ئیحسان حەسەن

ئەڤرۆ 16 تەباخێ یە، مللەتێ كورد و لایەنگرێن رێبازا بارزانییێ نەمر دێ سالیادا بورینا 80 سالان لسەر دامەزراندنا پارتی دیموكراتی كوردستانێ پیرۆز كەن، د ڤێ مێژوویا پر سەروەری دا، پارتی ب تنێ حزبەكا سیاسی یا چەكداری نەبوویە ژبۆ داكوكیكرنێ ژ مافێن مللەتێ كورد، بەلكو هەردەم هزر د ئاڤاكرنا تەخ و تویژن جودا یێن جڤاكی دا كرییە، د ناڤا ڤان تەخان دا سەكتەرێ وەرزشی و گەنجان  بوویە كو هەردەم د پێشەنكا كار و بەرنامەیێن پارتی دا بوویە، هەر ب گەرماتییا شورەشێ تا ئەڤرۆ خوە ل وەرزشێ كریە خودان و بدیتنەكا كوور بەرێ خوە دایە وەرزشێ وەكو لایەنەكێ گرنكێ ژیانێ كو ئارمانجا وێ یا سەرەكی خزمەتكرن و پەروەردەكرنا لاوانە، پەیاما دیرۆكی یا جەنابێ سەرۆك مەسعوود بارزانی دەمێ دبێژیت (رۆلێ وەرزشێ ژ هیچ لایەنەكێ سیاسی كێمتر نینە بۆ ناسناندنا مللەتێ كورد ل جیهانێ) نیشانا تێگەهشتنا كوور و ئاست بەرزە بۆ رۆل و سەنگا وەرزشێ د جیهانا ئەڤرۆدا، ب دیتنا سەرۆكی دا وەرزش ب تنێ یاری یان دەم بوراندن نینە، بەلكو هێزەكا نەرم و هۆكارەكێ كارا یێ دیبلۆماسییەتێ یە كو دشێت سنوران ببریت و دەنگ و روخسارێ شارستانی یێ مللەتێ كورد ب گەهینتە مەیدانێن دەولەتی، دەمێ ئالایێ كوردستانێ د قارەمانیێن جیهانی دا ب رێكا وەرزشڤانان دهێتە  بلندكرن، كاریگەریا وێ ب دەهان كومبوونێن سیاسی گرنكترە، سەرۆك بارزانی بڤێ ئاخڤتنێ وەرزشڤان كرینە بالیۆزێن راستەقینە یێن دۆزا رەوایا مللەتێ كورد د ناڤ گوكەلگەهێ نێفدەولەتی دا، ئەڤ دیتنا مەزن یا سەرۆكی، بوویە نەخشەرێیەكا كرداری بۆ هەموو بەرپرسێن پارتی یێن كو كار د ناڤا حكومرانییا كوردستانێ دكەن ب تایبەتی رۆلێ بەرچاڤێ بەرێزان نێجیرڤان بارزانی سەرۆكێ هەرێما كوردستانێ و مەسرور بارزانی سەرۆكێ حكومەتا هەرێما كوردستانێ دهێتە پێش، كو ب بەردەوامی و دهەمی قووناغان دا پشتەڤانێن راستەقینە یێن یانە و ئێكەتیێن وەرزشی و وەرزشڤانان بووینە، پشتەڤانییا وان یا بەردەوام و بەرهەڤكرنا هەر تشتەكێ پێدڤی بۆ سەركەڤتنا كاروانێ تیمێن كوردستانێ ژبۆ پشكداریێ دخول و قارەمانیێن نافخۆ و دەرڤەدا بەلگەیێ ڤێ چەندێ نە، ژبلی پشتەڤانییا وان یا بەردەوام  بۆ ئاڤاكرنا ژێرخانەیا وەرزشی ژ یاریگەه و هۆلێن دەولەتی، دیسان  پشتەڤانییا وان برێكا هەردو رێكخراوێن ئێكەتیا قوتابی ولاوێن كوردستانێ و ئێكەتیا ئافرەتێن كوردستانێ ب دروستكرنا ب دەهان یاریگەهان بۆ باژێر و گوندێن كوردستانێ، ژبلی دابینكرن و بەلاڤكرنا كەل و پەلێن وەرزشی ل سەر هزاران ژ تیمێن مللی بێ جوداهی، بەلگەیەكێ دی یێ پشتەڤانییا سەركردێن پارتی یە بۆ بزاڤا وەرزشی، ژبەر هندێ ژی  چ جاران رێگری ل حەزێن گەنجان نەكریە، د هەموو كاودانان دا پالپشتی لێكریە، ژبەر كو باش دزانیت وەرزش چییە و ئارمانجێن وەرزشێ چ نە، وەرزش هۆكارەكە بۆ دوورئێخستنا لاوان ژ مەترسی و دیاردێن زیان بەخش، دیسان بۆ ئاڤاكرنا ئەندروستییا جەستەیی و وهزری یا جڤاكی، هەروەسا بۆ چاندنا گیانێ هەڤركییا ساخلەم و كوردپەروەریێ د دلێ نەڤێن نوو دا، ژبەر كو ب باوەریا پارتی وەرزش سەكتەرەكێ پیرۆز و پاقژە، هەردەم دگەل هەموو كاودانان دا دەرگەه ڤەكری هێلایە داكو وەرزشڤانێن كوردستانێ بەردەوام هەڤركییان دگەل تیمێن ئیراقێ بكەن، داكو پتر شارەزاهییێ وەرگرن و ئاستێ خوە پتر پێشبێخن بۆ هندێ پاشەرۆژەكا باشتر هەبیت و ناڤێ خوە و ولات و مللەتێ خوە بلند بكەن، لەوما ژبەر ڤێ پووتەدانێ  بەرهەمەكێ زێرین هەبوویە، ئەڤرۆ وەرزشڤانێن كوردستانێ شانازیێ پێ دبن، ئەنجامێن دیرۆكی یێ یانە و وەرزشڤانێن كوردستانێ لسەر ئاستێ نافخویێ و دەرڤە دا،  بدەستڤە ئینانا مەدالیێن رەنگین دقارەمانیێن دەولەتی و ئۆلمپی دا ب یاریێن جودا وەكو فوتبۆلێ، باسكێت بۆلێ، ڤۆلی بۆلێ ،تێنسا ئەردی و مێزێ، یاریێن جەنگی، شەترەنج و پایسكلان لسەر ئاستێ كوڕان وكچان، دیسان خەلاتكرنا وان ژلایێ سەركردایەتییا پارتی ڤە بەرهەمێ ڤێ پشتەڤانییا بەردەوامە، دیارە خزمەتكرنا وەرزشێ لدەڤ پارتی دیموكراتی كوردستان، تنێ دروشمەكێ راگەهاندنێ نەبوویە، بەلكو بەشەك بوویە ژ ئادیۆلۆژیا ئاڤاكرنا مرۆڤێ كورد، ژبەر هندێ د سالیادا 80 یێ یا دامەزراندنا پارتی دا، وەرزشڤانێن كوردستانێ ب رێز و پێزانین ڤە بەرێ خوە ددەنە ڤێ مێژوویا پر ژ پشتەڤانیێ، ئەڤرۆ وەرزشا كوردستانێ ژ سیبەرا ڤێ رێبازێ دا گەهشتیە ئاستەكێ هووسا كو نە بتنێ ل سەر ئاستێ ناوچەیێ، بەلكو د مەیدانێن جیهانی دا ژی ئالایێ كوردستانێ یێ بلند دبیت و بەردەوام بیت  ب جهئینانا پەیاما سەرۆكێ كوردان، دا كو وەرزش بالیۆزێ راستەقینەبیت بۆ مللەتێ كورد.

ئیحسان حەسەن

سوبەهی دێ كاروانێ نوو یێ خولا ستێرێن ئیراقێ یا فوتبۆلێ دەستپێكەت، هیڤی و ئومێدێن پشتەڤان و حەژێكەرێن فوتبۆلێ ئەوە خولا ڤی وەرزی ژ هەموو لایەكیڤە جێواز بیت بەرامبەر كێماسیێن وەرزێ بوری، فێدراسیونا فوتبۆلا ئیراقێ ب چاڤەكێ رەخنەیی و ئاڤاكەر بەرێ خوە بدەنە نافخویا یاریگەهان، یا مۆدرێن و دادپەروەر و ب هێز بیت، دخولەكێدا سەركەڤتن و گەرماتیا وێ ب شێوەیەكێ راستەوخۆ یا گرێدای ئاست و پشكداریا بهێز یا یانەیێن كوردستانێ بیت، ئەوێن هەردەم بووینە هۆكارێن مەزن یێن بلندكرنا ئاستێ هەڤركییێ، لەوما پێدڤییە ئەڤ سالە تیمێن هەرێما كوردستانێ ب پلانەكا راست لسەر بنیاتەكێ جێگیر پشكداریێ بكەن، مفای ژ سەربۆر و شاشیێن پێشین وەرگرن، ئێك ژ مەزنترین ئاریشەیێن وەرزێ بوری گوهۆڕینا بلەز یاراهێنەران بوو ئەوا بوویە ئەگەر سەقامگیریا تەكتیكی یا تیمێ تێكدایی، ژبلی هندێ پێدڤییە كارگێریا یانەیێ و جەماوەرێ ژ ئەنجامێن تیمێ دبێهنفرهبن، پشتەڤانییا دارایی و مەعنوی بۆ راهێنەر و یاریزانان بەردەوامبیت، دیسان دگورانكاریێن زڤستانێ و هاڤینێ دا هۆشیاری بریارێ بدەن، ژلایەكێ دیڤە بادەكا دادڤانییێ ئێك ژ پرسیارێن گرنگێن وەرزێ بوری بوو كو تیبنیێن زوور لسەر هەبوون، بۆ سەركەڤتنا خولێ فیدراسیۆنا ئیراقی دكەڤیتە لژێر بەرپرسیارتییەكا ئەخلاقی و پیشەیی داكو دادپەروەریێ دناڤبەرا هەموو یانەیان دا جێبەجێبكەت، ئەكەر پێدڤی بیت پشتبەستنێ ددیدارێن مەزن و ئێكلاكەردا لسەر دادڤانێن دەرڤە بكەت، ئەگەر دادڤانێ خومالی ل ئاستێ پێدڤی نەبن ژبلی سزادانێ وان رێ پێ نەهێتەدان بەردەوامییێ درێڤەبرنا یاریاندا بكەن، هەروەسا خوە ژ پاشئێخستنا یاریان دوور بێخین، ژبەركو پاشئێخستن خشتەی خولێ تێكددەت ژبلی هندێ جوش و خروشا یاریگەهان دمرینیت، هەروەسا كارتێكرنێ ل شیانێن یاریزانان دكەت، دیسان پووتەی ب كوالیتییا ڤەگوهاستنا راستەوخۆ یاریان بدەت، پێدڤییە بگەهیتە ئاستەكێ پرۆڤیشنال كو ژ هەژی ناڤێ خولێ بیت و جوانییا یاریێ نیشا بینەران بدەت، چونكو جەماوەر فێقیێ یاریگەهانە و گیانێ فوتبۆلێ نە، ئامادەبوونا وان دناڤا پەلۆكێن یاریگەهان دا خوشییێ ددەنە هەر یاریەكێ، پێدڤییە ب گیانەكێ وەرزشی ڕەفتارێن دگەل هەموو روودانێن یاریان بكەن، ب تمامی خوە دووربێخن ژ ئاخڤتنێن نەشرین و ئاژاوەگیریێ، روویەكێ جوان نیشا جیهانێ بدەن و ئەنجامان ب هەموو رەنگان قوبوول بكەن، یا من دڤێت بێژم وەرزێ نوو دەرفەتەكە بۆ هندێ سنورەك بۆ شاشیێن بەرێ بهێتە دان، ب دادپەروەریا فێدرسیۆنا ئیراقێ یا فوتبۆلێ، سەبرا كارگێری و جەماوەری، ئاستێ بلندێ یێ یانەیێن كوردستانێ، رەفتارێن جوانێن پشتەڤانان، كوالیتییا یاریگەهان، سیستەمەكێ ئەلكترۆنی یێ پێشكەڤتی بۆ فرۆتنا پلێتێن یاریان و رێكخستنا چوونا جەماوەری وگرنگیدان ب تەندروستیا یاریزانان، خول دێ گەهیتە وی ئاستی یێ كو ئەم شانازیێ پێ دبین، ب هیڤییا هندێ یانەیێن مە یێن كوردستانێ بگەهنە  ئارمانجێن خوە یێن ژهەژی.

ئیحسان حەسەن

كێشەیا داریی یێن یانەیێن هەرێما كوردستانێ، نەخاسمە ئەو یانەیێن پشكداریێ دخولێن ئیراقێ یێن فەرمی دا دكەن، نەبابەتەكێ نوویە، بەلكو ئەڤ كێشەیە تێكچوونا بنیاتێ وەرزشێ د ناڤا جەرگێ یانەیان دا نیشان ددەت، ژبەر كو ئەو میزانییا دارایی یا فەرمی ئەوا ژلایەنێن پەیوەندیدارڤە بۆ ڤان یانەیان دهێتە تەرخانكرن ب چ ئۆپشنان ڤە تێرا كەمپێن راهێنانێ یا كرینا یاریزانێن ئاست بلند ناكەت ژبۆ پشكداریێ دخۆل و قارەمانییێن مەزن دا، یا دروست ژی وەكو جیهان هەموو لسەر چیت ئەوە، پێدڤییە  ئەو پارەیێ دهێتە تەرخانكرن بۆ هەر یانەیەكێ هند بیت كو د دو دەرگەهان دا بهێتە خەرجكرن، ئێك بۆ پشكداریێ دخول و قارەمانییاندا، یا دیتر ژی بۆ چێكرنا شەنگستێ یاریان، ژبەر كو ئەڤ رەوشا نها ئەم دبینین راستەوخوە بارگرانیا خوە دئێخیتە ل سەر پتر ژ 90 سەدێ ژ یانەیێن كوردستانێ هەتا یێن كو پشكداریێ لسەر ئاستێ كوردستانێ ژی دكەن، چونكو زۆربەیا ڤان یانەیان نە خودان كومپانیێن مەزنن كو پشتەڤانییێ بۆ بكەن، نە ژی خودان دەستەكەكا شەرەفی نە كو ددەمێن تەنگاڤ دا هاریكاریێ لێ بكەن، تنێ ئێك دەرگە هەیە ئەوژی پشتەڤانییا حكومەتێ یە، لسەر هندێ را كو حكومەتێ لدووڤ شیانان چ كێمتر خەمی نەكریە بۆ بەردوامییا یانەیێن مە دناڤا هەڤركییان، بەلێ ئەڤرۆكە زۆربەی كارگێرێن یانەیان دناڤا دەریایەكا قەرزان مەلەڤانیا دكەن، دناڤا ناڤەندێن وەرزشی دا ئاماژە بۆ هندێ دچن كو برین و كێمكرنا ڤێ میزانییێ بۆ وەزارەتا دارایی دزڤرن، بەلێ دراستی دا بێ سەروبەری و نەبوونا پلانەكا ستراتیژی یا درێژخایەن ئاریشەیا بنەرەتییە، ئەگەر ئەم قەیرانا دارایی ژی ژێ بینە دەر، ژبەر هندێ كو ئاستێ هەڤركییا یانەیێن مە دگەل یانەیێن باشوور و ناڤەراستا ئیراقێ بگونجیت ئەو یانەیێن كو ژلایێ وەزارەتێن نەفتێ و ڤەگوهاستنێ ڤە ب ملیۆنان دۆلاران بودجە وەردگرن، پێدڤییە میزانیێن یانەیێن مە ئەگەر مە بڤێت ئەم هەڤركییێ لسەر ناسناڤان بكەین د لوچیكی بن، ب كێماسی سێ تا پێنچ ملیون دۆلاران بهێنە تەرخانكرن بۆ یانەیێن مە یێن كو پشكداریێ دخولێن مەزنێن ئیراقێ دا دكەن وەكو خولا ستێرێن ئیراقێ یێن فوتبۆلێ و یێن كێمتر نەبن ژ ئێك ملیۆنان، یێن هەرێمێ ژی دو سەد تا دو سەد و پێنجی هزار دۆلاربن، ئەگەر مە بڤێت ئەم وەرزشا خوە پێشبێخین، ژبەر كو ئەڤ ژمارەیا خەرجیاتان ئەو زێدەبوون تێدا نینە بەلكو پێدڤییەكا سەرەكی یا وەرزشا پیشەكاریە، تا كو كارگێریا یانەیان و سپۆنسەرێن كەرتێ تایبەت ژی بشێن پشكەكا دی یا تێچوویان  ب ستویێ خوەڤە بگرن، دیارە ئاستی تەكنیكی یێ ئاریشەیان تنێ دبوراێ فوتبۆلێ نینە، بەلكو دهەموو یاریێن دی وەكو باسكتبۆلێ، ڤۆلی بۆلێ، تەپا دەستی، یاریێن گورەپان و مەیدانێ و یاریێن تاك و هەتا دووماهییێ نزم بووینە، بۆ هندێ ئەم جارەكادی وەرزشا خوە ڤەگەرینە ڤە و وان یاریێن نها نەماین یان پاشڤە چووین ساخ كەینە ڤە، مە پێدڤی بڤان خالان هەیە، یا ئێكێ دابینكرنا دارایی یا بەردەوام هەیە ئەڤە ژی پێدڤییە یاسەیەك بۆ هەبیت، هەر یانەیەك ب گورەیی مەزنییا خوە  ناڤ و دەنگییا خوە وەرگریت، یا دویێ راسپاردنا كارگێریێن یانەیان ب كەسێن وەرزشی و شارەزایێن كاركێری و بسپۆر و بێ مەحسوبیەت، یا سێیێ پشتەڤانیا وەرزشا قوتابخانەیان و ئەكادیمیان ژبۆ ئاڤاكرنا بنەمایەكێ دروست ژ یاریزانێن گەنج بكەن، یا من دڤێت بێژم، دڤێ قۆناغا مەترسیدار دا ئەوا وەرزشا كوردستانێ تێدا دبوریت مە پێدڤی ب لژنەیەكا ئێكلاكەر هەیە ژبۆ دانا سنورەكی بۆ هەلوەشاندنا ڤێ جورە كاركرنێ، ژبەر كو ئەوا وەرزشا نها دهێتە كرن ژ نەبوونا یاسایەكا وەرزشی ل هەرێما كوردستانێ، راوەستاندنا كارێ لژنەیا ئۆلمپی، نەبوونا چ دەستهەلاتان لدەڤ رێڤەبەریا گشتی یا وەرزشی ئەوا وەكو بینەر بەرێ خوە ددەنە یانەیێن مەزن بێ كو بزانێن كا ژێدەرێن وان یێ دارایی ژ كیڤە دهێن و كێڤە دچن، ئەز پێشنیار دكەم كو لژنەیەكا بالا ب سەرۆكاتییا بەرپرسێ ئێكێ یێ وەرزشی ل هەرێمێ و جێگراتییا نوونەرەكێ پلە بلند ژ وەزارەتا دارایی بهێتە دامەزراندن، كو ئەندامێن وێ پێكبهێن ژ سەرۆكێن یانەیێن كوردستانێ یێن پشكدار دخولێن ئیراقێ و هەرێما كوردستانێ دا، دگەل دەستەكەكا رۆژنامەڤانێن سەربەخۆ یێن وەرزشی، كو تێدا سەرۆكێن یانەیان ئاریشەیێن خوە بێ راپۆرتێن كاغەزی بێخنە بەردەم بەرپرسێ دارایی و وەرزشی، بڤێ شێوەی دێ شێن بریارێن بلەز دەن و یانەیێن مە ژ قەیرانێن دارایی رزگار كەن، ئەڤە ناهێتە كرن ئەگەر ئەڤ لژنە رازیبوونا حكومەتا هەرێما كوردستانێ وەرنەگریت بۆ پشتەڤانیكرنێ، ژبلی هندێ لژنەیەكا چاڤدیریێ بۆ خەرجیاتێن ڤان یانەیان هەبیت، ژبەر كو هەتا نها كێشیا سەرەكی ئەوە كو حكومەتێ چ ستاندەرێن جێگیر یێن پشتەڤانییێ نینن كو یانە لدووڤ وی پارێ پێ دهێتەدان كارێ خوە لسەر ئاڤابكەت، ژبلی هندێ دائێخستنا دەرگەهێ هەر یانەیەكێ دووركەڤتنا وێ ژ هەڤركییان، بتنێ مانا یان راوەستاندنا یاریەكێ ب تنێ نینە، بەلكو شكاندنا ئومێدا سەدان گەنجان و ژناڤبرنا بزاڤێن چەندین سالانە، دەم هاتییە كو هەموو لایەك بزاڤێ بكەن رێگە چارەیەكێ ببینن ژبۆ دەربازبوونا یانەیێن مە ژ قەیرانان، ئەوا بەری چەند رۆژان ل یانەیا دهۆك دیاربووی ئێكەم زەنگلا مەترسییێ بوو، ئەگەر زوو چارەنەبیت، سوبەهی دێ ل یانەیەكا دژی دیاربیت.

ئیحسان حەسەن

ئەڤرۆ ل پرانیا یانەیێن كوردستانێ ب تایبەت ئەوێن دخولێن مەزن دا پشكداریان دكەن، پێدڤییەكا مەزن ب هەبوونا پەیڤدارێ یان (ئاخڤتنكەرێ) فەرمی یێن خودان بسپۆری ژ نافخویا راگەهاندنا وەرزشی یا كوردستانێ هەیە، ئەڤ چەندە دێ پێنگاڤەكا ئەرینی و گرنك بیت بۆ رێكخستنا كارێ كارگێری یێ یانەیان، بەلێ ئێك ژ مەزنترین ئاستەنگێن ل هەمبەر پەیڤدارێن فەرمی كو دبنە رێگر بەرامبەری كارێ وان، نەبوونا داتا و پێزانینێن دروست و كێمیا شەفافیەتێ یە ل دەف وان، ب تایبەتی دەمێ پرسیارەكا هەستیار لسەر گرێبەستان، ئاریشەیێن دارایی، یان بریارێن كارگێری یێن یانەیێ دهێنە كرن، د دەمەكی دا كو پێدڤی یە ئاخفتنكەر بخوە دناڤ جەرگێ بریارێ دا بیت و ئاگەهداری هەموو هووركاریان با، ئەم ژ پەیڤدارێن فەرمی یێن یانەیێن كوردستانێ ناخوازین كو ل سەر شاشەیان بەحسێ دادڤانییێ، كێشەیێن دگەل فیدارسیۆنێن جودا، یان گوتگوتكێن بازاری بكەت، بەلكو ئەركێ وی یێ سەرەكی ئەوە گەهشتنا راستیا پەیاما فەرمی  دناڤبەرا كارگێریا یانەیێ و راگەهاندنا وەرزشی ب ساناهی بكەت، داكو جەماوەرێ كوردستانێ یێ چاڤەرێ نووچەیان، پێزانینێن راست و دروست پێ بگەهن ل شوونا وان دەنگو باسێن نەراست و پروپاگەندەیێن كو پەیچ و تۆرێن جڤاكی پێ تژی بووین، گەلەك یا فەرە كارگێریێن یانەیێن كوردستانێ هەتا یێن ئیراقێ ژی تێبگەهن كو پەیڤدارێ فەرمی چەكەكێ راگەهاندنێ یێ بهێزە بۆ گەهاندنا پەیامێن وان یێن وەرزشی، رێكخستنا پەیوەندیان دگەل پشتەڤانان، پێدڤییە پەیڤدار ببیتە پرەكا لێك تێگەهشتنێ دناڤبەرا یانەیێ و جیهانا دەرڤەدا، دیسان پەیڤدارێ فەرمی یێن یانەیێن كوردستانی لسەر وێ چەندێ د هشیار بن كو ئەو لسەر شاشە و مایكرۆفونان نوونەراتیا دیرۆك و ناڤێ یانەیێ دكەن، د هەر پەیڤەكا دبێژن چ ب قەسد بیت یان ژ نشكەكێ ڤە بیت، دەمێ پرسیارەك ژێ دهێتە كرن و ئەو خوە ژ بەرسڤێ لادەت یان توورە دبیت، لڤێرێ پەیام ئەوە كو كارگێریا یانەیێ ب تمامی یا بێ دەنگە یان كەڤتییە دئاریشەیان دا، ژبەر هندێ دخولێن مەدا، رۆلێ پەیڤدارێ فەرمی گەلەك ژ هندێ مەزنترە كو تنێ ناڤەكێ شەرەفی یێ بێ دەستهەلات بیت، یان پۆستەك بیت بۆ زێدەكرنێ لسەر سیڤیێ هندەك كەسان، پێدڤییە هندەك سالوخت لدەڤ هەبن یا ژهەمیا گرنكتر یێ هێمن بیت و بشێت كونترۆلێ لسەر خوە دهەموو رەوشاندابكەت، پێدڤی یێ شارەزا بیت دیاسیێن خولێ و رێنمایێن فیدراسیۆنێ و هووركاریێن كارگێری دا، دەمێ دئاخڤیت پەیڤێن وی دزانستی بن و سۆز و عاتیفە تێدا نەبن، ژبلی هندێ خودان زمانەكێ شرین بیت و بشێت پەیامێن ئالۆز ب ساناهیترین شێوە بگەهینیت، یێ  راستگوبیت و خودان پەیوەندیەكا بهێز  دگەل هەموو دەزگایێن راگەهاندنێ هەبیت و بزانیت كیژ دەم یێ گونجایە كو زانیاریێن پێدڤی لدۆر یانەیێ بدەت، یا من دڤێت بێژم كو دناڤبەرا یانەیێ و دەزگەهێن راگەهاندنێ دا كارێ رۆژانە، ئاخفتنگەر ب كارێ فەرمی رادبیت برێكا بەیاننامە و روونكرنان، نەوەك ئەوا نها ئەم دبینین كو جار هەیە ب تیبەت دەمێ برێڤەبرنا خولان دا سەرۆك و كارگێریێن یانەیان  لسەر سۆشیال میدیایێ بەرسڤا پشتەڤانان یان كێشەو شاشیێن دادڤانان ددەن.

ئیحسان حەسەن

ل گەل نێزیكبوونا پشككێشانا خولا ستێرێن ئیراقێ یا فوتبۆلێ، رەنگە پرسیارا ژ هەموویان گرنكتر دناڤا جادەیا وەرزشی یا ئیراقێ ب گشتی و كوردستانێ ب تایبەتی ئەوبیت، ئەرێ خولا ڤی وەرزی دێ بیتە دەرگەهێ گۆرانكاریەكا بنەرەتی د رێكخستنا خولێ دا، یان دێ دیسان كەڤیتە دناڤا بازنەیێ كێشەیێن دووبارە دا؟ ئەگەر ئەم بزانین ل وەرزێ بوری پتر ژ تێبینیەكێ لسەر كاروانێ خولێ هەبوون چ یێن گرێدای رێكخستنێ ڤە، هەروەسا شاشیێن دادڤانان، بۆ بەرسڤدانا ڤێ پرسیارێ، ئیراق دشێت مفای ژ ئەزمونێن وەلاتێن پێشكەڤتی وەرگریت، ئێكەم و گرنكترین پێنگاڤ بۆ سەركەڤتنا هەر خولەكێ، ساقامگیری و پابەندبوونە ب ژڤان و خشتێ یاریان، ئەركێ فیدراسیونا ئیراقێ و لژنەیا بەریكانەیان ئەوبیت یا رژدبیت د نەهێلانا دیاردەیا پاشخستنا یاریان، ژبەر كو خولا بهێز پێدڤی ب بەردەوامییێ هەیە، پاشخستنا بەردەوام ژبەر هەر ئەگەرەكی، ژبلی كو جوش و خورش و گرنگییا هەڤركییێ لدەڤ جەماوەری دكوژیت و زیانێ دگەهینتە ئاستێ تەكنیكی یێ یاریزانان، بارێ دارایێ یێ یانەیان ژی گران دكەت، ژبلی هندێ سەركەڤتنا ڤی وەرزی پێدڤی ب هەماهەنگیەكا سێقۆلی دناڤبەرا یانەیان، لژنەیا بەریكانەیان و كۆمپانیێن ڤەگوهاستنا تەلەفزیونی هەیە، ژبەر كو یانە بخوە وەبەرهێنەرێن سەرەكی یێن یاریێ نە، راگەهاندن ژی ئەوە پەنجەرەیە ئەوا ڤی بەرهەمی نیشا جیهانێ ددەت، لەوا پێدڤی یە دەمێ یاریان ب رازەمەندی و دانوستاندنا هەموو یانەیان بهێتە دیاركرن، نە ب سەپاندنا تاكلایانە ژلایێ لژنێ ڤە،چونكو پاشگوهێخستنا خواستا پشتەڤان و گەنالان دێ بیتە ئەگەرێ ڤالابوونا یاریگەهان و كێمبوونا رێژەیا بینەران، دڤێ چارچووڤەی دا پێشنیارەك هەیە كو پێدڤییە بهێتە جێبەجێكرن، ئەوژی بەلاڤكرنا یاریێن ئێك رۆژ لسەر دەمێن جێواز ل هەردو وەرزێن زڤستانێ و هاڤینێ، ئەڤە ژی دێ دەلیڤێ دەتە حەزژێكەرێن فوتبۆلێ پتر ژ یاریەكێ بینن، ژبلی هندێ یاریەك هەبیت بناڤێ یاریا حەڤتییێ ئەڤ یاریێ رۆژەكا تایبەت هەبیت بۆ نموونە یاریێن كلاسیكویێ و دێربیان یێن جەماوەری وەكو شورتە و جەوییە یان دهۆك و زاخۆ و هەولێر بۆ هندێ سرنجا میدیایی و سەرمایەداران ب كێشیتە لسەر وێ یاریێ، یا من دڤێت بێژم پێدڤییە فیدراسیونا ئیراقێ تێگەهشتنا خوە بۆ فوتبۆلێ ب گوهۆریت، ژبەر كو خول نەتنێ كەیف خوشی یە، بەلكو پێشەسازی و وەبەرهێنانە، ئەگەر خول پشتی پشككێشانێ ب شێوازێ بازرگانی یێ پرۆفیشینال بهێتە برێڤەبرن، داهاتیێن پلێت، سپۆنسەر و ریكلامان دێ بارێ دارایی یێ یانەیان گۆهوریت ژ پشتبەستنا ب پارەیێ حكومەتی تا رادەیەكی رزگار كەت، ئەز باوەرم ئەگەر فیدراسیونا ئیراقێ یافوتبۆلێ پشتی ئەنجامدانا ڤێ پشككێشانێ ڤان خالان بكەتە كریار، دێ شێت وەرزەكێ رێكخستی، كێم كێشە و پر داهات پێشكێشی جەماوەرێ وەرزشی یێ ئیراقێ و كوردستانێ كەت، بەلێ هەر دێ مێنیت كونترۆلكرنا شاشیێن دادڤانێن یاریان كلیلا سەركەڤتنا خولا نوو، دگەل داخوازیێن سەركەڤتنێ بۆ هەموو یانەیێن كوردستانێ.

ئیحسان حەسەن

دجیهانا فوتبۆلێ دا قووناغا بەری دەستپێكرنا وەرزێ نوو دهێتە هژمارتن بەرێ بنیاتێ سەرەكی كو ئاستێ تیمێ  لسەر بهێتە ئاڤاكرن، بەری بكەڤنە دناڤا هەڤركیێن خۆلێ دا، دڤێ قووناغێ دا هەموو یانە كاردكەن بۆ بەرهەڤكرنا یاریزانێن خوە ژ هەموو لایانڤە، جەستەیی، تەكنیكی و دەروونی، داكو ئەو لێكتێگەهشتن، هەماهەنگی وگونجاندنا پێدڤی دناڤبەرا واندا پەیداببیت ژبۆ بدەستڤەئینانا ئەنجامێن باش و گەهشتن ب ئارمانجێ، رەنگە پرسیارەك نها بهێتە پێش ب تایبەتی بۆ پشتەڤانێن  یانەیێن مە یێن كوردستانێ ئەوێن پشكدار دخولا ستێرێن ئیراقێ دا، ئەرێ بەری دەستپێكرنا وەرزێ نوو چ بهێتە كرن داكو پشكدارییەكا سەرفەراز بكەن؟ یا ئێكێ چونكو خولا ئیراقێ ب هێزا پێكدادانێن دژوار دهێتە نیاسین، پێدڤییە گرنگییێ ب شیانێن جەستەیی یێن یاریزان د كەمپێن راهێنانێ دا ژبۆ ئاڤاكرنا هێزا زەڤلەكان و لەزاتییێ و خۆراگریێ بهێتەكرن، داكو یاریزان بشێت 90 خولەكان ب هەمان هێز یاریێ بكەن، یا دویێ راهێنەر گرنگییەكیێ بدەنە لایەنێ تەكنیكی و راهێنانێن بهێز لسەر كونترۆلكرنا تەپێ، پاسدان شوتكرن، لایەنێ پلان تەكتیكا یاریێ داكو تێگەهشتنەكا هەڤپشك دناڤبەر خودا دروستبكەن ب تایبەت دگەل وان پیشەكارێن بیانی یێن نوو هاتینە دناڤا رێزێن تیمێ دا، یا سێیێ دەمێ فشار لسەر یانەیەكێ زێدەن دبن، لایەنێ دەروونی دبیتە كیلیلا سەركەڤتنێ، دڤان كەمپان دا كار لسەر بلندكرنا باوەری بخوەبوونێ، گیانێ شەركرنێ و رێكخستنێ بهێتەكرن، ئەڤ چەندە ژی برێكا كومبوونێن تایبەت و هاندانا بەردەوام دهێتە بدەسڤەئینان، یا چارێ بەری دەستپێكرنا خولێ یانەیێن مە پێدڤی ب ئەنجامدانا یاریێن هەڤالینی یێن بهێز هەنە، ئەڤ یاریە دێ بنە دەلیڤەكا زێرین بۆ بجهئینانا وان پلانێن دراهێنان دا هاتینە وەرگرتن، دیسان بۆ دیاركرنا خالێن لاوازیێ و هێزێ یێن تیمێ بەری دەستپێكرنا خولێ، یا پێنجێ كارگێریێن یانەیان كار لسەر سەقامگیریا دارایی بدرێژاهییا وەرزی بكەن، دیسان ئیمزاكرنا گرێبەستان دگەل سپۆنسەرێن مەزن بكەن ومفای ژ ریكلامێن ناڤا یاریگەهێ و درێسێن یانەیێ و فرۆتنا پلێتان بكەن، ب عەقلیەتەكا بازرگانی كاربكەن بۆ هندێ هەر چ نەبیت گڤاشتنێ لسەر حكومەتێ كێمبكەن، یا شەشێ پێدڤی یە یانە باوەریێ بدەنە پروژێ دەستەكێن خوە یێن راهێنانێ، دەمێن پێدڤی بدەنێ داكو بشێن پلانێن خوە یێن تەكتیكی بجهبینن، مفای ژ سەربۆرێن خوە یێن پێشین وەرگرن، ژبەركو گوهارتنا دو تا سێ راهێنەران دوەرزەكی دا نیشانا بێ پلانێ یە، یا حەڤتێ چونكو یانەیێن مە ژبەر بلندبوونا بهایێ گرینا یاریزانان نەشێن سالانە 15 تا 20 یاریزانان ئەگەر پتر ژی نەبن بكرن، پێدڤی یانەیێن مە كار لسەر ئاڤاكرنا ئەكادیمیێن خوە لسەر ستانداردێن نوو بكەن، ب تایبەت یاریزانێن بەهرمەند، داكو ل پاشەرۆژێ  ببنە خوونێن نوو بۆ تیما ئێكێ، دیسان رێژەیا یاریزانێن بیانی كێمتر لێ بهێن، بەلێ هەر دێ مینیت دلسۆزیا پشتەڤانان بۆ تیما خوە خالا هەرە سەرەكی بۆ سەركەڤتنا كاروانێ وان، دگەل داخوازیێن سەركەڤتنێ بۆ هەموو یانەیێن كوردستانێ دخولا نوو یا ئیراقێ دا.

ئیحسان حەسەن

مۆندیالا 2026ێ نە تنێ قارەمانەكێ نوو دیاركر، بەلكو وانەیەكا دیرۆكی و زێڕین د تەكتیك و خەباتا دناڤا یاریگەهێ دا پێشكێشی جیهانێ كر، پشتی هەلبژارتییێ ئیسپانیا ب سەركێشییا راهێنەرێ خوە لویس دی لافوینتی سەلماندی كو سەركەڤتن بناڤودەنگییێ ناهێت، بەلكو ب وێرەكی و یاریا ب كوم دهێت، ئیسپانیا نیشا هەموویان دا كا چەوا كارێ بێدەنگ دشێت شۆرەشەكا تەكتیكی دروست كەت، پشتی وان شێوازێ خوە یێ كونترۆلا تەپێ یا بێ مفا دڤێ مۆندیالێ دا گۆهارتی بۆ هێرشێن بلەز ب پشت بەستنێ لسەر یاریزانێن خوە یێن گەنج، برێكا لێدانا هێلێن بەرگریێ یێن هەڤركان، دگەل دروستكرنا بەرگیریەكا ئاسنی یا بهێز كو دهەشت یاریان دا تنێ ئێك گۆل لسەر هاتە تۆماركرن، ژبلی هندێ لایەنێ دی یێ وانەیا تەكتیكی بهایێ كورسیكا یەدەكان بوو، یێن كو بەردەوام جوداهی پەیدادكر دەمێ دهاتنە دناڤا یاریێ دا، ئەڤ چەندە دفینالێ دا ژی هات پێش، دەمێ یاریزانێ وان یێ پێگهۆر فێران تۆرێس گۆلا زێرین تۆماركری، دا كو بادەكا تیما خوە یا بێ دۆراندن پشتی 38 یاریێن لدووڤئێك هەر ژ یۆرۆیا 2024ێ بپارێزیت، و شیاین رێكا خوە یا بزحمەت بەرامبەر هەر ئێك ژ پورتۆگال، بەلچیكا، فرەنسا و ئەرجەنتین ب سەركەڤتییانە ببرن و بگەهنە هیڤیێن خوە، كو ژبلی بدەستڤەبرنا زۆربەی ناسناڤێن كەسوكی، ناسناڤێ خوە یێ دویێ ددیرۆكا مۆندیالێ دا لسەر كیستێ هەلگرا ناسناڤی ببەن، بەلێ ئەڤە رامانا وێ چەندێ نادەت كو ئەڤ بادەكا مۆندیالێ یا بێ كێماسی بوو، هەر ژ سیستەمێ نوو یێ 48 هەلبژارتییان پشكداربگرە، یێن كو بارگرانیەكا مەزن ئێخستیە لسەر ملێن رێكخەران، تا دگەهیتە سیاسەتا فیفایێ یا بازرگانی یا توند لسەر بهایێن تێكێتێن یاریان یا كو بوویە ئەگەرێ دوورخستنا جەماوەرێ راستەقینە، ژبلی ئاستەنگێن كەڤتینە درێكا خەونێن  هزارەهان پشتەڤانێن فوتبۆلێ یێن ئەفریكا و رۆژهەلاتا ناڤین بۆ وەرگرتنا فیزێن ئەمریكا و كەندا، زێدەباری ماندیبوونا گەشتكرنێ دناڤبەرا سێ وەلاتان دا، سەقایێ گەرم و بریارا راگرتنا یاریێ ژبەر ڤەخوارنا ئاڤێ، دیسان وان هەموو تێبینیێن دادڤانییێ یێن كو لسەر تەكنۆلۆژیا ڤارێ هەین، ئەز بێژم ئاستێ ڤێ مۆندیالێ ب وان هەموو گورانكاریێن خوە یێن تەكتیكی ڤە وئەو هەڤركییا بهێز یا هەلبژارتییان، ئاستەكێ قارەمانییێ ب شێوەیەكێ گشتی یێ بلند بوو، ئسپانیا ب ئاست و ئەنجام ژ هەژی ڤی ناسناڤی بوو، بەلێ دهەمان دەم دا نە خوشییا بازرگانیا فیفایێ ل دەرڤەی یاریگەهێ تاما ڤێ خوشیێ كێمكر، بەلێ روودانێن ڤێ قارەمانییێ هەر دێ ل بیرا مە مینن كو فوتبۆل چەند یا جوانە دەمێ دادپەروەری لسەر فریزیێ یاریگەهێ ب سەردكەڤیت، بەلێ هەر دێ مینیت دیمەنێ جوانێ ڤێ خرڤەبوونێ ئەو  پشتەڤان و حەژێكەرێن دلسۆز بوون یێن كو برەنگ و سرودێن خوە دناڤا بەلوكێن یاریگەهان و ژدەرڤە تابلویێن پر ژ ژیانێ پێشكێش دكرن، دیسان ئاستێ بەرچاڤ یێن تیمێن پاشگەڤتی و بچووك یێن كو شەردكرن و سەلماندی كو ئەو جێوازی دناڤبەرا ناڤان دا نەمایە وانەیا هەرا گرنگ دروودانێن ڤێ مۆندیالێ دا.

ئیحسان حەسەن

ئەڤرۆ چاڤێن هەموو جیهانێ دێ بەر ب یاریگەها میتلایف ل باژێرێ نیۆجێرسی یێ ئەمریكی چن، بۆ دیتنا دیدارا چاڤەرێ كری یا فینالا خەونان د مۆندیالا 2026ێدا دناڤبەرا ئەرجەنتین هەلگرا ناسناڤێ كۆپا جیهانێ و ئەمریكا باشۆر، ئسپانیا قارەمانا ئەورۆپا، ئەز باوەرم پرسیارا ژ هەموویان گرنكتر نها دناڤا حەزژێكەرێن فوتبۆلا جیهانێ دا دێ ئەوبیت ئەرێ مەزنێن نوو یێن ئۆرۆپا دێ شێن ناسناڤێ جیهانێ ژ تانگۆیا ئەرجەتینی وەرگرن، یان دێ مێسی جارەكادی سەلمینیت كو تەمەن رێگرنینە ل بەرامبەر شیانان؟ دیاریەكێ دا كو لسەر كاغەزێ وەكو مەزنترین فینالا جەرخێ نوو دهێتە ناڤكرن، دناڤا یاریگەهێ دا ژی دبیتە شەرێ ناسنامێ و دیتنا جوانییا هونەرێ فوتبۆلێ، ل لایەكی  جوش و خرۆشا قۆتابخانەیا ئەمریكا لاتینی، و ل لایێ دی رێكوپێكی و رێكخستن و تەكتیكا ژێرانە یا قوتابخانەیا ئەوروپی، ئەگەر ئەم بەحسێ خالێن هێزێ و لاوازیێ یێن هەردوو تیمان بكەین، ئەرجەنتین هێزا وێ دكەسایەتیا وێ وەكو قارەمانا جیهانێ، دیسان شیانێن وێ یێن ڤەگەریانێ و هیلا وان یا ناڤین دایە، زێدەباری ئەوێ ئازادییا تمام یا كو مێسی هەی ل پشت هێرشبەران، بەلێ خالا وێ یالاواز كێمبوونا شیانێن وان یێن جەستەییە دبەرگیریا ناڤین دا، دبەرامبەر دا ئسپانیا ب پلانا وان یا مودرێن دایە كو لسەر بنەمایێن كونترۆلكرنا تەپێ و فشارا وان یا بلندە لسەر هەلگرێ تەپێ، دگەل شیانێن یاریزانێن وان یێن گەنج دهێرشێن ژ هەردوو لایێن یاریگەهێ دا بۆ هەلوەشاندنا بەرگیریا تیمێن هەڤرك، بەلێ لاوازیا وان دكێم ئەزموونییا واندایە، دیسان ئەو ڤالاهیێن ل پشت هێرشبەرێن لایان دمینن كو مەترسییێ لسەر گۆلان وان دروست دكەن، بێ گومان نها راهێنەرێن وان سكالۆنی ودی لافوێنتی كار لسەر ڤان خالان كرینە بۆ هندێ بگەهنە ئارمانجێ، ژبلی هندێ ئەڤ یاریە  هەڤركییا كەسوكی ژی تێدایە، دناڤبەرا دو جیلێن جودا میسی مایسترۆ، سەركردە، گولكارو ئەندازیارێ یاریێ یێ كو دچركەیەكێ دا دشێت چارەنڤبسێ مۆندیالێ ب گۆهۆریت، و لامین یامال شاهێ سەردەمێ نوو و بەرەیێ زێرین ێ كو ب سحر خوە یا لسەر لایێ راستێ جیهان مەندهۆش كری،  هەردوو دگەل تیمێن خوە ب گورەیێ ئەو ئاستێ نیشانداین ژهەژی بلندكرنا ناسناڤێ مۆندیالێ نە، جودا ژ تەكتیكێ لایەنێ دەروونی دێ رۆلەكێ ئێكلاكەر گێریت، رووبرووبوونا فشارا جەماوەرێ تانگۆیێ دێ بیتە مەزنترین تاقیكرنا دەروونی بۆ گەنجێن ئسپانیا، چەنسێ سەركەڤتنێ گەلەك یێ هەڤسەنگە، ئسپانیا ژلایێ جەستەیی و یاریا ب كۆم و یاریزانێن گەنج یا سەركەڤتی یە، و ئەرجەنتین ب ئەزموون و كەسایەتییا خوە ل پێشە، ئەو تیما بشێت ددەمژمێرا ئێكێ یا یاریێ دا ب كێمترین شاشی دەركەڤیت و بەرگیریەكا باشتر بكەت، دێ شێت گەهیتە هیڤیێن خوە، دوور نینە بگەهیتە دوو نیڤێن زێدەكری و ب لێدانێن ئێكلاكەر( پەنەلتیان) ب دووماهی بهێت، یان ژی ئەنجامێن وێ لسەر هندەك هۆكارێن بچووك و ئارامییا دەروونی ب راوەستیت، هەر چەوا بیت ئەڤە نەتنێ یاریەكا ئاسایی یە، ئەڤە نڤێسینا دیرۆكا نوویە یا فوتبۆلێ یە، تانگو بۆ برنا ناسناڤێ خوە یێ چارێ و ئسپانیا بۆ بدەستڤەبرنا ستێرا خوە یا دویێ.

ئیحسان حەسەن

مۆندیالا 2026ێ یا بەر ب دووماهییێ ڤە دچیت، ڤێ روودانا مەزن جارەكادی سەلماند كو تنێ هەڤڕكیەكا وەرزشی و دیتنا یاریان نینە، بەلكو قۆتابخانەیەكا ڤەكری یا ژیانێ یە كو گەلەك وانە تێدا نە سنۆرێن لاكێشەیا كەسك دبەزنین و دچنە دناخێ ژیانا مە یا رۆژانە و پیشەیی دا، د ڤێ مۆندیالێ دا هێزا یاریا ب كۆم ل هەمبەر تاكە كەسی ب تایبەتی د قۆناغێن ئێكلاكەر دا، دیاربوو كو شیانێن تاكە كەسی ل هەمبەری هێزا كەسایەتی و كارێ ب كۆم ب سەرناكەڤن، تۆماركرنا گۆلێن گرنك د خولەكێن دووماهییێ دا، بێگۆمان ڤێ چەندێ چ پەیوەندی ب تەكتیكێ ب تنێ ڤە نینە، بەلكو یا گرێدای حەزا سەركەڤتنێ و ڕەتكرنا دۆڕاندنێ ڤە هەیە، یا دیتر ئەو تیمێن دگەهنە گۆپیتكێ پێدڤی ب سیستەمێ یاریا ب كۆم هەیە، هەر یاریزانەك پێخەمەت یاریا ب كۆم شەری بكەت، هەماهەنگییێ و ئێكگرتنا هێزان ژ دەستپێكا یاریێ تا دووماهیك چركە بكەت، بۆ هندێ بگەهنە ئارمانجێ، دیسان مە دڤان یاریان دا دیت كا چەوا مرۆڤ فێری هندێ دبیت، دۆڕاندن نە دووماهییا دونیایێ یە، پشتێ دەركەڤتنا هەر هەلبژارتییەكی دگەل دلگرانییا پشتەڤانان و رۆندكێن وان، چەوا دەست بۆ دقوتان، یاریزان و ستافێ راهێنانێ ژی چەوا داخوازا لێبورینێ دكرن و پیرۆزباهییێ ل سەركەڤتیان دكرن، ژلایەكێ دیڤە روودانێن مۆندیالێ سەلماند كو دژیانێ چ تشت ئەستەم نینە، ئەگەر پلانەكا باش و گیانێ شەركرنێ هەبیت، مرۆڤ دشێت بەربەستێن جیواز و شیانێن مادی بشكێنیت و ئەنجامێن دیرۆكی تۆماربكەت، تیمێن بچووك و خودان ئیمكانیاتێن كێمتر شیان تیمێن مەزن ب راوەستینن، ژبلی هندێ ئەو تیمێن نها گەهشتییە قۆناغێن دووماهییێ ب رێكەڤتن یان ب چەنسی نەگەهشتینە ڤێ پلا سەرفەرازیی، بەلكو ئەڤە بەرهەمێ پلانێن وان یێن ستراتیژی ویێن درێژخایەن و مفا وەركرتن ژ سەربۆرێن پێشین بوون، ژبلی هندێ دڤێ مۆندیالێ دا وانەكا هەرا گرنگ نیشامەدا ئەوژی ئەوە كا چەوا دێ شێی سەرەدەریێ دگەل خولەكێن دووماهییێ یێن چارەنڤیسازداكەی، بتایبەت دەمێ تیم دكەڤیتە لبن فشارەكا دەرۆنی یا مەزن و یا پاشكەڤتی بیت، بۆ مە دیاربوو ئەوا تیما شیای ئارامییا خوە پارێزیت یان خودان هێزا هزری و مێشكی بیت و بزانیت دێ چەوا بریارێ دەت ئەو بسەركەڤت، یا من دڤێت بێژم روودانێن ڤێ خرڤەبوونا جیهانێ دیاركر، كو یاریا فوتبۆلێ ژبلی هندێ كو یا پرە ژ دەرفەت و پێشهاتێن نەچاڤەرێكری و خولەكێن دژوار، نهێنیا سەركەڤتنێ نە ئەوە كو تو چ جاران نەكەڤی، بەلكو ئەوە دەمێ تو دكەڤی دێ چەوا رابی یەڤە و بەردەوام بی لسەر كاركرنێ و خەباتێ دناڤا یاریگەهێ دا تا فیركا دووماهییێ یا دادڤانی، سەركەڤتن چ جاران ب یاریا سست ناهێت، بەلكو ب راهێنان و خواندنا دروست و پێشخستنا كەسایەتیێ دهێت، ئەگەر تە بڤێت بەرە ب گوپیتكێ و پێشەكەریێ و داهێنانێ بچی، ئەگەر نە ئەو بابەتەكێ دی یە.

ئیحسان حەسەن

ل گەل دەستپێکرنا قۆناغا 16ێ ژ مۆندیالا 2026ێ یا فوتبۆلێ، دبیت پرسیارا ژ هەموویان گرنكتر نها دناڤ حەزژێكەر و پشتەڤانان دا، دیسان شرۆڤەكار و ڕەخنەگران دا ئەوبیت بۆچی هەلبژارتییێن خودان دیرۆك و ناڤودەنگییا مەزن تووشی زەحمەتێن تەكنیكی یێن مەزن بوون، دەمێ رووبرووی وان تیما بووین یێن كو ددەمەكی دا وەك ئاست گەلەك ژ وان كێمتر بوون؟ ئەگەر ئەم هندەك یاریان ژێ بینەدەر، ئەز دبێژم ئەڤچەندە ڤەدگەریێتە چەند هۆكاران، یا سەرەكی ئەوە زانستێ راهێنانێ گوڕانكاریێن مەزن بخوەڤە دیتینە، ئێدی تنێ كارزانیێن فوتبۆلێ تێرا یاریزانی ناكەت، بەلكو ئەڤرۆ راهێنانێن جەستەیی، تەكتیكی و تەكنیكی بووینە بنەما، ژبلی تەكنەلوژیا پێشكەڤتی یا شرۆڤەكرنا یاریان برێكا ڤیدیۆیێ بۆ دیاركرنا خالێن هێزێ ولاوازیا تیما هەڤڕك، دیسان سیستەمێ شرۆڤەكرنا ئاستێ یاریزانان هاریكاریا راهێنەران دكەت كو گورانكاریێن بلەز دپلانێن خوە دا بكەن، یاریزانانی هشیار بكەت لسەر ئاستێ وان ئەڤە هەموو ئەگەرن كو ئەو جوداهییا دناڤبەرا تیمێن مەزن و بچووك نەمینیت، هۆكارێ دی یێ گرنگ ماندیبوونا ستێرێن مەزن یێن هەلبژارتییێن ناڤدارن، وەكو یێن ئۆرۆپا و ئەمریكا باشوور دگەل یانەیێن خوە كو سالانە پتر ژ 50 یاریێن فەرمی دكەن، ژلایەكێ دیڤە پلانێن تەكتیكی یێن بەرگیریێ و بهێزكرنا هێلا ناڤەراست، بوویە ئەگەرێ هندێ كو ئەو جوانی و خۆشییا فوتبۆلێ كێم ببیت و ئێدی ئەم وی یاریزانی كێم دبینین یێ كو بشێت ژ سێ تا چار یاریزان دا دبوریت، ئانكو جهێ وان یاریزانان نینە تنێ پشتبەستنێ لسەر بەهرا خوە بكەت، ئەڤرۆكە سەركەڤتن بكارێ كۆم و هەماهەنگی دهێت پێش، هەروەسا تیمێن نها پتر ڕێكخستی بووینە و یاریزان شیاینە خوە دگەل شێوازێ یاریا بكۆم ب گونجینیت، هەر ئەڤ چەندە ئاستێ هەڤركییێ بهێزتر لێ دكەت و گیانێ یاریێ بلندتر لێ دكەت، ئەگەر ئەم هۆكارێ دەرونی ژی ژبیر نەكەین، یێ كو نها بوویە پشكەكا سەرەكی، بزاڤێن راهێنەر و سەرپەرشتێن تیمان بۆ بلندكرنا مۆرالا یاریزانان بەری هەر یاریەكێ وەدكەت كو هەموو شیانێن خوە بێخیتە كار دڤێ روودانا مەزن یا جیهانی دا، ناڤەكی بۆ خوە چێبكەن، دبیت جارەكادی دووبارە نەبیتە ڤە ب تایبەت بۆ وان تیمان یێن كو ئەو دیرۆكا مەزن و ئەو ئەزموون دڤێ خرڤەبوونێ دا نەبیت، هەرچەندە هندەك جاران ئامادەبوونا جەماوەر و حەزژێكەرێن وان بۆ تیم ویاریزانان وەدكەت یاریزان هەموو شیانان بێخیتە كار بۆ بلندكرنا ناڤێ وەلاتێ خوە، یا من دڤێت بێژم كو دگەل بەردەوامییا یاریێن مۆندیالێ و ئەو سوپرازیێن هەتا نها چێبووین، ئەركێ مەزنێن فوتبۆلا جیهانێ هند ب ساناهی نابیت دیاریێن خوە یێن ئێكلاكەر دا، رەنگە هژمارەكا یاریان د 90 خولەكان دا ب داوی نەهێن و سەركەڤتن دێ بۆ وان تیمان بیت، یێن كو خۆدان یەدەكێ باشتربن، یان گولپارێزەكێ شارەزا هەبیت د گرتنا لێدانێن پەنەلتییان دا لەوما دڤێت ئەم چاڤەرێ بین.