دیرۆكی د دیرۆكێ كوردستانێ دا بكه‌ت كو ئه ژی ریفراندۆم بوو، هه‌ر دیسان سه‌رۆك بارزانی شیا پێشمه‌رگه‌ی ژ توركیا ده‌ربازی كۆبانێ بكه‌ت و وه‌سا كۆبانێ ژ ده‌ستێ داعشێ هاته رزگار كرن، هه‌ر روودانه‌ك ل پارچه‌كێ دی یێ كوردستانێ روو بده‌ت دیسان سه‌رۆك بارزانی ب هه‌لوه‌ستێ خوه یێ نه‌ته‌وه‌یی دلێ كوردان خوه‌ش كریه و پشته‌ڤانیا كوردان ل هه‌موو جیهانێ كریه، ئه‌رێ ما ده‌م نه‌هاتیه هه‌موو هێزێن سیاسی بۆ جاره‌كێ ژی بیت رێزێ ل سه‌رۆك بارزانی و خه‌باتا وی بگرن و گۆهداریا وی بكه‌ن دا كورد ئێكه‌تیا نه‌ته‌وه‌یی دروست بكه‌ن.
دڤێت ئه‌م ژبیر نه‌كه‌ین هه‌كه نها هزره‌ك بۆ هه‌رێما كوردستانێ دهێته كرن، هه‌كه دوژمن و نه‌یارێن مه نه‌وێرن ده‌ست ب كارێن مه‌ترسیدار ل دژی كوردان بكه‌ن ژ به‌ر هه‌بوون و ئیرادا پۆلایی یا سه‌رۆك بارزانی یه، سه‌رۆك بارزانی سه‌رۆكێ ئه‌فسانه‌وی یێ گه‌لێ كورده و كه‌سه‌كه د ژیانا خوه دا هه‌رده‌م ب هه‌لوه‌ستێن نه‌ته‌وه‌یی بوویه جهێ شانازیێ بۆ هه‌موو كورده‌كێ ل هه‌ر چار پارچێن كوردستانێ.
ئه‌ز دبێژم دڤێت هه‌موو پارتێن سیاسی ل هه‌رێما كوردستانێ، ره‌وشه‌نبیر، زانا، كه‌سێن ئه‌كادیمی پێكڤه داخواز ژ سه‌رۆك بارزانی بكه‌ن ب ئه‌زموون و هزرێن خوه وه‌كو به‌رده‌وامیا وێ رێبازا پیرۆز یا بارزانیێ نه‌مر ئێكه‌تیا كوردان دروست بكه‌ت، چونكی ئاشكرایه بێی سه‌رۆك بارزانی كه‌سه‌ك دی نه‌شێت كاره‌كێ وه‌سا بكه‌ت، ئانكۆ هه‌كه ئه‌م بێژین د ره‌وشا نها دا كورد پتر ژ هه‌ر ده‌مه‌كێ پێدڤی سه‌رۆك بارزانی نه دێ گۆتنه‌ك د جهێ خوه دا بیت، ڤێجا ئه‌م رێزێ ل خه‌بات و رۆلێ سه‌رۆك بارزانی بگرین و گوهداریا شیره‌تێن جه‌نابێ وی بكه‌ین و وه‌كو رێبه‌رێ بزاڤا ئازادیخوازا گه‌لێ كوردستانێ ل پشت جه‌نابێ وی راوه‌ستین دا هه‌رێما مه یا پاراستی بیت و كورد ژی وه‌كو نه‌ته‌وه بگه‌هنه مافێن خوه.
هه‌رێما كوردستانێ د ناڤ گوهۆڕینان دا
ئه‌ڤین بارزانی
سیسته‌مێ نها یێ سیاسی ل رۆژهه‌لاتا ناڤین د قه‌یرانێ دایه، ئه‌مریكا و وه‌لاتێن زلهێز ژی چو پرۆژه بۆ گوهۆڕینه‌كا نوو ل ده‌ڤه‌رێ نینن، تشتێ هه‌تا نها ئه‌مریكی ل ئیراقێ یان ژی ل سووریێ كری تنێ بۆ پاراستنا پێگه‌ه و به‌رژه‌وه‌ندیێن خوه بوویه و پشتی شه‌رێ غه‌زه ره‌وشه‌كا نوو هاتیه پێش و ئه‌مریكا ژی نه‌ڤێت خوه بكه‌ته پشكه‌ك ژ قه‌یرانا نها ل ده‌ڤه‌رێ، به‌لكو ئه‌مریكا دڤێت ب هه‌ر ره‌نگێ هه‌ی پێگه‌هێ خوه یێ نها بپارێزیت و بهێزتر ژی بكه‌ت، لێ ئسرائیل ل ئالیه‌كێ و وه‌لاتێن دی یێن هه‌ڤپه‌یمانێن ئه‌مریكا ژی ژ ره‌وشا نها رازی نینن و وان ژی به‌رژه‌وه‌ندیێن خوه دڤێت.
ئێرشێن ڤێ دووماهیێ یێن ئه‌مریكا ل سه‌ر گرۆپێن چه‌كدارێن سه‌ر ب ئیرانێ نیشا دده‌ت ئه‌مریكا ب ره‌نگه‌كێ راسته‌وخوه نه‌ڤێت شه‌رێ ئیرانێ بكه‌ت، ئانكۆ یا نها ئیدارا بایدن دكه‌ت تنێ بۆ بابه‌تێ رایا گشتی یا ناڤخوه‌یێ ئه‌مریكا یه و بایدن و ئیدارا وی چه‌ندین جاران ژی ئاشكرا كرینه وان نه‌ڤێت شه‌رێ ئیرانێ بكه‌ن.
شیعه ل به‌غدا هه‌رێما كوردستانێ وه‌كو هه‌ڤپه‌یمانا ئه‌مریكا دبینن و هه‌ر ده‌مێ ئه‌مریكا فشار ل به‌غدا كربن یان ژی ئێرشی وان كربیت، هێزێن سه‌ر ب ئیرانێ و هه‌تا ئیران بخوه ژی به‌رێ خوه داینه هه‌رێما كوردستانێ، ژ به‌ر ڤێ یه‌كێ ژی دبیت پشتی ئێرشێن ڤێ دووماهیێ جاره‌كا دی گرۆپێن چه‌كدار بزاڤا ڤێ یه‌كێ بكه‌ن دیسا ئێرشی هه‌ولێرێ بكه‌ن، ژ به‌ر ڤێ یه‌كێ ژی دڤێت هه‌رێما كوردستانێ ژی هنده‌ك داخوازیێن بله‌ز ژ ئه‌مریكا هه‌بن.
دانا سیسته‌مێ به‌رگیێ مۆشه‌كی ئێكه ژ وان داخوازیێن سه‌ره‌كی یێ هه‌رێما كوردستانێ، ل ئالیێ دی دڤێت هه‌رێما كوردستانێ د ئاستێ ناڤخوه‌یی دا ژی بله‌ز ده‌ست ب هنده‌ك كارێن پێدڤی بكه‌ت. گه‌له‌ك یا گرنگ وه‌كو پێنگاڤه‌كا ده‌ستپێكی هه‌موو هێزێن سیاسی بله‌ز كۆمبن و ل هه‌مبه‌ر هه‌ر مه‌ترسیه‌كێ ل سه‌ر هه‌رێما كوردستانێ پێكڤه كار بكه‌ن، چونكی ده‌ڤه‌را رۆژهه‌لاتا ناڤین به‌ر ب گوهۆڕینێن بله‌ز ڤه دچیت، پێدڤیا مه وه‌كو هه‌رێما كوردستانێ ب ستراتیژیه‌كا نشتیمانی هه‌یه، خالا دی یا گرنگ ژی دڤێت بله‌ز هێزێن پێشمه‌رگه‌ی ببنه ئێك و ل ژێر ئێك فه‌رمانده‌هی دا كار بكه‌ن، چونكی ده‌مه‌كه ئه‌مریكا و هێزێن هه‌ڤپه‌یمانان ڤێ داخوازیێ ژ هه‌رێما كوردستانێ دكه‌ن، نها ده‌مه‌ك گه‌له‌ك گونجایه هه‌رێما كوردستانێ ب رێیا هنده‌ك گوهۆڕینا پێگه‌هێ خوه بهێز بكه‌ت.
نابیت وه‌كو هه‌رێما كوردستانێ ئه‌م چاڤه‌رێی ڤێ یه‌كێ بین كا دێ چ روو ده‌ت دا ل گۆر هندێ ئه‌م ژی ده‌ست ب هنده‌ك بزاڤان بكه‌ین، هنده‌ك كارێن گه‌له‌ك فه‌ر و گرنگ هه‌نه دڤێت هه‌ر زوو بهێنه كرن، ئێك ژ ڤان خالان ژی بابه‌تێ بهێزكرنا پێگه‌هێ ئابووری یێ هه‌رێما كوردستانێ یه، به‌غدا ناهێلیت ئه‌م په‌ترۆلا خوه بفرۆشین، لێ ئه‌و یه‌ك رامانا هندێ ناده‌ت دڤێت ئه‌م چ نه‌كه‌ین، دڤێت ل هه‌رێما كوردستانێ ده‌ست ب شوره‌شه‌كا كشتوكالی و پیشه‌سازیێ بكه‌ین و ده‌م یێ هاتی ئه‌م ئێدی پشتا خوه ب كه‌سێ گه‌رم نه‌كه‌ین، به‌لكو دڤێت ئه‌م ب هه‌موو ره‌نگه‌كێ پێگه‌هێ خوه یێ ئابووری بهێز بكه‌ین، كه‌رتێ كشتوكالێ و پیشه‌سازی دڤێت بهێنه بهێزكرن و وی ده‌می دێ پێگه‌هێ سیاسی یێ هه‌رێما كوردستانێ ژی گه‌له‌ك بهێزتر لێ هێت.
ل هه‌مبه‌ر فشار و گه‌فێن به‌غدا چ بكه‌ین؟
ئه‌ڤین بارزانی
فشار و گه‌فێن به‌غدایێ ب هه‌موو ره‌نگه‌كێ ل دژی هه‌رێما كوردستانێ د زێده دانه، دانوستاندن و رێككه‌فتنێن ل گه‌ل به‌غدا ژی ل ڤێ دووماهیێ هه‌ر ل سه‌ر كاغه‌زێ ماینه، سه‌رۆكێ هه‌رێما كوردستانێ نێچیرڤان بارزانی د سه‌ره‌دانا هه‌ری دووماهیێ دا ل گه‌ل حوكمه‌تێ و هه‌موو هێزێن سیاسی یێن شیعه كۆمبوو و نیه‌تا پاك و چاره‌سه‌ریا ئاریشه‌یان ب رێیا دستووری گه‌هانده به‌رپرسێن ئیراقێ و وان ژی سۆز دان دێ هه‌موو پرسێن هه‌ی ب رێیا دستووری هێنه چاره‌سه‌ر كرن.
لێ هه‌ر كو سه‌رۆكێ هه‌رێمێ ڤه‌گه‌ری هه‌ولێرێ، ئیرانێ ل ئالیه‌كێ و گرۆپێن چه‌كدارێن شیعه ژی ل ئالیێ دی ئێرشی هه‌ولێرێ كرن و ل ئالیێ دی وه‌زیرا دارایی یا ئیراقێ ژی ب ره‌نگه‌كێ ئاشكرا دبێژیت ئه‌و پێگریێ ب رێككه‌فتنێ ناكه‌ت، د ده‌مه‌كێ دا كو سه‌رۆك وه‌زیر و جڤاتا وه‌زیران بریاره‌ك دایه لێ چاوا دبیت وه‌زیره‌ك ئاسته‌نگیان دروست بكه‌ت و سه‌رۆك وه‌زیر ژی نه‌شێت چو بكه‌ت، ئه‌رێ ئه‌و یه‌ك نیشا ناده‌ت یا نها روو دده‌ت پشكه‌كه ژ وێ پیلانا هه‌می ئالی یا نه‌هێلانا قه‌وارێ هه‌رێما كوردستانێ؟ هه‌كه ره‌وش وه‌سا وی ده‌می دڤێت وه‌كو هه‌رێم ئه‌م چ بكه‌ین؟
به‌ری هه‌می تشته‌كێ دڤێت ئێدی ئه‌م ره‌وشا هه‌ی قه‌بوول نه‌كه‌ین، چونكی به‌غدا پێنگاڤ ب پێنگاڤ كار بۆ نه‌هێلانا قه‌وارێ هه‌رێما كوردستانێ دكه‌ت، وی ده‌می دڤێت وه‌كو پێنگاڤا ئێكێ كار بۆ خوه‌نیشادانه‌كا ملیۆنی ل هه‌رێما كوردستانێ بهێته كرن، رێكخستنا خوه‌نیشادانه‌كا وه‌سا تنێ كارێ پارتی و ئێكه‌تیێ نینه، به‌لكو به‌ری هه‌ر تشته‌كێ كارێ ئۆپۆزسیۆنێ یه ژی، هه‌كه هێزێن ب ناڤ ئۆپۆزسیۆن ژ ده‌ستهه‌لاتێ رازی نینن و دخوازن بخوه بهێنه سه‌ر ده‌ستهه‌لاتێ، ئه‌رێ ما ناهێته خواستن به‌ری هه‌ر تشته‌كێ ره‌وشا هه‌ی بهێته گوهۆڕین و به‌ری هه‌ر تشته‌كێ ژی دڤێت ئه‌زموونا نها بهێته پاراستن؟ هه‌كه تشته‌ك ب ناڤێ هه‌رێما كوردستانێ نه‌ما وی ده‌می ئه‌وێن هه‌ر رۆژ دژبه‌ریا ده‌ستهه‌لاتا نها ل هه‌رێما كوردستانێ دكه‌ن، دێ چ كه‌ن؟ هه‌كه وان ده‌ستهه‌لات دڤێت ما نه دڤێت هه‌رێم بمینیت دا ئه‌و رۆژه‌كێ بگه‌هنه داخوازیێن خوه، ئانكۆ ب كورتی پاراستنا هه‌رێما كوردستانێ ئه‌ركێ سه‌ره‌كی یێ وان هێزانه ئه‌وێن دبێژنه خوه ئۆپۆزسیۆن.
خاله‌كا دی یا گرنگ دڤێت هه‌ر زوو هه‌موو پارتێن سیاسی ل هه‌رێما كوردستانێ پێكڤه كۆمبن، كۆمبوونا هه‌موو هێزێن سیاسی ل هه‌رێما كوردستانێ كاره‌ك گه‌له‌ك گرنگه، دڤێت جڤاتا پارتێن سیاسی ل هه‌رێما كوردستانێ بهێته ئاڤاكرن و كارێ وان یێ سه‌ره‌كی ژی دانانا ستراتیژیه‌كا نه‌ته‌وه‌یی بیت بۆ پاراستنا هه‌رێما كوردستانێ ژ هه‌ر مه‌ترسیه‌كێ.
د ئاستێ نێڤده‌وله‌تی دا ژی دڤێت ده‌ست ب كارێن مه‌زن بهێته كرن، دڤێت لیژنه‌یه‌ك ژ هه‌رێما كوردستانێ ب نوونه‌راتیا هه‌موو هێزێن سیاسی و خه‌لكێ كوردستانێ ل گه‌ل ئه‌مریكا، ئێكه‌تیا ئۆرۆپا، نه‌ته‌وه‌یێن ئێكگرتی و وه‌لاتێن دی یێن كاریگه‌ر ل جیهانێ كۆمبن و ره‌وشا نها بگه‌هیننه وان، چونكی یا ئێكێ پشتی بریارا دادگه‌ها پاریس په‌ترۆلا هه‌رێما كوردستانێ ناهێته فرۆشتن و به‌غدا ژی بۆدجه و مووچه‌ی ناده‌ته هه‌رێما كوردستانێ، وی ده‌می ئه‌ركێ هه‌موو وان وه‌لاتانه یێن به‌ری نها هێلا ٣٦ بۆ پاراستنا هه‌رێمی دانای نها ژی ب ئه‌ركێ خوه رابن و ل هه‌مبه‌ر زۆرداریا به‌غدا هه‌لوه‌سته‌ك توند وه‌ربگرن.
ژ بۆ هه‌رێما كوردستانێ بشێت جاره‌كا دی پێگه‌هێ خوه بهێز بكه‌ت، گرنگه ل هه‌رێما كوردستانێ ل سه‌ر بنه‌مایێ گۆتاره‌كا نشتیمانی، هه‌لوه‌سته‌ك توند ل دژی وان كه‌سان ژی هه‌بیت یێن رۆژانه ل ژێر ناڤێ دیموكراسیێ و ب گۆتار و هه‌لوه‌ستێن خوه خزمه‌تا دۆژمنان دكه‌ن، ژ به‌ر ڤێ یه‌كێ ژی دڤێت هنده‌ك هێلێن سۆر هه‌بن و رێ نه‌هێته دان هنده‌ك هێز یان ژی كه‌س ببنه خزمه‌تكارێن دوژمن و نه‌یارێن كوردستانێ و خزمه‌تا وان بكه‌ن، ئه‌ڤ رێكاره وه‌كو پێنگاڤێن ئێكێ دشێن ئه‌و فشار و گه‌فێن هه‌ی ل سه‌ر هه‌رێمێ تا راده‌یه‌كێ كێم بكه‌ن و هه‌روه‌سا دێ پشته‌ڤانیه‌كا باش یا نێڤده‌وله‌تی ژی بۆ هه‌رێما كوردستانێ دروست بیت، گرنگه د ناڤ هه‌رێما كوردستانێ دا ژی هنده‌ك تشتێن گرنگ بهێنه كرن، یا هه‌ری گرنگ ژی هه‌لبژارتنێن په‌رله‌مانێ كوردستانێ د زووترین ده‌م دا بهێنه كرن دا سازیێن ژ كاركه‌فتی یێن هه‌رێما كوردستانێ جاره‌كا دی چالاك ببن و روویێ گه‌ش یێ دیموكراسیا هه‌رێما كوردستانێ نیشا هه‌موو جیهانێ بده‌ن.
ڤه‌كێشانا هێزێن ئه‌مریكا ژ ئیراقێ و كاریگه‌ریێن وێ ل سه‌ر ده‌ڤه‌رێ
ئه‌ڤین بارزانى
بابه‌تێ ڤه‌كێشانا هێزێن ئه‌مریكا ژ ئیراقێ ده‌مه‌كه د رۆژه‌ڤێ دایه، هێزێن شیعه یێن سه‌ر ب ئیرانێ و گرۆپێن چه‌كدار وه‌سا دبینن ئه‌و یه‌ك سه‌ركه‌فتنه‌كا گه‌له‌ك مه‌زنه بۆ وان و دێ وه‌سا بۆ خه‌لكێ ئیراقێ دیاركه‌ن كو وان شییا ب هێزا خوه و ب ئێرشێن خوه ئه‌مریكا نه‌چار بكه‌ن دا خوه ژ ئیراقێ ڤه‌كێشیت، لێ په‌یاما ئه‌مریكا بۆ حوكمه‌تا ئیراقێ گه‌له‌ك یا رۆن و ئاشكرایه، ئه‌و بێى مه‌رج ژ ئیراقێ ڤه‌ناكێشن و ڤه‌كێشان دێ باجا خوه هه‌بیت، ئانكۆ ئه‌مریكا ب ره‌نگه‌كێ ئاشكرا ڤێ په‌یامێ دده‌ته ئیراقێ پشتى مه چ روو بده‌ت هوون به‌رپرسیارن و هه‌كه هوون جاره‌كا دى وه‌كو هاتنا داعشێ داخوازا هاریكاریێ ژ مه بكه‌ن ڤێجارێ دێ ره‌وش گه‌له‌ك یا جودا بیت.
ل گۆر زانیاریێن ل هنده‌ك ده‌زگه‌هێن راگه‌هاندنێ هاتینه به‌لاڤكرن، ئه‌مریكا ئه‌ڤ په‌یامه دایه ئیراقێ ئه‌و وه‌سا زوو هێزێن خوه ڤه‌ناكێشن و خالا دى ژى دڤێت ئیراق خوه بۆ هه‌ر ئه‌گه‌ره‌كێ ئاماده بكه‌ت، ئه‌و یه‌ك د ده‌مه‌كێ دایه كو رۆژانه به‌رپرسێن ئه‌مریكا ئاماژه ب ره‌وشا خراب یا سیاسى و ئه‌منى یا ئیراقێ دكه‌ن و ڤێ په‌یامێ دده‌نه خه‌لكێ ئیراقێ هه‌كه ئه‌و ده‌ركه‌ڤن دێ ره‌وش گه‌له‌ك خرابتر لێ هێت.
به‌رپرسێن ئیراقێ ژى باش دزانن پشتى سالا ٢٠٠٣ هه‌تا نها هه‌موو داهاتێ فرۆشتنا په‌ترۆلا ئیراقێ دچیته به‌نكێن ئه‌مریكا و ژ وێرێ دهێته ئیراقێ، ئانكۆ ب ره‌نگه‌كێ دى هه‌م بێژین په‌ترۆلا ئیراقێ ب ته‌مامى ل ژێر كۆنترۆلا ئه‌مریكا دایه، ئه‌مریكا دشێت ب رێیا كارتا په‌ترۆلێ و كێمكرنا رێژه‌یا هنارتنا دۆلارى بۆ ئیراقێ ره‌وشه‌كا دى دروست بكه‌ت كو نه سوودانى و نه ژى ئیران نه‌شێن ڤێ ره‌وشێ سه‌ره‌راست بكه‌ن، ئانكۆ ئه‌مریكا كارتێن گه‌له‌ك بهێز د ده‌ستان دا هه‌نه و حوكمه‌تا نها یا ئیراقێ د ره‌وشه‌كا گه‌له‌ك لاواز دایه.
به‌روڤاژى هنده‌ك كه‌سان كو هه‌ر رۆژ ل هه‌رێما كوردستانێ دهۆلێ بۆ ئیراقا بهێز لێ دده‌ن، لێ د راستى دا ره‌وش گه‌له‌ك خرابه و به‌رپرسێن نها یێن ئیراقێ ژى باش دزانن پشتى ڤه‌كێشانا ئه‌مریكا دێ گرۆپێن چه‌كدار ب ته‌مامى خوه ل سه‌ر ده‌ستهه‌لاتێ فه‌رز كه‌ن و حوكمه‌تا نها دێ تنێ نه‌چار بیت گوهداریا داخوازیێن وان بكه‌ت، ئه‌و یه‌ك دێ ئیراقێ به‌ر ب چاره‌نڤیسه‌كێ نه‌دیار ڤه به‌ت و دێ خه‌لكێ ئیراقێ ژ گه‌له‌ك خزمه‌تگوزاریان هێنه بێبه‌ش كرن، ره‌وشا لوبنانێ، یه‌مه‌نێ و سووریێ به‌رچاڤه و دێ ئیراقێ خرابتر ژى لێ هێت، ژ به‌ر ڤێ یه‌كێ ژى ڤه‌كێشانا هێزێن ئه‌مریكا د به‌رژه‌وه‌ندیا خه‌لكێ ئیراقێ دا نینه، به‌لكو تنێ د به‌رژه‌وه‌ندیا گرۆپێن چه‌كدارێن سه‌ر ب ئیرانێ دایه.
هه‌لوه‌ستێ سه‌رۆك بارزانى و سه‌رۆكێ هه‌رێما كوردستانێ نێچیرڤان بارزانى ل دۆر ڤه‌كێشانا هێزێن ئه‌مریكا دیارن، سه‌رۆك بارزانى دبێژیت ئه‌و پشته‌ڤانیێ ل دانوستاندنێن د ناڤبه‌را ئه‌مریكا و حوكمه‌تا سوودانى دا دكه‌ن بۆ رێككه‌فتنه‌كێ ل دۆر چاوانیا كاركرنا هێزێن ئه‌مریكا و هه‌ڤپه‌یمانیا نێڤده‌وله‌تى ل ئیراقێ.
په‌یاما سه‌رۆك بارزانى و سه‌رۆكێ هه‌رێما كوردستانێ نێچیرڤان بارزانى ڤێ راستیێ باش نیشا دده‌ن كو هه‌رێما كوردستانێ باش دزانیت دێ ئه‌نجامێن ڤه‌كێشانا ئه‌مریكا ژ ئیراقێ چ كاریگه‌ریه‌كا خراب ل پاشه‌ڕۆژا ئیراقێ كه‌ت، چونكى د ناڤ ئیراقێ دا ره‌وش گه‌له‌ك خرابه، ناكۆكیێن گه‌له‌ك مه‌زن د ناڤبه‌را كوردان و به‌غدا دا هه‌نه، شیعه د ناڤ خوه دا گه‌له‌ك ناكۆكن و هه‌روه‌سا ناكۆكیێن سوننه و شیعان ژى گه‌له‌ك زێده بووینه، ئه‌و یه‌ك ژى نیشا دده‌ت راگرتنا هه‌ڤسه‌نگیێن سیاسى تنێ ب بابه‌تێ سه‌ربازى ڤه گرێداى نینه، به‌لكو هه‌تا رێككه‌فتنه‌كا گشتى د ئاستێ هه‌ر سێ پێكهاتێن ئیراقێ ئانكۆ (كورد، سوننه و شیعان) دا ب چاڤدێریا هێزه‌كا نێڤده‌وله‌تى نه‌هێته‌كرن، ره‌وشا نها دێ خرابتر لێ هێت و ب ڤه‌كێشانا هێزێن ئه‌مریكا دێ ئیراق به‌ر ب چاره‌نڤیسه‌كێ نه‌دیار ڤه چیت و شه‌ڕێ ناڤخوه‌یى یا پێشبینى كریه.
هه‌رێما كوردستانێ د ناڤبه‌را ئالۆزیێن ئه‌مریكا و ئیراقێ دا
ئه‌ڤین بارزانی
نها ل رۆژهه‌لاتا ناڤین شه‌ڕه‌كێ سنۆردار د ناڤبه‌را ئه‌مریكا و ئیرانێ دا هه‌یه، لێ هه‌ر دو ئالى ب ره‌نگه‌كێ راسته‌وخوه د شه‌ڕى دا پشكدار نینن، ئیران ب رێیا حوسیێن یه‌مه‌نى، رێكخستنا حه‌ماس و گرۆپێن چه‌كدار شیعه ل ئیراقێ شه‌ڕه‌كێ نه‌راسته‌وخوه ل گه‌ل ئه‌مریكا دكه‌ت و ئارمانجا سه‌ره‌كى ژى لاوازكرنا پێگه‌هێ ئه‌مریكا یه ل ده‌ڤه‌رى، نها مه‌ترسیا حوسیێن یه‌مه‌نى ل ده‌ریا سۆر ل سه‌ر ئاسایشا جیهانى ب تایبه‌تى ژى بازرگانیا جیهانى زێده‌تر لێ هاتیه و ئه‌و یه‌ك دشێت ببیته ئه‌گه‌رێن گوهۆڕینێن مه‌زن ل ده‌ڤه‌رێ.
ئه‌مریكى باش دزانن نه‌شێن ل ئیراقێ كار بۆ نه‌مانا حه‌شدا شه‌عبى بكه‌ن، به‌لكو دشێن لاواز بكه‌ن، لێ هه‌كه ئه‌مریكى ب ره‌نگه‌كێ راسته‌وخوه شه‌ڕێ حه‌شدا شه‌عبى بكه‌ن وى ده‌مى ئیران ژى دشێت ئالۆزیێن گه‌له‌ك مه‌زن بۆ ئه‌مریكا دروست بكه‌ت، ژ به‌ر ڤێ یه‌كێ ژى به‌رى دو رۆژان جۆن كێربى شیره‌تكارێ ئاسایشا نه‌ته‌وه‌یى یا ئه‌مریكا ل كۆچكا سپى راگه‌هاند ئه‌و وه‌كو ئه‌مریكا ب چو ره‌نگه‌كێ ناخوازن شه‌رێ ئیرانێ بكه‌ن، ئه‌و یه‌ك ژى نیشا دده‌ت ئارمانجا ئه‌مریكا لاوازكرنا گرۆپێن چه‌كداره دا نه‌بنه مه‌ترسیێن ل سه‌ر به‌رژه‌وه‌ندیێن وێ ل رۆژهه‌لاتا ناڤین ب تایبه‌تى ژى ل ئیراقێ.
شیعه ل به‌غدا هه‌رێما كوردستانێ یان ژى ب ره‌نگه‌كێ راستتر ئه‌گه‌ر بێژم پارتى دیموكراتى كوردستان وه‌كو هه‌ڤپه‌یمانا ئه‌مریكا دبینن، ژ به‌ر ڤێ یه‌كێ ژى ده‌مه‌كه ب درۆنان ئێرشى هه‌ولێرێ دكه‌ن، ئه‌مریكا ب كوشتنا دو فه‌رماندارێن حه‌شدا شه‌عبى، ئه‌ڤ په‌یامه دا وان هه‌كه ئێرشێن خوه نه‌ده‌نه راگرتن دێ ره‌وشه‌كا دى هێته پێش.
بێگومان هه‌رێما كوردستانێ بۆ ئه‌مریكا گه‌له‌ك گرنگه، لێ ژ به‌غدا گرنگتر نینه، ئه‌و یه‌ك گه‌له‌ك ئاشكرایه، ئه‌مریكا نه‌ڤێت هه‌رێما كوردستانێ ژ ده‌ست بده‌ت لێ د هه‌مان ده‌مى دا یا به‌رهه‌ڤ نینه ژ بۆ هه‌رێما كوردستانێ په‌یوه‌ندیێن خوه ل گه‌ل شیعه‌یێن به‌غدایێ ژى تێك بده‌ت، ئاخڤتنا جۆن كێربى ژى ڤێ راستیێ نیشا دده‌ت ئه‌مریكا یا به‌رهه‌ڤ نینه جارێ كار بۆ چو گوهۆڕینان ل ئیراقێ و رۆژهه‌لاتا ناڤین بكه‌ت، به‌لكو ئارمانجا ئه‌مریكا پاراستنا به‌رژه‌وه‌ندیێن وێ نه د ره‌وشا نها یا ئالۆز ل ده‌ڤه‌رێ دا.
د ڤێ چارچۆڤێ دا هه‌كه ئه‌م به‌رێ خوه بده‌ینه سیاسه‌تا ئه‌مریكا هه‌رده‌م ئه‌مریكى یێ به‌رێ هه‌رێما كوردستانێ دده‌نه به‌غدا، هه‌رده‌م دبێژن دڤێت هه‌ولێر پرسێن هه‌ى ل گه‌ل به‌غدا چاره‌سه‌ر بكه‌ت، ئانكۆ ب كورتى د سیاسه‌تا ده‌رڤه یا ئه‌مریكا دا چو تشته‌ك تایبه‌ت و جودا بۆ كوردان نینه، ئه‌و كوردان وه‌كو كیانه‌ك جودا و سه‌ربخوه نابینن، به‌لكو وه‌كو هه‌رێمه‌كێ د چارچۆڤێ ئیراقێ دا دبینن و د ڤان ده‌مێن دووماهیێ دا ئه‌مریكیان نه‌ڤێت هه‌رێما كوردستانێ بهێز ژى كه‌ڤیت، چونكى د ریفراندۆما سالا ٢٠١٧ و قۆناغێن پشتى وى سیاسه‌تا ئه‌مریكا ل هه‌مبه‌ر هه‌رێما كوردستانێ گه‌له‌ك ئاشكرا بوو.
هه‌رچه‌نده به‌رپرسێن ئه‌مریكا دبێژن مه هه‌رێمه‌كا كوردستانێ یا بهێز د چارچۆڤێ ئیراقێ دا دڤێت، لێ ب كریارى وان هه‌رێما كوردستانه‌كا لاواز د ناڤ ئیراقێ دا دڤێت، ب كریارى سیاسه‌تا چه‌ند سالێن دووماهیێ یا ئه‌مریكا وه‌سا بوویه، ژ به‌ر ڤێ یه‌كێ ژى باشترین تشتێ نها به‌رپرسێن هه‌رێما كوردستانێ بكه‌ن ئه‌وه بشێن ل گه‌ل به‌غدا بگه‌هنه چاره‌سه‌ریه‌كێ هه‌تا ره‌وشا ناڤخوه‌یى یا هه‌رێما كوردستانێ هنده‌كێ باش ببیت، ب تایبه‌تى ژى د بیاڤێ ئابوورى دا، چونكى نها ره‌وشا ئابوورى یا هه‌رێما كوردستانێ باش نینن، گیرۆبوونا مووچێ فه‌رمانبه‌ران و نه‌هاتنا بودجه‌ى ژ به‌غدا و ئاسته‌نگیێن ل هه‌مبه‌ر هنارتنا په‌ترۆلێ ره‌وشا ئابوورى یا خه‌لكێ ژى خراب كریه، ژ به‌ر ڤێ یه‌كێ ژى وه‌كو چاره‌سه‌ریه‌كا به‌روه‌خت ئانكۆ بۆ ساله‌كێ هه‌تا دو سالان ژى بیت باشتره هه‌رێما كوردستانێ ل گه‌ل به‌غدا بگه‌هیته رێككه‌فتنى، سه‌ره‌دانا ڤێ دووماهیێ یا سه‌رۆكێ هه‌رێما كوردستانێ بۆ به‌غدا و دیدارێن وى ل گه‌ل به‌رپرسێن هێزێن جودا جودا یێن شیعه‌یان دشێت پێنگاڤه‌كا گرنگ بۆ ڤێ ستراتیژیا هه‌رێما كوردستانێ بیت.
ئیراق به‌ر ب چاره‌نڤیسه‌كێ نه‌دیار ڤه
ئه‌ڤین بارزانی
رۆژهه‌لاتا ناڤین ب گشتی د ره‌وشه‌كا گه‌له‌ك ئالۆز دایه، پشتی شه‌رێ د ناڤبه‌را ئسرائیلێ و حه‌ماسێ دا ره‌وشه‌كا دی هاتیه پێش، ئسرائیل وه‌كو هه‌ڤپه‌یمانا ستراتیژی یا ئه‌مریكا یێ بزاڤا هندێ دكه‌ت ب پشته‌ڤانیا ئه‌مریكا رێكخستنا حه‌ماسێ ب ته‌مامی ژناڤ ببه‌ت، هه‌رچه‌نده ئه‌مریكا د گه‌له‌ك خالان دا ل گه‌ل ئسرائیلێ یا ناكۆكه لێ د هه‌مان ده‌می دا نها د ناڤ ئه‌مریكا دا ژی ره‌وشه‌كا جودا یا هه‌ی، هه‌لبژارتنێن سه‌رۆك كۆماریێ نێزیك دبن، هه‌ڤڕكیا د ناڤبه‌را هه‌ر دو پارتێن كۆماری و دیموكرات دژوارتر دبیت و ل گۆر دووماهی راپرسیان ژی نها پێگه‌هێ جۆ بایدن سه‌رۆكێ ئه‌مریكا گه‌له‌ك لاوازه و دۆنالد ترامپ جاره‌كا دی دڤێت ڤه‌گه‌ریته ڤه سه‌ر ده‌ستهه‌لاتێ، ترامپ ده‌مه‌كه ب توندی ئێرشی بایدنی دكه‌ت و دبێژیت بایدن وه‌سا كریه ئه‌مریكا چو پێگه‌هێ خوه یێ جاران ل ده‌ڤه‌رێ نه‌مایه، ژ به‌ر ڤان خالان ژی نها پێدڤیا ئیدارا جۆ بایدن ب شه‌ره‌كێ ل ئیراقێ هه‌یه، هه‌ر چ نه‌بیت دڤێت دربه‌كێ ل گرۆپێن چه‌كدارێن سه‌ر ب ئیرانێ بده‌ت كو ده‌مه‌كه ل سووریێ و ئیراقێ ئێرشی هێزێن ئه‌مریكا و هه‌ڤپه‌یمانێن وێ دكه‌ن.
پشتی كوشتنا دو فه‌رماندارێن حه‌شدا شه‌عبی ژ ئالیێ ئه‌مریكا ڤه نها هێزێن شیعه دبێژن دڤێت ئه‌مریكا هێزێن خوه ژ ئیراقێ ڤه‌كێشیت، وان دڤێت ئه‌مریكا چو هێز ل ئیراقێ و هه‌رێما كوردستانێ نه‌مینن، لێ ئه‌و یه‌ك وه‌سا ب ساناهی نینه، چونكی چه‌ندین فاكته‌رێن گرنگ و كاریگه‌ر هه‌نه دێ كاریگه‌ریا خوه ل چاره‌نڤیسێ ئیراقێ كه‌ن، دڤێت ژبیر نه‌كه‌ین ده‌مێ سه‌رۆك وه‌زیرێن به‌رێ یێ ئیراقێ عادل عه‌بدولمه‌هدی بزاڤا ڤێ یه‌كێ كر په‌یوه‌ندیێن ئیراقێ ل گه‌ل وه‌لاتێ چینێ د بیاڤێ ئابووری دا بهێز بكه‌ت ئه‌و یه‌ك ب دلێ ئه‌مریكا نه‌بوو، ژ به‌ر ڤێ یه‌كێ ژی ئه‌مریكا ب پشته‌ڤانیا هنده‌ك هێزێن ناڤخوه‌یی ل ئیراقێ كو وان ژی به‌رژه‌وه‌ندیێن هه‌ڤپشك ل گه‌ل ئێكتر هه‌بوون وه‌سا كر عادل عه‌بدولمه‌هدی ده‌ست ژ كاری كێشا و دووماهی ب كابینا وی هات.
هه‌كه نها سودانی ژی یێ رژد بیت كو دڤێت ئه‌مریكا هێزێن خوه ل ئیراقێ ڤه‌كێشیت ئه‌و یه‌ك دێ بیته ئه‌گه‌رێ دووماهیا سودانی، چونكی ئه‌مریكا گه‌له‌ك كارتێن بهێز د ده‌ستان دا هه‌نه، ئه‌مریكا ب چو ره‌نگه‌كێ ئیراقێ چۆل ناكه‌ت، ئه‌مریكا دشێت كارتا دۆلاری وه‌سا ل دژی حوكمه‌تا ئیراقێ بكار بینیت كو ره‌وشا ئیراقێ گه‌له‌ك خراب بكه‌ت، ژ به‌ر ڤێ یه‌كێ ژی ده‌رخستنا هێزێن ئه‌مریكا ژ ئیراقێ كاره‌كێ وه‌سا ب ساناهی نینه، لێ دبیت هێزێن شیعه یێن كو ژ سودانی رازی نینن ڤی بابه‌تی ل دژی وی بكار بینن دا حوكمه‌تا سودانی ژناڤ بچیت و ئه‌و بشێن حوكمه‌ته‌كا نوو ئاڤا بكه‌ن كو پتر نێزیكی ئیرانێ بیت، ئه‌و یه‌ك دشێت ئیراقێ پتر به‌ر ب شه‌ره‌كێ ناڤخوه‌یی ڤه ببه‌ت، وی ده‌می دیار نابیت كا دێ چاره‌نڤیسێ ئیراقێ چ بیت.
دڤێت ژبیر ناكه‌ین نها هه‌م سوننه و هه‌م ژی كورد ژ حوكمه‌تا ئیراقێ گه‌له‌ك تووره نه، سۆزێن چارچۆڤێ هه‌ماهه‌نگی داینه كوردان و سوننان بجه نه‌ئیناینه و ل ئالیێ دی ژ به‌ر لاوازیا سودانی گرۆپێن چه‌كدارێن شیعه ل ئیراقێ شیاینه پرانیا چه‌مكێن ده‌ستهه‌لاتێ بگرنه ده‌ستێ خوه، دادگه‌ها فیدرالی ژی كه‌فتیه ده‌ستێ وان و ل گۆر به‌رژه‌وه‌ندیێن خوه ل دژی كوردان و سوننان بكار دئینن، ژ به‌ر ڤێ یه‌كێ بابه‌تێ ده‌رخستنا هێزێن ئه‌مریكا ژ ئیراقێ دێ ره‌وشێ گه‌له‌ك ئالۆزتر لێ كه‌ت، ئه‌مریكا ژی ل هه‌مبه‌ر ڤان گرۆپێن چه‌كدار بێده‌نگ نامینیت و دبیت دربێن گرانتر ژی ژ وان گرۆپان بده‌ت، ڤێجا گرنگه كورد سیاسه‌تا خوه یا نها به‌رده‌وامیێ پێ بده‌ن و نه‌بنه پشكه‌ك ژ ئالۆزیێن نها، چونكی به‌رژه‌وه‌ندیێن كوردان جوداترن ژ ناكۆكیێن نها د ناڤبه‌را ئه‌مریكا و گرۆپێن چه‌كدار دا.
مه‌ترسیا مادده‌یێن هۆشبه‌ر ل سه‌ر ئاسایشا هه‌رێما كوردستانێ
ئه‌ڤین بارزانی
رۆژ ب رۆژێ بازرگانیا ماددێن هۆشبه‌ر ل هه‌رێما كوردستانێ زێده‌تر دبیت، رۆژانه ئه‌م ده‌نگوباسێن ده‌سته‌سه‌ركرنا بازرگانان دبهیسین و هنده‌ك جاران ژی ب چه‌كی روو ب روویی هێزێن ئێمناهیێن ژی دبن و ئه‌و یه‌ك ژی نیشا دده‌ت كو چه‌ندین گرۆپ وه‌كو مافیا ل هه‌رێما كوردستانێ بووینه بازرگانیێن ماددێن هۆشبه‌ر، بێگومان بكارئینه‌ر ئانكۆ كه‌سێن ئالۆده‌یی ڤی مادده‌یی ژی بووینه هژمارا وان ل گۆر راپۆرتێن ئالیێن په‌یوه‌ندیدار ل هه‌رێما كوردستانێ زێده بووینه.
هه‌كه ئه‌م به‌رێ خوه بده‌ینه وان وه‌لاتێن رۆژهه‌لاتا ناڤین كو بكارئینانا ماددێن هۆشبه‌ر لێ زێده بووینه و چاره‌نڤیسێ كه‌سێن كو تووشبووینه دێ بۆ مه دیار بیت كا ماددێن هۆشبه‌ر چه‌ند مالێن خه‌لكی خراب كرینه، ئه‌ڤرۆكه كه‌سه‌ك كو ئالوده‌ی ماددێن هۆشبه‌ر ببیت د ناڤ خێزانه‌كێ دا دێ وێ خێزانێ هه‌موویێ ژناڤ به‌ت، د بیاڤێ ماددی و مه‌عنه‌وی دا كه‌سه‌كێ ئالودی ماددێن هۆشبه‌ر ببیت دشێت ب ساناهی خێزانه‌كێ ژناڤ ببه‌ت، ئه‌رێ مه هه‌تا نها ئه‌ڤ پرسیاره ژ خوه كریه كو دوژمنێن هه‌رێما كوردستانێ ئه‌ڤرۆكه ماددێن هۆشبه‌ر وه‌كو چه‌كه‌كێ یێ ل دژی خه‌لكێ مه بكار دئینن و ب تایبه‌تی ژی گه‌نجان تووشی ڤێ كاره‌ساتێ دكه‌ن دا وه‌سا جڤاكێ مه ژ گه‌له‌ك تشتان دوور بكه‌ن، هشیاریار نه‌ته‌وه‌یی لاواز بكه‌ن، هه‌ر خێزانه‌كێ بشێن كه‌سه‌كێ ژێ ئالودی ڤی مادده‌ی بكه‌ن دێ وێ خێزانێ ژ گه‌له‌ك تشتان دوور كه‌ن و ئه‌و دێ نه‌چار بن تنێ مژوولی چاره‌سه‌ریا وی كه‌سی بن، چونكی وه‌كو نه‌خوه‌شه‌كێ لێ هاتیه و چاره‌سه‌ركرنا وی ژی یا ب ساناهی نینه و ده‌م پێ دڤێت هه‌تا ئه‌و بشێن كه‌سه‌كێ ئالوده‌یی ماددێن هۆشبه‌ر بوویه چاره‌سه‌ر بكه‌ن و گه‌له‌ك ژی دڤێت خوه پێ ماندی بكه‌ن، وی ده‌می ئه‌و خێزانه دێ ب ره‌نگه‌كێ ئۆتۆماتیك ژ گه‌له‌ك تشتێن دی دوور كه‌ڤن و هه‌موو هێز و شیانێن وێ خێزانێ دێ بۆ چاره‌سه‌ریا كه‌سێ تووشبوویی هێته ته‌رخانكرن.
ئانكۆ هه‌كه نها رێگری لێ نه‌هێته كرن دێ ماددێن هۆشبه‌ر بیته مه‌زنترین چه‌كێ دوژمنان ل سه‌ر ئاسایشا هه‌رێما كوردستانێ، ژ به‌ر ڤێ یه‌كێ ژی ئێدی نابیت ئه‌م بێژین تنێ ئه‌ركێ حوكمه‌تا هه‌رێما كوردستانێ یه شه‌رێ بازرگانێن ماددێن هۆشبه‌ر بكه‌ت، به‌لكو دڤێت هه‌موو وه‌لاتی ل هه‌رێما كوردستانێ ب ئه‌ركێ خوه یێ نه‌ته‌وه‌یی رابن و ل گۆر به‌رچاڤ وه‌رگرتنا مه‌ترسیا ماددێن هۆشبه‌ر هه‌ڤكاریا سازیێن ئێمناهیێ و ئالیێن په‌یوه‌ندیدار ل هه‌رێما كوردستانێ بكه‌ن.
باشترین كارێ نها بهێته كرن بۆ نه‌هێلانا ڤێ به‌لایێ مرۆڤ دشێت هنده‌ك ژ ڤان وه‌سا دیار بكه‌ت:
– ئاگه‌هداركرنا وه‌لاتیان ژ مه‌ترسیا ماددێن هۆشبه‌ر ب تایبه‌تی ژی گه‌نجان.
– دروستكرنا چه‌ندین به‌رنامێن ته‌له‌فزیۆنی دا خه‌لك ئاگه‌هدار بن چاوا دێ شێن گه‌نجێن خوه ژ ڤێ به‌لایێ دوور بكه‌ن.
– دروستكرنا چه‌ندین رێكخستنێن تایبه‌ت بۆ ئاگه‌هداركرنا خه‌لكی، گێرانا كۆمبوونان و دروستكرنا به‌رنامان دا خه‌لك پتر یێ ئاگه‌هدار بیت.
– دروستكرنا هنده‌ك به‌لگه فلمان ل گه‌ل وان كه‌سێن تووشی ماددێن هۆشبه‌ر بووینه و چ كاره‌سات هاتینه سه‌رێ وان، دا ئه‌و یه‌ك ببیته وانه بۆ هه‌موو كه‌سه‌كێ ب تایبه‌تی ژی گه‌نجان دا خوه ژ ڤێ به‌لایێ دوور بكه‌ن.
– ب توندی سزادانا وان كه‌سان یێن بازرگانیێ ب ماددێن هۆشبه‌ر دكه‌ن و ژ بۆ به‌رژه‌وه‌ندیێن خوه یێن ته‌نگ جڤاكه‌كێ تووشی كاره‌ساتێن مه‌زن دكه‌ن.
بێگومان ئه‌ڤه هژماره‌ك ژ ڤان پێشنیازانه و گه‌له‌ك كارێن دی ژی ئه‌م دشێین وه‌كو تاك ژی بكه‌ین دا بشێین وه‌لاتێ خوه ژ ڤێ كاره‌ساتێ بپارێزین و رێ نه‌ده‌ین دوژمنێن گه‌لێ مه ب رێیا ماددێن هۆشبه‌ر جڤاكێ مه ژ هه‌ستا نه‌ته‌وه‌یی و گه‌له‌ك تشتێن دی دوور بكه‌ن، چونكو د ره‌وشا نها دا دوژمنێن هه‌رێما كوردستانێ ب هه‌موو ره‌نگه‌كێ كار بۆ لاوازكرن و نه‌هێلانا قه‌وارێ هه‌رێما كوردستانێ دكه‌ن كو ماددێن هۆشبه‌ر ژی وه‌كو چه‌كه‌كێ بكار دئینن.
مه‌ترسیا گیرۆبوونا هه‌لبژارتنان ل هه‌رێما كوردستانێ
ئه‌ڤین بارزانی
هه‌رچه‌نده گه‌له‌ك جاران ئاماژه ب ڤێ یه‌كێ هاتیه كرن، دادگه‌ها فیدرالی وه‌كو كارته‌كا سیاسی ل هه‌مبه‌ر هه‌رێما كوردستانێ دهێته بكارئینان، لێ دڤێت ئه‌م ڤێ راستیێ ژی باش بزانین یێن بوونه ئه‌گه‌ر هه‌لبژارتن بهێنه گیرۆكرن و به‌رهه‌ڤ نه‌بوون هه‌لبژارتنان د ده‌مێ خوه دا بهێنه كرن ژی تاوانبارن و رێ بۆ دادگه‌ها فیدرالی خوه‌ش كرن بریاره‌كا وه‌سا ل دژی خه‌لكێ كوردستانێ دا و جهێ داخێ یه نها هه‌رێما كوردستانێ بێ په‌رله‌مانه.
هه‌رچه‌نده سه‌رۆكێ هه‌رێما كوردستانێ رۆژا ٢٥/٠٢/٢٠٢٤ بۆ هه‌لبژارتنان دیاركریه و ل په‌رله‌مانێ ئیراقێ بریارا درێژكرنا ژیێ كۆمسیۆنا هه‌لبژارتنان یا ئیراقێ هاته دان دا بشێت هه‌لبژارتنێن په‌رله‌مانێ كوردستانێ برێڤه ببه‌ت، لێ هه‌تا نها ژی مه‌ترسیا ڤێ یه‌كێ یا هه‌ی هه‌لبژارتن د ده‌مێ خوه دا نه‌هێنه‌كرن.
ئه‌و سكالا كو ژ ئالیێ ئێكه‌تیێ ڤه ل دۆر سیسته‌مێ هه‌لبژارتنان هاتیه تۆماركرن؛ دشێت ئاریشه‌كا نوو دروست بكه‌ت، چونكی ئێكه‌تیێ دڤێت سیسته‌مێ هه‌لبژارتنان بهێته گوهۆڕین و بابه‌تێ كورسیێن كۆتا ژی ئاریشه‌كا دیتره، هه‌رچه‌نده بریارا په‌رله‌مانێ ئیراقێ بۆ درێژنا ژیێ كۆمسیۆنا هه‌لبژارتنان پێنگاڤه‌كا گرنگه، لێ هه‌كه هێزێن سیاسی ل هه‌رێما كوردستانێ د زووترین ده‌م دا سه‌باره‌ت ب هه‌لبژارتنان نه‌گه‌هنه رێككه‌فتنه‌كێ، مه‌ترسیا ڤێ ئێكێ یا هه‌ی هه‌لبژارتن د ده‌مێ خوه دا نه‌هێنه‌كرن.
د ڤان گوهۆڕینێن بله‌ز یێن ل رۆژهه‌لات ناڤین دا، د ره‌وشه‌كێ دا كو به‌غدا ب هه‌موو ره‌نگه‌كێ یێ بزاڤا لاوازكرنا هه‌رێما كوردستانێ دكه‌ت، نه‌بوونا په‌رله‌مانی ل هه‌رێما كوردستانێ ئاریشه‌كا گه‌له‌ك مه‌زنه و دڤێت هه‌موو هێزێن سیاسی ب تایبه‌تی ژی ئه‌و هێزێن ب به‌هانێن جودا جودا هه‌تا نها بووینه رێگر ل هه‌مبه‌ر هه‌لبژارتنان، هه‌ست ب به‌رپرسیاریا خوه یا دیرۆكی ل هه‌مبه‌ر خه‌لكێ هه‌رێما كوردستانێ بكه‌ن و ئێدی به‌رژه‌وه‌ندیێن بلند یێن خه‌لكێ هه‌رێما كوردستانێ نه‌كه‌نه قوربانیا به‌رژه‌وه‌ندیێن خوه یێن ته‌نگ.
خالا دی یا گه‌له‌ك گرنگ ژی هه‌بوونا دستووره‌كێ یه بۆ هه‌رێما كوردستانێ، مخابن سه‌ره‌رای هندێ كو دستوورێ ئیراقێ رێك دایه هه‌رێما كوردستانێ خوه‌دان دستوور بیت، لێ دیسا ژ به‌ر ناكۆكیێن هێزێن سیاسی هه‌تا نها هه‌رێما كوردستانێ بێ دستووره، ژ به‌ر ڤێ یه‌كێ ژی گه‌له‌ك یا گرنگه پشتی هه‌لبژارتنێن په‌رله‌مانێ كوردستانێ، كارێ هه‌ری سه‌ره‌كی یێ په‌رله‌مانی و ئالیێن سیاسی ئاماده‌كرنا دستوورێ هه‌رێما كوردستانێ بیت، ئاشكرایه هه‌كه نها هه‌رێما كوردستانێ خوه‌دانا دستوورێ خوه با پرانیا ئه‌ڤ ئاریشێن نها ئه‌م تێدا روو نه‌ددان، ژ به‌ر ڤێ ئێكێ ژی هه‌بوونا دستووره‌كێ بۆ هه‌رێما كوردستانێ گه‌له‌ك گرنگه.
بابه‌تێ كورسیێن كۆتا سیمایێ دیموكراسی و پێكڤه‌ژیانێ یه ل هه‌رێما كوردستانێ، هه‌بوونا پێكهاتێن جودا و بیروبارێن جودا ل هه‌رێما كوردستانێ، هه‌بوونا نوونه‌رێن وان ل په‌رله‌مانێ كوردستانێ هه‌رده‌م وه‌سا كریه د ئاستێ نێڤده‌وله‌تی دا گرنگیه‌كا گه‌له‌ك مه‌زن ب هه‌رێما كوردستانێ بهێته‌دان، نابیت نها ئێكه‌تی ژ بۆ چه‌ند كورسیكان بزاڤا هندێ بكه‌ت ده‌ستكاری د كورسیێن كۆتا دا بهێته كرن، ئه‌و یه‌ك دێ ئه‌نجامێن خوه یێن گه‌له‌ك خراب بۆ هه‌رێما كوردستانێ هه‌بیت، دڤێت ئه‌م ژبیر نه‌كه‌ین ده‌مێ سه‌ركردێن وه‌لاتێن جیهانێ سه‌ره‌دانا هه‌رێما كوردستانێ دكه‌ن هه‌رده‌م به‌حسێ جوانیا پێكڤه‌ژیانا هه‌رێما كوردستانێ دكه‌ن، ئه‌و یه‌ك ژی بێگومان شانازیه‌كا مه‌زنه بۆ هه‌موو خه‌لكێ هه‌رێما كوردستانێ، گرنگه ئه‌و یه‌ك ژی نه‌بیته قوربانیا به‌رژه‌وه‌ندیێن هێزه‌كا سیاسی، چونكی دێ وه‌سا كه‌ت د ئاستێ نێڤده‌وله‌تی دا پشته‌ڤانیا نها یا بۆ هه‌رێما كوردستانێ هه‌ی، بهێته كێمكرن و ئه‌و یه‌ك ژی بێگومان دێ ئه‌نجامێن خوه یێن گه‌له‌ك خراب بۆ هه‌موو وه‌لاتیێن هه‌رێما كوردستانێ هه‌بیت، ئه‌و یه‌ك دێ بیته ئه‌گه‌رێ لاوازكرنا پێگه‌هێ هه‌رێما كوردستانێ و دڤێت وه‌لاتی و هێزێن سیاسی ڤێ یه‌كێ ب توندی ره‌ت بكه‌ن.
نيشاندانWP Facebook Auto Publish Powered By : XYZScripts.com