بێوار حەمدی

ب گشتی جڤاك ئەو دابونەریتن یێن كو تاك ل سەر ب ڕێڤە دچیت، لەورا ئەو جڤاكە یێ كیژ نەتەوەی بیت تاكێ وان ل گوڕ وان سنۆر و یاسا و دابونەریتان ب ڕێڤە دچیت یێن كو جڤاكی بو وان ب ئازادی هەژمارتین، تاك ژی هەتا رادەیەكێ مەزن یێ نەچارە بێی هزركرن ل دووف وان سنۆران بچیت یێن بووینە نەریتێ جڤاكێ وی ئەوێ ژ دابونەریتێن باب وباپیرێن وی بو ماین، هەكە خۆ ئەو كار و نەریت و یاسایە یێن بەری 100 سالان و پتر ژی بن، ئەم هەموو دناڤ گێلەشوكا جڤاكێن خوەدا دژین لێ دبیت كەس هەست پێ نەكەت كا ڕامان ژ گێلەشوكا جڤاكی چیە و چەوا پەیدا دبیت؟ وەكو مە گۆتی پتریا تاكان بێی هزركرن یاسایێن جڤاكێن خوە بجه دئینیت و كێم ژوان دوڤچوونا ئەگەرێ وێ یاسایێ و نەریتی دكەن، ل ڤێرە گێلەشوك دروست دبیت، ئەوب خۆ نە جڤاكە گێلەشۆكێ دروست دكەت بەلكو تاكە، جاران ئەم دبێژین كو جڤاك ڤێ چەندێ قەبوول ناكەت، بەلی ئەم هزرا خۆ ناكەین كو هەر تاك ب خوە جڤاكە، هەر تاكە دشێت جڤاكی ئاڤا بكەت یان ب هەڕفینیت، دەمێ دابونەریت و هزر تێكەل دبن دەمێ هزرا جیاواز و كارێ جیاواز نەهێتە قەبوولكرن، ل ڤێرە زۆرینە و كەمینە دجڤاكی دا دێ بەربنە ئێك و بڤی شێوازی گێلەشوك دروست دبیت، هەكە ئەم جڤاكێ خۆ یێ كوردی بكەینە میناك، كو ئاریشەیامە یا هەرە مەزن دوێ چەندێ دایە هەر تاكەك حەزدكەت هەموو وەكی وی بژین و وەكو وی هزربكەن و هەكە هات و هزراوی جیواز بوو یان كارەكێ باش ژی بكەت كۆ جیاواز بیت ژ دابونەریت و یاسایێن جڤاكی بو داناین دێ تووشی هێرش و ڕەخنەیێن دەوروبەران بیت، لەوما ژی هەتا كو هزرا ئازاد و دەربرینا ئازاد یا رەوا دجڤاكان دا نەهێتە قەبوولكرن چ جاران ئەم ژ گێلەشۆكێن جڤاكی ب دووماهی ناهێین، ژبیرنەكەین ئەو جڤاكێ ئەم تێدا دژین یێ فرە لایەنە، هەرچەندە ئەم موسلمان ڕێژەیا زۆرینەینە، لێ ئەڤە ڕامانا وێ چەندێ نادەت كو ئەم زالبین ل سەر كەمینەیێ و وان ب ڕێژەیەكا كێم ولاواز ب هەژمێرین، چونكو پێكڤەژیان و پێكڤە كاركرن و هەڤدو قەبوولكرن بەشەكێ گرنگە كو هەڤدژ بیت ل گەل گێلەشۆكێ، ل گەل هندێ ژی ئەو بابێ كوبەری 60سالان ژیای نابیت وێ ڕوتین و رەفتار و نەریتێ وی دەمی نیشا زارۆكێ خۆ ژی بدەت و نەچار بكەت كو ل گوڕ هزركرنا وی ژیانێ بكەت، هەردەمێ مە هزرا خۆ ئاڤاكر ئێدی دێ ژ گێلەشۆكێن جڤاكی ژی قورتال بین.

بێوارحەمدی

دەمێ هەر زارۆكەك بۆ جارا ئێكێ‌ قەستا قوتابخانێ دكەت، تشتێ كو ل پولا ئێكێ بنەرەتی دهێتە فێركرن ئەوە كو قوتابخانە مالاوی یا دویێ یە، ئەرێ ئەڤ گۆتنە كریار پێ دهێتەكرن یان بتنێ گۆتنە؟ لێ چونكو قوتابی ل وی ئاستێ هزركرنێ نینە كو بەرسڤا ڤێ پرسیارێ بدەت، نەشێت وەكو پێدڤی هزر ژی تێدابكەت، مەبەست ژ گۆتن و كریارێ ئەوە، دڤێت زارۆك هێشتا نەچوویە قوتابخانێ بهێتە فێركرن كو مالا وی یا ئێكێ كیژكە؟ بدروستی زارۆك ل مال بهێتە فێركرن كو خێزانا وی مالا وی یا ئێكێ یە و ئەرك و كریارو ڕەوشتێن مالا خۆ ب دروستی بزانیت، دگەل هندێ دا بەری كو ماموستا ڕۆلێ خۆیێ فێركرنێ و نیشادانا رەوشت وكریارێن قوتابخانێ نیشا بدەت، دڤێت مالباتا وی هندەك دەستپێكیێن گرنگ یێن قوتابخانێ بۆ شرۆڤەبكەت، چونكو ل دەسپێكێ دڤێت ئەو جوداهیێ دناڤبەرا مالا خۆیا ئێكێ و دویێ دا بكەت، دیسان دەمێ پێنگاڤێن دەسپێكێ ژبۆ قوتابخانێ دهاڤێت دڤێت ژلایێ ماموستای ڤە بهێتە شرۆڤەكرن كا مالا وی یا ئێكێ و دویێ چیە؟ و چ رامان هەیە؟ بتنێ زارۆك دزانیت كو قوتابخانە مالا وی یا دویێ یە لێ ئەو پێدڤی ب شرۆڤەكرنێن جوانترو روهنترە، پێدڤی یە ماموستا ب روونی بو قوتابیان بێژیت كو ژینگەها قوتابخانێ نێزیكە ژ یا مالێ، ژبۆ ئەركێن (پاقژیێ، خوارنێ، جهێ هاڤێتنا گلێشی، هاتن و چون و ڕونشتن، سەرەدەری دگەل هەڤال و ماموستایان) كو ئەڤە ب دروستی بو بهێنە شرۆڤەكرن دا كو قوتابی فێری ئەركێن پاراستنا ژینگەها قوتابخانێ و مالا خۆ بیت، قوتابی نیڤەكا هێزو شیانێن خۆ ژ ماموستایێن خوە وەردگریت، ئەگەر قوتابی هەست پێ نەكەت كو ماموستا ژی ل شوینا برایێ وی یان بابێ وی یە ئێدی ئەو فێری وێ چەندێ ژی نابیت كو قوتابخانێ ب مالا خوە یا دویێ بزانیت، بەرۆڤاژی ژی ئەگەر خێزان زارۆكێن خۆ یێن قوتابی وەسا فێرنەكەن كو ڕێزێ ل مالا خوە یا ئێكی بگریت و سنورێن خۆ یێن ئاخفتنێ بزانیت و فێری هندەك یاسایێن ژیانێ نەكەت، ل وی دەمی چونا وی ژبۆ قوتابخانێ ژی چ ڕامانا خۆ نامینیت، لەوما دڤێت مە پەروەردە د مالا ئێكێ دا هەبیت  ئەوە یا كو دایك و باب ژێ بەرپرسن داكو بشێین پەروەردەیا مالا دویێ ژی پەیڕەوبكەین، ئەواكو ماموستا ژێ بەرپرسن، ئەڤجا دا پێكڤە زارۆكێن خۆ ل سەر پەروەردەیا ساخلەم ئاڤابكەین دا كو شانازیێ ب ئێك ب بەین.

بێوار حەمدی

هەرجار لیستا پێشەنگ یا پارتی دیموكراتی كوردستان ب ژمارەیەكا جوان و سەرنج ڕاكێش باڵامە ژبۆ دەنگدانێ ڕادكێشیت، ئەو ژمارەیا كو هەردەم مە ل بیردمینیت و ب ساناهی دهێتە سەرزارێ مە، ئەرێ گەلومە جارەكێ هزركریە كو جوانیا ژمارێ و ئاسانی یا وێ پتر ڕۆلێ خوە هەیە د ناڤ هەلبژارتنان دا؟ بێگۆمان ژبەركو ژمارە ئەگەر یا ب زەحمەت و گران بیت دبیت كەسێن دانعەمر یان ئەوێن زوی تشتان ژبیردكەن بو وان یا نەخۆش بیت و ژبیربكەن، لێ بەرۆڤاژی ژمارە یان جوانیەكێ ددەتە لیستەیێ یانژی بساناهی دگەل زمان و ستران و مۆزیكان دگۆنجیت، لەوما ژی یا پێدڤیە بێ دوو دلی ئەم لیستا 275 بهەلبژێرین، چونكو ئەڤ لیستە ئیرادە و باوەریە بۆ مە، ب شانازی ڤە لیستا پارتی دیمۆكراتی كوردستان دهەلبژێرین ئەو بویە ئەگەرێ سەرخستن و ئێكگرتن و بەرخوە دانێ هەردیسان ئەوبوویە ئەگەرێ ئێكڕێزی و هەڤدوقەبوولكرنێ و هێزا پێكڤەژیانێ ل هەرێما كوردستانێ، بۆچی باوەریێ بدەینە لیستا 275؟ ژبەركو ئەڤ لیستە بوویە چەپەر ژبۆ بەرسینگگرتنا شەرێن وەكو داعشێ و شیایە ب هێزا پێشمەرگێن خوە یێن چاڤ نەترس عەرشێ دوژمنی ل ئەردی بدەت، ئەگەر لیستا پارتی یا 275 نەبایە ئەڤرۆ ئەو ئازادیا ڕەوا یا د ناڤ جڤاكێ كوردی دا نەدبوو، هەردیسا كولتوورو ڕەسانایەتیا كوردبوونێ د گەشەبوونێ دا نەدبوو، ئەڤرۆ دەولەتێن چار دەورێن مە یێن حەسوودیێ ب ئاشتی و ئازادی و پێكڤەژیانا د ناڤا جڤاك و ئاخا كوردستانێ دا دبەن، ئەڤجا بێی هزركرن و دودلی دا پێكڤە بچینە سەرسندۆقێن دەنگدانێ و لیستا 275 بهەلبژێرین، نێ ئەگەر ب سایا سەرێ ڤێ لیستێ نەبیت ئێدی كوردبوونا مە چ ڕامانا خوە نامینیت، ئێدی دێ لاڤایان كەین ژبۆ چەندەكا ئازادی و ئێمناهیێ، نێ هەر ئەڤ پارتە بوویە یانەهێلای وەڵاتێ مەببیتە قوربانی و ب ساناهی بیتە نێچیرا دوژمنێن مە.

بێوار حەمدی

دجڤاكێ مە دا دەمێ كەسەك زێدە ب ئاخڤیت و گەلەك گۆتنان بكەت، ئەم گەلەك جاران دبێژینێ ( شەش و بێش نە ئاخڤە) ئانكو ب گشتی دەمێ مرۆڤ كەسەك بیت یێ گەلەك ب ئاخڤیت، یێ بەرامبەر دێ پێ نەخۆش بیت، چونكو دو هزران دكەت یان ئەو ئاخفتنە نەوەییە، یان ژی ئەو كەسەكێ مەتحەكەرە، هتر ژبەر هندێ گۆتنێن بێ كریار جهێ خۆ پتر دكەن و مرۆڤ دبیتە جهێ ژدەستدانا باوەریێ بو كەسێن بەرامبەر، دگەل وێ چەندێ ژی ئەگەر نیازێن مرۆڤی چەند دباش ژی بن، پێدڤیە مرۆڤ گۆتنێن بێ كریار نەبێژیت، ئەڤ جۆرە گۆتنە ڕویێ مرۆڤی یێ ڕاستەقینە پتر نیشان ددەت، ژبەركو ئەگەر ئەم گۆتنەكێ بێژین و مە شیانێن كریارێ نەبن، ل وی دەمی دێ ب كەسێ(لاواز، ترسنۆك، مەتحەكەر، درەوین) هێتە دیتن ل پێش چاڤێن هەموویان، لەوما ژی هزركرن ژبەری هەرئاخفتنەكێ گەلەك یاگرنگە، دڤێت مرۆڤ دگەل خۆ بێژیت: ئەرێ ما من شیانێن ڤێ كریارێ هەنە؟ ئەرێ ئەڤ گۆتنێن من دێ بنە كریارێن ڕازیبوونێ؟ ئەگەر بەرسڤا ڤان پرسیاران مە هەبیت ل وی دەمی گۆتن یا دجهێ خۆدایە، لێ ئەگەر بەرۆڤاژی بیت دێ تووشی وان ئاریشەیان بین یێن مە بەحس ژێ كری، دیسان ژی گرنگە ئەگەر مرۆڤی كارەك ل بەرهەبیت یان پڕۆژەیەك باشترە مرۆڤ بەحس لێ نەكەت، داكو ئەو ئاخفتنە لسەر مرۆڤی نەبنە مال، هەردەمێ مە كریارێن خۆ هێلان هەتا كو كریار پێ بهێتە كرن ل وی دەمی مە چ ژڤان ئاریشەیان نابن، پێدڤی یە هەر ئێك ژمە بزانیت چاوا دێ شەڕی دگەل ژیانێ كەت بو وێ چەندێ بشێت خوە لسەر پێن خۆ بگریت و ڕێ ب وێ چەندێ نەدەت كو ژیان یاریان ب هێزو كەرامەت و شیانێن وی بكەت، ئانكو دڤێت مرۆڤ دهەموو ڕەوشان دا خودان ئاخفتنا خوە بیت و ئەو ب خوە نەبیتە ئەگەرێ وێ چەندێ كو تاكەكێ جڤاكی سڤكاتیێ ب كەرامەتا وی بكەت، چونكو گەلەك جاران دناڤ جڤاكێ مە دا مە گۆتنەك یا هەی ئەم دبێژین ( زەلام ئەو زەلامە یێ خودان ئاخفتنا خوە بت) هەر دیسان ئەڤ ئاخفتنە نەبتنێ بو زەلامی یە بەلكو ژن ژی پێدڤیە یا بڤی شێوەی بیت، لێ بلا ئەڤ ئاخفتنە بتنێ نەبیتە گۆتن، بەلكو وەكو مە گۆتی كریار شەرتە و ژبیرنەكەین كو ئامانجێن مە دژیانێ دا دگرێداینە ب گۆتنێن مە ڤە و هەكە ئەو گۆتنە بتنێ مان گۆتن ئێدی ئارمانجێن مە ژی چ بوهایێن خوە نامینین.

بێوار حەمدی

هەر كەسێ ل قوتابخانێ خواند بیت یان ژی نەچۆبیتە قوتابخانێ دزانیت كو قوتابی بابەتێ هونەرێ دخۆینن، هونەر ژوان بابەتانە كو هەبوونا وێ گەلەكا پێدڤی یە دهەموو سیكتەرێن خواندنێ دا، بەلێ ئایا ئەم بهایێ وێ دزانین؟ یان ئایا هونەر وەكو پێدڤی دهێتە گۆتن ژلایێ ماموستایان ڤە؟ دەمێ ڤان پرسیاران ژخۆ دكەین دێ گەلەك نیشانێن سەرسورمانێ پەیدابن، هەر ژپۆلا ئێكێ و تاكو قوتابخانە ب دووماهی دهێن پتریا قوتابیان وەسا دهێنە تێگەهاندن كو هونەر بتنێ شێوەكاریە و چێكرنا هندەك وێنەیێن سروشتی وتڕۆمبێلا وگولایە، لێ یا ڕاستی هونەر ژڤان هەموویان گەلەك مەزنترە، چونكو بتنێ ئەڤە چبكەكن ژ دەریا هونەری، ئەو دەریایا كو دڤێت گەلەكێ مەلەڤانبی و تە ڕاهێنەرێن مەلەڤان هەبن، ب مخابنی ڤە جارێ ئەگەر بەرێ خۆ بدەینێ گەلەك ژوان ماموستایێن وانا هونەری دبێژن د تایبەتمەندن دڤی بیاڤی دا، ئانكو جاران ل دووف پێدڤیا قوتابخانێ ماموستایەك بو هونەری دهێتە هنارتن، ئەڤە ژی دبیتە ئەگەرەكێ مەزن كو قوتابی ب دروستی فێری هونەری و بەشێن هونەری نەبیت، ژلایەكێ دی بتنێ هونەرێ ( شێوەكاری) ل قوتابخانان دهێتە خواندن، ئەرێ ما ئەڤ سیستە مە یێ درستە؟ بێگومان نەخێر، چونكو هونەر نەبتنێ شێوەكاریە، بەلكو گەلەك بەشان بخۆڤە دگریت وەكو( سترانگۆتن، مۆزیك، شێوەكاری، شانۆ)لەوما ژی قوتابی ژڤان هەموو بەشان دهێتە بێ بەهركرن، دبیت د شیان دا نەبیت ئەڤ هەموو بەشە بو بهێنە گۆتن و ب دروستی فێرببیت، لێ هەر چو نەبیت دڤێت لایەنێ (تیۆری) بۆ بهێتە بەحسكرن، دا قوتابی ژی بها وگرنگیا هونەری بزانیت و ڕێزی ل وان كەسان بگریت یێن زەحمەتێ ب كارێن خۆ یێن هونەری ڤە دبەن.

بێوار حەمدی

دژیانێ دا چ مرۆڤ نینن کو بیرهاتنان دگەل خوە نەهلگریت و دڕاستی دا پتریا مە مرۆڤان حەز ژ بیرهاتنان دکەن ب تایبەت ئەگەر بیرهاتنێن خوەش بن چوجاران ژبیرا مە ناچن، هەر دبەرێ دا دەما ئەم قوتابی گەلەک جاران ئەم دچووینە سینەما نەورۆز د ناڤ بازاڕێ دهۆکێ دا کو تەماشەی فلمەکی بکەین، لێ دوی دەمی دا مە بهایێ سینەمایێ نەدزانی، بتنێ ئەو جوش و خڕوشا مە دگەل هەڤاڵان دبر گەلەک یا ب تام بوو و تاریاتیا سینەمایێ ژی گەلەک کەیفا مە دئینا دبیت نویاتیەک بیت دا کو مە دگەل سینەمایێ شارەزا بکەت.
هەرچەندە هەتا رادەیەکێ مەزن ئەم ژ فلمێن کوردی دبێ بەهربووین، چونکۆ بەهرا پتر فلمێن بیانی بوون، لێ هەر چەوابیت مە خوەشی دبرن و پەیوەندیێن مە یێن هەڤالینیێ بهێز تر دکەفتن.
دەما ئەم مەزن بووین ئەو خوەشیە بتنێ بوو مە بۆ بیرهاتنەک، ل هەمی جیهانێ هۆلێن سینەمایێ گرنگی و بهایەکێ ئێکجار مەزن هەیە و هەر دەمێ ببیتە جهەکێ کەڤنار ژی مرۆڤان ژ خۆە دوور ناکەت بەلکو پتر رێزو بوهایێ وێ دمینیت، دەمێ ئاریشەیەک ژی دکەڤیتێ هەر ئێکسەر جهێن پەیوەندیدار خوە لێ دکەنە خۆدان، چونکۆ هونەر ( ژیانە، ڕێزگرتنە، پێکڤە گرێدانا پەیوەندیانە، کوولتورە، ڕەسەنایەتیە) دەمێ هونەر نەمینیت هیچ جوانیەک ژی دژیانێ دا نامینیت.
سینەما نەورۆز جهەک بو پیرو لاو پێکڤە کومدکرن و دگۆتە وان ئەڤە هونەرە، لێ ئەڤ هونەرێ جوان هێدی هێدی بەرەڤ نەمانێ چو تاکو ب ئێکجاری وەکو دیوارەکێ لسەر بەفرێ کەفتی، ئەرێ گەلو ما سینەما نەورۆز یا ژ هەژی خرابکرنێ و نەمانێ بوو؟ بێگومان ئەو کەسێن هونەر دوست دێ بێژن نەخێر، دەما سینەما هاتیە ژناڤبرن وەکو تازیەکێ و ئەرد هەژەکێ بوو، ل شوینا نووژەنکرنا وێ و مەزنکرنا بهایێ وێ مە ئەو هەڕفاند، یا پێدڤی بو سینەما نەوروز ب ڕێز ڤە هاتبا نوژەنکرن و پتر بوها پێ هاتبا دان، جهێن وەسا وەکو دارەکا مەزنن و مرۆڤ خوە ب چەقێن وێ ڤە دگریت، سینەما نەوروز هەر ددلێ مە دا دمینە لێ ب مخابنی ڤە بتنێ وەکو بیرهاتنەک

بێوار حەمدی

د زمانێ مە یێ كوردی دا مە گەلەك دەستەواژە هەنە كو دەربڕینێ ژ كلتۆر و چاندا كوردی دكەن، هەر دیسان گەلەك پەیڤان ئەم بكاردئینین بێی كو ب دروستی ئەم دڕامانا وان یا راست بگەهین، ب تایبەت دڤی دەمی دا گەلەك پەیڤ دهێنە بكارئینان كو دبیت گەلەك ڕامان ژێ بچن و دبیتە ئەگەر یێ بەرامبەر جاران شاش تێ دگەهیت، لێ لڤێرە یامە دڤێت ل سەر ب ڕاوەستین كا ڕامان ژ پەیڤان ( خەلەت تێ نەگەهە) چیە؟ و بۆچی ئەم بكاردئینین؟ پتریا مە وێ چەندێ دزانن كو ئەڤ پەیڤە بۆ هندێ دهێتە بكارئینان كو یێ بەرامبەری مرۆڤی ب شاشی د ئاخفتنێ نەگەهیت ئانكو بەر ب چ ئاقارێن دی ڤە نەبەت، هەر ژبۆ وێ چەندێ كو دلێ وی ژ مرۆڤی نەمینیت، بەلێ گەلو ما باشتر نابیت ئەگەر ئەم ل شوینا بێژین خەلەت تێ نەگەهە، ئەم خەلەت نە ئاخڤین یانژی پتر هزرا خۆ دوێ ئاخفتنێ دا بكەین و پاشی بێژین، چونكو باهرا پتر دەمێ ئەم دبێژینە كەسەكی خەلەت تێ نەگەهە هەر ژنوی ئەو هزرە بو وی چێدبیت كو ئەو هزرەكا دی ژ مرۆڤی بكەت یان ژی بابەتی ژبۆ ئاقارەكێ دی ببەت ب كویری دناڤ هزرێن خۆدا دچیتە خوارێ، ژبەركو هەردەمێ ئەم باشتر هزر دهەر ئاخفتنەكا خودا بكەین، ئەو ئاخفتن دێ ب شێوازەكێ جوانتر و بڕێیەكا باڵكێش تر گەهیتە كەسێ بەرامبەر، ب ڕاستی ژی دەمێ دبێژین خەلەت تێ نەگەهە ئەم ب ڕێیەكێ یێ كەسێ دی بتنێ ڕازی دكەین لسەر تشتەكی كو پێ توڕە نەبیت، ئانكو ژلایەكی ڤە ئەم یێ ڕاستیا بابەتی ژی ل ڤی كەسی د ڤەشێرین، ڕاستە جاران گۆتنا هندەك ڕاستیان یا تەعلە و كەسێ بەرامبەر پێ دئێشیت، لێ جاران ژی ل شوینا ئەم قەنجیەكێ ل گەل بكەین داكو بتنێ توڕە نەبیت بەرۆڤاژی ئەم خرابیەكێ دگەهینینێ، باشترە هەموو بزاڤ بهێنە كرن كو بابەت پتر ب شەفافی و ئاشكرای بهێتە گۆتن، ب تایبەت ئەگەر بابەت گرێدای خەلەتیەكا كەسێ بەرامبەر بیت، چونكو گەلەك یا گرنگە جاران مرۆڤ ب هەموو وێرەكی بابەتی بگەهینیت.

بێوار حەمدی

كوردستان خودان كلتۆر و پێگەهەكێ گەلەك جوان و بەركەفتیە، هەموو دەمان شوناسا كورد بوویە جهێ سەرنجێ بۆ دەوروبەران، ئەڤجا بگرە ژ دیلانێ و جلوبەرگان و دیسان دیمەنێن جوانێن وەلاتی، دیسان مە وەكو كورد رەنگە پتری (100) دیلانێن كوردی هەنە و هەر ژ دەسپێكا ڤەژاندنا كوردبوونێ دیلانێن مە د زێدەونێ دانە، ل كیرا دونیایێ دیلانەك جوانتر هەیە ژ( شێخانی و قولیچ و سێ پێ و…هتد) بێگۆمان نینن، چونكو دیلانێن كوردی بەرهەمێ خۆمالی و دیاركرنا كلتۆرێ ڕەسەنێ كوردایەتیێ یە، لێ یا ئەم لێ مەندەهوش دبین هندەك وەلاتان مینا توركان بتنێ ئێك جۆرێ دیلانێ هەیە، لێ ب مخابنی ڤە هندەك كەس دجڤاكی دا چاڤلێكرنا دیلانێن وان دكەن و وەكو خومەزنكرنەك یان ژی نوویاتیەك وجیوازیەك دێ ل ناڤا شەهیانێن خوە دیلانێن وان كەن ئەڤجا چاڤلێكرنا دیلانا هەر وەلاتەكی بیت، ئەرێ گەلو ل وەلاتێن بیانی تاكۆ یێن جیران ژی جارەكێ دیلانێن كوردی دكەن و شانازیێ پێ دبەن، بێگۆمان نەخێر، لێ گەمژەییە ئەم كەلتورێ وان تێكەلی كەلتورێ خویێ ڕەسەن بكەین، ئەم كورد ب جوانیا سرۆشتێ خوە و ب مەزناهیا وەلاتێ خوە دجوانین، ئەڤرۆ گەلەك تیپێن هونەرێ مللی یێن دیلانێ و یێن مۆزیكێ و سترانێ یێ خزمەتا وەلاتێ مە دكەن بتنێ بۆ هندێ شوناسا مە بەرزەنەبیت و كوردینیا خوە ب پارێزین، دێ چەند یا جوان بیت ئەگەر دناڤ هەر ئاهەنگەكێ یان شەهیانەكێ ئەم جلێن كوردی ل بەرخوە بكەین و دیلانێن كوردی یێن هەمەجۆر بكەین، هەر چەندە هەتا ڕاددەیەكێ باش مە دیلانێن خۆ نەهێلاینە و بەردەوام گرنگی پێ دهێتە دان، لێ ژلایەكی هێدی هێدی خەلكەك یێ چاڤ ل كلتۆرێن بیانی دكەت، ئەڤجا دا پێكڤە ڕێزێ ل نەتەوا خوە و كلتۆرێ خوە بگرین بلا چاڤێ هەموویان ل سەر هێزا كوردبوونێ بیت.

بێوار حەمدی

جڤاکێ کوردی هەر ژکەڤن دا گرنگی ب هونەری و جورو شێوازێن هونەری دایە، بتایبەتی ژی دەنگ و ڕەنگێ هونەرمەندێ کەڤنار چجاران ژبیرناچیت وسەنگ و جوانی و هێزەکا دی یە ژبۆ گوهدار و بینەرێن وان، پتریا وان هونەرمەندێن دەنگخۆش و جوانە مەرگ یێن کو دژیانێ دا نەماین لێ هەر دناڤا دلێن مەدا دساخ وەکۆ ڕێزگرتن ژبۆ گیانێ وان یێ پیرۆز و دەنگێ وان یێ زێرین پەیکەر ژبۆ وان هاتینە دروستکرن و ئەڤ پەیکەرە وەکو دیار دناڤا پارکا و جهێن گشتی دا دهێنە دیتن، ژبۆ وێ چەندێ کو هەردەما مرۆڤ نێزیک دبیت و پەیکەرێ وی دبینیت ئێکسەر بیرا مرۆڤی پتر لێ دهێت و تاکو بووینە جهێ وێ چەندێ گەلەک کەس وێنەیان ژی دگەل دگرن ژبۆ بیرهاتن کو لدەڤ وان بمینن، لێ ئەرێ بۆچی پەیکەر بتنێ ژبۆ هونەرمەندێن دژیانێ دا نەماین دهێنە دروستکرن و ژبۆ ساخان نینن؟ ب دیتنامن بلا چێکرنا پەیکەران لدور وێ چەندێ نەبیت کۆ دەمێ دژیانێدا نەمینن ژنوی ئەم پتر بۆهای بدەینێ و پەیکەران بۆ دوست بکەین، بەلکو باشترە هونەرمەند ب ساخیا خۆژی پەیکەرێ خو ببینیت و بزانیت تاچ ڕاددە ژبۆ خەلک و جەماوەرێ خۆ گرنگە و ڕێز لێ هاتیە گرتن و ئەڤ چەندە نە بتنێ ژبۆ هونەرمەندی دێ خۆشیەک بیت و بیرهاتنەک بیت بەلکو بۆ حکومەتێ و دەستهەلاتێ ژی دێ گرنگیا خوە هەبیت، ژ بەر دوو ئەگەران ئێک ژوان: دەمێ پەیکەرەکی ژبۆ هونەرمەندەکی دروست دکەن وێ چەندێ دیاردکەن کو کورد گەلەک گرنگیێ ب کەلتور و هونەر و هونەرمەندێن خوە ددەن و یا دووێ ژی بۆ وێ چەندێ دەمێ گەشتیار ووەڵاتیێن بیانی ژی قەستا هەرێمێ دکەن و پەیکەرێن هونەرمەندا ل سەر جادە و پارک وجهێن گشتی دبینن، ل وی دەمی دێ زانن کو ئەم وەڵاتەکین ڕێز و بهایی ددەینە هونەرمەندێ خوە و د هونەر دوستین و دگەل هندێ دا ژی ئەڤ وەڵاتیێن بیانی وێنەیان دگەل پەیکەران دگرن و دبەنە وەلاتێن خۆ، ئەڤجا بدیتنا من باشترە پەیکەر بۆ ساخان ژی بهێنە دروستکرن لدویڤ مێژویا وی یاهونەری و پێگەهێ وی دناڤ جڤاکی دا سەرەدەری دگەل بهێتەکرن.

بێوار حەمدی

دەمێ كو هەلبژارتنێن هەرێما كوردستانێ دهێنەكرن دێ بینین تاكێ كورد گەلەك دجۆش و خڕۆشەكا جودا دایە  كو جیاواز ژ هەلبژارتنێن پەرلەمانێ ئیراقێ، رەنگە ئەڤە بۆ چەند خالەكا بزڤڕیت، رەنگە تاكێ كورد وەسا هاتیە پەروەردەكرن كو زێدەتر حەزژ وەلاتێ خۆ بكەت و ڕێزێ ل ئالایێ خۆ بگریت و دیسا ژ لایەكێ دی كورد پتریا جاران پشتەڤانێن ئێك بووینە د بابەتێن گشتی دا، ب تایبەت دەما كو هەلبژارتن دهێنەكرن ب هەمی هێزا خۆ ڤە بڕیارێ ددەت كو بچیت دەنگێ خۆ بدەت ب وێ چەندێ كو ب ڤێ ڕێكێ ژی داخوازا مافێ خۆیێ ڕەوا بكەت كو رەنگە ب ڕێیا هەلبژارتنا كەسێن هەژی بشێت ئەو كێماسیا د ژیانا وی دا هەی چارەسەر بكەت، لێ بەروڤاژی دەما كو هەلبژارتنێن ئیراقێ دهێنەكرن تاكێ كورد ئەو رۆل و خڕۆشا جاران نامینیت، دبیت ژبەر وێ چەندێ بیت كو ژ ئیراقێ ژی بێ هیڤیە یان ژی رەنگە باوەریا وی كێمتر بیت، بەلێ دڤێت ڤێ چەندێ بزانین كو هەلبژارتنێن ئیراقێ ژی گرنگیەكا ئێكجار مەزن بۆ مە كوردان هەیە و پێدڤیە رۆلێ خۆ تێدا ژ بیرنەكەین، خۆ ئەگەر ئەم كەسێن نۆرمال ژی بین و نەبەربژارێن پەرلەمانی، ژی بین بەلكو دڤێت ئەم ئێكگرتنا خۆیا جاران ژبیرنەكەین، ب تایبەت هەلبژارتنێن ئەڤ ساڵە یێن پەرلەمانی ئیراقێ دڤێت مە كوردان، رۆلەكێ مەزنتر هەبیت و پتر شیانێن خۆ بمەزێخین، بۆ وێ چەندێ كورد د چاڤێن وان دا دلاواز و بێ دەستهەلات نەبن، نەخێر مە ژی بەربژارێن ژ هەژی هەنە، لێ یا ژ هەژیتر ئەم بزانین دێ چاوا كەسێن هەژی هەلبژێرین، چونكو هەلبژارتن نەوەكو وێ چەندێ یە كارەكە دێ هەر زوی ژخۆ ڤەكەی ول دەڤ خو وەكو سەرگێژیەك ل قەلەم بدەی، بەلكو دڤێت ل دەسپێكێ مە پشتەڤانی هەبیت ژبۆ بەربژارێن خۆ و پاشی بەربژارێن هەژی بهەلبژێرین و دویڤدا دێ بارگرانیا ژ هەمیێ مەزنتر دەسپێكەت كو ئەوژی دێ مینتە ل سەر ملێن بەربژاران و بتایبەت ئەو كەسێن دەردچن ژبۆ پەرلەمانی، پێدڤی یە ئەڤجارە زێدەتر گڤاشتنێ ل سەر وان بكەن و بشێن پێگەهێ خۆ و جهێ خۆ پتر د ناڤ پەرلەمانی دا ببینن، بۆ وێ چەندێ مافێ رەوا یێ تاكێ كورد نەهێتە خوارن و نەبینە خوارنەكا ب ساناهی بۆ دوژمنی، لەوما ژی داپێكڤە كاربكەین و بۆ وان بسەلمینن كو كورد چ جاران ژ كەفتنان ناترسن، ژبەركو هەر زوی ڕادبنەڤە، دەما كو یاریكەرەكێ تەپاپێی یێ سەركەفتی بیت یان ژی بشێت سەركەفتنێن مەزن تۆمار بكەت ئەڤە هەمی ب خێرا پشتەڤانایە، لەوما ئەڤەژی وەكی وێ یە دڤێت پشتەڤانیا بەربژارێن خۆ بكەین داكو پتر ڕۆمالا وان ژی بلند ببیت و پتر بەرەڤ پێشڤەبرنێ ڤە بچن.