ئیحسان حەسەن

گومان تێدا نینە كو ئەڤرۆكە یاریا فوتبۆلێ نەمایە لسەر شیانێن یاریزانەكی بتنێ، بەلكو هەر یازدە یاریزانێن یاریێ دكەن گرنگییا خوە هەنە، ژبۆ بجهئینانا پلانێن تەكتیكی یێن دەستەكا راهێنانێ و گەهشتن ب ئارمانجان، لێ هێلا ژ هەموویان چاڤ پتر لسەر هەی یاریزانێن یا هێرشبەریێ یە، ژبەركو بارا پتری یاریزانێن ڤێ هێلێ وەكو كلیلا سەركەڤتنا تیمێن خوە دهێنە دیتن، ئەڤە رامانا وێ چەندێ نادەت كو هێلێن دی نە دگرنكن، بەلكو دیرۆكێ هووسا نیشامەدا یە كو هژمارەكا تیمان شیاینە ب سیستەمێ خوە یێ بەرگیریێ بگەهنە بلندترین ناسناڤێن كێشوەری و جیهانێ، لێ جهێ داخێ یە سەرباری وێ ئەزموونا مەزن یا هەردو یانەیێن مە یێن پارێزگەهێ دهۆك و زاخۆ دخولا ستێرێن ئیراقێ دا، نەشیایە وەكو پێدڤی هێرشبەرێن گولكار بینە دناڤ رێزێن خوە كو ببیتە گولكارێن دیارێن خولێ، یان ئەنجامێ یاریێ ب گوهۆڕن دەمێ تیما وان پێدڤی پێ هەبیت، سەرباری هندێ كو هەر ژ دەستپێكا خولێ تا نها چەندین گورانكاری ژی دڤێ هێلێ دا كرینە ژ دەستبەردان و مفاوەرگرتن ژ بازارێ ڤەگوهاستنا یاریزانان یێن هاڤین و زڤستانێ، لێ هەتا نها وەكو پێدڤی دسەركەڤتی نەبوون دهەلبژارتنێن خوەدا، ژبەركو ئەو ساخلەتێن پێدڤی یە لدەڤ هێرشبەرێ گولكەر هەبن هەتا نها  ناهێنە دیتن، ژهەمییا گرنكتر هەستا گۆلكرنێ و راوەستیان ل جهێ دروستێ تەپێ، ژبەركو هێرشبەرێ زیرەك دزانیت كا كەنگی ل كیڤە دێ تەپە گەهیتێ، ژبلی هندێ گۆلكەر رێكا گۆلێ دزانیت هند دەلیڤەیان ژدەست نادەت، پێدڤییە ب هەردو پێیان و سەری گۆلان تۆماربكەت و مفایی ژنیف دەلیڤێ بینت، یا دیتر ژی هێرشبەرێ مەزن و خودان شیان ئەوە یێ كو لڤینێن وی دناڤا دەڤەرا سزایا تیما هەڤركا بێ تەپە باشتر بن ژ دەمێ تەپە دگەهیتێ، ئەم ڤێ چەندێ ژی كێم دبینین، دگەل باوەریا مە كو شیانێن جەستەیی و لەزاتی خالەكا گرنگە پێدڤییە لدەڤ هێرشبەری هەبن ئەوژی وەكو پێدڤی نینن، چونكو هێرشبەر تنێ یاریزانەك نینە ل نێزیكی گۆلا بەرامبەر ب راوەستیت، بەلكو دشێت دهەر خولەكێ دا گۆلێ تۆماربكەت و تیما خوە ژ دۆراندنێ یان وەكهەڤییێ قورتالبكەت، یا من دڤێت بێژم ئەوا نها ئەم لدەڤ هێرشبەرێن هەردو تیمان دبینین لاوازیەكا بەرچاڤە، پێدڤی ب چارەسەریێ، ئەڤجا ئەگەرێ وێ نەگونجاندنە دگەل فەلسەفا راهێنەری، یان ژی لایەنێ دەورنی و گڤاشتنا جەماوەری و راگەهاندنا وەرزشی یە، یان سیستەمێ یاریكرنێ و حەزا گۆلكرنێ بخوە  بتنێ یە، ئەڤە هەموو كێشەنە پێدڤی یە بهێنە جارەكرن،  ژبەر كو بڤێ رەوشا ئەم نها دبینین ژدەستدانا ڤان هەموو دەلیڤەیێن ساناهی یێن گۆلكرنێ ب تایبەت دگەل یانەیێن خودان رێزبەندیێن ژخوە كێمتر، هوون نەشێن هەڤركییێ لسەر ناسناڤان بكەن، دخولەكێ دا پتر ژ تێبینیەكێ لسەر شێوازێ وێ یێ برێڤەبرنێ، دیسان لاوازیا دادڤانێن یاریان هەبن.

ئێحسان حەسەن

یێ كو بەرێ خوە ددەنە هەڤركیێن خولا ستێرێن ئیراقێ یا فوتبۆلێ، باش دزانن كو كڤاشتنێن نوو یێ نها پتر ژ جەماوەری یاریێ، دیسان دەزگایێن راگەهاندنێ لسەر دادڤانێن یاریان دهێنە كرن، گڤاشتنا یاریزانانە دناڤا یاریگەهێ دا، ئەز باوەرم ئەڤ رەوشەنبیرییە چ جاران هندی نها بەلاڤ نەبوویە، ئەوژی خرڤەبوون ل دورماندوری دادڤانی، دیسان ئاخڤتن دگەل وی دا كو كارتێكرنێ لسەر بریارا وی بكەن بەری كو بدەت، ئەڤرۆكە ئەڤ رەفتارە یێن بووینە رەوشەنبیریەكا گشتی بۆ هژمارەكا تیمێن خولێ كو ئەركێن خوە یێن تەكتیكی یێن ژبیركرین، تنێ كارێ خوە یین كرینە گڤاشتن و نەرازیبوون لسەر بریارێن دادڤانان، رەنگە ئەڤ چەندە ژ ڤالاهییێ نەهاتبن بەلكو دئاراستەكری بن ژلایێ دەستەكا راهێنانێ یان ژی كاپتنێ تیمێ، هەتا ئێك ژ بەرپرسێن یانەیێ، ژبەر كو دگەلەك رەوشان دا دادڤان پێدڤی ب هندێ یە كو گوهێ خوە بدەتە تێبینیێن دادڤانێن ڤارێ دێ بینی یاریزان لێ كوم بوون بۆ هندێ كارتێكرنێ ل بریارا وی بكەن  و دبەرژەوەندییا خوەدا ئێكلابكەن، هندەك جاران ژی هند خوە نێزیك دكەن و دگەل ئاخڤن هەتا ئەو نەشێت گوهێ خوە بدەتە دادڤانێ ڤارێ كا دێ چ بێژیتێ لدۆر وێ رەوشا تەپە بۆ هاتیە راوەستاندن، چونكو دادڤانییا فوتبۆلا ئیراقێ هەتا نها ئاریشەیەكا مەزنە و پتر ژ تیبینیەكێ لسەر هەنە، رۆژ بۆ رۆژێ شاشیێن كوژەك چ ئەنقەسد بن یان ژ نەزانینێ و نەرازیبوون یێن لسەر دهێتە كرن، ڤێجا ئەگەر ئەڤ گڤاشتنە ژی دبەردەوام بن ئەز باوەر ناكەم بشێن بدروستی ب ئەركێن خوە رابن، هەر چەندە فێدراسیونا ئیراقێ لڤێ داویێ ب تایبەت بۆ دیدار و یاریێن هەستیار پشت بەستن لسەر كوما دادڤانێن دەولەتی یێن دەرڤی وەلاتی كرینە، لێ دیارە ئەوژی نەشیاینە وەكو پێدڤی ببنە جهێ رازیبوونا هەموو یانەیان، یا من دڤێت بێژم چونكو شاشی پشكەكە ژ یاریێ، بەردەوامییا گڤاشتناراكەهاندنێ و جەماوەری و یاریزانان لسەر دادڤانان ئاریشەیێ چارەسەر ناكەت، پێدڤییە فێدراسیونا ئیراقێ هندەك پێنگاڤان پاڤێژیت و رێنما و رێكارێن توند ب گرتە بەر بۆ هندێ دادڤانان ژ بن ڤێ گڤاشتنا دژوار بینتە دەر، ئەز پێشنیار دكەم كو رێ ب كاپتنێ تیمێ وەكو خولێن جیهانی بهێتە دان ب تنێ دگەل دادڤانێ یاریێ باخڤیت و ژبلی وی ئەو یاریزانێ نەرازیبوونێ دیاردكەت بهێتە سزادان، ژبلی هندێ سزادانا وان راهێنەران بكەت یێن كو گڤاشتنان دئێخنە لسەر دادڤانان ب تایبەتی دادڤانێ چارێ، كارتێن رەنگاورەنگ دژی وان بكار بینن، هەروەسا رێ نەدەنە ئەندامێن تیمان كو پشتی یاریێ هێرش بكەنە لسەر دادڤانان، ب كوژمەكێ مەزن یێ پاری دیسان یێ كارگێری سزابدەن، بەلێ ئەڤە رامانا هندێ نادەت كو دادڤان ژی ئەركێ خوە بدروستی بجه نەئینن، باشتر ئەوە یێ كو ژ هەژی نەبیت یاریێن خولێ برێڤەببەت، ئامارێن وی یێن برێڤەبرنا یاریێ دباش نەبن، رێ پێ نەهێتە دان بەردەوامییێ بدەتە برێڤەبرنا یاریان و ئەوژی بهێتە سزادان ب راوەستاندنێ، ئەگەر ئەڤ پێنگاڤە هاتنە هاڤێژتن، ئەز باوەرم دێ رەوشا دادڤانییا خولێ باشتر لێ هێت و دەنگێن نەرازیبوونێ ژی دێ كێمتر لێ هێن.

ئیحسان حەسەن

گەلەك جاران دانوستاندن و گەنگشە لدۆر وان پیڤەرێن دهێنە كرن ژبۆ زانینا جوداهییا ئاستێ تیمەكێ دگەل ئێكا دی، بارا پتر بۆچوون بۆ هندێ دچن ئەو تیما دشێت ناسناڤێ خولێ یا هەر وەلاتەكی بدەستڤە بینیت ئەو بهێزترین و باشترینە، ئەڤێ بۆچوونێ زۆربەی شارەزایێن وەرزشێ سەرانسەری جیهانێ پەیرودكەن، نەتنێ بۆ یاریا فوتبۆلێ، بەلكو هەموو یاریێن كۆم، ئەڤە ڕامانا هندێ نادەت كو قارەمانیێن دی وەكو ناسناڤێ كۆپان كو رێژەیا یاریێن وان كێمترە بهایێ خوە نینە یان ل پشتگوه دهێنە هاڤێژن، نەخێر، لێ ئەگەر تە بڤێت پیڤەرێ حێبەتیان تێدا دیاربیت و تیمێن بچووك ببنە هەسپێن رەش بۆ شكەستنا تیمێن مەزن و بگەهنە ئارمانجێن خوە، بێ گومان نە دهەموو قارەمانییان دا، دێ پیڤەرێ كوپان بیت، لێ ئەگەر تەبڤێت كارێ تو ئەنجامددەی بهێز دیاربیت ژلایێ تەكنیكی، تەكتیكی و كارگێری ڤە، خول پیڤەرێ ڕاستەقینە، ئەوژی ژبەر ڤان ئەگەران، یا ئێكێ دخولێ دا پتر دادی یا تێدا هەی ژبەر كو پێدڤییە لسەر هەر تیمەكێ یاریێن خوە دژی هەموو تیمێن خولێ برێكا هاتن و چوونێ بكەت، ئەڤچەندە كارتێكرنا چەنسی و بەختی بدرێژاهییا هەڤڕكییێ كێم دكەت، یا دویێ ئەو تیما دڤێت ناسناڤی بدەستڤە بینیت پێدڤییە بشێت ئاستێ خوە بدرێژاهییا حەفت هەتا هەشت هەیڤان ب كێماسی پارێزیت، ژبلی هندێ هژمارەكا یەدەكێن خودان شیان لبەر دەستێ دەستەكا راهێنانێ هەبن و بشێت ڕەفتارێ دگەل هەر كێشەیەكێ یا گرێدای هنگاڤتنا یاریزانان بكەت، یا سێیێ دخولێ دا دەرفەت یا هەی تو دۆراندنا تیما خوە دیاریەكێ دا قەربووبكەی، ژبەر كو هەموو تیم نەشێن بدرێژاهییا خولێ بەردەوام سەركەڤتنان دناڤا یاریگەها خوە دیسان ل دەرڤە تۆماربكەن، یا چارێ، ئەو قارەمانیێن قارەمانێن خولان پشكداریێ تێدا دكەن وەكو ناڤ و دەنگی و بهایێ وێ و هەتا خەلاتێن وێ گەلەك مەزنترن ژوان قارەمانیان یێن كو قارەمانێن كۆپان پشكداریێ تێدا دكەن، یا من دڤێت ئەز بێژم كو هەر تیمەكا وەرزشی پێدڤی ب سیستەمەكێ كاری یێ تمام ژلایێ كارگێری، تەكنیكی و جەماوەری و هەتا راگەهاندنێ هەیە، دەستبەردان ژ هەر ئێك ژوان دێ كارتێكرنێ دكارێ تیمێ دا پەیدا كەت، دێ نێزیكی پاشڤەچوونێ و شكەستنێ كەت و نەشێت وەكو پێدڤی بگەهیتە ئارمانجێن خوە، چونكو ناسناڤێ خولێ ئامانج و كوپیتكا هیڤیێن هەر تیمەكا جیهانێ یە، ئەو تیما بڤێت بگەهییتە ڤێ پلا سەرفەرازیی و جهەكی بخوە دناڤا مەزناندا پەیدابكەت، دڤێت هەموو شیانان بێخیتە كار، خودان نەفسەكا درێژ بیت و بشێت خوە ژ هەموو ئاستەنگان دەربازبكەت، ژینگەها ساخلەم و هێزا پاری و ژێرخانەیا وەرزشی و كارێ ب كوم هۆكارێن سەرەكی نە ژبۆ گەهشتنا ناسناڤی، ژبەر هندێ هەر دێ مینیت ناسناڤێ خولێ راستگوترین پیڤەر كو تێدا كارێ یانەیێ دگەل جهێن تیمێن دی د هەر خولەكا وەرزشی دا دیاربیت.

ئیحسان حەسەن

گۆمان تێدا نینە كو هزرا خەلاتكرنا باشترین وەرزشڤانێن سالێ، دهێتە هژمارتن ئێك ژ پێنگاڤ و كارێن هەرە گرنگ یێن كو هەر دەزگەهەكێ وەرزشی ل هەر وەلاتەكی یان هەرێمەكێ یان ژی پارێزگەهەكێ پێ را دبیت، ژبەر وان ئەنجام و دەستكەڤتان یێن كو وەرزشڤانێن وان دمەیدانێن وەرزشی دا بدرێژاهییا سالێ بدەستڤە دئینن، چونكو خەلاتكرن رەفتارەكا شارستانی یە و كێمترین وەفاداریە بۆ وان كەسان یێن كو خزمەتا وەلاتێ خوە ب رێكا پشكدارییا خوە دقارەمانیێن جودا دكەن و زەحمەتەكا زوور دبەن بۆ هندێ بگەهنە پودیومێن خەلاتكرنێ وناڤ و دەنگییا وەلات و باژێرێ خوە دهەلكەڤتێن دەولەتی دا بلند بكەن، دیارە ل وەلاتێن پێشكەڤتی و هەتا ل هەرێما مە یا كوردستانێ ژی سالانە خەلاتكرن بۆ یاریزان و راهێنەر و كارگێریێن یانەیان ژبەر دەستكەڤتێن وان یێن كەسوكی دیسان دگەل تیمێن وان دهێنە كرن،  ئەم دبینین خەلاتكرن ژلایێ دەستهەلاتا حكومی و هەتا یاسیاسی یا دهێتە كرن، ئەڤە پێنگاڤەكا هەرە باش و پیرۆزە كو یاریزان یان تیمێن مە پێنگاڤێن باشتر پاڤێژن ب تایبەت دقارەمانیێن نافخویی و دەولەتی دا، ژبلی هندێ ئەڤە خەلاتكرنە دێ بیتە هاندانەكا باش بۆ كەرتێ وەرزشێ ب هەموو سازیێن خوەڤە كو كار ژبۆ بجهئینانا ئەنجامێن مەزنتر بكەن، بەلێ یا ژهەمییا گرنكتر ژی ئەوە ئەڤ پروسێسە یا بەردەوام بیت، ژبلی هندێ ئەڤە خەلاتكرنە بۆ خودانێ دەستكەڤتێ دژیانا وی یا وەرزشی دا بهێتە كرن، نەك پشتی چوونا وی لبەر دلوڤانییا خودێ، ئانكو رێزلێینانا خوە هێشتا یێ ساخ ببینیت، ب تایبەت ئەو كەسێن نها بووینە هێمایێن وەرزشا كوردستانێ یێن كو بارا پتری ژیانا خوە هەموو تەرخانكرین بۆ خزمەتا وەرزشێ، بۆ ڤێ ژی پێدڤییە رێڤەبەریا گشتی یا وەرزشێ ل هەرێما كوردستانێ، جودا ژ خەلاتكرنا دەزگەهێن دی یێن وەرزشی، یان ژی رێكخراوێن نەحكومی، هەر سال رۆلێ خوە وەكو مەزنترین دەستهەلاتا وەرزشی ل هەرێما كوردستانێ بگریت، وان ژی پلانا خوە یا سالانە بۆ خەلاتكرنا یاریزان و كارگێری و دادڤانان و هەتا راگەهاندنا وەرزشی هەبیت، رۆژەك بۆ ڤێ هەلكەڤتێ بدانین ڤێجا چ رۆژا وەرزشا كوردستانێ بیت، یان ژی هەیڤا ئێكێ ژ دەسپێكا هەر سالەكا نوو بیت،  قارەمان و باشترینێن سالێ خرەڤەكەت و خەلات بكەت، داكو ببیتە هاندانەك بۆ وان كو پتر خوە پێشبێخن، بێ نەڤێت ئەڤە ناهێتە كرن ئەگەر لژنەیەك یا دەستەیەك نەهێتە پێكئینان كو نوونەرێن ئێكەتیێن وەرزشی و یانە و دەزگەهێن وەرزشی یێن شارەزا و خودان سەربۆر  تێدا نەبن كو كار بكەن ژبۆ خرڤەكرنا داتایان بدرێژاهییا سالێ، بۆ هندێ ئەم ژی وەكو وەلاتێن پێشكەڤتی ل جیهانێ ڤێ پروسێسێ ب شێوەیەكێ جوان رێك و پێك بجهبینین، بۆ هەموویان نێرینا هەرێما كوردستانێ یا گرێدای پێشخستنا كارێ دەزگەهێن وەرزشی دیاربكەن، لەوما ئەم دێ چاڤەرێ بین.

ئیحسان حەسەن

بدەستڤەئینانا جەماوەرێ فوتبۆلا یانەیا زاخۆ ناسناڤێ خەلاتێ زەبیست یێ باشترین جەماوەرلسەرانسەری جیهانێ، دهێتە هژمارتن دەستكەڤتا كێم وێنە و دیرۆكی بۆ  وەرزشا كوردستانێ و ئیراقێ، كو بۆ جارا ئێكێ یە ناڤێ تیمەكا رۆژهەلاتا ناڤین دچیتە دناڤا هەڤركییا ڤی خەلاتی دا ئەوا سالانە فیفا پێشكێش باشترین جەماوەردكەت، ڤێ دەستكەڤتا مەزن و پرشەنگدار ل هەر كوردەكێ دلسۆز لسەرانسەری جیهانێ پیرۆز دكەم، تشتێ دلخوشێ ڤێ دەستكەڤتا هاتیە تۆماركرن، دانپێدانا جیهانێ یە بۆ وێ پشتەڤانییێ و وی هەلویستێ مروڤایەتی و جڤاكی ئەوا لیاریگەها گەلها سوور هاتیە نیشاندان، ب دەستپێشخەریا وان یا هاڤێژتنا هزاران یاریكێن زارۆكان بۆ پشتەڤانیكرنا زارۆكێن خودان پێداویستیێن تایبەت و نەساخێن پەنجەشێرێ، كو باشترین بەلگە بوو بۆ دووپاتكرنا پەیام و بهایێ فوتبۆلا راستەقینەیە كو پترە ژ جەماوەرێ یانەیەكێ یە، بوویە ئەگەرێ هندێ كو بكەڤیتە دناڤا هەڤركییێ دا و بگەهیتە ڤێ پلا سەرفەرازیێ، گرنگییا ڤێ دەستكەڤتی ژبلی هندێ كو ناڤێ وەلات و باژێرێێ خوە دڤێ هەلكەڤتا جیهانی دا بلندكر، ئەڤێ سەركەڤتنێ ناسنامەیا یانەیێ و ناڤێ  تیما وان یا فوتبۆلێ ژی ئەوا پشكدار دخولا ستێرێن ئیراقێ دا مەزنتر لێكر، ئەگەر ئەم گرنگییا ڤی خەلاتێ لسەر ئاستێ تەكنیكی  ووەرزشی بۆ پتر پشتەڤانییا تیمێ و بلندكرنا سەقایی هەڤركییێ و چێكرنا تابلویێن جوانتر بكار ئینانا تەكنەلوجییا سەردەم ژێ ژبیر نەكەین، هەورەسا ئەڤ دەستكەڤتە دێ وە كەیت كو ببیتە نموونە بۆ پشتەڤانێن جەماوەرێن دی ل یانەیێن كوردستانێ و ئیراقێ بۆ پاراستنا گیانێ وەرزشی، ژبلی گرنگییا وێ بۆ زێدەبوونا جەماوەرێ یانەیێ نەتنێ لسەر ئاستێ نافخو بەلكو لسەر ئاستێ جیهانێ ژی مینا یانەیێن مەزنێن جیهانێ، ژبلی هندێ دێ وەكەت كو ستێرێن یانەیێ ئەوێن نها بەرەڤانییێ ژدریسێ كورێن خابیری دكەن كو پتر بهێنە گرێدان ب جەماوەرێ یانەیێ ڤە و كار ژبۆ تۆماركرنا دەستكەڤتان د خول و قارەمانییان دا لسەر ئاستێ ئیراقێ و دەرڤە بدەستڤە بینن، ژبلی هندێ دێ دەرگەهێ ماركتینكا وەرزشی، ژبلی ماركتینكا بازارێ یاریزانان ژی ژبەر ناڤ و دەنگییا یانەیێ، ئەگەر كار لسەر بهێتە كرن دوور نینە  چەندین دەرگەهێن بازرگانی ژلایێ كومپانیان ڤە بۆ بهێنە ڤەكرن، دیسان كارتێكرنا وێ یا باش دێ لسەر خورتكرنا بزاڤا گەشتیاری ل ئیدارەیا سەربەخویا زاخۆ هەبیت، بەلێ هەر دێ مینیت چالنجا بەری ڤێ خەلاتكرنێ و ئێكرێزیا كوردان  و حەزكرنا وان بۆ سەركەڤتن و سەرئێخستنا تیما نەتەوەیا خوە لسەر هەر دوو بەربژێرێن یانەیێن ئسپانی و ئەرجەنتینی دڤێ پێشبركا جیهانی دا، ئەوا هەر كوردەكێ دلسۆز لسەرانسەری جیهانێ پشتەڤانی لێكری، دەستكەڤتا ژ هەموویان مەزنتر كو ئەم هەموو شانازیێ پێ دبەین، دووبارە پیرۆزە ل زاخۆ پیرۆزە ل عەشقا هەر و هەر، پیرۆزە باژێرێ مەردە مێر و عەكید و شەهیدان ئەڤ دەستكەڤتا ژ هەژی.

ئیحسان حەسەن

رەنگە گەلەك ژ چاڤدێر و ڕەخنەگر و حەزژێكەرێن یانەیێن خولا ستێرێن ئیراقێ یا فوتبۆلێ بەحس بكەن، كا پشتی یاریێن گەرا حەفتێ دێ چ ل چارەنڤیسێ خولێ هێت، ئەگەر ئەم بزانین كو تنێ چاریكەك ژ هەڤڕكیێن خولێ ژ سەرجەمێ 38 یاریان چوینە، ژبلی هندێ راوەستاندنا خولێ ژ ئەگەرێ پشكداریا هەلبژارتییێ ئیراقێ دڤاڤارتنێن مۆندیالا 2026، هەروەسا كۆپا ئەرەبان تا ڕادەیەكی كارتێكرن درێڤەچوونا درێژترین خول لسەرانسەری جیهانێ كریە، ئێك ژ خالێن هەرە بەرچاڤ یێن كو هەتا نها دخولێ دا هاتینە دیتن ئەوە هەلگرا ناسناڤی دگەل خودانا رێزا دویێ و هەتا یا سێیێ لرێزبەندیا ئێكێ نا هێنە دیتن ئەوا نها یانەیا هەولێرێ سەركێشیا وێ بجوداهییا چار خالان ژ هەلگرا ناسناڤێ وەرزێ بوری یانەیا شورتە دكەت، ژبلی هندێ ئەو یانەیێن ژنوو هاتینە دناڤا خولا مەزناندا شیاینە ئاستەكێ باش نیشان بدەن، هەر زوو خوە بگونجینن و رێزێن خوە باش بكەن، دیارە ئەو دزانن كو پاراستنا دەستكەڤتێ بزەحمەترە ژ گەهشتنێ، خالا دی یا كو جهێ كێماسییێ یا فوتبۆلا ئیراقێ تا نها ئەوە دوورئێخستنا راهێنەرانە كو هژمارەكا یانەیان دەست ژ راهێنەرێن خوە بەردان، دوور نینە نیڤەكا ڕاهێنەران ژ یانەیێن پشكدار بهێنە دوور كرن ئەگەر ئەنجام لدووڤ خاست و داخوازیێن كارگێری و پشتەڤانێن وان نەبن، ئەگەر ئەم خالا ژ هەموویان گرنكتر ژبیر نەكەین، ئەوژی بهێزكرنا رێزێن خوە دبازارێ ڤەگوهاستنا زڤستانێ دا ب تایبەت ئەو یانەیێن هیڤیێن ناسناڤی پشتی ڤان گەران لدەڤ پەیدابوین یان ئەو یانەیێن نەشیاینە هەتا نها ئەو ئاستێ چاڤەرێكری نیشانبدەن و رێزبەندیا وان نە ل ئاستێ هیخوازییێ، هەر چەندە هێشتا زوویە ئەم بەحسێ ناسناڤێ خولێ بكەین ژبەر كو گەلەك سەرئەڤرازی و سەرنشیڤی ل هیڤیا هەموو تیمان ماینە، چ یێن گرێدای هنگاڤتنا ستێرێن وان، یان ژی ئاریشەیێن دارایی یێن كو دبیت هژمارەكا یانەیان ڤەگریت ژبەر كو هەر رۆژەكا خول دهێتە درێژكرن لسەر حسێبا بودجەیێن یانەیانە، یا من دڤێت بێژم چونكو خول یا درێژە و 31 گەر ماینە، ئەز بێژم یا باشتر ئەوە ئەم زوو پێشبینیا قارەمانا خولێ نەكەین، دبیت ئەم بێژین كو شورتە پتر شارەزاهی هەیە، وان دڤێت ئەو شكەستنا خوە دخولا یانەیێن ئاسیا دا وەكو وەرزێ بوری بناسناڤێ خولێ قەربوو بكەت، لێ ئەڤە رامانا وێ چەندێ نادەت كو یانەیێن هەولێر، جەوییە، زاخۆ، زەورا، گەرمە و هەتا دهۆك سەرباری دەستپێكا وێ نەباش بێنە دناڤا هەڤركییێ دا، ژبەر كو ئەز باوەرناكەم ناسناڤ ژڤان تیمان دەركەڤیت، دبیت ئێك ژڤان دگەل یانەیێن مایی چەنسێ بدەستڤەبرنا كوپا ئیراقێ هەبیت، لێ ئەڤە هەموو دێ وەكو بوچوون مینن، بەلێ هەر دێ مینیت پێن یاریزانان و خەباتا وان دناڤا یاریگەهێ دا و پلانێن راهێنەران و پشتەڤانییا دارایی و جەماوەری، خالا هەرا سەرەكی بۆ بەردەوامی دان ب ئەنجامێن سەركەڤتی دخولەكێ دا، دبیت لڤی وەرزی و ژبەر راوەستاندنێن بەردەوام و درێژاهییا ماوەیێ خولێ، بزەحمەترین بیت.

ئیحسان حەسەن
لدووڤ بەرنامەیێ هاتیە دانان وەكو دیار لڤێ حەڤتییێ هەلبژارتن بۆ دانانا دەستەكێن نوو یێن یانەیێن وەرزشی لسنورێ پارێزگەها دهۆكێ دێ هێنە كرن، لدەستپێكێ زوور یا گرنگە ئەڤ هەلبژارتنە برەنگەكێ رێك و پێك و یاسایی وەكو پروسێسەكا دیموكراتی دناڤا مللەتەكێ دیموكراتخواز دا بهێنە كرن، یا گرنكتر ئەوە بۆ دەستەكێن گشتی یێن ڤان یانەیان ب مەژیەكێ ڤەكری و بەرچاڤ وەرگرتنا بەرژوەندیێن گشتی یێن پێشڤەبرنا یانەیێن خوە ب هشیاری رەفتارێ دگەل ڤێ برۆسێسێ بكەن ووان كەسان ب هەلبژێرین كو ژهەژی دەنگێن هەوە بن، خوە دوور بێخن ژ پەیوەندیێن كەسایەتی و مروڤ مرۆڤكانێ و بەرژوەندیێن بەرتەنك، ژبەر كو یا ئاشكەرایە بڤان هەلبژارتنان هوون دێ كادرێن خودان شیان بۆ چار سالێن دی بخوە دانن و پێ نەڤێت یێ كو سەركێشییا ڤێ بزاڤێ دكەت، پێدڤییە سالوخەتێن سەرۆكاتییێ و برێڤەبرنێ لدەڤ هەبن، ژبەر كو ئەگەر ڤێ چەندێ لبەر چاڤ نەوەرگرن، ئێدی ئاخڤتن و پەشمانی و كازندێن لبەر دیواران و ژدەرڤەی یانەیێ فایدە ناكەن، ژبلی هندێ داخوازێ ژوان بەربژێرا دكەم یێن كو حەزا هندێ هەی كو دناڤا كارگێریا یانەیێ دا كار بكەن، ئەوژی ب مەژیەكێ ڤەكری بەری ڤێ پێنگاڤێ پاڤێژن، دەه جاران هزرا خوە بكەن تا دگەهنە وی رادەی كو خوە ژ هەژی بینن بۆ ڤی پوستەی، ژبەر كو یێ كو ئەركێ كارگێریێ وەردگریت پێدڤییە كاری بۆ یانەیێ بكەت نەتنێ ئارمانجا وی ئەوبیت ناڤێ خوە ددیرۆكا یانەیێ دا تۆماربكەت، دەمەكێ بێژیت ئەژی ئەندامێ كارگێریێ بووم، ئانكو دڤێت دگەل خوشی و نەخوشیێن یانەیا خوەبیت ژبلی هندێ هەموو مەرجێن ئەندامەتییا یانەیێ لدەڤ هەبن، ئەگەر ئەم بزانین كو یانەیێن مە ب تایبەت دڤان سالێن داویێ دا تنێ پشكداری وئەنجام كرینە پیڤەرێ خوە یێ سەرەكی، لایەنێ ژهەمویان گرنكتر ل پشت گوه هاڤێژتینە ئەوژی ئاڤاكرنا نفشەكێ ساخلەم بۆ وەرزشا پارێزگەهێ و كوردستانێ وكاركرن بۆ ئاڤاكرنا ژێرخانەیا وەرزشی ژ یاریزانێن بەهرەمەند، رەنگە وان ژی ئەگەرێن خوە هەبن ب تایبەت دپشتەڤانییا دارایی یا بەردەوام دا، یا من دڤێت ئەز بێژم بلا جارەكێ ئەم مفای ژ سەربۆرێن پێشین وەرگرین و پێنگاڤەكا دروست پاڤێژین، چ ئەو كەسێن خوە بۆ دەستەكێن یانەیان دهەلبژێرن و ئەركێ برێڤەبرنا یانەیێ دكەڤیتە دستویێن واندا، یان ئەو كەسێن دەنگێن خوە ددەن، كو پێنگاڤەكا دیراسەت كری و بریارەكا وێرەك بدەن و چەند پرسیاران ژخوە بكەن، ئەرێ بۆ چار سالێن بهێت مە چ ژ كارگێری و دەستەكا نوو یا یانەیێ دڤێت؟ ئەرێ ئەڤ كەسێن ئەم دهەلبژێرین دێ شێن چ بۆ یانەیێ كەن و دێ چەند شێن وەرزشا یانەیێ پێش ئێخن؟ ئەرێ یانە پێدڤی بكهورینێ یە یان نە؟ ئەگەر مە هزرا خوە باش كر و مە بریارەكا دروست دا، ئەز گرنتیا سەركەڤتنا بوچونێن زانستی و پێَشكەڤتنخواز دكەم، دگەل داخوازێن سەركەڤتنێ بۆ هەموو یانەیان.

ئیحسان حەسەن

یێ كو بەرێ خوە ددەتە خولا ئیراقێ یا فوتبۆلێ ب تایبەت دڤان دو سالێن بوری دا، پشتی ناڤێ وێ هاتیە گوهارتن بۆ خولا ستێرێن ئیراقێ ب شێوازێ خوە یێ نوو، دێ بینیت كو یانەیێن پشكدار پێشكەڤتنەكا باش ب هەموو لایەنان ڤە بخوڤە گرتییە، ئەگەر ئەم وان تێبینیان لدۆرجەماوەر و پشتەڤانێن هژمارەكا یانەیان ژێ بینە دەر، كو ئامادەبوونا وان نە ل ئاستێ هیخوزایێ نە، بەلێ تشتێ ئێكانە یێ هەتا نها پێش نەكەڤتی و باوەرناكەم پێشكەڤیت، لژنەیا دادڤانییێ و بازنێ دادڤانێن برێڤەبرنا یاریانە كو پتر ژ تێبینییەكێ لسەر ئاستێ وان هەنە، ژبەر وان شاشیێن ئەو دكەڤنێ دبنە ئەگەرێ هندێ كو گورانكاری دئەنجامێن یاریاندا پەیداببن، دیسان ببنە جهێ نەرازیبوونا كارگێری و راهێنەر و پشتەڤانێن یانەیان، لێ تشتێ سەیر و سەمەر ئەوە كو گەلەك جاران ل شوونا ئەو دادڤانێن شاشیان دیاریاندا دكەن، هەموو شاشیێن وان دهێنە ئاشكراكرن، بهێتە سزادان یان دوورخستن، دێ بینی هاتنە دانان بۆ برێڤەبرنا یاریەكا هەستیار دناڤبەرا دو تیمان دا یێن كو دبیت ئەو تیم بن یێن كو هیڤیێن بدەستڤەبرنا ناسناڤێ خولێ هەین، ئەڤ رەوشە چەندین جاران هاتیە دوبارەكرن، دگەل باوەریا مە و هەموو چاڤدێران كو دادڤانێن مە یێن نافخو نە ل ئاستێ پێدڤینە و چ هیڤی مە پێ نینن كو ل پاشەرۆژێ پێشكەڤن، بەلێ لسەر هندێ ڕا لژنەیا دادڤانان ل فیدراسیونا ئیراقێ یا رژدە كو ناڤێن وان بۆ برێڤەبرنا یاریان بدانن، ژبەر كو وان ژبلی وان چ كەسێن دی نینن، ئانكو نە شیاینە هە تا نها هژمارەكا باشا دادڤانان بەرهەڤبكەن كو ببنە جهێ باوەریا یانەیێن پشكدار و پێدڤییە ئەوژی بهێنە سزادان، یا من دڤێت بێژم راستە هێشتا ئەم یێ ل دەستپێكا خولا ڤی وەرزی، بەلێ دەمەك دێ هێت هەڤركی دناڤبەرا تیمان دا لسەر ناسناڤێ، دیسان مانا وان دناڤا خولێ دا دێ بهێزتر لێ هێت،  ئێدی ئەڤ یاریە شاشیان قەبوول ناكەن، ئەگەر لژنەیا دادڤانان ئەو دادڤان نەبن یێن كو بشێن ڤان یاریان برێڤەبەن، لەوما ئێكەم پێنگاڤ پێدڤییە بهێتە هاڤێژتن، دڤێت پشت بەستن لسەر دادڤانێن دەرڤەی ئیراقێ بهێتە كرن، بەلكو ئەم دادیەكا باشتر بینین، ئێدی هند یاری نەهێنە گیرووكرن و ڕاوەستاندن وئەم بریارێن دروست بینن، ئەگەر وان هندەك شاشی ژی كرن، هەر چ نەبیت هەوە یا لسەر خوە كر، ژبەر كو خول یا درێژە ومە بدەهان یاریێن ڤەبر و جەماوەری ودێربی ماینە و پێدڤی ب باشترین دادڤانە، چونكو دادڤانێن یاریكەهان تەوەركێ گرنگ یێ برێڤەبرنا یاریانە، بەردەوامییا وان بڤی ئاستێ لاواز بێ گومان دێ كارتێكرنێ و مەترسییێ لسەر هەڤركییێ پەیداكەت، ژبەر كو نە یا رەوایە یانەیێن مە یێن وەرزشی ب ملیارا دیناران بۆ ئینانا یاریزانان و یهێزكرنا رێزێن خوە ب مەزێخن، شیانێن وان هەموویان ببنە قوربانی شاشیێن فیركا دادڤانان.

ئیحسان حەسەن
ئەز هووسا هەست پێ دكەم كو هەتا نها شریكێن مە درێڤەبرنا ئیراقا نوو یا فێدرالی دا، تێنەگەهشتی نە یان ژی خوە تێناگەهینن كو راِكرن و بلند نرخاندنا ئالایێ مە یێ گوردستانێ، گەلەك مەزنتر و بهاترە هزار جاران ئەگەر بهێتە گرێدان یا بەرواردكرن ب سەركەڤتنەكێ یان پشكدارییەكێ دقارەمانی یان خولەكا وەرزشی دا، نابیت ب چ رەنگان چ كەس یان لایەن جورئەتێ بدەنە خوە و بەحسێ ئالایێ مە بكەن یان گرێدەن ب هەربابەتەكێ دیڤە، ژبەر كو ژبلی دستوریا ڤی ئالای د ئیراقا نوودا، ڤی ئالایی دیرۆكەكا پری شانازی سەروەری هەیە، ب هزاران گەنجێن كوردان لبن سیبەرا ڤی ئالایی خوینا خوە كریە قوربان ژبۆ ئازادی و سەرفەرازیا كوردستانێ تا كو ئەم گەهشتینە ڤێ قۆناغێ، من ئەڤ پێش گوتنە ئینا، پشتی فێدراسیونا ئیراقێ یا ڤۆلی بۆلێ لسەر ئەنجامێ بلندكرنا هژمارەكا كچێن هەرێما كوردستانێ یێن كو دناڤا هەلبژارتییێ ئیراقێ دا یاریێ دكرن، ئالایێ كوردستانێ دقارەمانییا رۆژئاڤا ئاسیا دا ل وەلاتێ ئوردنێ، بوویە ئەگەرێ هندێ كو سەرۆكێ ڤێ فێدارسیونێ لژنەیەكێ پێكبینیت بۆ هندێ ڤەكولینێ لدۆر ڤی بابەتی بكەت، كا بۆچی یاریزانێن كوردستانێ ئالایێ كوردستانێ ل شوونا یێ ئیراقێ بلندكریە، هووسا ل قەلەم دایە كو ئەڤە ڕەفتارە نە یا رەوایە و كارتێكرنێ ل هێما و ئێكگرتنا هەلبژارتییێ ئیراقێ دكەت، ژبیركریە كو ڤی ئالای هێمایەكێ تایبەت لدەڤ هەر كوردەكێ لسەرانسەری جیهانێ هەیە، تشتێ سەیر ویێ ئەز دلگران كریم كو ڤی بابەتی ب ئازرینم ئەوە، فێدراسیونێ خوە تێنەگەهاندیە كو سێ چارێكێن پێكهاتییێ ئیراقێ و پتر ژ یاریزان و راهێنەران ژ كچێن كوردستانێ نە، ئەگەر ئەونەبان هەر نەشیان پشكداریێ بكەن، دیسان ژبیركریە كو بەری دەستپێكرنا هەر یاریەكێ ڤان یاریزان لبن سرودا نیشتمانی یا ئیراقێ و درێسێن ئالایێ ئیراقێ لسەر یاریێن خوە ئەنجامدایە، هەروەسا ژبیر كریە كو ئەگەر كچێن كوردان نەبان نەدشیان بۆ جارا ئێكێ ددیرۆكا خوەدا میدالییا برۆنزی بدەستڤە بینن، ئەگەر ئەڤە راست بیت و سوبەهی ئەڤ یاریزانە پشتی ڤێ دەستكەڤتێ ل شوونا خەلاتكرنا وان پێرابوون لبن هەر ناڤەكی دگەل وان بهێنە كرن، پێدڤییە لایەنێن پەیوەندیدار ل كوردستانێ هەلویستەك تۆند بەرامبەر رەفتارا وان وەرگریت و نابیت ب چ رەنگان بهێتە قەبۆلكرن، یا من دڤێت بێژم داكو كەس خەلەت ل من نەگەهیت، ئەز نە دژی حەژێكرنا وەلاتی مە، ب تایبەت ئەوێن ڤان قەوانان لبن دروشمێن نیشتمان پەروەریا سەقەت تنێ بۆ بەرژوەندێن خوە نە زێدەتر لێددەن، ژبەر كو ئەڤ لایەنە وەكی وانن یێن كو دینی بكار دئینن داكو تاوانێن خوە یێن كوشتنا خەلكێ بێ گونەه پێ بڤەشێرن، ڤێجا ئەڤ فلمە نە یێ نوویە بۆ مە، گەلەك جاران هندەك كەسێن نەشاز د مالپەرێن جودا دا بەحسێ راكرنا ئالایێ كوردستانێ ژلایێ وەرزشڤانێن مە دقارەمانیێن جودا دا كرینە، لێ مە ب چ ڤە وەرنەگرتینە، لێ دەمێ لایەنەكێ فەرمی بیت، دڤێت مە ئاخفتنا خوە هەبیت و ئەم لبەرامبەر ب راوستین، ژبەر كو یێ رێزێ ل ئالایێ مە نەگریت ئەم ژی رێزێ لێ ناگرین ڤێجا هەر كی بیت.

ئیحسان حەسەن

دەمێ ئەم بەرێ خوە ددەینە هندەك ژ مالپەرێن جهێن یانەیان یێن فەرمی و نە فەرمی لسەر تۆرێن جڤاكی، براستی مرۆڤ تشتێن سەیر و سەمەر تێدا دبینیت، ب تایبەت ئەو بابەت و دان و ستاندێن گرێدای رەوشا تیمێن مە یێن هەرێما كوردستانێ ئەوێن پشكدار د خولا ستێرێن ئیراقێ یا فوتبۆلێ دا، ئەو سوحبەتێن دهێنە كرن هەر ژبەری یانەیا وان ڤیان لسەر هەی یاریێ بكەن، یان ژی پشتی یاری دهێتە ئەنجامدان، دێ بینی ئێكێ پێكهاتییێ تیما خوە یێ ئینایە خوار و ئامۆژگاریان دەتە دەستەكا راهێنانێ كو ئەگەر ئەو ب وی پێكهاتی ئەوی پێشنیاركری یاریێ بكەت، دێ شێت سەركەڤتنێ تۆماربكەت، ژبەر كو دنیڤا دویێ یا یاریا بوری شیابوو ئەنجامی ب گوهۆڕن، ل هندێ ژی ناراوەستیت بوچوونان ژی وەردگریت كا ئەو ئەدمێن و هەڤالێن پوستێ وی دبینن چەند دگەل بووچوونا وی نە، یان ژی دێ بێژن ئەڤ یاریكەرە وەكو هەر جار ستێرا یاریێ بوو، ئەگەر پشتی دەمەكی ئاستێ وی هاتە خوار یان درۆژا خوەدا نەبوو، دێ بێژن حرامە ئەڤ پارە بڤی یاریزانی هاتیە دان، یان دێ بێژن ئەڤە باشترین راهێنەر و سەرۆكێ یانەیێ یە، ئەگەر ئەنجام ب دلێ وان نەبوون، دێ بێژن ئەڤە راهێنەرە نە ژهەژی ناڤێ یانەیێ یە، یان پێدڤی یە دەستەكا یانەیێ جهێ خوە بدەنە هندەكێن دی ئەگەر نەشێن داخوازیێن جەماوەری بجهبینن و گەلەك بابەتێن دی، ئانكو دێ هندەك ئاخڤتن و پەیڤێن نەدیار یێن كو هیچ هزرەك یان رەخنەكا ئاڤاكەر تێدا نەبیت دژی یاریزان و یانەیان ب شێوەیەكێ گشتی ئینا خوار، تنێ بۆ هندێ دا بۆ خەلكەكی دیار كەن كو ئەم یێن هەین، ڤێجا چەوا و ژبەر چێ؟ ئەو ژی نوزانن، یا من دڤێت ئەز بێژم جهێ داخی یە كو نڤێسینا برێكا سوشیال میدیایی وئەنترنێتێ دەرگەه هێلایە ڤەكری بۆ هەر كەسەكی بوچوونا خوە بدەت، ئەگەر چەند یا دروست ژی نەبیت، ئەڤرۆكە هەر كەسەك بخوە بێ كو بزانیت، یێ بوچوونەكا سەربەخۆ ددەت تنێ بۆ ئێك ئارمانج ئەوژی ئەوە كو جهەكی یان ناڤەكی بخوە چێكەت، ئەڤجا چ دناڤا یانەیێ دا یان ل هەر جهەكێ دی، هەر چەندە دڤێت جهێ دروستێ ڤان كەسان تنێ دناڤا پەلوكێن یاریگەهان بن نەزێدەتر، ژبەر كو وەرگرتنا بوچوونان ژ هەر كەسەكی ناهێنە وەرگرتن، تنێ ژ خودان سەربۆر و مێشكێن ئاڤاكەر و باوەرنامەیێن زانستی نە بن، دیسان یێن كو بزانن دێ چەوا رەفتارێ دگەل روودانان برێكێن دروست كەن، دوور ژ دەمارگیریێ و بووچونێن سەقەت و پێزانینێن شاش، لەوما یا پێدڤییە ئەڤ پەیچە یان مالپەرە ببنە پەنجەرەك دناڤبەرا جەماوەر و یانەیێ دا، یاباش ئەوە هاندەرێن ڤان یانەیان ڤێ پەنجەرێ بۆ هندێ بكار بینن كو دەنگێ خوە و بووچونێن خوە ب شێوەیەكێ زانستی بگەهینن، ژبەر كو ئەوا نها ئەم دبینین ب تمامی یا بەروڤاژی یە، ب چ رەنگان دگەل پرنسیپێن وەرزش لسەر هاتیە ئاڤاكرن ناگونجن، تنێ دەرگەهەكە بۆ بەلاڤكرنا رەوشەنبیریا برینداكرنێ و نەڤیانێ، دگەل باوەریا مە كو ئەڤ رەوشە هەموو مالپەران ناڤەگریت.