ئه‌ڤین بارزانی
سه‌ره‌دانا سه‌رۆك بارزانی بۆ به‌غدا د راستی دا ده‌ستپێكا قۆناغه‌كا نوو یه هه‌م بۆ ئیراقێ و هه‌م ژی بۆ هه‌رێما كوردستانێ، هێزێن شیعه یێن ئیراقێ برێڤه دبه‌ن باش دیتن كو بێی رۆلێ كارا یێ هه‌رێما كوردستانێ و بێی رازیبوونا سه‌رۆك بارزانی پرۆسیسا سیاسی ل ئیراقێ یا سه‌ركه‌فتی نابیت، ئه‌زموونا چه‌ندین سالێن بۆری سه‌لماند كو ئیراق د قه‌یرانه‌كا گه‌له‌ك مه‌زن دایه، سه‌رۆك بارزانی ئێكه ژ سه‌ركردێن هه‌ری كاریگه‌ر كو كار بۆ دامه‌زراندنا ئیراقێ نوو یا كری، سه‌رۆك بارزانی د ئاماده‌كرنا دستوورێ نوو یێ ئیراقێ دا رۆله‌ك كارا هه‌بوو، هه‌رچه‌نده هنده‌ك هێزان وه‌سا هزر دكر هه‌كه بشێن هه‌رێما كوردستانێ لاواز كه‌ن دێ ئه‌و بهێز كه‌ڤن، لێ بۆ وان ژی دیار بوو بێی رازیبوونا هه‌رێما كوردستانێ و ب تایبه‌تی ژی مه‌رجه‌عێ كوردان ئه‌و نه‌شێن ئیراقێ برێڤه ببه‌ن و دێ هه‌ر د قه‌یران و نه‌خوه‌شیان دا بن.
سه‌رۆك بارزانی سه‌ركردایه‌تیا شۆره‌شه‌كا مه‌زن بۆ ئازادیا كوردان دكه‌ت، د ئاستێ ئیراقێ، رۆژهه‌لاتا ناڤین و جیهانێ دا رێزه‌ك مه‌زن ل جه‌نابی وی دهێته گرتن، ژ به‌ر ڤێ یه‌كێ ژی پێشه‌وازیه‌كا گه‌له‌ك گه‌رم ل سه‌رۆك بارزانی هاته‌كرن، هه‌كه براستی هێزێن شیعه ل به‌غدا بخوازن به‌غدا پایته‌ختێ وه‌لاته‌كێ فیدرالی بیت و هه‌موو كه‌س تێدا هه‌ست ب ئارامیێ بكه‌ن و شانازیێ ب وه‌لاتێ خوه بكه‌ن وی ده‌می دڤێت رێزێ ل هه‌رێما كوردستانێ بگرن، وه‌كو هه‌رێمه‌كا دستووری هه‌موو مافێ وێ بده‌نێ، هه‌تا ئه‌و یه‌ك نه‌هێته كرن به‌غدا ژی ئه‌و به‌غدا نابیت یا كو براستی ببیته پایته‌ختێ وه‌لاته‌كێ كو هه‌موو وه‌لاتیێنوێ شانازیێ پێ بكه‌ن.
سه‌رۆك بارزانی ب سه‌ره‌دانا خوه یا دیرۆكی جاره‌كا دی ئه‌ڤ په‌یامه دا به‌رپرسێن ئیراقێ كو وه‌كو هه‌رێما كوردستانێ وان دڤێت د چارچۆڤێ دستووری هه‌موو پرسێن هه‌ی چاره‌سه‌ر بكه‌ن، كوردان دڤێت ل ئیراقه‌كا فیدرالی دا بژین كو هه‌موو مافێن وان بهێته گه‌ره‌نتی كرن، كورد زۆلم و زۆرداریێ قه‌بوول ناكه‌ن، نها ته‌پ د مه‌یدانا به‌رپرسێن شیعه دایه، هه‌كه براستی ژی وان بڤێت ره‌وشا ئیراقێ یا باش بیت و پرسێن هه‌ی ژی بهێنه چاره‌سه‌ركرن دێ ئه‌و شانسێ سه‌رۆكی دایه وان مفایێ ژێ وه‌ربگرن و دووماهیێ ب گه‌له‌ك ئاریشان بینن.
د هه‌مان ده‌می دا هه‌كه هه‌لوه‌ستێ به‌رپرسێن ئیراقێ وه‌كو چه‌ند سالێن بۆری بیت بێگومان دێ ئاریشێن هه‌ی ژی به‌رده‌وام بن و ره‌نگه زێده‌تر ژی لێ بهێن، بلا هه‌ر كه‌س بزانیت ده‌مێ به‌غدایێ ئاریشه ل گه‌ل هه‌رێما كوردستانێ هه‌بن ئانكۆ به‌غدا ژی یا ئارام نینه، بكارئینانا هنده‌ك كارتان ب تایبه‌تی ژی كارتێ بۆدجه‌ی ل دژی خه‌لكێ هه‌رێما كوردستانێ ژ ئالیێ هنده‌ك به‌رپرسێن ئیراقێ ڤه چو ده‌مه‌كێ سه‌ركه‌فتی نابیت، دیرۆكێ سه‌لماندیه كو كورد زۆرداریێ قه‌بوول ناكه‌ن و هه‌لوه‌ستێ توند یێ به‌رپرسێن ئیراقێ دێ وه‌سا كه‌ت كو ئاریشێن هه‌ی زێده‌تر لێ بهێن و وی ده‌می دێ به‌غدا ژی تووشی گه‌له‌ك ئاریشان بیت.
سه‌رۆك بارزانی وه‌كو مه‌رجه‌عێ گه‌لێ كورد ب سه‌ربلندی و بهێز چوو به‌غدا، په‌یاما ئاشتیێ و پێكڤه‌ژیانێ دا به‌رپرسێن شیعه ل به‌غدا، نیه‌تا چاره‌سه‌ریا هه‌موو ئاریشان گه‌هانده وان، ره‌نگه ئه‌ڤه د گه‌له‌كه بیاڤان دا شانسێ دووماهیێ ژی بیت، چونكی خه‌لكێ هه‌رێما كوردستانێ ژی ئێدی قه‌بوول ناكه‌ن هه‌رده‌م ب هنده‌ك به‌هانه‌یان به‌غدا زۆرداریێ بكه‌ت و مافێن كوردان نه‌ده‌تێ، سه‌رۆك بهێز چوو به‌غدا، ئه‌و یه‌ك نیشا دده‌ت هه‌رێما كوردستانێ هه‌ر یا بهێزه و په‌یامێن سه‌رۆك بارزانی ل به‌غدا هه‌موو نیشانا بهێزیا هه‌رێما كوردستانێ و ب تایبه‌تی ژی پارتی دیموكراتی كوردستان بوون.
نووترين نووچه
- مەسرور بارزانی پیرۆزباهیێ ل هەردو قوتابیێن ئێكێ و دویێ ل سەر ئاستێ ئیراقێ دكەت
- دخوازین رەوشا نە هنارتنا بۆدجەی و مووچەی ب شێوەیەكێ رێكخستی ژ بەغدا ب دووماهی بهێت
- سۆدانی بۆ فەرمانگەهێن حوكمەتا ئیراقێ: ناڤێ پەكەكێ ب رێكخستییەکا قەدەغەكری بینن
- كۆمسیۆن: هیچ بەربژارەكێ پارتی ژ هەلبژارتنان نەهاتییە دوورئێخستن
- سەگڤان سندی: داخوازیێن كوردان د دانوستاندنێن ئەمریكا و ئیراقێ دا یێن هاتینە بەرچاڤكرن
- هیومان رایتس ووچ: هەتا نوكە ئاوارەیێن شنگالێ نەهاتینە قەرەبووكرن
- نێچیرڤان بارزانی و مەسرور بارزانی بۆ پشكداریێ د گۆپیتكا سەركردەیێن جیهانی دا بۆ سەقای دهێنە خواندن
- ماجد سەید سالح: رەوشەنبیرییا نەتەوەیی و نیشتمانی ئەڤرۆ گەلەك پێدڤیترە ژ دوهی
- پارتی داخواز دكەت كوردەكێ بێلایەن ببیتە پارێزگار
- دڤێت كوردەك ببیتە پارێزگارێ كەركووكێ
ئه‌ڤین بارزانی
دیاركرنا رۆژا هه‌لبژارتنان
ئه‌ڤین بارزانی
پشتی ناكۆكیێن گه‌له‌ك مه‌زن و ژناڤچوونا سیناریۆیا هه‌لبژارتنان ژ ئالیێ پارتی دیموكراتی كوردستان ڤه ل دووماهیێ هه‌موو هێز و ئالیێن سیاسی رازیبوون كو ژڤانه‌ك نوو ژ ئالیێ سه‌رۆكێ هه‌رێما كوردستانێ ڤه بۆ برێڤه‌چوونا هه‌لبژارتنێن په‌رله‌مانێ كوردستانێ بهێته دیاركرن و رۆژا ٢٠ مه‌ها ١٠ یا ئه‌ڤساله هاته دیاركرن.
به‌ری هه‌ر تشته‌كێ دڤێت ڤێ راستیێ دیار بكه‌م كو پارتی شه‌ڕه‌ك مه‌زن كر هه‌تا شیا سیناریۆنا هه‌لبژارتنان یا ژ بۆ بێ ئیراده‌كرنا خه‌لكێ هه‌رێما كوردستانێ ژناڤ ببه‌ت، چونكی ل هه‌رێما كوردستانێ و به‌غدا چه‌ند هێزێن سیاسی دخواستن ب رێیا هه‌لبژارتنه‌كا به‌رنامه‌كری ئیرادا خه‌لكێ هه‌رێما كوردستانێ ژناڤ ببه‌ن و به‌ری هه‌لبژارتنان هه‌موو تشت د به‌رژه‌وه‌ندیا وان دا بهێته ئێكلاكرن، لێ سه‌ركردایه‌تیا پارتی دیموكراتی كوردستان ب تایبه‌تی ژی جه‌نابێ سه‌رۆك بارزانی هه‌ر زوو هه‌ست ب پیلانه‌كا مه‌ترسیدار ل دژی هه‌رێما كوردستانێ كر و پارتی بریاره‌كا دیرۆكی دا و نه‌هێلا سیناریۆیا هه‌لبژارتنان سه‌ر بگریت، پشتی بریارا دیرۆكی یا پارتی ژی هه‌موو هه‌ڤسه‌نگیێن سیاسی ل هه‌رێما كوردستانێ ب ره‌نگه‌كێ دی هاتنه گوهۆڕین و نها ژڤانه‌ك نوو بۆ هه‌لبژارتنێن په‌رله‌مانێ كوردستانێ هاته دیار كرن.
پارتی ب رێیا كۆنفرانسێن ناڤخوه‌یی یێ خوه بۆ هه‌لبژارتنان به‌رهه‌ڤ دكه‌ت، بێگومان ئاشكرایه هه‌لبژارتنێن ڤێجارێ یێن په‌رله‌مانێ كوردستانێ وه‌كو چو هه‌لبژارتنێن به‌ری نها نابن، چونكی هه‌م ده‌ستێوه‌ردانێن ده‌ره‌كی هه‌نه، ئیران و هێزێن سه‌ر ب وێ دێ ب هه‌موو ره‌نگه‌كێ بزاڤا ڤێ یه‌كێ كه‌ن كو ئێدی هه‌ر دو پۆستێن مه‌زن ئانكۆ سه‌رۆكێ هه‌رێمێ و سه‌رۆكێ حوكمه‌تێ بۆ پارتی نه‌بیت، ل هه‌مبه‌ر دا پارتی ژی پشتا وێ ب خه‌لكێ كوردستانێ و ده‌نگده‌رێن خوه گه‌رمه و خه‌لكێ هشیار یێ هه‌رێما كوردستانێ ژی باش دزانیت تنێ هێزا سیاسی كو بشێت كوردستانێ ل هه‌مبه‌ر پیلانێن داگیركه‌ران بپارێزیت پارتی دیموكراتی كوردستانه، لێ دیسان ژی دڤێت پارتی خوه بۆ هه‌ر سینایۆیه‌كێ و پیلانه‌كێ به‌رهه‌ڤ بكه‌ت.
ئه‌ڤ هه‌لبژارتنه پشتی هه‌لبژارتنێن سه‌رۆك كۆماریێ ل ئیرانێ و سه‌رۆكایه‌تیا ئه‌مریكا دهێنه كرن، ئانكۆ د ئاستێ جیهانێ و رۆژهه‌لاتا ناڤین دا دێ گه‌له‌ك گوهۆڕینێن مه‌زن روو ده‌ن، هه‌رێما كوردستانێ ژی بێگومان دێ كه‌ڤیته ژێر كاریگه‌ریا بهێز یا هه‌ر گوهۆڕینه‌كێ، نیه‌تا به‌رپرسێن ئیراقێ ژی ئه‌و نینه كو پرسێن هه‌ی ل گه‌ل هه‌رێما كوردستانێ چاره‌سه‌ر بكه‌ن، به‌لكو ئه‌و یێ ژ ده‌لیڤه‌كێ دگه‌رن دا بشێن قه‌وارێ هه‌رێما كوردستانێ زێده‌تر لاواز بكه‌ن دا هه‌رێما كوردستانێ یا نه‌چار بیت هه‌موو داخوازیێن به‌غدا قه‌بوول بكه‌ت، چونكی ئه‌و ژی باش دزانن ل هه‌رێما كوردستانێ هنده‌ك هێز هه‌نه یێ به‌رهه‌ڤن هه‌موو تشته‌كێ بده‌نه به‌غدا و ل هه‌مبه‌ر دا تنێ داخوازا نانێ سه‌رشوریێ دكه‌ن.
پارتی هه‌تا نها شیایه پیلانێن هه‌ی تا راده‌یه‌كێ ژناڤ ببه‌ت، ژ بۆ ڤان هه‌لبژارتنان ژی دڤێت پارتی هه‌م ژ ئالیێ ده‌ستنیشانكرنا به‌ربژاران و هه‌م ژی به‌رنامێ خوه راستیێن هه‌ی باش ل به‌رچاڤ وه‌ربگریت، هێڤیدارم به‌رژه‌وه‌ندیێن بلند یێن خه‌لكێ هه‌رێما كوردستانێ ل پێش به‌رژه‌وه‌ندیێن هنده‌ك كه‌سان یان ژی عه‌شیره‌تان بهێته به‌رچاڤ وه‌رگرتن، بهێزبوونا پارتی ئانكۆ بهێزبوونا هه‌رێما كوردستانێ و ده‌مێ هه‌رێما كوردستانێ یا بهێز بیت هه‌موو وه‌لاتیێن هه‌رێما كوردستانێ دێ دلخوه‌ش بن، ژ بۆ ڤێ یه‌كێ ژی گرنگه وه‌كو كادرێن پارتی و ره‌وشه‌نبیرێن كورد ل هه‌رێما كوردستانێ ئه‌م ژی هه‌ست ب به‌رپرسیاریا خوه یا دیرۆكی بكه‌ین، چونكی پارتی دیموكراتی كوردستان هێڤیا هه‌موو خه‌لكێ هه‌رێما كوردستانێ یه، دڤێت ڤێ راستیێ ژی باش بزانین ئه‌ڤرۆكه چاڤێ هه‌موو كوردان ل جیهانێ ل هه‌رێما كوردستانێ یه، بهێزبوونا هه‌رێما كوردستانێ ئانكۆ بهێزبوونا هه‌موو كوردان ل سه‌ر ئاستێ جیهانێ.
خوه‌چه‌ماندن و راده‌ستكرن د كه‌لتورێ پارتی دا نینه
ئه‌ڤین بارزانی
ئه‌و هێزێن سیاسی یێن كوردی كو هه‌ر رۆژ دگۆتن كا به‌غدا چ دڤێت بده‌نێ به‌س دا به‌غدا نانه‌كێ بده‌ته مه، هه‌كه ل گۆر گۆتنا وان با، دڤیا نوكه تشته‌ك ب ناڤێ هه‌رێما كوردستانێ نه‌مابا، لێ پارتی دیموكرات كوردستان شیا ره‌وشا هه‌ی ب ره‌نگه‌كێ دی بگوهۆڕینیت و هه‌موو هه‌ڤسه‌نگیێن سیاسی ب ره‌نگه‌كێ دی هاتنه گوهۆڕین كو ئه‌ڤرۆكه گه‌له‌ك مه‌ترسی ل سه‌ر هه‌رێما كوردستانێ نه‌مایه.
پارتی ب جهێ هندێ كو هه‌موو داخوازیێن به‌غدا قه‌بوول بكه‌ت، ده‌ستوورێ ئیراقێ وه‌كو بنه‌مایێ چاره‌سه‌ریێ دا پێش، ل گه‌ل به‌غدا و ته‌هرانێ ده‌ست ب گه‌ره‌كا دی یا دانوستاندنان كر و ب سیاسه‌ته‌كا حه‌كیمانه گه‌له‌ك ژ پیلانێن دوژمنێن گه‌لێ كوردستانێ هاتنه ژناڤبرن، پیلانا هه‌ری مه‌زن ژی سیناریۆیا هه‌لبژارتنان بوو.
ب تایبه‌تی ژی پشتی سه‌ره‌دانا سه‌رۆكێ هه‌رێمێ بۆ ئیرانێ، فشارێن به‌غدا تا راده‌یه‌كێ لاواز بووینه، گه‌له‌ك ژ داخوازیێن ره‌وا یێن خه‌لكێ كوردستانێ ژ ئالیێ به‌غدا ڤه هاتینه قه‌بوول كرن، بابه‌تێ مووچه و بۆدجه‌ی به‌ر ب چاره‌سه‌ریه‌كا ریشه‌یی ڤه دچیت، هه‌كه هندكه ئالیێن سیاسی ل هه‌رێما كوردستانێ ئاسته‌نگیان دروست نه‌كه‌ن، وه‌كو وه‌لاتیێن هه‌رێما كوردستانێ دێ چه‌ندین سالێن خوه‌ش چاڤه‌رێی مه بن، ب تایبه‌تی ژی د بیاڤێ ئابووری دا دێ ره‌وش گه‌له‌ك باشتر لێ هێت.
كا چاوا پارتی دیموكراتی كوردستان د شه‌رێ ل دژی رژێما دكتاتور یا سه‌دامی و شه‌رێ ل دژی داعشێ دا خۆراگری هه‌لبژارت و ب پشته‌ڤانیا خه‌لكێ هه‌رێما كوردستانێ شیا سه‌ركه‌ڤیت د سیاسه‌تا ل هه‌مبه‌ر به‌غدا ژی پارتی هه‌مان ستراتیژی هه‌لبژارت و دیسان به‌ر ب سه‌ركه‌فتنێ ڤه دچیت، چونكی د كه‌لتورێ پارتی و بارزانی دا خوه‌چه‌ماند بۆ دوژمن و نه‌یاران نینه، د كه‌لتورێ پارتی دا خوه‌گۆری كرن، قوربانیدان بۆ گه‌ل و وه‌لاتی هه‌یه، ژ به‌ر ڤێ یه‌كێ ژی هه‌ر ده‌مێ روودانه‌ك مه‌زن روو بده‌ت یان ژی ئێرش و گه‌ف ل سه‌ر هه‌رێما كوردستانێ هه‌بن، هه‌موو خه‌لكێ كوردستانێ چاڤه‌رێی بریارا پارتی دیموكراتی كوردستانن.
پارتی جاره‌كا دی سه‌لماند شه‌رێ هه‌ری مه‌زن یێ نها ب رێیا سیاسه‌تێ، ب رێیا دبلۆماسیێ دهێته كرن، ژ بۆ سه‌ركه‌فتنێن مه‌زنتر ژی پارتی كار دكه‌ت، لێ دهێته خواستن هێزێن سیاسی یێن هه‌رێما كوردستانێ ژی ئێدی وانێن پێدڤی ژ دیرۆكێ وه‌ربگرن، چونكی گه‌له‌ك ژ وان تنێ ب رێیا دژبه‌ریا پارتی دخوازن پێگه‌هه‌كێ بۆ خوه په‌یدا بكه‌ن، لێ هه‌كه ل گه‌ل پارتی پێكڤه ل سه‌نگه‌رێ به‌رخوه‌دانێ بن و كار بۆ بده‌ستڤه‌ئینانا مافێن ره‌وا یێن گه‌لێ كوردستانێ بكه‌ن وان دێ پێگه‌هه‌ك گه‌له‌ك باشتر ژ نها هه‌بیت.
خوه كێمكرن بۆ دوژمنێ چو ده‌مه‌كێ ئه‌نجامێ خوه نه‌بوویه، هه‌كه تشته‌ك ژی بۆ هنده‌ك هێزێن بچوویك ده‌ستڤه هاتیبیت ژی ئه‌و نانێ سه‌رشوریێ یه، ژ به‌ر ڤێ یه‌كێ ژی نها كو هه‌رێما مه و ده‌ڤه‌ر ب گشتی به‌ر ب گوهۆڕینێن مه‌زن ڤه دچن، دهێته خواستن هێزێن سیاسی ئێدی ده‌ست ژ هه‌لوه‌ستێن خوه یێن له‌رزوك به‌رده‌ن و ل گه‌ل پارتی پێكڤه كار بۆ بهێزكرنا پێگه‌هێ هه‌رێما كوردستانێ بكه‌ن، چونكی بهێزبوونا هه‌رێما كوردستانێ دێ بیته جهێ شانازی و سه‌ربلندیێ بۆ هه‌موو هێزێن سیاسی و بۆ هه‌موو وه‌لاتیێن هه‌رێما كوردستانێ.
ئه‌م یێ به‌ر ب ٧٨ سالیا دامه‌زراندنا پارتی ڤه دچین، دیرۆكه‌ك پر ژ شانازی و سه‌ربلندیێ، كا چاوا شانازیه مرۆڤ كورد بیت وه‌سا ژی شانازیه‌كا مه‌زنه مرۆڤ ئه‌ندامێ پارته‌كا مه‌زن بیت كو ئه‌ڤرۆكه د ئاستێ جیهانێ، رۆژهه‌لاتا ناڤین و ئیراقێ دا حسابه‌كا مه‌زن بۆ دهێته كرن.
پارتی جاره‌كا دی سه‌لماند ئیرادا گه‌ل دێ سه‌ركه‌ڤیت
ئه‌ڤین بارزانی
١٠ سالن به‌رپرسێن به‌غدا ل ژێر ناڤێن جودا جودا كار بۆ نه‌هێلانا قه‌وارێ هه‌رێما كوردستانێ دكه‌ن، د راستی دا ده‌مێ دستوورێ ئیراقێ هاته په‌سه‌ند كرن و سیسته‌م ئیراقێ بوویه فیدرالی هه‌ر ژ وێ رۆژێ هه‌تا نها كار بۆ لاوازكرنا هه‌رێما كوردستانێ و نه‌هێلا وێ دهێته كرن، چونكی هه‌بوونا وه‌لاته‌كێ فیدرالی د ناڤ جه‌رگێ سیسته‌مێ پاشكه‌فتی و ب تایبه‌تی ژی داگیركه‌رێن كوردستانێ ب دلێ توركیا، ئیران و سووریێ نینه و نابیت ژی.
توندره‌وێن شیعه ل به‌غدا هه‌موو رێ بۆ نه‌هێلانا هه‌رێما كوردستانێ بكار ئینان و نه‌شیان سه‌ركه‌ڤن، پاره دانه هنده‌ك هێزان ل هه‌رێما كوردستانێ دا دژبه‌ریا حوكمه‌ت و سازیێن هه‌رێما كوردستانێ بكه‌ن، هه‌تا نها ژی ئه‌و یه‌ك به‌رده‌وامه، ئه‌ڤرۆكه هنده‌ك ژ ده‌زگه‌هێن راگه‌هاندنێ ل هه‌رێما كوردستانێ تنێ دژبه‌ریا حوكمه‌تێ دكه‌ن و ئێك بابه‌تێ وان ل دژی زۆرداریا به‌غدا نینه.
لێ پارتی دیموكراتی كوردستان ب پشت به‌ستن ب ئیرادا خه‌لكێ هه‌رێما كوردستانێ شیا گه‌له‌ك پیلانێن دوژمنان ژناڤ ببه‌ت، وان دخواستن ب رێیا سیناریۆیا هه‌لبژارتنان پارتی لاواز بكه‌ن ئه‌و یه‌ك ژی سه‌ر نه‌گرت و نها ژی بابه‌تێ ئێزدیان دخوازن بكار بینن، دخوازن ئێزدیان وه‌كو نه‌ته‌وه‌كا جودا ب فه‌رمی ل ئیراقێ بده‌نه ناسكرن، ئه‌و یه‌ك بۆ لاوازكرنا كوردان، پارچه‌كرنا نه‌ته‌وا كورده و دڤێت ب توندی ئه‌و یه‌ك بهێته ره‌تكرن.
ئاریشا مه ل گه‌ل به‌غدا تنێ موچه و بۆدجه نینه، مه ئاریشا ئاخێ ل گه‌ل به‌غدا هه‌یه، دڤێت ئه‌م باش بزانین هه‌تا كه‌ركووك و ده‌ڤه‌رێن دی یێن داگیركری نه‌هێنه سه‌ر هه‌رێما كوردستانێ ئاریشێن هه‌ی دێ وه‌كو خوه مینن و دێ بابه‌ت ئالۆزتر لێ هێت، راسته بابه‌تێ موچه‌ی د ره‌وشا نها دا گه‌له‌ك گرنگه، چونكی گرێدای ژیانا خه‌لكی یه، لێ دوژمنێن گه‌لێ كوردستانێ ژی باش دزانن هه‌كه نها بابه‌تێ موچه‌ی چاره‌سه‌ر بكه‌ن دێ سوباهی كورد داخوازێن دی كه‌ن، دیاره ژ به‌ر ڤێ یه‌كێ ژی دخوازن بابه‌تی درێژ بكه‌ن دا تنێ داخوازیێن كوردان موچه و بۆدجه بیت، هه‌رچه‌ند جاش و كرێگرتیێن وان ل هه‌رێما كوردستانێ ژی تنێ ڤێ ئاریشێ وه‌كو ئاریشا سه‌ره‌كی یا خه‌لكێ هه‌رێما كوردستانێ دبینن.
سه‌رۆكێ هه‌رێما كوردستانێ ل گه‌ل سه‌رۆك وه‌زیران ده‌ست ب بزاڤه‌كا مه‌زن یا دبلۆماسی كرن و شیان فشارێن ل سه‌ر هه‌رێما كوردستانێ كێم بكه‌ن، هه‌كه بابه‌تێ په‌ترۆلا هه‌رێما كوردستانێ ژی بهێته چاره‌سه‌ركرن دێ كارتێن د ده‌ستێ به‌غدا دا ل دژی هه‌رێما كوردستانێ گه‌له‌ك كێم بن، پارتی پشتا خوه ب ئیرادا خه‌لكێ كوردستانێ گه‌رم كر و شیا هه‌تا راده‌یه‌كێ پرسێن هه‌ی د به‌رژه‌وه‌ندیا خه‌لكێ هه‌رێما كوردستانێ دا چاره‌سه‌ر بكه‌ت، پارتی جاره‌كا دی سه‌لماند ئه‌و ئیرادا خوه راده‌ستی چو هێزه‌كێ ناكه‌ن، به‌لكو دێ كار بۆ بده‌ستڤه‌ئینانا مافێن ره‌وا یێن خه‌لكێ كوردستانێ كه‌ن.
رۆژهه‌لاتا ناڤین به‌ر ب گوهۆڕینێن مه‌زن ڤه دچیت، چاره‌سه‌ركرنا پرسا فه‌له‌ستینیان دێ ده‌رگه‌هه‌كێ نوو بۆ پرسا كوردی ڤه‌كه‌ت، هه‌ر ژ نها ڤه گه‌له‌ك كه‌س به‌حسێ چاره‌سه‌ركرنا پرسا كوردی ژی دكه‌ن، دوژمنێن گه‌لێ كوردستانێ ژی باش دزانن هه‌كه هنده‌ك پیلانێن دی ل دژی كوردان نه‌گێرن و وان لاواز نه‌كه‌ن پشتی چاره‌سه‌ركرنا پرسا فه‌له‌ستینیان دێ ده‌رگه‌ه بۆ دروستكرنا ده‌وله‌تا كوردی ژی ڤه‌بیت، ژ به‌ر ڤێ یه‌كێ ژی دخوازن پرسا كوردی تنێ وه‌كو پرسا موچه و بۆدجه‌ی نیشا بده‌ن، ژ به‌ر ڤێ یه‌كێ ژی گرنگه ئه‌م هه‌موو جاره‌كا دی پشته‌ڤانیێ ل بزاڤێن پارتی بكه‌ین و رێ نه‌ده‌ین نه‌یار و دوژمنێن مه یاریێ ب چاره‌نڤیسێ مه بكه‌ن.
قۆناغه‌كا نوو د په‌یوه‌ندیێن هه‌رێما كوردستانێ و ئیرانێ دا
ئه‌ڤین بارزانی
ئاشكرایه كو ئه‌ڤرۆكه ئیران وه‌لاتێ هه‌ری كاریگه‌ره ل ئیراقێ، بریارێن چاره‌نڤیسساز و گرنگ ل ئیراقێ بێی رازیبوونا ته‌هرانێ ناهێنه دان، پشتی سالا ٢٠٠٣ هه‌تا نها بێی رازیبوونا ته‌هرانێ چو سه‌رۆك وه‌زیره‌ك ل ئیراقێ نه‌هاتیه سه‌ر كار، ئانكۆ هه‌ر تشته‌ك ل گۆر دلێ ئیرانێ و د به‌رژه‌وه‌ندیا وێ دا نه‌بیت زه‌حمه‌ته ل ئیراقێ سه‌ر بگریت.
پشتی سالا ٢٠١٤ قۆناغه‌كا نوو و ئالۆز د په‌یوه‌ندیێن هه‌ولێر و به‌غدایێ دا ده‌ستپێكر و ئه‌ڤ ئالۆزی هه‌تا نها ژی ب ره‌نگێن جودا به‌رده‌وام دكه‌ن، لێ هه‌رێما كوردستانێ و ئیراقێ هه‌ست ب ڤێ یه‌كێ كرن هه‌تا ئه‌ڤ ئاریشێن هه‌ی نه‌هێنه چاره‌سه‌ركرن ره‌وشا ئیراقێ ژی یا ئارام نابیت.
هه‌تا نها وه‌كو هه‌رێما كوردستانێ مه گه‌له‌ك رێككه‌فتن ل گه‌ل حوكمه‌تێن جودا ل ئیراقێ هه‌بووینه، لێ مخابن ئیراقێ پێگری ب رێككه‌فتنان نه‌كریه، به‌ری نها گه‌له‌ك جاران مه یا گۆتی هه‌كه هه‌رێما كوردستانێ بڤێت ئاریشێن هه‌ی بهێنه چاره‌سه‌ركرن بلا ب جهێ به‌غدا جاره‌كێ ژی به‌رێ خوه بده‌ته ته‌هرانێ، یا ڤێ دووماهیێ روو دایی مرۆڤ دشێت د ڤێ چارچۆڤێ دا ئانالیز بكه‌ت.
هه‌بوونا په‌یوه‌ندیێن بهێز یێن هه‌رێما كوردستانێ ل گه‌ل ئه‌مریكا و وه‌لاتێن رۆژئاڤایی هه‌رده‌م بوویه جهێ دلگرانیا به‌رپرسێن ئیرانێ، هه‌ر چه‌نده هه‌رده‌م به‌رپرسێن هه‌رێما كوردستانێ دیار كرینه، ئه‌و نابنه گه‌ف بۆ ئیرانێ و چو وه‌لاته‌كێ دی، به‌لكو هه‌رێما كوردستانێ دڤێت ژ بۆ بهێزكرنا پێگه‌هێ خوه یێ سیاسی و ئابووری په‌یوه‌ندیێن باش ل گه‌ل هه‌موو وه‌لاتێن جیهانێ هه‌بن، بێگومان ئه‌و یه‌ك مافه‌كێ هه‌ری سروشتی یێ هه‌رێما كوردستانێ یه، لێ دڤێت ئه‌م ڤێ یه‌كێ ژی باش بزانین كو بهێزبوونا هه‌رێما كوردستانێ د به‌رژه‌وه‌ندیا ئیرانێ و به‌غدا دا نینه، ژ به‌ر ڤێ یه‌كێ ژی هه‌رده‌م ئاسته‌نگیان ل هه‌مبه‌ر هه‌رێما كوردستانێ دروست دكه‌ن، ژ بۆ نه‌هێلانا ڤان ئاسته‌نگیان هه‌رێما كوردستانێ ده‌ست ب قۆناغه‌كا نوو یا په‌یوه‌ندیێن سیاسی و دبلۆماسی ل گه‌ل كۆمارا ئیسلامی یا ئیرانێ كر كو بێگومان ئه‌ندازیار ڤان په‌یوه‌ندیان ژی به‌رێز نێچیرڤان بارزانی سه‌رۆكێ هه‌رێما كوردستانێ یه.
وه‌كو هه‌رێما كوردستانێ د ڤێ قۆناغا هه‌ستیار دا ئه‌م چه‌ند بشێین فشارێن به‌غدا و ته‌هرانێ ل سه‌ر خوه كێم بكه‌ین دێ ئه‌و یه‌ك گه‌له‌ك یا باش بیت، چونكی وه‌كو هه‌رێما كوردستانێ مه پێدڤی ب ڤێ یه‌كێ یا هه‌ی، ل گه‌ل به‌غدا په‌یوه‌ندیێن مه باش بن، چونكی ژ بۆ باشتركرنا ره‌وشا ئابووری یا هه‌رێما كوردستانێ و نه‌هێلانا هنده‌ك به‌هانێن دی پێدڤیه ئه‌م و به‌غدا هنده‌ك ژ ناكۆكیێن هه‌ی چاره‌سه‌ر بكه‌ین، د ڤێ خالێ دا هه‌بوونا په‌یوه‌ندیێن باش و بهێز ل گه‌ل ئیرانێ دێ بیته كارته‌ك گه‌له‌ك بهێز دا به‌غدا یا نه‌چار بیت ده‌ست ژ فشارێن خوه یێن ل سه‌ر هه‌رێما كوردستانێ به‌رده‌ت یان ژی تا راده‌یه‌كێ نه‌رم بیت، ژ بۆ ڤێ یه‌كێ ژی ده‌ستپێكرنا قۆناغه‌كا نوو ل گه‌ل ئیرانێ كاره‌ك گه‌له‌ك گرنگ و د هه‌مان ده‌می دا ئه‌ز دشێم بێژم پێنگاڤه‌كا دیرۆكی بوو.
كا چاوا هه‌رێما كوردستانێ په‌یوه‌ندی ل گه‌ل توركیا، ئه‌مریكا، فره‌نسا و گه‌له‌ك وه‌لاتێن جیهانێ هه‌نه، وه‌سا ژی گه‌له‌ك سروشتی یه كو مه په‌یوه‌ندیێن باش ل گه‌ل ئیرانێ هه‌بن، ده‌ستپێكرنا قۆناغه‌كا نوو ل گه‌ل ئیرانێ دێ كاریگه‌ریه‌كا خوه یا گه‌له‌ك باش ل سه‌ر هه‌رێما كوردستانێ هه‌بیت، گه‌ف و ئێرشێن گرۆپێن چه‌كدار دێ نه‌مینن، وی ده‌می هه‌رێما كوردستانێ دشێت د بیاڤێ ئابووری و سیاسی دا پێگه‌هێ خوه بهێزتر لێ بكه‌ت. دڤێت باش بزانین ئه‌و یه‌ك داخوازیا هه‌موو وه‌لاتیێن هه‌رێما كوردستانێ یه.
كاریگه‌ریا سه‌ره‌دانا سه‌رۆكێ هه‌رێمێ بۆ ئیرانێ
ئه‌ڤین بارزانى
سه‌رۆكێ هه‌رێما كوردستانێ د ره‌وشه‌كا تایبه‌ت دا سه‌ره‌دانا ئیرانێ كر، ده‌زگه‌هێن راگه‌هاندنا ئیرانێ ئه‌و وه‌كو سه‌ركردێ هه‌ری كاریگه‌ر ل ئیراقێ بناڤ كرن و دیار كرن نێچیرڤان بارزانی وه‌كو بالیۆزێ ئاشتیێ یێ هه‌رێما كوردستانێ سه‌ره‌دانا ته‌هرانێ دكه‌ت، سه‌ره‌دانا سه‌رۆكێ هه‌رێما كوردستانێ د ده‌مه‌كێ دا بوو كو وه‌كو هه‌رێما كوردستانێ مه ئاریشێن مه‌زن ل گه‌ل ئیرانێ هه‌نه، ئیرانێ ب ره‌نگه‌كێ راسته‌وخوه ئێرشی هه‌ولێرێ كر و ل دژی ئیرانێ خوه‌نیشادانێن مه‌زن ل هه‌رێما كوردستانێ هاتنه كرن، سه‌ره‌دانا سه‌رۆكێ هه‌رێما كوردستانێ ده‌ستپێكرنا قۆناغه‌كا نوویه ل گه‌ل ئیرانێ، ئه‌م دشێین د چه‌ند خالان دا به‌حسێ گرنگیا سه‌ره‌دانا سه‌رۆكێ هه‌رێمێ و كاریگه‌ریا وێ سه‌ره‌دانا ل سه‌ر پرۆسیسا سیاسی ل ئیراقێ و هه‌رێما كوردستانێ بكه‌ین.
به‌ری هه‌ر تشته‌كێ د ئاستێ هه‌ری بلند دا پێشوازی ل سه‌رۆكێ هه‌رێما كوردستانێ هاته كرن، په‌یامێن سه‌ركرده‌یێن ئیرانێ گه‌له‌ك نه‌رم بوون و داخوازا ده‌ستپێكرنا قۆناغه‌كا نوو ل گه‌ل هه‌رێما كوردستانێ كرن، ئه‌و یه‌ك ژی ئاماژه‌كا به‌رچاڤه كو ئه‌ڤرۆكه هه‌رێما كوردستانێ نه تنێ ل ئاستێ ئیراقێ دا به‌لكو ل ئاستێ رۆژهه‌لاتا ناڤین دا ژی خوه‌دان رۆلێ خوه یێ تایبه‌ته، سه‌رۆكێ هه‌رێما كوردستانێ ژی وه‌كو نوونه‌رێ هه‌موو خه‌لكێ هه‌رێما كوردستانێ ئه‌ڤ په‌یامه دا ئیرانێ كو وه‌كو هه‌رێما كوردستانێ وان دڤێت په‌یوه‌ندیێن باش ل گه‌ل ئیرانێ و هه‌موو وه‌لاتێن جیران هه‌بن، چونكی هه‌رێما كوردستانێ فاكته‌رێ ئارامیێ یه.
بێگومان پشتی سه‌ره‌دانا سه‌رۆكێ هه‌رێما كوردستانێ دهێته چاڤه‌رێكرن كو قۆناغه‌كا نوو د په‌یوه‌ندیێن هه‌رێما كوردستانێ ل گه‌ل ئیرانێ دا ده‌ستپێ بكه‌ت، ئه‌و یه‌ك دێ كاریگه‌ریا خوه ل سه‌ر ژیانا خه‌لكی ژی كه‌ت، چونكی وه‌سا دهێته دیتن دێ په‌یوه‌ندیێن ئابووری و بازرگانی ل گه‌ل ئیرانێ باشتر لێ هێن و ل ئالیێ دی پشتی سه‌ره‌دانا سه‌رۆكێ هه‌رێما كوردستانێ بۆ ئیرانێ، دهێته چاڤه‌رێكرن كو هه‌لوه‌ستێ هێزێن توندره‌و یێن شیعه ژی ل دژی هه‌رێما كوردستانێ وه‌كو خوه نه‌مینیت و ئه‌و ژی نه‌رم ببن.
ره‌نگه گه‌له‌ك كه‌س وه‌سا ببین كو هه‌رێما كوردستانێ وه‌كو هه‌ڤپه‌یمانا ئه‌مریكا ده‌مێ په‌یوه‌ندیێن خوه ل گه‌ل ئیرانێ باش بكه‌ت دێ ئه‌نجامێن وێ چ بن، به‌ری هه‌ر تشته‌كێ دڤێت ئه‌م ڤێ راستیێ قه‌بوول بكه‌ین كو ئه‌مریكا وه‌كو پێدڤی ل هه‌مبه‌ر ئێرشێن گرۆپێن چه‌كدار هه‌رێما كوردستانێ نه پاراست و ب كریاری هه‌تا نها ئه‌مریكا نه‌سه‌لماندیه كو هه‌رێما كوردستانێ وه‌كو هه‌ڤپه‌یمانا خوه یا ستراتیژی دبینیت، هه‌ر رۆژ به‌رپرسێن ئه‌مریكا یێ دبێژن په‌یوه‌ندیێن خوه ل گه‌ل به‌غدا باش بكه‌ن، ژ بۆ كو مه په‌یوه‌ندیێن باش ل گه‌ل به‌غدا هه‌بن دڤێت وه‌كو هه‌رێما كوردستانێ ئه‌م به‌ری هه‌ر تشته‌كێ په‌یوه‌ندیێن خوه ل گه‌ل ئیرانێ باش بكه‌ین، د ڤێ خالێ دا سه‌ره‌دانا سه‌رۆكێ هه‌رێما كوردستانێ بۆ ئیرانێ گه‌له‌ك گرنگ و دیرۆكی یه.
هه‌رێما كوردستانێ د ره‌وشا نها یا گه‌له‌ك ئالۆز ل رۆژهه‌لاتا ناڤین دا دڤێت كار بۆ پاراستنا خوه بكه‌ت، دڤێت هه‌رێما كوردستانێ په‌یوه‌ندیێن خوه ل گه‌ل هه‌موو وه‌لاته‌كێ بهێز بكه‌ت، د ڤێ چارچۆڤێ دا سه‌ره‌دانا سه‌رۆكێ هه‌رێما كوردستانێ رێزدار نێچیرڤان بارزانی بۆ ئیرانێ گه‌له‌ك گرنگ و دیرۆكی یه، سه‌رۆكێ هه‌رێما كوردستانێ جاره‌كا دی سه‌لماند كو ئه‌و دشێت هه‌موو ده‌رگه‌هێن گرتی ڤه‌كه‌ت، ب سیاسه‌ت و بسپۆریا خوه شیا په‌یاما ئاشتیێ بده‌ته ئیرانێ، د ره‌وشا نها دا وه‌كو هه‌رێما كوردستانێ دڤێت ئه‌م په‌یوه‌ندیێن خوه ل گه‌ل ئیرانێ و توركیا باش بكه‌ین، ئه‌و یه‌ك د به‌رژه‌وه‌ندیا هه‌رێما كوردستانێ دایه.
نێچیرڤان بارزانی و هێڤیه‌كا نوو بۆ چاره‌سه‌ریێ
ئه‌ڤین بارزانی
سه‌رۆكێ هه‌رێما كوردستانێ نێچیرڤان بارزانی ئێكه ژ وان سه‌ركردێن ناڤدار د ئاستێ ئیراقێ و هه‌رێما كوردستانێ دا كو هه‌رده‌م ب گۆتارا خوه یا نه‌رم و ئاشتیانه بزاڤا چاره‌سه‌ركرنا ئاریشێن هه‌ی كریه، ژ به‌ر ڤێ یه‌كێ ژی نه تنێ د ناڤ كوردان دا به‌لكو د ئاستێ ئیراقێ و ده‌ڤه‌رێ دا ژی كه‌سه‌ك خۆشتڤی یه و رێز لێ دهێته گرتن، د سه‌ره‌دانا هه‌ری دووماهیێ یا بۆ به‌غدایێ دا ژی ده‌ركه‌فت كو هێز و ئالیێن شیعه ژی ب ره‌نگه‌كێ گه‌له‌ك باش هه‌ست ب رۆل و سه‌نگێ سه‌رۆكێ هه‌رێما كوردستانێ كرینه، ده‌مێ مالكی گۆتی سه‌رۆكێ هه‌رێما كوردستان بهێز هاتیه به‌غدا، ئاماژه‌كا راسته‌قینه یه بۆ ڤێ یه‌كێ، كو چاره‌سه‌ریا پرسێن نها یێن ئیراقێ و هه‌رێما كوردستانێ ل ده‌ف پارتی دیموكراتی كوردستانه.
سه‌رۆكێ هه‌رێما كوردستانێ د سه‌ره‌دانا خوه یا بۆ به‌غد دا ڤێجارێ ئه‌ڤ په‌یامه دا به‌رپرسێن ئیراقێ، كو هه‌كه هه‌وه بڤێت ره‌وشا ئیراقێ یا ئارام بیت، دڤێت دستوور ببیته بنه‌مایێ چاره‌سه‌ریا هه‌موو ئاریشێن هه‌ی، دڤێت به‌رپرسێن به‌غدا رێزێ ل ماف و داخوازیێن خه‌لكێ هه‌رێما كوردستانێ بگرن، هه‌لوه‌ستێ بوێر و بهێز یێ پارتی دیموكراتی كوردستان و سه‌رۆكێ هه‌رێمێ جاره‌كا دی نیشا دا، بێی پارتی نه به‌غدا دێ یا ئارام بیت و نه ژی ل هه‌رێما كوردستانێ هنده‌ك هێز دشێن به‌حسێ پرۆژێن خوه بكه‌ن، چونكی پارتی دیموكراتی كوردستان نوونه‌راتیا هه‌موو خه‌لك و پێكهاتێن ل هه‌رێما كوردستانێ دكه‌ت.
پارتی نوكه شه‌ڕی بۆ مافێن كوردان و پێكهاتێن دی یێن ل هه‌رێما كوردستانێ دكه‌ت، ئه‌و یه‌ك ژی نیشا دده‌ت پارتی چه‌ند حزبه‌كا مه‌زنه، ئه‌ڤرۆكه پارتی و جه‌نابێ سه‌رۆك بارزانی دبێژن دڤێت كورسیێن پێكهاتان بۆ وان بهێته ڤه‌گه‌راندن، دڤێت رێز ل ئیرادا وان بهێته گرتن، لێ مخابن هنده‌ك هێزێن لاواز ل هه‌رێما كوردستانێ وه‌سا دبینن، هه‌كه ئه‌و ١١ كورسی نه‌مینن ئه‌و دێ شێن هنده‌ك تشتان بده‌ستڤه بینن، ئه‌و یه‌ك ژی نیشانا لاوازی و بێ چاره‌یا وان هێزانه.
ئه‌ڤرۆكه یێن به‌غدا برێڤه دبه‌ن باشتر ژ هه‌ر ده‌مه‌كێ دزانن، هه‌كه رێز ل داخوازیێن خه‌لكێ هه‌رێما كوردستانێ نه‌هێته گرتن، هه‌كه دیسان ب رێیا هنده‌ك فشاران بزاڤ بۆ ڤێ یه‌كێ بكه‌ن دا كورد داخوازیێن وان قه‌بوول بكه‌ن، ئه‌و یه‌ك دێ ئیراقێ ژی تووشێ كاره‌ساتێن مه‌زن كه‌ت، ڤێ دووماهیێ به‌رپرسێن ئیراقێ دبێژن بهێزبوونا هه‌رێما كوردستانێ رامانا بهێزبوونا ئیراقێ دده‌ت، ئانكۆ بۆ وان ژی ئاشكرا بوویه، ب پیلانگێری و دۆرپێچان ئه‌و نه‌شێن سه‌ركه‌ڤن، چونكی پارتی و خه‌لكێ كوردستانێ خوه‌دان ئیراده‌كا گه‌له‌ك مه‌زنن و ل هه‌مبه‌ر رژێمه‌كا دكتاتۆر ب سالان شه‌ڕ كرن و بنده‌ستی ره‌ت كرن، ژ به‌ر ڤێ یه‌كێ ژی دڤێت به‌غدا هه‌لوه‌ستێ خوه بگوهۆڕیت.
سه‌رۆكێ هه‌رێما كوردستانێ نیه‌تا پاك یا هه‌رێما كوردستانێ گه‌هانده به‌رپرسێن ئیراقێ، د هه‌مان ده‌می دا هۆشداریه‌كا نه‌رمه ژی بۆ به‌غدا كو دانوستاندن تنێ رێیا چاره‌سه‌ریێ یه، هه‌رێما كوردستانێ بهێزه و دڤێت پرسێن چه‌ندین سالێن بۆری ب رێیا دانوستاندنان چاره‌سه‌ر بكه‌ت، نها ته‌پ ل مه‌یدانا به‌غدا دایه، هه‌كه به‌غدا بڤێت پرسێن هه‌ی چاره‌سه‌ر بكه‌ت دڤێت ده‌لیڤا نها بۆ وێ هاتیه پێش ژ ده‌ست نه‌ده‌ت، نێچیرڤان بارزانی سه‌لماندیه سیاسه‌تمه‌دارێ رۆژێن سه‌خت و دژواره و دشێت ده‌رگه‌هێن گرتی ڤه‌كه‌ت، هێڤیێن ژ ده‌ست چوویی جاره‌كا دی ڤه‌گه‌رینیت، هه‌كه به‌غدا ده‌لیڤا هاتیه پێش ره‌ت بكه‌ت بێگومان دێ به‌غدا تووشی خوساره‌تیه‌كا مه‌زن بیت، چونكی هه‌رێما كوردستانێ جاره‌كا دی سه‌لماند تنێ داخوازا مافێن خوه یێن ره‌وا دكه‌ت.
فشارێن ده‌رڤه و ناڤخوه‌یی هه‌رده‌م بووینه ئه‌گه‌رێ بهێزبوونا پارتی
ئه‌ڤین بارزانی
پشتی بریارێن دادگه‌ها فیدرالی هه‌م ل به‌غدا و هه‌م ژی ل هه‌رێما كوردستانێ هنده‌ك هێزان خه‌ون بۆ لاوازبوونا پارتی ددیتن، هنده‌ك كه‌سان ژی وه‌سا حساب كربوون دێ هه‌لبژارتن هێنه كرن و دێ وه‌سا ئه‌و شێن پتر پێگه‌هێ پارتی لاواز كه‌ن.
ل ئالیێ دی ل به‌غدا هێزێن كو كارێ وان تنێ دژبه‌ریا مافێن ره‌وا یێن گه‌لێ كوردستانێ یه، گه‌له‌ك بزاڤ كرن كو سه‌رۆك كۆمارێ توركیا ره‌جه‌ب ته‌یب ئه‌ردۆغان سه‌ره‌دانا هه‌رێما كوردستانێ نه‌كه‌ت، لێ گرنگیا هه‌رێما كوردستانێ ب تایبه‌تی ژی سیاسه‌تا حه‌كیمانه یا پارتی دیموكراتی كوردستان ب سه‌رۆكاتیا مه‌رجه‌عێ گه‌لێ كوردستانێ سه‌رۆك بارزانی بۆ هه‌موو ئالیه‌كێ ئاشكرا بوویه، توركیا ئێكه ژ وان وه‌لاتان كو باش دزانیت بێی رازیبوونا پارتی چو پرۆژه‌یه‌ك ل ئیراقێ سه‌ر ناگریت و ژ به‌ر ڤێ یه‌كێ ژی سه‌رۆك كۆمارێ توركیا هاته هه‌ولێرێ و سه‌ره‌دانا سه‌رۆك بارزانی ژی كر، سه‌ره‌دانا سه‌رۆك كۆمارێ توركیا بۆ ده‌ف جه‌نابێ سه‌رۆكی په‌یامه‌كا گه‌له‌ك رۆن و ئاشكرایه بوو كو نه‌یارێن پارتی كو هه‌كه پارتی نه‌بیت كه‌س چو حسابه‌كێ هه‌ر بۆ وان ناكه‌ت، هه‌كه ئه‌و نها ل هه‌رێما كوردستانێ ئازاد دژین و سیاسه‌تێ دكه‌ن ئه‌و ژی سایا سه‌رێ پارتی یه.
نها ژی سه‌رۆكێ هه‌رێما كوردستانێ به‌رێز نێچیرڤان بارزانی ل به‌غدا یه، به‌رپرسێن شیعه ل به‌غدا دبێژن پشكداریا سه‌رۆكێ هه‌رێما كوردستانێ د كۆمبوونێن هه‌ڤپه‌یمانیا برێڤه‌برنا ده‌وله‌تێ دا بوویه خاله‌ك گه‌له‌ك باش و گرنگ بۆ ئیراقێ و دێ گه‌له‌ك پرسێن هه‌ی ژی هێنه چاره‌سه‌ركرن.
ئانكۆ پارتی شیا د ده‌مه‌كێ كورت دا هه‌م ل به‌غدا پێگه‌هێ خوه بهێز بكه‌ت و هه‌م ژی بۆ نه‌یارێن خوه ل ئیراقێ ژی سه‌لماند فشارێن ده‌رڤه و ناڤخوه‌یی چو ده‌مه‌كێ نابنه ئه‌گه‌رێ لاوازبوونا پارتی، به‌لكو د دیرۆكێ هه‌تا نها دا هه‌رده‌م فشارێن ده‌رڤه بووینه ئه‌گه‌رێ بهێزبوونا پارتی، پارتی د هه‌لبژارتنێن هه‌ری دووماهیێ یێ په‌رله‌مانێ ئیراقێ دا هێزا ئێكێ بوو، نها ژی هێزا ئێكێ و هه‌ری كاریگه‌ره ل ئیراقێ دا، ژ به‌ر ڤێ یه‌كێ ژی بلا كه‌س چو حسابێن شاش و دوور ژ راستیێ نه‌كه‌ت، بێی پارتی چو هه‌لبژارتن ناهێنه‌كرن، گه‌له‌ك یا سه‌یره شیعه و ئه‌وێن هه‌تا دوهی دوژمناتیا پارتی دكرن گه‌هشتنه ڤێ باوه‌ریێ هه‌تا ل گه‌ل پارتی په‌یوه‌ندیێن خوه باش نه‌كه‌ن ره‌وشا وان ژی باش نابیت، لێ هێشتا ژی هنده‌ك هێزێن لاواز ل هه‌رێما كوردستانێ وه‌سا دبینن دشێن بێی پارتی هه‌لبژارتنان بكه‌ن.
پارتی دیموكراتی كوردستان هه‌ر ژ رۆژا دامه‌زراندنا خوه هه‌تا نها كار بۆ بده‌ستڤه‌ئینانا مافێن ره‌وا یێن خه‌لكێ كوردستانێ كریه، بریارا دیرۆكی یا پارتی ل دۆر هه‌لبژارتنان و به‌ره‌ڤانیا پارتی ژ كورسیێن پێكهاتان نیشا دا پارتی ب راستی ژی پارته‌كا دیموكراته و باوه‌ریا وێ ب پێكڤه‌ژیانێ و ئاشتیێ هه‌یه، ژ به‌ر ڤێ یه‌كێ ژی جاره‌كا دی هه‌لوه‌ستێ بوێر و دیرۆكی یێ پارتی وه‌سا كر وه‌لاتێن زلهێز و وه‌لاتێن ده‌ڤه‌رێ هه‌ست ب گرنگی و رۆلێ دیرۆكی یێ پارتی بكه‌ن.
پارتی نها پتر ژ هه‌ر ده‌مه‌كێ یا بهێزه، چونكی خه‌لكێ كوردستانێ دزانن تنێ هێزا به‌ره‌ڤانی ل مافێن وان دكه‌ت پارتی دیموكراتی كوردستانه، هه‌كه داخوازیێن پارتی كو هه‌مان داخوازیێن ره‌وا یێن گه‌لێ كوردستانێ نه بهێنه بجهئینان پارتی دێ پشكداریێ د هه‌لبژارتنان دا كه‌ت و دێ دیسا وه‌كو هێزا ئێكێ سه‌ركه‌ڤیت، چونكی خه‌لكێ كوردستانێ دزانیت د ته‌نگاڤیان دا كێ به‌ره‌ڤانی ل وان كریه و كێ پارێزڤانێ راسته‌قینه یێ خه‌لكێ كوردستانێ یه.
خواندنه‌ك بۆ سه‌ره‌دانا سۆدانی بۆ ئه‌مریكا
ئه‌ڤین بارزانی
سه‌رۆك وه‌زیرێن ئیراقێ محه‌مه‌د شیاع سۆدانی پشتی ده‌مه‌كێ درێژ و بزاڤێن به‌رده‌وام یێن وی بۆ هه‌ڤدیتنه‌كێ ل گه‌ل سه‌رۆكێ ئه‌مریكا چوویه ئه‌مریكا، بێگومان سه‌ره‌دانا سۆدانی د ده‌مه‌كێ دایه كو رۆژهه‌لاتا ناڤین د قۆناغه‌كا گه‌له‌ك هه‌ستیار دایه و ل ئالیێ دی د ناڤ ئیراقێ دا ژی ره‌وشه‌كا تایبه‌ت هه‌یه، ئێك ژ خالێن هه‌ری گرنگ یێن گرێدای سه‌ره‌دانا سۆدانی ژی بێگومان په‌یوه‌ندیێن به‌غدا و هه‌ولێرێنه و ئه‌و ئێك بۆ ئه‌مریكا گه‌له‌ك یا گرنگه.
ئه‌ڤ سه‌ره‌دانه د ده‌مه‌كێ دایه كو به‌ری ده‌مه‌كێ سه‌رۆك وه‌زیرێن هه‌رێما كوردستانێ ژی ل ئه‌مریكا بوو و ل گه‌ل به‌رپرسێن وی وه‌لاتی كۆمبوو، هه‌رێما كوردستانێ نێرینا خوه سه‌باره‌ت ب ئالۆزیێن نها ل ئیراقێ و ب تایبه‌تی ژی ئه‌و پرسێن گرێدایی هه‌رێما كوردستانێ و به‌غدا و چاوانیا چاره‌سه‌ركرنا وان پرسان گه‌هانده به‌رپرسێن ئه‌مریكا، ژ به‌ر ڤێ یه‌كێ ژی نها چه‌ند خالێن گرنگ هه‌نه كو دهێته چاڤه‌رێكرن د سه‌ره‌دانا سۆدانی دا بهێنه ئێكلاكرن كو ئه‌و یه‌ك ژ بۆ هه‌رێما كوردستانێ ژی گه‌له‌ك یا گرنگه.
دیاره دێ ئه‌مریكا داخواز ژ سۆدانی كه‌ت ئێدی نابیت بابه‌تی مووچێ فه‌رمانبه‌رێن هه‌رێما كوردستانێ ببیته ئاریشه و دڤێت ئه‌و یه‌ك ب ته‌مامی بهێته چاره‌سه‌ركرن، خالا دی یا هه‌ری گرنگ ژی بابه‌تێ هنارتنا په‌ترۆلا هه‌رێما كوردستانێ یه، هه‌كه سۆدانی ل ئه‌مریكا بریارا دووماهیێ ل دۆر هنارتنا په‌ترۆلا هه‌رێما كوردستانێ نه‌ده‌ت وی ده‌می مرۆڤ نه‌شێت بێژیت كو سه‌ره‌دانا سۆدانی یا سه‌ركه‌فتی یه، چونكی نها هنده‌ك خال گرێدای ب هه‌رێما كوردستانێ و ئیراقێ هه‌نه كو بۆ ئه‌مریكا ژی گه‌له‌ك د گرنگن، ده‌مه‌كه ئه‌مریكا ژی بزاڤا ڤێ یه‌كێ دكه‌ت دا په‌ترۆلا هه‌رێما كوردستانێ جاره‌كا دی بچیته بازارێن جیهانێ.
سۆدانی نه‌ڤێت خوه ب ته‌مامی ژ ئیرانێ ژی دوور بكه‌ت، ژ به‌ر ڤێ ئێكێ ژی به‌ری كو بچیته ئه‌مریكا دیار كر، ئه‌و وه‌كو ئیراق بزاڤا ڤێ یه‌كێ دكه‌ن شه‌رێ د ناڤبه‌را ئسرائیلێ و ئیرانێ دا ب دووماهی بهێت و به‌رفره‌هتر لێ نه‌هێت، ئه‌و یه‌ك ژی نیشا دده‌ت سۆدانی نه‌شێت ب ته‌مامی خوه ژ ئیرانێ دوور بكه‌ت لێ د هه‌مان ده‌می دا سۆدانی بێی پشته‌ڤانیا ئه‌مریكا ژی نه‌شێت سه‌ركه‌فتی بیت، چونكی گه‌له‌ك پرسێن گرنگ هه‌نه دڤێت بهێنه چاره‌سه‌ركرن و بێی پشته‌ڤانیا ئه‌مریكا سۆدانی نه‌شێت وان پرسان چاره‌سه‌ر بكه‌ت.
سه‌ره‌دانا سۆدانی یا بۆ ئه‌مریكا دێ وی ده‌می یا به‌رهه‌مدار بیت كو سۆدانی بشێت پرسێن نها د ناڤبه‌را هه‌ولێر و به‌غدایێ دا چاره‌سه‌ر بكه‌ت، ره‌نگه چاره‌سه‌ركرنا هنده‌ك ژ وان پرسیار د ده‌ستهه‌لاتا سۆدانی دا ژی نه‌بن، لێ هنده‌ك پرس هه‌نه سۆدانی دشێت نها وان چاره‌سه‌ر بكه‌ت و وی ده‌می دێ هه‌رێما كوردستانێ ژی پتر ژ جاران پشته‌ڤانیێ ل سۆدانی كه‌ت، سه‌رۆك وه‌زیرێن ئیراقێ ژی باش دزانیت كو هه‌رێما كوردستانێ بۆ ئه‌مریكا گه‌له‌ك یا گرنگه، ژ به‌ر ڤێ یه‌كێ ژی هه‌كه سۆدانی هنده‌ك بریارێن دلخوه‌شكه‌ر سه‌باره‌ت ب چاره‌سه‌ركرنا پرسێن نها د ناڤبه‌را هه‌ولێر و به‌غدا دا نه‌ده‌ت و كار بۆ وان نه‌كه‌ت وی ده‌می سه‌ره‌دانا وی یا سه‌ركه‌فتی نابیت.
ئه‌مریكا گرنگیه‌كا مه‌زن دده‌ته ئیراقێ، لێ به‌رپرسێن ئه‌مریكا ژی باش دیتن ب سالانه ژ به‌ر ئاریشه‌یێن د ناڤبه‌را هه‌ولێرێ و به‌غدایێ دا، ئیراق ب گشتی یا لاواز دبیت و نه‌شێت ب رۆلێ خوه رابیت، ئانكۆ هه‌تا ئاریشه‌یێن نها ل ئیراقێ به‌رده‌وام بن ئه‌مریكا ژی نه‌شێت ب رێیا ئیراقێ به‌رنامێن خوه ل ده‌ڤه‌رێ بجه بینیت.
بۆچی هه‌لوه‌ستێ به‌غدا هاته گوهۆڕین؟
ئه‌ڤین بارزانی
ل به‌غدا هنده‌ك هێزێن شیعه ب هاریكاریا هنده‌ك هێزێن كوردی ل هه‌رێما كوردستانێ پیلانه‌ك به‌رفره‌ه هاتبوو ئاماده‌كرن و كار بۆ ڤێ یه‌كێ دكرن پێنگاڤ ب پێنگاڤ هه‌رێما كوردستانێ لاواز بكه‌ن و به‌ر ب نه‌مانێ ڤه ببه‌ن، ل هه‌مبه‌ر پیلانا به‌غدا پارتی دیموكراتی كوردستان ده‌ست ب بزاڤه‌كا مه‌زن كر، سه‌رۆكێ حوكمه‌تا هه‌رێما كوردستانێ سه‌ره‌دانا ئه‌مریكا كر و راستیا هه‌ی بۆ به‌رپرسێن ئه‌مریكا ئاشكراكرن و پشتی ڤه‌گه‌ریانا سه‌رۆكێ حوكمه‌تێ ژی پارتی دیموكراتی كوردستان راگه‌هاند ئه‌و پشكداریێ د هه‌لبژارتنه‌كێ دا ناكه‌ن كو پێشوه‌خت هاتیه دیزایین كرن، چونكی ئه‌و یه‌ك مه‌ترسیه‌كا گه‌له‌ك مه‌زنه ل سه‌ر پاشه‌رۆژا هه‌رێما كوردستانێ.
پارتی دیموكراتی كوردستان وه‌كو هێزا هه‌ری مه‌زن و كاریگه‌ر ل هه‌رێما كوردستانێ ب هه‌لوه‌ستێ خوه شیا به‌غدا نه‌چار بكه‌ت ده‌ست ژ فشارێن خوه به‌رده‌ن، ل ئالیێ دی د چه‌ند رۆژێن بۆری دا هه‌لوه‌ستێ به‌غدا تا راده‌یه‌كێ هاته گوهۆڕین و هنده‌ك ژ ئه‌ندامێن په‌رله‌مانی یێ شیعه كو ب هه‌موو ره‌نگه‌كێ ل دژی ڤێ یه‌كێ بوون مووچه‌یێ خه‌لكێ هه‌رێما كوردستان بهێته فرێكرن، ئه‌ڤرۆكه یێ دبێژن مه ل هه‌مبه‌ر مه‌سرۆر بارزانی شكه‌ست خوار و ئه‌و سه‌ركه‌فت، ئه‌و یه‌ك ژی نیشا دده‌ت بزاڤێن پارتی و سه‌رۆكێ حوكمه‌تێ ل هه‌مبه‌ر پیلانێن به‌غدا سه‌ركه‌فتن بده‌ستڤه ئینا، لێ ئه‌و یه‌ك رامانا هندێ ناده‌ت كو هه‌موو تشت ب دووماهی هاتینه و ئه‌و ئێدی دێ ده‌ست ژ پیلانێن خوه یێن بۆ لاوازكرنا قه‌وارێ هه‌رێما كوردستانێ به‌رده‌ن.
مخابن هنده‌ك هێز ل هه‌رێما كوردستانێ وه‌سا دبینن لاوازكرنا پارتی و هه‌تا لاوازكرنا قه‌وارێ هه‌رێما كوردستانێ د به‌رژه‌وه‌ندیا وان دایه، به‌ری نها سه‌رۆكێ حوكمه‌تێ ژی ب ره‌نگه‌كێ ئاشكرا ئه‌و یه‌ك دیار كر.
بێگومان نها رۆژهه‌لاتا ناڤین به‌ر ب گوهۆڕینێن بله‌ز ڤه دچیت، مه‌ترسیا شه‌ڕی د ناڤبه‌را ئسرائیل و ئیرانێ دا هه‌یه، ل ئالیێ دی هه‌لبژارتنێن ئه‌مریكا ژی دێ كاریگه‌ریا خوه ل رۆژهه‌لاتا ناڤین كه‌ن، ئیراق وه‌كو ئێك ژ وه‌لاتێن رۆژهه‌لاتا ناڤین بێگومان دێ كه‌ڤیته ژێر كاریگه‌ریا هه‌ر گوهۆڕینه‌كێ كو ل ده‌ڤه‌رێ روو بده‌ت، یێن وه‌سا هزر دكه‌ن به‌غدا سویسرایه و هه‌كه ئه‌م خوه راده‌ستی به‌غدا بكه‌ین دێ هه‌موو تشت چاره‌سه‌ر بن جاره‌كا دی ب چاڤێ خوه دیتن هه‌تا تو هێز نه‌بی كه‌س چو حسابه‌كێ بۆ ته ناكه‌ت. سیاسه‌ت ل سه‌ر بنه‌مایێ هێز دهێته‌كرن، دڤێت تو بهێز بی دا بشێی یا ته دڤێت بده‌ستڤه بینی، پارتی دیموكراتی كوردستان تنێ هێزا كوردی یه كو د چه‌ند سالێن بۆری دا شیایه ل گۆر راستیا ل به‌غدا هه‌ی سیاسه‌تێ بكه‌ت.
راستیا نها نیشا دده‌ت پارتی شیا تا راده‌یه‌كێ پیلانێن ل دژی هه‌رێما كوردستانێ بده‌ته راگرتن، مه‌رجێن پارتی یێن بۆ پشكداریا د هه‌لبژارتنان دا ژی هه‌كه بهێنه قه‌بوول كرن وی ده‌می دێ پشكه‌كا دی ژ پیلانێن نه‌یارێن كوردستانێ ژناڤ چن، چونكی پارتی دیموكراتی كوردستان هه‌تا نها ژی به‌رهه‌ڤ نینه پشكداریێ د هه‌لبژارتنه‌كێ دا بكه‌ت كو پێشتر ژ ئالیێ دوژمن و نه‌یارێن گه‌لێ مه به‌رنامه بۆ هاتیه دانان.
پارتی دیموكراتی كوردستان جاره‌كا دی ب سیاسه‌تا خوه یا حه‌كیمانه كو سه‌رۆك بارزانی سه‌ركێشیا ڤێ سیاسه‌تێ دكه‌ت، بۆ هه‌موو ئالیه‌كێ سه‌لماند بێی پارتی دێ هه‌رێما كوردستانێ ژناڤ چیت، چونكی هێزێن دی تنێ بۆ به‌رژه‌وه‌ندیێن خوه یێن ته‌نگ كار دكه‌ن، هه‌لوه‌ستێ وێره‌كانه و دیرۆكی یێ پارتی شیا هه‌ڤسه‌نگیێن سیاسی د ناڤ ئیراقێ و هه‌رێما كوردستانێ دا بگوهۆڕیت، یێن كار بۆ لاوازكرنا پارتی دكرن جاره‌كا دی بۆ وان دیار بوو پارتی دار به‌رۆیه و وه‌سا ب ساناهی لاواز نابیت، بێگومان خه‌لكێ هه‌رێما كوردستانێ ژی دیتن بهێزبوونا پارتی ئانكۆ بهێزبوونا هه‌رێما كوردستانێ.
WP Facebook Auto Publish Powered By : XYZScripts.com