ئیحسان حەسەن

هەر كەسێ بزاڤێ بكەت ب خامێ خوە بكەڤیتە دناڤا دیرۆكا یاریێن هەردو مەزنێن كوردستانێ دهۆك و هەولێر خولا ستێرێن ئیراقێ یا فوتبۆلێ دا، دێ گەهیتە وێ راستییێ كو ئەڤ چاڤەرێكرنا مەزن یا جەماوەری بۆ ڤێ دیدارێ سنورێن نافخویی یێن هەرێمێ بەزاندینە، رەنگە ل رۆژێن بوری د ناڤا رۆژنامەڤان و رەخنەگر و پشتەڤانێن هەردو تیمان دا، تنێ ئێك پرسیار هاتبیتە گوتن، ئەرێ كیژ تیم دێ شێت سەركەڤتنێ د كلاسیكویا ڤێ جارێ یا كوردستانێ دا تۆماركەت، ئەرێ دهۆك ب زاخا یاریزانێن خوە یان هەولێر ب عینادا خوە، هەر چەندە دیرۆكێ هووسا نیشا مە دایە كو چ جاران ئەنجامێن دیدراێن هەردو تیمان گرێدای چ پیڤەرێن پێشوەخت نەبووینە، بەلكو لسەر هندەكێن خالێن دی یێن گرێدای دیرۆك و زاخا یاریزانان و بەرهەڤییا وان یا باش و لایەنێ دەرونی بووینە، بەلێ ئەز هووسا هزر دكەم وەكو بۆچوون كو یاریا كلاسیكویا یا ڤێ جارێ دێ یا جودا بیت د رەهەند و رامانێن خوەڤە، ژبەر كو یانەیا قەلا و منارە یا ئەڤرۆ نە وەكو یا دوهی یە، دێ هەموو شیانان ئێختە كار كو دەستڤالا ژ ڤێ یاریێ دەرنەكەڤیت، باش دزانیت سەرباری ئەركێ وێ یێ ب زحمەت، ئەگەر ب سەركەڤت دێ شێت رێزبەندییا خوە ب كێماسی پارێزیت و بەردەوامییێ دەتە هەڤركییا خوە دگەل تیمێن پێشییێ یێن خولێ، د بەرامبەر دا ئەلهویێن چیا ئەز باوەردكەم دێ درویشمێ وان یێ سەرەكی سێ خالێن یاریێ بن، ژبەر كو چ دەرفەتێن دی یێن هووسا بدەست ناكەڤن، ئێك ژبۆ تۆلڤەكرنا دۆراندنا قووناغا ئێكێ، یا دویێ راوەستاندنا هەولێر بۆ پتر پێشڤەچوونێ د رێزبەندیا خولێ دا، ژلایێ تەكنیكی ڤە ئەز خوە نا ئێخمە د ناڤا پێشبێنێن پێشوەخت دا كو هندەك حەز دكەن بەری هەر یاریەكا مەزن بكەم، لێ ژ دەرڤەی پێشبینیان ئەز هووسا دبینم كو هەر كەسێ چاڤەرێ یاریێ دكەت، هەست ب زەحمەتا ئەرك و پلان و خواندنا راهێنەرێن هەردو تیمان دكەت، ب تایبەتی بۆ خودانێن ئەردی چونكو دۆراندن دڤێ دیدارێ دا یان وەكهەڤی، ئێدی دڤێت بەحسێ هەڤركییا ناسناڤی نەكەت، بەلێ ئەگەر ئەم بەحسێ خالێن هێزێ و ولاوازیێ بكەین، ب بۆچوونا من خالا هێزێ یا یانەیا مێڤان، هێلا هێرشبەریێ یە ب هەبوونا گۆلكارێ خولا ڤی وەرزی تا نها شیرزود تیمیرۆڤ ب 19 گۆلان، بەلێ هێلا بەرەڤانییێ و نەبوونا پێگوهۆرێن باش خالا هەرا لاوازا وانە، د بەرامبەر دا خالا هێزێ یا خودانێن ئەردی هێلا وان یا ناڤینە ب هەبوونا مایسترۆ هارون ئەحمەد، بەلێ هەر دێ مینیت خالا لاوازا وان هێلا هێرشبەریێ ب نەبوونا گۆلكارەكی یێ كو بشێت مفای ژ دەلیڤەیان بینیت، دیسان گۆلپارێزەكێ باوەریێ یە، ڤێ چەندێ تا رادەیەكێ مەزن كارتێكرن ل پێشڤەچوونا تیمێ دخولێدا كریە، یا من دڤێت بێژم هیڤییا مە ئەوە ئەڤ شەڤە ئەم یاریەكا بهێز و پر هەڤركی ژ هەژی ناڤ و دەنگییا وان بینین، گیانێ وەرزشی و هەڤركیا پاقژ و براینی بەری هەر ئەنجامەكی ببیتە ناڤ و نیشانێن سەرەكی یێن هەردو زەرەپۆشان دكلاسیكویا كوردستانێ دا.

ئیحسان حەسەن

گەلەك جاران بەحس دهێتە كرن كا دێ خولا ستێرێن ئیراقێ یا فوتبۆلێ چ لێ هێت، كیژ تیم دێ شێت ناسناڤێ خولا ڤی وەرزی ب دەستڤە ئینیت، چەنسێ هەر چار یانەیێن مە یێن كوردستانێ بۆ هەڤڕكییێ لسەر ناسناڤێ خولێ دێ چەوا بیت، یا ژ من وەرە هێشتا زوویە ئەم بەحسێ قارەمانا خولا ڤی وەرزی بكەین، ئەگەر ئەم بزانین كو تنێ 21 گەڕ چووینە و هێشتا مە 17 یاری ماینە ژبۆ ب دویماهی هاتنا یاریێن خولێ، ئەگەر چ رەوشێن نوو نەهێنە پێش، چ یێن گرێدای شەڕێ نها یێ د ناڤبەرا ئیران و ئەمریكا و ئسرائیلێ دا بن، كو دبیت ئەڤ شەڕ و ئالۆزیە ئەگەر بەردەوام بیت، یان گەرمتر لێ بهێت ببیتە ئەگەرێ ڕەواستاندن و نەتمامبوونا یاریێن خولێ، یان ژی رەوشێن دارایی یان هنگاڤتنین یاریزان ببنە ئەگەرێ پاشكەڤتنا ئەنجامێن هندەك یانەیان ئەگەر نها ل رێزێن پێشییێ ژی بن، ژبەر هندێ ئەز هووسا دبینم كو هێشتا زوویە ئەم بەحسێ چەنسێ بدەستڤەئینانا ناسناڤێ خولێ بكەین، ژبەر كو هێشتا خول  یا درێژە، راستە ئێك ژ كێماسیێن هەرە مەزن یێن خولا ڤی وەرزی تا نها، گوهۆڕینا زێدە یا ڕاهێنەران بوویە، كو چەند یانەیێن كێم ماینە ڕاهێنەرێن خوە هەر ژ دەستپێكا خولێ نە گۆهارتین، هەتا هندەكان گەهاندینە سێ ڕاهێنەران، ژبلی شاشیێن دادڤانان یێن كو كارتێكرنێن بەرچاڤ ل ئەنجامێن هژمارەكا یانەیان لسەر كیستێ یانەیێن دی كرین، ئەگەر ئەم وان سزایێن ئەوێن لسەر یانەیان هاتینە سەپاندن بێژین، چ یێن گرێدای ڕەفتارێن جەماوەر پشتەڤان بن، یان دەستەكێن ڕاهێنانێ و كارگێرێن تیمان بن، چونكو 17 گەر ماینە و51 خال بۆ هەر یانەیەكێ لبەر دەستن كو شەری لسەر بكەن، رەنگە پێشبینی یا بزحمەت بیت، بەلێ لسەر كاغەزێ  لدووڤ ئەوا نها ئەم دبینین، رەنگە یانەیا شورتە هەلگرا ناسناڤێ وەرزێن بوری شارەزاهییا وێ ژ هەموویان پتر بیت، دیسان جەوییە چەنسێ بەردەوامییا هەڤڕكییێ هەبیت، ئەگەر بشێت بەردەوامییێ بدەتە ئەنجامێن خوە یێن باش د ناڤا بەغدا دا دیسان ل دەرڤە، ئەگەر ئەم هیڤیێن هەولێرێ و گەرمە و تەلەبە و زاخۆ و هەتا زەورا و دهۆك  ژبیرنەكەین كو دشێن خوە نێزیكی رێزێن پێشییێ بكەن، هەر چ نەبیت هەڤركییێ لسەر ئێك ژ پلێتێن قارەمانییەكا دەرڤە بكەن، ئەز باوەر ناكەم ناسناڤێ وێ ژ ئێك ژڤان یانەیان دەركەڤیت ب تایبەتی هەر شەش یانەیێن ئێكێ، یا من دڤێت بێژم كاروانێ ڤان یانەیان هێشتا یێ درێژە و پێدڤی ب پتر كاركرنێ و پشتەڤانییێ یە، ژبەر كو جوداهییا خالان هێشتا هند نینە ئەم پێشبینیەكا ڤەبڕ بدەین، هیڤیا مە ئەوە ئەم یانەیێن كوردستانێ پتر د هەڤڕكییێ دا ببینین، گەڕێن دەستپێكێ یێن قووناغا دویێ دێ دئێكلاكەربن بۆ پتر پێشكەڤتنێ دخولێ دا و گەهشتنێ ب ئارمانجان.

ئیحسان حەسەن

كێمتر ژ دو حەفتیان بۆ یانەیا زاخۆ ماینە كو  دیدارا خوە یا  یا ئێكێ ژ قووناغا پێش داوییا خولا یانەیێن كەنداڤی یا فوتبۆلێ دگەل مێڤاندارا خوە یانەیا شەباب یا سعودی  ئەنجامبدەت، پشتی شیای ب سەرفەرازی و د ئێكەمین پشكداریا خوە دا وەكو سەركێشا كۆما ئێكێ پلێتا دەربازبوونێ بۆ ڤێ قووناغێ بدەستڤە بینیت، چونكو دیدارێن ڤێ قووناغێ گەلەك بهێزن ئەو تیمێن گەهشتینە چوار گوشەیا زێرین خودان ئەزمون و شیانێن مەزنن، زاخۆ ژی زانی كو دێ یاریا خوە یا ئێكێ ل سعودیێ كەتن، بۆ بەرەڤانیكرنێ ژ خەونا فینالێ، پێدڤییە د ڤان رۆژێن مایی دا یانەیا زاخو و دەستەكا راهێنانێ هندەك پێنگاڤان پاڤێژیت، بۆ هندێ ب ئەنجامەكێ دلخوشكەر ب دەركەڤن بەری دیدارا خوە یا دویێ و ڤەبر ل یاریگەها خوە ئەنجامبدەن، یا ئێكێ و ژ هەمیا گرنگتر پێدڤییە دەستەكا تەكنیكی یا تیمێ ڤەكولینێ و خواندنەكا دروست و هویر بۆ تیما بەرامبەر بكەن، خالێن هێزێ و لاوازیێ یێن وان دەستنیشان بكەت و كار لسەر بكەن، یا دویێ زانینا كەش و هەوا و سەقایێ وان بكەن، باشتر ئەوە ل پێش یاریێ ب چەند رۆژەكان بچنە سعوودیێ و كەمپەكێ كورت بدانن، بۆ هندێ یاریزانێن خوە دگەل سەقایێ وان ب گونجینن، یا سێیێ تیم ب هەموو رەنگان بهێتە دوورخستن ژ گڤاشتنێن دەرونی، پێدڤییە كارگێریا یانەیێ و دەستەكا راهێنانێ و پشتەڤانێن تیمێ، هەتا میدیایا وەرزشی هند فشارێ نە ئێخنە لسەر یاریزانان، كار لسەر هندێ بكەن كو تیما وان د شێت ژ ڤێ ئاستەنگێ دەربازبیت، یا چارێ تەكتیكا گونجای بۆ یاریا ئێكێ دێ یا كاریگەر بیت ژبەر كو د دیدارا ناڤا یاریگەها واندا رەنگە بەرگیریا بهێز و نەخوارنا گۆلێ گرنكتربیت ژ گولكرنێ، ب تایبەت ئەگەر ئەم بزانین كو تیما بەرامبەر نە تیمەكا ئاساییە، یا پێنجێ پێدڤییە ب هەموو رەنگان راهێنەرێ نوو یێ زاخۆ ئەیوب ئەدیشو ستوونێن تیما خوە ژ یاریزانان پارێزیت، رەنگە بۆ پێشهاتێن هەردو یاریان و بجهئینانا پلانێن خوە پێدڤی پێ هەبیت، ئەو ژی پاراستنا سلامەتییا وانە بەری كرنا یاریێ، یا من دڤێت بێژم كو یانەیا شەباب دخولا سعوودیێ دا یا لبن فشارەكا مەزندا، رەنگە تەركیزا وان لسەر ڤێ قارەمانییێ وەكو زاخۆ نەبیت، پێدڤی یە زاخۆ ڤێ وەكو خالەكا دەرۆنی د بەرژوەندیا خوە دا بكار بینیت، ئەگەر كورێن خابووری شیا ب ئەنجامەكێ دلخوشكەر ددیدارا ئێكێ دا ب دەركەڤن، دێ شێن پێنگاڤەكا مەزن بەر ب یاریا فینالێ هاڤێژن، ئەگەر گەهشتن ژی ژبلی تۆماركرنا دیرۆكەكا نوو و ناڤ و دەنگییا زێدەتر و دلخۆشییێ نەك تنێ بۆ زاخۆ بەلكو بۆ هەرێما كوردستانێ و ئیراقێ ژی، دێ وەكەت كو پتر گرنگی ب ژێرخانەیا وەرزشی بهێتە دان، بەلێ هەر دێ مینیت باوەری بخوە بوون و تەكتیكا هەڤسەنگ كلیلا بەردەوامی دان ب هەڤركییێ و گەهشتن ب ئارمانجان، مە باوەریەكا تمام هەیە كو نوونەرا ئیدارا سەربەخویا زاخۆ و پارێزگەها دهۆك و هەرێما كوردستانێ دێ شێت ئەوا پێدڤی بجهئینیت و ژ هەر تیمەكا كەنداڤی دەربازبیت.

ئیحسان حەسەن

دۆڕاندنا یانەیا دهۆك دكەل یانەیا ئەلغراف د گەرا داویێ دا ژ قووناغا ئێكێ یا خولا ستێرێن ئیراقێ، پتر ژ تێبینیەكێ لسەر ئاستێ ئەلهویێن چیا و كاروانێ وێ د خولا ڤی وەرزی دا پەیداكرن، ژبەر كو تنێ دۆڕاندنەك نەبوو بەرامبەر تیمەكا ئاست نزمتر، بەلكو  یا گرێدای چەند شاشی و هۆكارێن پێش وەخت بوون كو بوونە ئەگەر بڤێ رەوشا لاواز و ئەنجامێن خراب نەتنێ دڤێ یاریێ دا، بەلكو بدرێژاهییا قوناغا ئێكێ دەركەڤن، ئەگەر رەوش یا هووسا بیت و چارەسەریەكا بلەز بۆ نەهێتە دیتن، ئەز باوەرناكەم بشێت هیڤیێن جەماوەرێ خوە بجهبینیت، یان ئێك ژ پلێتێن قارەمانییەكێ یان خولەكا ل دەرڤە وەرگریت، ئەگەر ئەم لایەنێ كارگێری وەرگرین، كارگێریا یانەی دهۆك یا سەركەڤتی نەبوو ب وان گرێبەستان یێن كو دگەل یاریزانێن ل دەرڤەی پارێزگەهێ كرین، چ ئەوێن بەری دەستپێكرنا خولێ چ یێن ڤەگوهاستنا زڤستانێ دا، ئەڤە ژی وێ چەندێ دیاردكەت كو لژنەیا تەكنیكی یا ئینانا یاریزانان نەشیا یاریزانێن بیانی یێن خودان شیان و كولەتییەكا بلند بینە د ناڤ رێزێن تیمێ دا، ژبلی هندێ گوهۆڕینا بەردەوام یا ڕاهێنەران و گوهۆڕین د پێكهاتییێ تیمێ دا ئەگەرەكێ دی یە، ژبەر كو هەتا نها دەستەكا راهێنانێ نەشیایە بەلانسا تیمێ ڕابگریت وەكو تیمەكا بێ ناسنامە دهێتە دیتن، هەروەسا مە ئەو كوهۆڕینێن دیار دپلان و تەكتیكا راهێنەرێ نوو دا نەدیتی نە، خواندنا وان بۆ تیمێن بەرامبەر هند یا سەركەڤتی نینە، ژبلی شاشیێن كوژەك یێن گولپارێزێ تیمێ كو ب چ رەنگان ژ هەژی درێسێ یانەیا دهۆك نینە، ئەگەر ئەم بزانین كو گولپارێز نیڤا تیمی و راهێنەرێ دویێ یە د ناڤا یاریگەهێ دا، ئەركێ وی تنێ گرتنا تەپێ نینە، بەلكو سەركێشییا هێلا بەرگێریێ ژی دكەت، بەلێ ئەوا ئەم نها لدەڤ كولپارێزێ دهۆكێ دبینن و مە دیتی ژ دەركەڤتنێن وی یێن خەلەت، ئەو شاشیێن كوژەك یێن كو دكەت و ئەو ئاستێ نزم یێ پێ دەركەڤیت، وەدكەت كو دەرفەت ب تیما هەڤرك بهێتە دان كو گۆلان ب ساناهی تۆماربكەن، ئەڤە فشارەكا دی یە لسەر یاریزانێن تیمێ، ژبەر كو دەمێ هێلا بەرگێرییێ بزانن كو گولپارێزەكێ زیرەك ل پشت وانە ب باوەریەكا زێدەتر یاریێ دكەن، فشار ژی لسەر وان كێم دبیت، ئەز دبێژم ئێدی دەرفەت بۆ نەما وەكو گۆلپارێزێ سەرەكی بمینیت، ژبلی هندێ پێدڤی یە لسەر راهێنەرێ گولپارێزان ژی ئەگەرێن ڤێ رەوشێ دیاربكەت، ژبلی خالا فشارێن جەماوەری لسەر یاریزانێن تیمێ كو پێدڤی یە كارگێریا یانەیێ خوە ژێ دوور بێخیت، ب تایبەت ب ئینان و دەستبەردانا یاریزانان دا، هەر ئەڤەنە بووینە ئەگەرێ پاشكەڤتنا ئەنجامان، یا من دڤێت ئەز بێژم كو دفوتبۆلێ و هەر یاریەكا وەرزشی دا، بارێ گران دكەڤیتە ل سەر كارگێریا یانەیێ چونكو ئەو بەرپرسن ژ ئینانا یاریزان و راهێنەران، بەلێ هەر دێ مینیت كار كرن بۆ ڤەگەراندنا گیانێ تیمێ و شەركرن بۆ بلندكرنا ناڤێ یانەیێ،  دەرئێخستنا ستافێ تیمێ لبن گڤاشتنێن دەرونی و كوهۆڕینا تەكتیكا تیمێ، رێكا هەرا سەرەكی بۆ ڤەگەراندنا ئەنجامێن دلخوشكەر، لەوما دڤێت ئەم چاڤەرێ بین.

ئیحسان حەسەن

د فوتبۆلێ دا دبێژن نیڤا دویێ نیڤا راهێنەرانە، ژبەر كو راهێنەر ڤیابیت دنیڤا ئێكێ دا تیما هەڤرك باش خواند بیت، ژبلی هندێ بزاڤێ بكەت كو ئەو شاشیێن تیما وی دخولەكێن نیڤا ئێكێ دا كەڤتنێ چارەسەربكەت، بۆ هندێ ئەنجامی دبەرژوەندیا خوەدا ئێكلابكەت، دیدارا دهۆك دگەل مێڤانا وێ یانەیا مووسل ئەڤ گوتنە بدروستی سەلماند، من ئەڤ گوتارە نڤیسی نە بۆ هندێ ئەز دیاربكەم، كا كیژ راهێنەر باشتر بوو دخواندنا یاریێ دا، ژبەر كو فوتبۆلێ هووسا نیشا مەدایە هەردەم تیما لسەر كاغەزێ باشتر، یان خودان یاریزانێن زیرەكتر ب سەرناكەڤیت، لێ وەكهەڤی و ژدەستدانا دو خالان دناڤا یاریگەها خوەدا بۆ خودانێن ئەردی ب رێزا دۆراندنێ یە، ب تایبەت ئەگەر ئەو تیم بن یێن هیڤیێن وان هەڤڕكی لسەر ناسناڤ و ڕێزێن پێشییێ بن، یا من دڤێت ئەز بەحس بكەم گرنكترین ئەو شاشیێن تەكتیكی نە یێن راهێنەرێ یانەیا دهۆك (عبد الغنی شهد) كەڤتییێ، ژبەر كو راهێنەرێن سەركەڤتی دخواندنا خوەدا تنێ ناڤان نا گوهۆرن، بەلكو گوهۆڕینێ دپلان و شێوازێ یاریێ دا دكەن، یا ئێكێ راهێنەرێ یانەیا دهۆك باش دزانی كو یانەیا مووسل یا هاتی خالەكێ ژ دهۆكێ چێكەت، شاشیا وی پشتی نیڤا ئێكێ هەموو دیتی، ئەوبوو دەمێ یاریزان ب یاریزانەكێ دی گوهارتی ب تایبەت دهێلا هێرشبەریێ دا، ئەڤێ چەندێ ژی ئاریشەیا تیما وی تێدا چارەسەر نەكر، پێدڤی بۆ لسەر هەر زوو یاریزانەك ل پشت هێرشبەران زێدەكربا بۆ هندێ رێكەكێ بۆ شكاندنا هێلا بەرگیرییا یانەیا مێڤان یا پێنچ یاریزانی بینیت، یان ژی گوهۆرینێ دشێوازێ خوە یێ تەكتیكی كربا، یا دویێ وی دیت یانەیا مووسل یا دەمی ب هەموو رێكان دكوژیت، پشتی شیانێن جەستەیی یێن یاریزانێن وان ل خولەكا 65ێ و پێهەل هاتینەخوار، پێدڤی بوو وی هەر زوو هێرشبەر زێدەكربان، لێ وی ل خولەكا 80ێ و پێهەل ژنوو گوهۆڕینان لرێزێن پێشییێ ژ ترسا هێرشێن هەڤدژ كرن، ڤێ چەندێ وەكر كو یاریزانێن مووسل پتر باوەریێ دخولەكێن ماییدا وەرگرن، یا سێیێ، شاشیا وی یا گرێدانا وهێلانا یاریزانێن هێرشبەر ل جهێن خوە، رێ نەدان ب وان كو تا رادیەكی دئازاد بن دناڤا دەڤەرا پەنەلتییێ دا، پێگیریا وی ب شێوازێ خوە یێ تەكتیكی یێ نەسەركەڤتی، بۆ ئەگەرێ هندێ كارێ یاریزانێن بەرگیریا یانەیا مێڤان ب ساناهی بیت دپاقژكرنا تەپان دناڤا دەڤەرا پەنەلتییێ خوەدا، ئەڤە چەندە بۆ ئەگەر كو راهێنەرێ مووسل د خواندنا خوە یا نێكەتیف دا ئەوا وی ڤیای بجه بینیت، دبەرامبەر دا هۆكارێ ئەردو جەماوەری و گڤاشتنا دەرونی بۆ وەرگرتنا بریارا دروست بۆ ئەگەر دهۆك نەشیا بگەهیتە ئارمانجا خوە، یا من دڤێت لدووماهییێ ئەز بێژم، راهێنەرێ سەركەڤتی تنێ تیما خوە نا خوینیت، لێ پێشبینیا هندێ دكەت كا دێ هەڤركێ وی چ كەت، لەوما خواندنا نیڤا دویێ ئەوا دهێتە نیاسین ب نیڤا راهێنەران وێ جوداهییێ دناڤبەرا راهێنەرێ ئاسایی و یێ خودان شیان دیار دكەت.

ئیحسان حەسەن

گومان تێدا نینە كو ئەڤرۆكە یاریا فوتبۆلێ نەمایە لسەر شیانێن یاریزانەكی بتنێ، بەلكو هەر یازدە یاریزانێن یاریێ دكەن گرنگییا خوە هەنە، ژبۆ بجهئینانا پلانێن تەكتیكی یێن دەستەكا راهێنانێ و گەهشتن ب ئارمانجان، لێ هێلا ژ هەموویان چاڤ پتر لسەر هەی یاریزانێن یا هێرشبەریێ یە، ژبەركو بارا پتری یاریزانێن ڤێ هێلێ وەكو كلیلا سەركەڤتنا تیمێن خوە دهێنە دیتن، ئەڤە رامانا وێ چەندێ نادەت كو هێلێن دی نە دگرنكن، بەلكو دیرۆكێ هووسا نیشامەدا یە كو هژمارەكا تیمان شیاینە ب سیستەمێ خوە یێ بەرگیریێ بگەهنە بلندترین ناسناڤێن كێشوەری و جیهانێ، لێ جهێ داخێ یە سەرباری وێ ئەزموونا مەزن یا هەردو یانەیێن مە یێن پارێزگەهێ دهۆك و زاخۆ دخولا ستێرێن ئیراقێ دا، نەشیایە وەكو پێدڤی هێرشبەرێن گولكار بینە دناڤ رێزێن خوە كو ببیتە گولكارێن دیارێن خولێ، یان ئەنجامێ یاریێ ب گوهۆڕن دەمێ تیما وان پێدڤی پێ هەبیت، سەرباری هندێ كو هەر ژ دەستپێكا خولێ تا نها چەندین گورانكاری ژی دڤێ هێلێ دا كرینە ژ دەستبەردان و مفاوەرگرتن ژ بازارێ ڤەگوهاستنا یاریزانان یێن هاڤین و زڤستانێ، لێ هەتا نها وەكو پێدڤی دسەركەڤتی نەبوون دهەلبژارتنێن خوەدا، ژبەركو ئەو ساخلەتێن پێدڤی یە لدەڤ هێرشبەرێ گولكەر هەبن هەتا نها  ناهێنە دیتن، ژهەمییا گرنكتر هەستا گۆلكرنێ و راوەستیان ل جهێ دروستێ تەپێ، ژبەركو هێرشبەرێ زیرەك دزانیت كا كەنگی ل كیڤە دێ تەپە گەهیتێ، ژبلی هندێ گۆلكەر رێكا گۆلێ دزانیت هند دەلیڤەیان ژدەست نادەت، پێدڤییە ب هەردو پێیان و سەری گۆلان تۆماربكەت و مفایی ژنیف دەلیڤێ بینت، یا دیتر ژی هێرشبەرێ مەزن و خودان شیان ئەوە یێ كو لڤینێن وی دناڤا دەڤەرا سزایا تیما هەڤركا بێ تەپە باشتر بن ژ دەمێ تەپە دگەهیتێ، ئەم ڤێ چەندێ ژی كێم دبینین، دگەل باوەریا مە كو شیانێن جەستەیی و لەزاتی خالەكا گرنگە پێدڤییە لدەڤ هێرشبەری هەبن ئەوژی وەكو پێدڤی نینن، چونكو هێرشبەر تنێ یاریزانەك نینە ل نێزیكی گۆلا بەرامبەر ب راوەستیت، بەلكو دشێت دهەر خولەكێ دا گۆلێ تۆماربكەت و تیما خوە ژ دۆراندنێ یان وەكهەڤییێ قورتالبكەت، یا من دڤێت بێژم ئەوا نها ئەم لدەڤ هێرشبەرێن هەردو تیمان دبینین لاوازیەكا بەرچاڤە، پێدڤی ب چارەسەریێ، ئەڤجا ئەگەرێ وێ نەگونجاندنە دگەل فەلسەفا راهێنەری، یان ژی لایەنێ دەورنی و گڤاشتنا جەماوەری و راگەهاندنا وەرزشی یە، یان سیستەمێ یاریكرنێ و حەزا گۆلكرنێ بخوە  بتنێ یە، ئەڤە هەموو كێشەنە پێدڤی یە بهێنە جارەكرن،  ژبەر كو بڤێ رەوشا ئەم نها دبینین ژدەستدانا ڤان هەموو دەلیڤەیێن ساناهی یێن گۆلكرنێ ب تایبەت دگەل یانەیێن خودان رێزبەندیێن ژخوە كێمتر، هوون نەشێن هەڤركییێ لسەر ناسناڤان بكەن، دخولەكێ دا پتر ژ تێبینیەكێ لسەر شێوازێ وێ یێ برێڤەبرنێ، دیسان لاوازیا دادڤانێن یاریان هەبن.

ئێحسان حەسەن

یێ كو بەرێ خوە ددەنە هەڤركیێن خولا ستێرێن ئیراقێ یا فوتبۆلێ، باش دزانن كو كڤاشتنێن نوو یێ نها پتر ژ جەماوەری یاریێ، دیسان دەزگایێن راگەهاندنێ لسەر دادڤانێن یاریان دهێنە كرن، گڤاشتنا یاریزانانە دناڤا یاریگەهێ دا، ئەز باوەرم ئەڤ رەوشەنبیرییە چ جاران هندی نها بەلاڤ نەبوویە، ئەوژی خرڤەبوون ل دورماندوری دادڤانی، دیسان ئاخڤتن دگەل وی دا كو كارتێكرنێ لسەر بریارا وی بكەن بەری كو بدەت، ئەڤرۆكە ئەڤ رەفتارە یێن بووینە رەوشەنبیریەكا گشتی بۆ هژمارەكا تیمێن خولێ كو ئەركێن خوە یێن تەكتیكی یێن ژبیركرین، تنێ كارێ خوە یین كرینە گڤاشتن و نەرازیبوون لسەر بریارێن دادڤانان، رەنگە ئەڤ چەندە ژ ڤالاهییێ نەهاتبن بەلكو دئاراستەكری بن ژلایێ دەستەكا راهێنانێ یان ژی كاپتنێ تیمێ، هەتا ئێك ژ بەرپرسێن یانەیێ، ژبەر كو دگەلەك رەوشان دا دادڤان پێدڤی ب هندێ یە كو گوهێ خوە بدەتە تێبینیێن دادڤانێن ڤارێ دێ بینی یاریزان لێ كوم بوون بۆ هندێ كارتێكرنێ ل بریارا وی بكەن  و دبەرژەوەندییا خوەدا ئێكلابكەن، هندەك جاران ژی هند خوە نێزیك دكەن و دگەل ئاخڤن هەتا ئەو نەشێت گوهێ خوە بدەتە دادڤانێ ڤارێ كا دێ چ بێژیتێ لدۆر وێ رەوشا تەپە بۆ هاتیە راوەستاندن، چونكو دادڤانییا فوتبۆلا ئیراقێ هەتا نها ئاریشەیەكا مەزنە و پتر ژ تیبینیەكێ لسەر هەنە، رۆژ بۆ رۆژێ شاشیێن كوژەك چ ئەنقەسد بن یان ژ نەزانینێ و نەرازیبوون یێن لسەر دهێتە كرن، ڤێجا ئەگەر ئەڤ گڤاشتنە ژی دبەردەوام بن ئەز باوەر ناكەم بشێن بدروستی ب ئەركێن خوە رابن، هەر چەندە فێدراسیونا ئیراقێ لڤێ داویێ ب تایبەت بۆ دیدار و یاریێن هەستیار پشت بەستن لسەر كوما دادڤانێن دەولەتی یێن دەرڤی وەلاتی كرینە، لێ دیارە ئەوژی نەشیاینە وەكو پێدڤی ببنە جهێ رازیبوونا هەموو یانەیان، یا من دڤێت بێژم چونكو شاشی پشكەكە ژ یاریێ، بەردەوامییا گڤاشتناراكەهاندنێ و جەماوەری و یاریزانان لسەر دادڤانان ئاریشەیێ چارەسەر ناكەت، پێدڤییە فێدراسیونا ئیراقێ هندەك پێنگاڤان پاڤێژیت و رێنما و رێكارێن توند ب گرتە بەر بۆ هندێ دادڤانان ژ بن ڤێ گڤاشتنا دژوار بینتە دەر، ئەز پێشنیار دكەم كو رێ ب كاپتنێ تیمێ وەكو خولێن جیهانی بهێتە دان ب تنێ دگەل دادڤانێ یاریێ باخڤیت و ژبلی وی ئەو یاریزانێ نەرازیبوونێ دیاردكەت بهێتە سزادان، ژبلی هندێ سزادانا وان راهێنەران بكەت یێن كو گڤاشتنان دئێخنە لسەر دادڤانان ب تایبەتی دادڤانێ چارێ، كارتێن رەنگاورەنگ دژی وان بكار بینن، هەروەسا رێ نەدەنە ئەندامێن تیمان كو پشتی یاریێ هێرش بكەنە لسەر دادڤانان، ب كوژمەكێ مەزن یێ پاری دیسان یێ كارگێری سزابدەن، بەلێ ئەڤە رامانا هندێ نادەت كو دادڤان ژی ئەركێ خوە بدروستی بجه نەئینن، باشتر ئەوە یێ كو ژ هەژی نەبیت یاریێن خولێ برێڤەببەت، ئامارێن وی یێن برێڤەبرنا یاریێ دباش نەبن، رێ پێ نەهێتە دان بەردەوامییێ بدەتە برێڤەبرنا یاریان و ئەوژی بهێتە سزادان ب راوەستاندنێ، ئەگەر ئەڤ پێنگاڤە هاتنە هاڤێژتن، ئەز باوەرم دێ رەوشا دادڤانییا خولێ باشتر لێ هێت و دەنگێن نەرازیبوونێ ژی دێ كێمتر لێ هێن.

ئیحسان حەسەن

گەلەك جاران دانوستاندن و گەنگشە لدۆر وان پیڤەرێن دهێنە كرن ژبۆ زانینا جوداهییا ئاستێ تیمەكێ دگەل ئێكا دی، بارا پتر بۆچوون بۆ هندێ دچن ئەو تیما دشێت ناسناڤێ خولێ یا هەر وەلاتەكی بدەستڤە بینیت ئەو بهێزترین و باشترینە، ئەڤێ بۆچوونێ زۆربەی شارەزایێن وەرزشێ سەرانسەری جیهانێ پەیرودكەن، نەتنێ بۆ یاریا فوتبۆلێ، بەلكو هەموو یاریێن كۆم، ئەڤە ڕامانا هندێ نادەت كو قارەمانیێن دی وەكو ناسناڤێ كۆپان كو رێژەیا یاریێن وان كێمترە بهایێ خوە نینە یان ل پشتگوه دهێنە هاڤێژن، نەخێر، لێ ئەگەر تە بڤێت پیڤەرێ حێبەتیان تێدا دیاربیت و تیمێن بچووك ببنە هەسپێن رەش بۆ شكەستنا تیمێن مەزن و بگەهنە ئارمانجێن خوە، بێ گومان نە دهەموو قارەمانییان دا، دێ پیڤەرێ كوپان بیت، لێ ئەگەر تەبڤێت كارێ تو ئەنجامددەی بهێز دیاربیت ژلایێ تەكنیكی، تەكتیكی و كارگێری ڤە، خول پیڤەرێ ڕاستەقینە، ئەوژی ژبەر ڤان ئەگەران، یا ئێكێ دخولێ دا پتر دادی یا تێدا هەی ژبەر كو پێدڤییە لسەر هەر تیمەكێ یاریێن خوە دژی هەموو تیمێن خولێ برێكا هاتن و چوونێ بكەت، ئەڤچەندە كارتێكرنا چەنسی و بەختی بدرێژاهییا هەڤڕكییێ كێم دكەت، یا دویێ ئەو تیما دڤێت ناسناڤی بدەستڤە بینیت پێدڤییە بشێت ئاستێ خوە بدرێژاهییا حەفت هەتا هەشت هەیڤان ب كێماسی پارێزیت، ژبلی هندێ هژمارەكا یەدەكێن خودان شیان لبەر دەستێ دەستەكا راهێنانێ هەبن و بشێت ڕەفتارێ دگەل هەر كێشەیەكێ یا گرێدای هنگاڤتنا یاریزانان بكەت، یا سێیێ دخولێ دا دەرفەت یا هەی تو دۆراندنا تیما خوە دیاریەكێ دا قەربووبكەی، ژبەر كو هەموو تیم نەشێن بدرێژاهییا خولێ بەردەوام سەركەڤتنان دناڤا یاریگەها خوە دیسان ل دەرڤە تۆماربكەن، یا چارێ، ئەو قارەمانیێن قارەمانێن خولان پشكداریێ تێدا دكەن وەكو ناڤ و دەنگی و بهایێ وێ و هەتا خەلاتێن وێ گەلەك مەزنترن ژوان قارەمانیان یێن كو قارەمانێن كۆپان پشكداریێ تێدا دكەن، یا من دڤێت ئەز بێژم كو هەر تیمەكا وەرزشی پێدڤی ب سیستەمەكێ كاری یێ تمام ژلایێ كارگێری، تەكنیكی و جەماوەری و هەتا راگەهاندنێ هەیە، دەستبەردان ژ هەر ئێك ژوان دێ كارتێكرنێ دكارێ تیمێ دا پەیدا كەت، دێ نێزیكی پاشڤەچوونێ و شكەستنێ كەت و نەشێت وەكو پێدڤی بگەهیتە ئارمانجێن خوە، چونكو ناسناڤێ خولێ ئامانج و كوپیتكا هیڤیێن هەر تیمەكا جیهانێ یە، ئەو تیما بڤێت بگەهییتە ڤێ پلا سەرفەرازیی و جهەكی بخوە دناڤا مەزناندا پەیدابكەت، دڤێت هەموو شیانان بێخیتە كار، خودان نەفسەكا درێژ بیت و بشێت خوە ژ هەموو ئاستەنگان دەربازبكەت، ژینگەها ساخلەم و هێزا پاری و ژێرخانەیا وەرزشی و كارێ ب كوم هۆكارێن سەرەكی نە ژبۆ گەهشتنا ناسناڤی، ژبەر هندێ هەر دێ مینیت ناسناڤێ خولێ راستگوترین پیڤەر كو تێدا كارێ یانەیێ دگەل جهێن تیمێن دی د هەر خولەكا وەرزشی دا دیاربیت.

ئیحسان حەسەن

گۆمان تێدا نینە كو هزرا خەلاتكرنا باشترین وەرزشڤانێن سالێ، دهێتە هژمارتن ئێك ژ پێنگاڤ و كارێن هەرە گرنگ یێن كو هەر دەزگەهەكێ وەرزشی ل هەر وەلاتەكی یان هەرێمەكێ یان ژی پارێزگەهەكێ پێ را دبیت، ژبەر وان ئەنجام و دەستكەڤتان یێن كو وەرزشڤانێن وان دمەیدانێن وەرزشی دا بدرێژاهییا سالێ بدەستڤە دئینن، چونكو خەلاتكرن رەفتارەكا شارستانی یە و كێمترین وەفاداریە بۆ وان كەسان یێن كو خزمەتا وەلاتێ خوە ب رێكا پشكدارییا خوە دقارەمانیێن جودا دكەن و زەحمەتەكا زوور دبەن بۆ هندێ بگەهنە پودیومێن خەلاتكرنێ وناڤ و دەنگییا وەلات و باژێرێ خوە دهەلكەڤتێن دەولەتی دا بلند بكەن، دیارە ل وەلاتێن پێشكەڤتی و هەتا ل هەرێما مە یا كوردستانێ ژی سالانە خەلاتكرن بۆ یاریزان و راهێنەر و كارگێریێن یانەیان ژبەر دەستكەڤتێن وان یێن كەسوكی دیسان دگەل تیمێن وان دهێنە كرن،  ئەم دبینین خەلاتكرن ژلایێ دەستهەلاتا حكومی و هەتا یاسیاسی یا دهێتە كرن، ئەڤە پێنگاڤەكا هەرە باش و پیرۆزە كو یاریزان یان تیمێن مە پێنگاڤێن باشتر پاڤێژن ب تایبەت دقارەمانیێن نافخویی و دەولەتی دا، ژبلی هندێ ئەڤە خەلاتكرنە دێ بیتە هاندانەكا باش بۆ كەرتێ وەرزشێ ب هەموو سازیێن خوەڤە كو كار ژبۆ بجهئینانا ئەنجامێن مەزنتر بكەن، بەلێ یا ژهەمییا گرنكتر ژی ئەوە ئەڤ پروسێسە یا بەردەوام بیت، ژبلی هندێ ئەڤە خەلاتكرنە بۆ خودانێ دەستكەڤتێ دژیانا وی یا وەرزشی دا بهێتە كرن، نەك پشتی چوونا وی لبەر دلوڤانییا خودێ، ئانكو رێزلێینانا خوە هێشتا یێ ساخ ببینیت، ب تایبەت ئەو كەسێن نها بووینە هێمایێن وەرزشا كوردستانێ یێن كو بارا پتری ژیانا خوە هەموو تەرخانكرین بۆ خزمەتا وەرزشێ، بۆ ڤێ ژی پێدڤییە رێڤەبەریا گشتی یا وەرزشێ ل هەرێما كوردستانێ، جودا ژ خەلاتكرنا دەزگەهێن دی یێن وەرزشی، یان ژی رێكخراوێن نەحكومی، هەر سال رۆلێ خوە وەكو مەزنترین دەستهەلاتا وەرزشی ل هەرێما كوردستانێ بگریت، وان ژی پلانا خوە یا سالانە بۆ خەلاتكرنا یاریزان و كارگێری و دادڤانان و هەتا راگەهاندنا وەرزشی هەبیت، رۆژەك بۆ ڤێ هەلكەڤتێ بدانین ڤێجا چ رۆژا وەرزشا كوردستانێ بیت، یان ژی هەیڤا ئێكێ ژ دەسپێكا هەر سالەكا نوو بیت،  قارەمان و باشترینێن سالێ خرەڤەكەت و خەلات بكەت، داكو ببیتە هاندانەك بۆ وان كو پتر خوە پێشبێخن، بێ نەڤێت ئەڤە ناهێتە كرن ئەگەر لژنەیەك یا دەستەیەك نەهێتە پێكئینان كو نوونەرێن ئێكەتیێن وەرزشی و یانە و دەزگەهێن وەرزشی یێن شارەزا و خودان سەربۆر  تێدا نەبن كو كار بكەن ژبۆ خرڤەكرنا داتایان بدرێژاهییا سالێ، بۆ هندێ ئەم ژی وەكو وەلاتێن پێشكەڤتی ل جیهانێ ڤێ پروسێسێ ب شێوەیەكێ جوان رێك و پێك بجهبینین، بۆ هەموویان نێرینا هەرێما كوردستانێ یا گرێدای پێشخستنا كارێ دەزگەهێن وەرزشی دیاربكەن، لەوما ئەم دێ چاڤەرێ بین.

ئیحسان حەسەن

بدەستڤەئینانا جەماوەرێ فوتبۆلا یانەیا زاخۆ ناسناڤێ خەلاتێ زەبیست یێ باشترین جەماوەرلسەرانسەری جیهانێ، دهێتە هژمارتن دەستكەڤتا كێم وێنە و دیرۆكی بۆ  وەرزشا كوردستانێ و ئیراقێ، كو بۆ جارا ئێكێ یە ناڤێ تیمەكا رۆژهەلاتا ناڤین دچیتە دناڤا هەڤركییا ڤی خەلاتی دا ئەوا سالانە فیفا پێشكێش باشترین جەماوەردكەت، ڤێ دەستكەڤتا مەزن و پرشەنگدار ل هەر كوردەكێ دلسۆز لسەرانسەری جیهانێ پیرۆز دكەم، تشتێ دلخوشێ ڤێ دەستكەڤتا هاتیە تۆماركرن، دانپێدانا جیهانێ یە بۆ وێ پشتەڤانییێ و وی هەلویستێ مروڤایەتی و جڤاكی ئەوا لیاریگەها گەلها سوور هاتیە نیشاندان، ب دەستپێشخەریا وان یا هاڤێژتنا هزاران یاریكێن زارۆكان بۆ پشتەڤانیكرنا زارۆكێن خودان پێداویستیێن تایبەت و نەساخێن پەنجەشێرێ، كو باشترین بەلگە بوو بۆ دووپاتكرنا پەیام و بهایێ فوتبۆلا راستەقینەیە كو پترە ژ جەماوەرێ یانەیەكێ یە، بوویە ئەگەرێ هندێ كو بكەڤیتە دناڤا هەڤركییێ دا و بگەهیتە ڤێ پلا سەرفەرازیێ، گرنگییا ڤێ دەستكەڤتی ژبلی هندێ كو ناڤێ وەلات و باژێرێێ خوە دڤێ هەلكەڤتا جیهانی دا بلندكر، ئەڤێ سەركەڤتنێ ناسنامەیا یانەیێ و ناڤێ  تیما وان یا فوتبۆلێ ژی ئەوا پشكدار دخولا ستێرێن ئیراقێ دا مەزنتر لێكر، ئەگەر ئەم گرنگییا ڤی خەلاتێ لسەر ئاستێ تەكنیكی  ووەرزشی بۆ پتر پشتەڤانییا تیمێ و بلندكرنا سەقایی هەڤركییێ و چێكرنا تابلویێن جوانتر بكار ئینانا تەكنەلوجییا سەردەم ژێ ژبیر نەكەین، هەورەسا ئەڤ دەستكەڤتە دێ وە كەیت كو ببیتە نموونە بۆ پشتەڤانێن جەماوەرێن دی ل یانەیێن كوردستانێ و ئیراقێ بۆ پاراستنا گیانێ وەرزشی، ژبلی گرنگییا وێ بۆ زێدەبوونا جەماوەرێ یانەیێ نەتنێ لسەر ئاستێ نافخو بەلكو لسەر ئاستێ جیهانێ ژی مینا یانەیێن مەزنێن جیهانێ، ژبلی هندێ دێ وەكەت كو ستێرێن یانەیێ ئەوێن نها بەرەڤانییێ ژدریسێ كورێن خابیری دكەن كو پتر بهێنە گرێدان ب جەماوەرێ یانەیێ ڤە و كار ژبۆ تۆماركرنا دەستكەڤتان د خول و قارەمانییان دا لسەر ئاستێ ئیراقێ و دەرڤە بدەستڤە بینن، ژبلی هندێ دێ دەرگەهێ ماركتینكا وەرزشی، ژبلی ماركتینكا بازارێ یاریزانان ژی ژبەر ناڤ و دەنگییا یانەیێ، ئەگەر كار لسەر بهێتە كرن دوور نینە  چەندین دەرگەهێن بازرگانی ژلایێ كومپانیان ڤە بۆ بهێنە ڤەكرن، دیسان كارتێكرنا وێ یا باش دێ لسەر خورتكرنا بزاڤا گەشتیاری ل ئیدارەیا سەربەخویا زاخۆ هەبیت، بەلێ هەر دێ مینیت چالنجا بەری ڤێ خەلاتكرنێ و ئێكرێزیا كوردان  و حەزكرنا وان بۆ سەركەڤتن و سەرئێخستنا تیما نەتەوەیا خوە لسەر هەر دوو بەربژێرێن یانەیێن ئسپانی و ئەرجەنتینی دڤێ پێشبركا جیهانی دا، ئەوا هەر كوردەكێ دلسۆز لسەرانسەری جیهانێ پشتەڤانی لێكری، دەستكەڤتا ژ هەموویان مەزنتر كو ئەم هەموو شانازیێ پێ دبەین، دووبارە پیرۆزە ل زاخۆ پیرۆزە ل عەشقا هەر و هەر، پیرۆزە باژێرێ مەردە مێر و عەكید و شەهیدان ئەڤ دەستكەڤتا ژ هەژی.