ئیحسان حەسەن

رەنگە گەلەك ژ چاڤدێر و ڕەخنەگر و حەزژێكەرێن یانەیێن خولا ستێرێن ئیراقێ یا فوتبۆلێ بەحس بكەن، كا پشتی یاریێن گەرا حەفتێ دێ چ ل چارەنڤیسێ خولێ هێت، ئەگەر ئەم بزانین كو تنێ چاریكەك ژ هەڤڕكیێن خولێ ژ سەرجەمێ 38 یاریان چوینە، ژبلی هندێ راوەستاندنا خولێ ژ ئەگەرێ پشكداریا هەلبژارتییێ ئیراقێ دڤاڤارتنێن مۆندیالا 2026، هەروەسا كۆپا ئەرەبان تا ڕادەیەكی كارتێكرن درێڤەچوونا درێژترین خول لسەرانسەری جیهانێ كریە، ئێك ژ خالێن هەرە بەرچاڤ یێن كو هەتا نها دخولێ دا هاتینە دیتن ئەوە هەلگرا ناسناڤی دگەل خودانا رێزا دویێ و هەتا یا سێیێ لرێزبەندیا ئێكێ نا هێنە دیتن ئەوا نها یانەیا هەولێرێ سەركێشیا وێ بجوداهییا چار خالان ژ هەلگرا ناسناڤێ وەرزێ بوری یانەیا شورتە دكەت، ژبلی هندێ ئەو یانەیێن ژنوو هاتینە دناڤا خولا مەزناندا شیاینە ئاستەكێ باش نیشان بدەن، هەر زوو خوە بگونجینن و رێزێن خوە باش بكەن، دیارە ئەو دزانن كو پاراستنا دەستكەڤتێ بزەحمەترە ژ گەهشتنێ، خالا دی یا كو جهێ كێماسییێ یا فوتبۆلا ئیراقێ تا نها ئەوە دوورئێخستنا راهێنەرانە كو هژمارەكا یانەیان دەست ژ راهێنەرێن خوە بەردان، دوور نینە نیڤەكا ڕاهێنەران ژ یانەیێن پشكدار بهێنە دوور كرن ئەگەر ئەنجام لدووڤ خاست و داخوازیێن كارگێری و پشتەڤانێن وان نەبن، ئەگەر ئەم خالا ژ هەموویان گرنكتر ژبیر نەكەین، ئەوژی بهێزكرنا رێزێن خوە دبازارێ ڤەگوهاستنا زڤستانێ دا ب تایبەت ئەو یانەیێن هیڤیێن ناسناڤی پشتی ڤان گەران لدەڤ پەیدابوین یان ئەو یانەیێن نەشیاینە هەتا نها ئەو ئاستێ چاڤەرێكری نیشانبدەن و رێزبەندیا وان نە ل ئاستێ هیخوازییێ، هەر چەندە هێشتا زوویە ئەم بەحسێ ناسناڤێ خولێ بكەین ژبەر كو گەلەك سەرئەڤرازی و سەرنشیڤی ل هیڤیا هەموو تیمان ماینە، چ یێن گرێدای هنگاڤتنا ستێرێن وان، یان ژی ئاریشەیێن دارایی یێن كو دبیت هژمارەكا یانەیان ڤەگریت ژبەر كو هەر رۆژەكا خول دهێتە درێژكرن لسەر حسێبا بودجەیێن یانەیانە، یا من دڤێت بێژم چونكو خول یا درێژە و 31 گەر ماینە، ئەز بێژم یا باشتر ئەوە ئەم زوو پێشبینیا قارەمانا خولێ نەكەین، دبیت ئەم بێژین كو شورتە پتر شارەزاهی هەیە، وان دڤێت ئەو شكەستنا خوە دخولا یانەیێن ئاسیا دا وەكو وەرزێ بوری بناسناڤێ خولێ قەربوو بكەت، لێ ئەڤە رامانا وێ چەندێ نادەت كو یانەیێن هەولێر، جەوییە، زاخۆ، زەورا، گەرمە و هەتا دهۆك سەرباری دەستپێكا وێ نەباش بێنە دناڤا هەڤركییێ دا، ژبەر كو ئەز باوەرناكەم ناسناڤ ژڤان تیمان دەركەڤیت، دبیت ئێك ژڤان دگەل یانەیێن مایی چەنسێ بدەستڤەبرنا كوپا ئیراقێ هەبیت، لێ ئەڤە هەموو دێ وەكو بوچوون مینن، بەلێ هەر دێ مینیت پێن یاریزانان و خەباتا وان دناڤا یاریگەهێ دا و پلانێن راهێنەران و پشتەڤانییا دارایی و جەماوەری، خالا هەرا سەرەكی بۆ بەردەوامی دان ب ئەنجامێن سەركەڤتی دخولەكێ دا، دبیت لڤی وەرزی و ژبەر راوەستاندنێن بەردەوام و درێژاهییا ماوەیێ خولێ، بزەحمەترین بیت.

ئیحسان حەسەن
لدووڤ بەرنامەیێ هاتیە دانان وەكو دیار لڤێ حەڤتییێ هەلبژارتن بۆ دانانا دەستەكێن نوو یێن یانەیێن وەرزشی لسنورێ پارێزگەها دهۆكێ دێ هێنە كرن، لدەستپێكێ زوور یا گرنگە ئەڤ هەلبژارتنە برەنگەكێ رێك و پێك و یاسایی وەكو پروسێسەكا دیموكراتی دناڤا مللەتەكێ دیموكراتخواز دا بهێنە كرن، یا گرنكتر ئەوە بۆ دەستەكێن گشتی یێن ڤان یانەیان ب مەژیەكێ ڤەكری و بەرچاڤ وەرگرتنا بەرژوەندیێن گشتی یێن پێشڤەبرنا یانەیێن خوە ب هشیاری رەفتارێ دگەل ڤێ برۆسێسێ بكەن ووان كەسان ب هەلبژێرین كو ژهەژی دەنگێن هەوە بن، خوە دوور بێخن ژ پەیوەندیێن كەسایەتی و مروڤ مرۆڤكانێ و بەرژوەندیێن بەرتەنك، ژبەر كو یا ئاشكەرایە بڤان هەلبژارتنان هوون دێ كادرێن خودان شیان بۆ چار سالێن دی بخوە دانن و پێ نەڤێت یێ كو سەركێشییا ڤێ بزاڤێ دكەت، پێدڤییە سالوخەتێن سەرۆكاتییێ و برێڤەبرنێ لدەڤ هەبن، ژبەر كو ئەگەر ڤێ چەندێ لبەر چاڤ نەوەرگرن، ئێدی ئاخڤتن و پەشمانی و كازندێن لبەر دیواران و ژدەرڤەی یانەیێ فایدە ناكەن، ژبلی هندێ داخوازێ ژوان بەربژێرا دكەم یێن كو حەزا هندێ هەی كو دناڤا كارگێریا یانەیێ دا كار بكەن، ئەوژی ب مەژیەكێ ڤەكری بەری ڤێ پێنگاڤێ پاڤێژن، دەه جاران هزرا خوە بكەن تا دگەهنە وی رادەی كو خوە ژ هەژی بینن بۆ ڤی پوستەی، ژبەر كو یێ كو ئەركێ كارگێریێ وەردگریت پێدڤییە كاری بۆ یانەیێ بكەت نەتنێ ئارمانجا وی ئەوبیت ناڤێ خوە ددیرۆكا یانەیێ دا تۆماربكەت، دەمەكێ بێژیت ئەژی ئەندامێ كارگێریێ بووم، ئانكو دڤێت دگەل خوشی و نەخوشیێن یانەیا خوەبیت ژبلی هندێ هەموو مەرجێن ئەندامەتییا یانەیێ لدەڤ هەبن، ئەگەر ئەم بزانین كو یانەیێن مە ب تایبەت دڤان سالێن داویێ دا تنێ پشكداری وئەنجام كرینە پیڤەرێ خوە یێ سەرەكی، لایەنێ ژهەمویان گرنكتر ل پشت گوه هاڤێژتینە ئەوژی ئاڤاكرنا نفشەكێ ساخلەم بۆ وەرزشا پارێزگەهێ و كوردستانێ وكاركرن بۆ ئاڤاكرنا ژێرخانەیا وەرزشی ژ یاریزانێن بەهرەمەند، رەنگە وان ژی ئەگەرێن خوە هەبن ب تایبەت دپشتەڤانییا دارایی یا بەردەوام دا، یا من دڤێت ئەز بێژم بلا جارەكێ ئەم مفای ژ سەربۆرێن پێشین وەرگرین و پێنگاڤەكا دروست پاڤێژین، چ ئەو كەسێن خوە بۆ دەستەكێن یانەیان دهەلبژێرن و ئەركێ برێڤەبرنا یانەیێ دكەڤیتە دستویێن واندا، یان ئەو كەسێن دەنگێن خوە ددەن، كو پێنگاڤەكا دیراسەت كری و بریارەكا وێرەك بدەن و چەند پرسیاران ژخوە بكەن، ئەرێ بۆ چار سالێن بهێت مە چ ژ كارگێری و دەستەكا نوو یا یانەیێ دڤێت؟ ئەرێ ئەڤ كەسێن ئەم دهەلبژێرین دێ شێن چ بۆ یانەیێ كەن و دێ چەند شێن وەرزشا یانەیێ پێش ئێخن؟ ئەرێ یانە پێدڤی بكهورینێ یە یان نە؟ ئەگەر مە هزرا خوە باش كر و مە بریارەكا دروست دا، ئەز گرنتیا سەركەڤتنا بوچونێن زانستی و پێَشكەڤتنخواز دكەم، دگەل داخوازێن سەركەڤتنێ بۆ هەموو یانەیان.

ئیحسان حەسەن

یێ كو بەرێ خوە ددەتە خولا ئیراقێ یا فوتبۆلێ ب تایبەت دڤان دو سالێن بوری دا، پشتی ناڤێ وێ هاتیە گوهارتن بۆ خولا ستێرێن ئیراقێ ب شێوازێ خوە یێ نوو، دێ بینیت كو یانەیێن پشكدار پێشكەڤتنەكا باش ب هەموو لایەنان ڤە بخوڤە گرتییە، ئەگەر ئەم وان تێبینیان لدۆرجەماوەر و پشتەڤانێن هژمارەكا یانەیان ژێ بینە دەر، كو ئامادەبوونا وان نە ل ئاستێ هیخوزایێ نە، بەلێ تشتێ ئێكانە یێ هەتا نها پێش نەكەڤتی و باوەرناكەم پێشكەڤیت، لژنەیا دادڤانییێ و بازنێ دادڤانێن برێڤەبرنا یاریانە كو پتر ژ تێبینییەكێ لسەر ئاستێ وان هەنە، ژبەر وان شاشیێن ئەو دكەڤنێ دبنە ئەگەرێ هندێ كو گورانكاری دئەنجامێن یاریاندا پەیداببن، دیسان ببنە جهێ نەرازیبوونا كارگێری و راهێنەر و پشتەڤانێن یانەیان، لێ تشتێ سەیر و سەمەر ئەوە كو گەلەك جاران ل شوونا ئەو دادڤانێن شاشیان دیاریاندا دكەن، هەموو شاشیێن وان دهێنە ئاشكراكرن، بهێتە سزادان یان دوورخستن، دێ بینی هاتنە دانان بۆ برێڤەبرنا یاریەكا هەستیار دناڤبەرا دو تیمان دا یێن كو دبیت ئەو تیم بن یێن كو هیڤیێن بدەستڤەبرنا ناسناڤێ خولێ هەین، ئەڤ رەوشە چەندین جاران هاتیە دوبارەكرن، دگەل باوەریا مە و هەموو چاڤدێران كو دادڤانێن مە یێن نافخو نە ل ئاستێ پێدڤینە و چ هیڤی مە پێ نینن كو ل پاشەرۆژێ پێشكەڤن، بەلێ لسەر هندێ ڕا لژنەیا دادڤانان ل فیدراسیونا ئیراقێ یا رژدە كو ناڤێن وان بۆ برێڤەبرنا یاریان بدانن، ژبەر كو وان ژبلی وان چ كەسێن دی نینن، ئانكو نە شیاینە هە تا نها هژمارەكا باشا دادڤانان بەرهەڤبكەن كو ببنە جهێ باوەریا یانەیێن پشكدار و پێدڤییە ئەوژی بهێنە سزادان، یا من دڤێت بێژم راستە هێشتا ئەم یێ ل دەستپێكا خولا ڤی وەرزی، بەلێ دەمەك دێ هێت هەڤركی دناڤبەرا تیمان دا لسەر ناسناڤێ، دیسان مانا وان دناڤا خولێ دا دێ بهێزتر لێ هێت،  ئێدی ئەڤ یاریە شاشیان قەبوول ناكەن، ئەگەر لژنەیا دادڤانان ئەو دادڤان نەبن یێن كو بشێن ڤان یاریان برێڤەبەن، لەوما ئێكەم پێنگاڤ پێدڤییە بهێتە هاڤێژتن، دڤێت پشت بەستن لسەر دادڤانێن دەرڤەی ئیراقێ بهێتە كرن، بەلكو ئەم دادیەكا باشتر بینین، ئێدی هند یاری نەهێنە گیرووكرن و ڕاوەستاندن وئەم بریارێن دروست بینن، ئەگەر وان هندەك شاشی ژی كرن، هەر چ نەبیت هەوە یا لسەر خوە كر، ژبەر كو خول یا درێژە ومە بدەهان یاریێن ڤەبر و جەماوەری ودێربی ماینە و پێدڤی ب باشترین دادڤانە، چونكو دادڤانێن یاریكەهان تەوەركێ گرنگ یێ برێڤەبرنا یاریانە، بەردەوامییا وان بڤی ئاستێ لاواز بێ گومان دێ كارتێكرنێ و مەترسییێ لسەر هەڤركییێ پەیداكەت، ژبەر كو نە یا رەوایە یانەیێن مە یێن وەرزشی ب ملیارا دیناران بۆ ئینانا یاریزانان و یهێزكرنا رێزێن خوە ب مەزێخن، شیانێن وان هەموویان ببنە قوربانی شاشیێن فیركا دادڤانان.

ئیحسان حەسەن
ئەز هووسا هەست پێ دكەم كو هەتا نها شریكێن مە درێڤەبرنا ئیراقا نوو یا فێدرالی دا، تێنەگەهشتی نە یان ژی خوە تێناگەهینن كو راِكرن و بلند نرخاندنا ئالایێ مە یێ گوردستانێ، گەلەك مەزنتر و بهاترە هزار جاران ئەگەر بهێتە گرێدان یا بەرواردكرن ب سەركەڤتنەكێ یان پشكدارییەكێ دقارەمانی یان خولەكا وەرزشی دا، نابیت ب چ رەنگان چ كەس یان لایەن جورئەتێ بدەنە خوە و بەحسێ ئالایێ مە بكەن یان گرێدەن ب هەربابەتەكێ دیڤە، ژبەر كو ژبلی دستوریا ڤی ئالای د ئیراقا نوودا، ڤی ئالایی دیرۆكەكا پری شانازی سەروەری هەیە، ب هزاران گەنجێن كوردان لبن سیبەرا ڤی ئالایی خوینا خوە كریە قوربان ژبۆ ئازادی و سەرفەرازیا كوردستانێ تا كو ئەم گەهشتینە ڤێ قۆناغێ، من ئەڤ پێش گوتنە ئینا، پشتی فێدراسیونا ئیراقێ یا ڤۆلی بۆلێ لسەر ئەنجامێ بلندكرنا هژمارەكا كچێن هەرێما كوردستانێ یێن كو دناڤا هەلبژارتییێ ئیراقێ دا یاریێ دكرن، ئالایێ كوردستانێ دقارەمانییا رۆژئاڤا ئاسیا دا ل وەلاتێ ئوردنێ، بوویە ئەگەرێ هندێ كو سەرۆكێ ڤێ فێدارسیونێ لژنەیەكێ پێكبینیت بۆ هندێ ڤەكولینێ لدۆر ڤی بابەتی بكەت، كا بۆچی یاریزانێن كوردستانێ ئالایێ كوردستانێ ل شوونا یێ ئیراقێ بلندكریە، هووسا ل قەلەم دایە كو ئەڤە ڕەفتارە نە یا رەوایە و كارتێكرنێ ل هێما و ئێكگرتنا هەلبژارتییێ ئیراقێ دكەت، ژبیركریە كو ڤی ئالای هێمایەكێ تایبەت لدەڤ هەر كوردەكێ لسەرانسەری جیهانێ هەیە، تشتێ سەیر ویێ ئەز دلگران كریم كو ڤی بابەتی ب ئازرینم ئەوە، فێدراسیونێ خوە تێنەگەهاندیە كو سێ چارێكێن پێكهاتییێ ئیراقێ و پتر ژ یاریزان و راهێنەران ژ كچێن كوردستانێ نە، ئەگەر ئەونەبان هەر نەشیان پشكداریێ بكەن، دیسان ژبیركریە كو بەری دەستپێكرنا هەر یاریەكێ ڤان یاریزان لبن سرودا نیشتمانی یا ئیراقێ و درێسێن ئالایێ ئیراقێ لسەر یاریێن خوە ئەنجامدایە، هەروەسا ژبیر كریە كو ئەگەر كچێن كوردان نەبان نەدشیان بۆ جارا ئێكێ ددیرۆكا خوەدا میدالییا برۆنزی بدەستڤە بینن، ئەگەر ئەڤە راست بیت و سوبەهی ئەڤ یاریزانە پشتی ڤێ دەستكەڤتێ ل شوونا خەلاتكرنا وان پێرابوون لبن هەر ناڤەكی دگەل وان بهێنە كرن، پێدڤییە لایەنێن پەیوەندیدار ل كوردستانێ هەلویستەك تۆند بەرامبەر رەفتارا وان وەرگریت و نابیت ب چ رەنگان بهێتە قەبۆلكرن، یا من دڤێت بێژم داكو كەس خەلەت ل من نەگەهیت، ئەز نە دژی حەژێكرنا وەلاتی مە، ب تایبەت ئەوێن ڤان قەوانان لبن دروشمێن نیشتمان پەروەریا سەقەت تنێ بۆ بەرژوەندێن خوە نە زێدەتر لێددەن، ژبەر كو ئەڤ لایەنە وەكی وانن یێن كو دینی بكار دئینن داكو تاوانێن خوە یێن كوشتنا خەلكێ بێ گونەه پێ بڤەشێرن، ڤێجا ئەڤ فلمە نە یێ نوویە بۆ مە، گەلەك جاران هندەك كەسێن نەشاز د مالپەرێن جودا دا بەحسێ راكرنا ئالایێ كوردستانێ ژلایێ وەرزشڤانێن مە دقارەمانیێن جودا دا كرینە، لێ مە ب چ ڤە وەرنەگرتینە، لێ دەمێ لایەنەكێ فەرمی بیت، دڤێت مە ئاخفتنا خوە هەبیت و ئەم لبەرامبەر ب راوستین، ژبەر كو یێ رێزێ ل ئالایێ مە نەگریت ئەم ژی رێزێ لێ ناگرین ڤێجا هەر كی بیت.

ئیحسان حەسەن

دەمێ ئەم بەرێ خوە ددەینە هندەك ژ مالپەرێن جهێن یانەیان یێن فەرمی و نە فەرمی لسەر تۆرێن جڤاكی، براستی مرۆڤ تشتێن سەیر و سەمەر تێدا دبینیت، ب تایبەت ئەو بابەت و دان و ستاندێن گرێدای رەوشا تیمێن مە یێن هەرێما كوردستانێ ئەوێن پشكدار د خولا ستێرێن ئیراقێ یا فوتبۆلێ دا، ئەو سوحبەتێن دهێنە كرن هەر ژبەری یانەیا وان ڤیان لسەر هەی یاریێ بكەن، یان ژی پشتی یاری دهێتە ئەنجامدان، دێ بینی ئێكێ پێكهاتییێ تیما خوە یێ ئینایە خوار و ئامۆژگاریان دەتە دەستەكا راهێنانێ كو ئەگەر ئەو ب وی پێكهاتی ئەوی پێشنیاركری یاریێ بكەت، دێ شێت سەركەڤتنێ تۆماربكەت، ژبەر كو دنیڤا دویێ یا یاریا بوری شیابوو ئەنجامی ب گوهۆڕن، ل هندێ ژی ناراوەستیت بوچوونان ژی وەردگریت كا ئەو ئەدمێن و هەڤالێن پوستێ وی دبینن چەند دگەل بووچوونا وی نە، یان ژی دێ بێژن ئەڤ یاریكەرە وەكو هەر جار ستێرا یاریێ بوو، ئەگەر پشتی دەمەكی ئاستێ وی هاتە خوار یان درۆژا خوەدا نەبوو، دێ بێژن حرامە ئەڤ پارە بڤی یاریزانی هاتیە دان، یان دێ بێژن ئەڤە باشترین راهێنەر و سەرۆكێ یانەیێ یە، ئەگەر ئەنجام ب دلێ وان نەبوون، دێ بێژن ئەڤە راهێنەرە نە ژهەژی ناڤێ یانەیێ یە، یان پێدڤی یە دەستەكا یانەیێ جهێ خوە بدەنە هندەكێن دی ئەگەر نەشێن داخوازیێن جەماوەری بجهبینن و گەلەك بابەتێن دی، ئانكو دێ هندەك ئاخڤتن و پەیڤێن نەدیار یێن كو هیچ هزرەك یان رەخنەكا ئاڤاكەر تێدا نەبیت دژی یاریزان و یانەیان ب شێوەیەكێ گشتی ئینا خوار، تنێ بۆ هندێ دا بۆ خەلكەكی دیار كەن كو ئەم یێن هەین، ڤێجا چەوا و ژبەر چێ؟ ئەو ژی نوزانن، یا من دڤێت ئەز بێژم جهێ داخی یە كو نڤێسینا برێكا سوشیال میدیایی وئەنترنێتێ دەرگەه هێلایە ڤەكری بۆ هەر كەسەكی بوچوونا خوە بدەت، ئەگەر چەند یا دروست ژی نەبیت، ئەڤرۆكە هەر كەسەك بخوە بێ كو بزانیت، یێ بوچوونەكا سەربەخۆ ددەت تنێ بۆ ئێك ئارمانج ئەوژی ئەوە كو جهەكی یان ناڤەكی بخوە چێكەت، ئەڤجا چ دناڤا یانەیێ دا یان ل هەر جهەكێ دی، هەر چەندە دڤێت جهێ دروستێ ڤان كەسان تنێ دناڤا پەلوكێن یاریگەهان بن نەزێدەتر، ژبەر كو وەرگرتنا بوچوونان ژ هەر كەسەكی ناهێنە وەرگرتن، تنێ ژ خودان سەربۆر و مێشكێن ئاڤاكەر و باوەرنامەیێن زانستی نە بن، دیسان یێن كو بزانن دێ چەوا رەفتارێ دگەل روودانان برێكێن دروست كەن، دوور ژ دەمارگیریێ و بووچونێن سەقەت و پێزانینێن شاش، لەوما یا پێدڤییە ئەڤ پەیچە یان مالپەرە ببنە پەنجەرەك دناڤبەرا جەماوەر و یانەیێ دا، یاباش ئەوە هاندەرێن ڤان یانەیان ڤێ پەنجەرێ بۆ هندێ بكار بینن كو دەنگێ خوە و بووچونێن خوە ب شێوەیەكێ زانستی بگەهینن، ژبەر كو ئەوا نها ئەم دبینین ب تمامی یا بەروڤاژی یە، ب چ رەنگان دگەل پرنسیپێن وەرزش لسەر هاتیە ئاڤاكرن ناگونجن، تنێ دەرگەهەكە بۆ بەلاڤكرنا رەوشەنبیریا برینداكرنێ و نەڤیانێ، دگەل باوەریا مە كو ئەڤ رەوشە هەموو مالپەران ناڤەگریت.

ئیحسان حەسەن
ئەزباوەر ناكەم پشتەڤانێن ئەلهویێن چیا درازی بن ژ ئاستێ تیما خوە یا فوتبۆلێ ئەوا پشكدار دخولا ستێرێن ئیراقێ دا، پشتی چار دۆراندنێن لدووڤئێك داین، باوەرناكەم ژی كارگێریا یانەیێ بهێلیت ئەڤ ڕەوشە بەردەوام بیت یان ژی گەلەك ڤەكێشیت، چونكو بەردەوامییا ڤێ رەوشێ ب گورەی ئەو جهێ لێ درێزبەندیێ دا ب چ رەنگان خزمەتا تیمێ و هیڤیێن وێ ناكەت، ژبەر كو نها دهۆك ژلایێ تەكنیكی ڤە تایبەتی پشتی ئەو ئاستێ خراب دیاریێن بوریدا نەمایە ئەو تیما پترس، ئەڤ چەندە بۆ ئەگەرێ هندێ كو ڤان خالان هەموویان ژدەست بدەت، بێ گومان دێ پەشمانی ڤان خالان بیت، ژبلی هندێ یێن كو بەرێ خوە دایە یاریێن تیمێ، باش دزانن كو كێماسییەكا مەزن دناڤ دا هەیە، ژبەركو هەتا نها دهۆكێ ئەو مفا ژ پیشەكارێن خوە یێن نافخویی و بیانی نەدیتی نە، ژ هەمیا دلگرانتر ئەوە نەبوونا كیانێ شەركرنێ دناڤا یاریگەهێ دا، ئەڤە دەستپێكەكا خرابە بۆ خودانا دو ناسناڤێن وەرزێ بوری كو ئەم بڤێ رەنگی بینن، ئەڤە نیشانا هندێ یە كو ئەو هیڤیێن بەری دەستپێكرنا خولێ هاتینە دانان تا نها شكەستن ئیناینە، ئەڤ رەوشە ژ هەژی تیما مە نیننن یێن كو شیان ل وەرزێ بوری دیرۆكەكا نوو ژ دەستكەڤتان بخوە و پارێزگەهێ و هەرێما كوردستانێ تۆماربكەن، زێدەباری هندێ كو باوەریا یاریزانان یا زێدە بخوە كو ئەو باشترینن، ژبلی گوهۆڕینا هژمارەكا زوور یا یاریزان ئەگەرەكێ دی بوو كو كارتیكرنێ ل ئاست و ئەنجامێن تیمێ بكەت، ژبەر كو یاریزانێن نها بەرەڤانییێ ژدرێسێ یانەیێ دكەن و ئەم نوزانین كا ئەكەر چنە، دهێنە هژمارتن ژ یاریزانێن ئاسایی، هەتا ئەوێن دهاتنە هژمارتن ستێرێن تیمێ ل وەرزێ بوری نەمایە ل ئاستێ خوە یێ جاران، رەنگە ئێك بێژیت ل وەرزێ بوری دهۆك دهەمان رەوش دا بوو لێ شیا ڤەگەریێت، ئەز هووسا دبینم كو رەوشا تیمێ دگەل یا بوری جێوازە، بەلكو ل وەرزێ بوری مە ئاست دیت، ئەگەر ئەنجام ژی دبەرژوەندیا مەدا نەبا، لێ نها نە ئەم ئاستی دبینین نە ئەنجامان، ژبەر هندێ نها تەپە كەڤتە دگورەپانا كاركێریا یانەیێ دا كو سنورەكی بۆ ڤێ رەوشێ و بەرزەبوونا ناسنامەیا تەكنیكی یا تیمێ بدانیت، ئەوژی كاركرن ب رێسایا خەلاتكرن و سزادانێ ژبۆ ڤەگەراندنا تیمێ بۆ جهێ وێ یێ دروست، هەر چەندە ئەوژی تا ڕادیەكی د سەركەڤتی نەبووین دهەلبژارتنا راهێنەرێ ئێكێ دا ئەوێ تنێ دو یاریان مایە دگەل تیمێ، دیسان ب ئینانا هژمارەكا یاریزان كو پێدڤی بوو ژ وەرزێ بوری باشتربان، ئەگەر نە یانەیا مە دێ زحمەتەكا ئێكجار مەزن بینیت بۆ هەڤركییێ لسەر رێزێن پێشییێ دخولا ڤی وەرزی دا، دوورنینە دەستڤالا دەركەڤیت، دخولەكێ دا ژبلی ئەنجامێن نەباش، نە باوەریا تیمێن مە یێن كوردستانێ ب دادڤانێن برێڤەبرنا یاریان و شاشیێن وان یێن بەردەوام یێن كو دكەڤنە دخزمەتا تیمێن بەرامبەر دا لسەر كیستێ یانەیێن مە ئەگەرەكێ دێ یێ ڤێ پاشكەڤتنێ یە.

ئیحسان حەسەن

ئەڤرۆ یانەیا زاخۆ نوونەرا فوتبۆلا كوردستانێ و ئیراقێ  دێ پێنگاڤا خوە یا ئێكێ د قارەمانییا خولا یانەیێن كەنداڤی یا فوتبۆلێ هاڤێژیت، دەمێ یانەیا قادسیە یا كوێتی لیاریگەها دهۆك مێڤاندكەت، نە یا بساناهی یە ئەم پێشبینیا هندێ بكەین كا كیژ تیم دێ شێت سەركەڤتنێ تۆماركەت و ئێكەم سێ خالێن یاریێ بدەستڤە ئینیت، ئەگەر ئەم بزانین كو هەردوو یانە دێ بۆ جارا ئێكێ ددیرۆكا خوەدا رووبروو ئێك بن، ژبلی هندێ سەركەڤتن دڤێ یاریێ دا دێ بیتە باشترین پالدەر ژبۆ دەربازبوونێ بۆ قۆناغا دویێ ژكۆما ئێكێ ب هەبوونا یانەیێن عەین یا ئیماراتی و سترە یا بەحرینی، ئەگەر ئەم لدەستپێكێ بەحسێ چەنسێ یانەیا مێڤان خودانا دوو ناسناڤێن ڤێ قارەمانییێ بكەین، دیارە وان  دیرۆكەكا مەزن یا پشكداریان دخول و قارەمانییان لسەر ئاستێ كوێتێ و یانەیێن ئەرەبی  ئاسیا دا هەیە، بەلێ ئەنجامێن وێ یێن ڤێ داویێ دخولا نافخویی دا نە ل ئاستێ هێخوازیێ نە، بەلێ یا ڤێ یانەیێ جێواز دكەت ئەوە كو هەردەم قادسیە دقارەمانیێن دەرڤەدا ئاستەكێ باشتر ژ خولا نافخویی  پێشكێش دكەت، بەلگە ژی ل وەرزێ بوری شیا لسەر كیستێ یانەیێن ژخوە باشتر بگەهیتە فینالێ و رێزبەندیا دویێ دڤێ قارەمانییێ دا بدەستڤە بینیت، هەر چەندە دێ هێتە دڤێ یاریێ دا ب دۆراندنێ دداوی یاریا خوەدا ژخولێ بەرامبەر یانەیا كوێت، دیسان بێ پشكداریا هژمارەكا یاریزانێن خوە ئەوێن توشی هنگاڤتنێ بوون، بەلێ دڤێت ژبیر نەكەین كو وان راهێنەرەكێ خودان سەربور هەیە، ئەوژی راهێنەری تونسی نەبیل مەعلولە ئەوێ لڤی وەرزی پشت بەستن لسەر هاتیە كرن كو ب شارەزاهییا خوە جارەكا دی مەزنا كوێتیان ڤەگەرینتە ناسناڤێن خول و قارەمانییان ئەگەر چەند رێكا وان یا بزحمەت بیت، دبەرامبەرا دا دیارە رەوشا كورێن خابیری دخولا نافخویی دا دگەل مێڤانا خوە یا هەڤسەنگە، بەلێ ب چ رەنگان یا بەرهەڤ نینە ڤێ دەلیڤەیێ ژدەستێ خوە بكەت، باش دزانن سەركەڤتن و بدەستڤەئینانا خالێن یاریێ، دێ بۆ وان بیتە پێنگاڤەكا بهێز ژبۆ بەردەوامییێ ب كاروانێ خوە دقارەمانییێ دا، چەكێ وێ یێ سەرەكی دێ یاریگەه و پشتەڤانێن وێ یێن دلسۆز و زاخا یاریزان و دەستەكا وێ یا راهێنانێ بیت، یێن كو پێدڤی یە هەموو شیانێن خوە بێخنە كار بۆ هندێ بگەهنە ئارمانجا خوە یا سەرەكی، هەموو هزر و تەكتیك و تەكنیكا یاریزانان لسەر رەوشا ڤێ یاریێ بیت، ژبەر كو ئەڤە پێنگاڤا ئێكێ یا بجهئینانا خەون و ئارمانجانە، بێ نەڤێت ئەڤ خەونە یاری بۆ یاریێ دێ مەزن بن تا كو دگەهنە ناسناڤێ كەنداڤی، ژبەر هندێ ئەڤرۆ تیما گەلها سور بەرامبەر بەرپرسیارەتییەكا دیرۆكی یە، كو ب سەرفەرازی ژڤێ دیدارا گرنگ بدەركەڤیت، ئەڤ چەندە دێ هێتە پێش ئەگەر تیما مە شیا هەڤسەنگییێ دناڤبەرا هێلا هێرشبەریێ و بەرگێریێ دروست بكەت، یاریزانێن مە درۆژا خوەدا بن و بشێن پلانا راهێنەرێ خوە بجهبینن، لێ هەر دێ مینیت رەوشا دەرونی و باوەری بخوبوون كلیلا سەركەڤتنێ دڤێ دیدارا ئاگرین دا، یا كو مە هەموویان دڤێت زاخۆیی و كوردستانی بیت.

ئیحسان حەسەن
ئەز دبێژم هوون ژی دگەل منن، كو ئێك ژ ئەگەرێن هەرە گرنگ یێن پاشكەڤتنا فوتبۆلا ئیراقێ ب شێوەیەكێ گشتی، رەوشەنبیریا هەلبژارتن و دەرئێخستنا راهێنەرانە، ژبەر كو مە نەدیتی یە راهێنەرەك سێ وەرزان مایە دگەل تیمەكێ، سەرباری هەبوونا یاریگەه و باشترین بەهرمەندان، بەلێ ئەم یێ دبینین كو یاریزانێ نافخویی ب تایبەت یێ كو ل ئیراقێ دژیت هند پێش ناكەڤیت، ژئەگەرێ لاوازیا وی یا تەكنیكی نەك نەبوونا بەهرەمەندیێ، بێ گومان لاوازییا وی یا تەكنیكی یا سروشتی یە، ئەوژی ژ ئەنجامێ لێكگوهارتنا راهێنەران و كێمبوونا ماوەیێ دەستەكا راهێنانێ یە دگەل تیمێن وان، كو ئەڤ چەندە دبیتە ئەگەرێ بەرزەبوونا یاریزانی دراهێنان دا و نە پێشكەڤتنا ئاستێ وی كو نەشێت هند ناڤ و دەنگییێ وەرگریت و رێ پێ بهێتە دان وەكو پیشەكار دخولەكا ئورۆپی یاریێ بكەت، ژلایەكێ دیڤە گەلەك جاران یاریزان بخوە دبنە ئەگەرێ دەرئێخستنا دەستەكا راهێنانێ، ژبەر كو بارا پتری وان حەژ ژ پێگیریێ ب سیستەم و بەرنامە و راهێنانێن بزحمەت یێن سپێدی و ئیڤاری ناكەن، دێ بینی یێ پیلانان ددانن داكو راهێنەری دوور بێخن و نوزانن كو ئەو یێ زەرەرێ ل خو دكەن، هەر چەندە بریارا دوور خستنا وی ددەستێ واندا نینە، بەلكو كارگێریا یانەیێ ددەت، ئەز لڤێرە بەحسێ دوورئێخستنا راهێنەرێ یانەیا دهۆكێ یێ بەرازیلی سێرجیو فاریاس ناكەم، بەلێ ئەز یێ بەحسێ رەوشەنبیریا فوتبۆلا وەلاتێن پاشكەڤتی ب شێویەكێ گشتی و ئیراقێ ب تایبەتی دكەم، ژبەر كو دەرئێخستنا راهێنەرێ دهۆكێ وەكر ئەز ڤی بابەتی بنڤێسم، هەر چەندە هەمی دەمان یاریزان ئەگەرێ دوورئێخستنا راهێنەری نینن، بەلكو هندەك جاران ژبەر گڤاشتنێن جەماوەری، دبیت ئەگەرێ وێ سەرۆكێ یانەیێ، یان ئەندامەكێ یانەیێ یێ فەخری بیت، ژبەر كو دەمی ئاستێ تیمێ دهێتە خوار و ئەنجام لدووڤ هیخوازیێ نەبن، قوربانییێ ئێكێ راهێنەرە، ژبەر كو یانە نە یا بەرهەڤە دەستان ژ یاریزانێن خوە بەردەت یێن كو خەزینا خوە یا پاران پێ ڤالاكرین، رەنگە گەلەك جاران یێن كو بریارێ لسەر باشی و خرابیێن راهێنەری ددەن، بارا پتری وان هەر فوتبۆل نەكریە و دهێن هەلسەنگاندنێ بۆ راهێنەری دكەن، ژبەر كو كێم جاران ئەم دبینین دناڤا یانەیێن مە دا لژنەیەكا تەكنیكی بۆ هەلسەنگاندنا راهێنەری هەبیت یان ژی ئاموژگاریان بۆ ئینانا راهێنەرەكی یان دەرئێخستنا وی وەرگرن، یا من دڤێت ئەز ب ئاشكرایی بێژم بێ كو ئێك تۆرەببیت، ژمن وەرە یانەیێن مە هووسا هزر دكەن كو راهێنەر پشكەكە ژ ملكێ وان یێ تایبەت، هەر دەمێ ڤیا دێ دەستان ژێ بەردەن، ڤێجا چ یێ رازی بیت یان نە، ئەوژی ژبەر ئێك ئەگەر داكو خوە ژ بەرپرسیارەتیا شكەستنێن خوە دوور بێخن و حەزا جەماوەری بجه بینن، ژبەر كو ئەو راهێنەر هەر ئەوە یێ كو هەوە بەرامبەر سیڤی و شارەزاهییا وی هەڤبەست دگەل گرێدای، هێشتا ئەو دەلیڤە یا كو پێدڤییە پێ بهێتەدان نە وەرگرتی هەوە دەست ژێ بەردان، ئەڤجا ب دوبارەبوونا سیناریویا دووركرنا راهێنەران پشتی چەند یاریان ب بوچوونا من گەلەك یا بزەحمەتە فوتبۆلا ئیراقێ و كوردستانێ پێشكەڤیت.

ئیحسان حەسەن

جهێ دلخوشییێ بوو ئەو پشكدارییا بەرفرەه یا یانەیێن وەرزشی دقارەمانییا پارێزگەها دهۆكێ یا فوتسالا كچان دا، ئەوا هەڤركیێن وێ بۆ جارا ئێكێ ددیرۆكا خوەدا ب پشكدارییا  هەشت یانەیان لسەر ئاستێ یاریزانێن كێمتر ژ 18 سالییێ هاتیە كرن، یا كەیفخوشتر ژی ئەبوو ئەو گیانێ هەڤالینی و هەڤڕكییا وەرزشی یا پاقژ ئەوا ژلایێ هەموو ئەندامێن تیمێن پشكدار ڤە هاتیە كرن كو هیچ ئاریشە روونەدا كارتێكرنێ لسەر سەركەڤتنا ڤێ قارەمانییێ بكەت، لژنەیا سەرپەرشت ژی كو دەستەكا نوو یا فدراسیۆنا فوتبۆلا پارێزگەها دهۆكێ بوو، هەر تشتەكێ پێدڤی بۆ سەركەڤتنا كاروانێ ڤێ قارەمانییێ لدووڤ پێچێبونێن خوە بەرهەڤكربوون، دەرباری تیمێن پشكدار ژی هەر ژ دەستپێكێ یا دیار بوو و بوچوون بۆ هندێ دچوون  كو هەڤركی لسەر ناسناڤێ ڤێ قارەمانییێ دێ دناڤبەرا خانمێن هەر دو یانەیێن ئافرەتێن دهۆك و یانەیا زاخۆ دا بیت، ب هەبوونا هژمارەكا یاریزانێن زیرەك و چەلەنك دناڤ رێزێن واندا، ب تایبەت یانەیا ئافرەتێن دهۆكێ ئەوا وەكو تیمەكا ئێكگرتی، دیسان وەكو هەلگرا ناسناڤێ خولا كوردستانێ لسەر ئاستێ پێشكەڤتیان خوە نیشاندای، نەڤیای لسەر ئاستێ تەمەنان ژی ب سەرپەرشییا راهێنەرێ خوە یێ گەنج ئاراز سالح دەلیڤەیا بدەستڤەبرنا ناسناڤێ پارێزگەهێ ئەگەر بۆ ژیێن كێمتر ژی بیت ژدەست بدەن، بەرامبەر تیمەكێ دیاریا فینالێ دا باشتر ژیاریێن دەستپێكا قارەمانییێ هاتە دیتن، دیاربوو كو دەستەكا راهێنانێ ب سەرپەرشتییا خانم زینە جەمیل یا رازی ب ئەنجامێ یاریێ سەرباری پشت بەستنا وان لسەر هژمارەكا یاریزانێن ژدەرڤەی پارێزگەهێ، تنێ قوسیرا وان ئەو بوو ئەو تێگەهشتن ئەوا كو پێدڤی بوو دناڤبەرا یاریزانان واندا هەبیت ژبۆ بجهئینانا پلانا تەكتیكی تا رادەیەكی یا باش نەبوو، دیار بوو كو هند راهێنان پێكڤە نەكرینە، هەر چەندە شیان ببنە هەڤركێن سەخت ب تایبەت دنیڤا ئێكێ دا، لژنەیا دادڤانان ژی ب جلكێن خوە یێن یاسایی روویەكێ دی یێ جوان دا ڤێ قارەمانییێ و شیان ب سەركەڤتیانە ئەركێن خوە بجهبینن، هەر چەندە پشكداریا هەشت تیمێن فوتسالێ وێ چەندێ دیار دكەت كو مە هژمارەكا باشا بەهرمەندێن ڤێ یاریێ هەنە، ئەگەر بەردەوام بن لسەر راهێنانێن خوە و پتر پشتەڤانی لێ بهێتە كرن، دێ  بنە باشترین شەنگست بۆ ڤێ یاریێ ل پارێزگەهێ، ئەگەر ئەم بزانین كو ب بەردەوامییا ڤان قارەمانییان لسەر ئاستێ كوردستانی، نها زۆربەی یاریزانین هەرێمێ ئەندامن دناڤ رێزێن هەلبژارتییێ ئیراقێ دا، لێ ئەوا من تێبینی كری و بوویە جهێ حێبەتییێ و راوستاندنێ، هەلبژارتنا باشترین یاریزان و باشترین گۆلپارێز بوو، ئەز نوزانم  لژنەیا دەستنیشانكرنا وان لسەر چ پێڤەر هەلسەنگاندن كریە، ژبەر كو ل دونیایێ هەموویێ نینە تیمەك ناسناڤی ببەت و باشترین یاریزان ژ تیمەكا دی بیت، یان ناسناڤێ باشترین كۆلپارێز ژ تیمەكا ژدەرڤەی یاریا فینالێ بیت، ڤیابا هوورتر و باشتر ڕەفتار دگەل ڤێ بادەكێ كربا، ئارمانج تنێ رازیكرن نەبا، لێ هەر دێ مینیت رێژەیا پشكداریێ و ئەو ئاستێ مەزن ئەوێ مە دفینالێ دا دیتی، دیسان وێنێ ئاهەنگێرانا هەر تیمێن ئێكێ پێكڤە، سەركەڤتنا ژ هەموویان مەزنتر.

ئیحسان حەسەن

من باوەر نەدكر كو گەرا ئێكێ ژخولا ستێرێن ئیراقێ یا فوتبۆلێ دێ بڤی روویێ تەكنیكی یێ باش دەركەڤیت، ئەوا د وەرزێ بوری دا دەستپێكەكا لاواز و پری هۆشداری بوو، رێژەیا تۆماركرنا گۆلان ئێك ژروخسارێن ڤێ گەرێ بوون كو هژمارا وان گەهشتە 24 گۆلان ب رێژەیا دو گۆل و نیڤان دهەر یارییەكێ دا، ئەگەر ئەم بزانین كو یاریەكا پاشئێخستی ژی هەبوو، رەنگە ئێك بێژیت ژبەر كو ئەو ئاستێ هەڤركییێ نە بوو یان جوداهی دئاستێ وان دا هەبوو، ژبلی دیدارا دهۆك و گەرمە نەبیت ئەوا دهاتە هژمارتن گۆپیتكا یاریێن ڤێ گەرێ، لێ ئەز هووسا دبینم كو بشت بەستنا راهێنەران لسەر سیستەمێ هێرشبەریێ و نێزیكبوونا ئاستێ وان وەكر كو ئەڤ رێژەیا باش بهێتە تۆماركرن، تنێ یاریا نەفت و قاسم نەبیت ئەوا ب سێ گۆلێن پاقژ بداوی هاتی، ژبەر كو هەموو یاریێن دی تنێ جوداهییا گۆلەكێ دناڤبەرا واندا هەبوو، دیارە یاریگەها دهۆك بۆ فالەكا باش بۆ هەردو یانەیێن هەرێمێ هەولێر و نەورۆز ئەوێن شیاین سەركەڤتنێ ب هەمان ئەنجام 3ب 2 لسەر یانەیێن نەجەف و كارەبا تۆماربكەن، ژبلی هندێ هاتنە خوارا رێژەیا كارتێن رەنگین یێن كو یاریزانان وەرگرتین ئێك ژ خالێن گرنك یێن ڤێ گەرێ بوون، ئەڤە ژی وێ چەندێ دیار دكەت كو بارا پتری یاریزانێن تیمان نەچوونە یاریا زڤر و پێگیری ب كونترۆل ورەفتارێن خوە دناڤا یاریگەهێ دا كرن، دیسان داخویانیێن بەری یاریێ هەروەسا یێن پشتی یاریان تارادەیەكی دنموونە بوون، ژبەر كو دوور نەكەڤتن ژ گیانێ وەرزشی، دبیت ئەگەرێ وێ ژی ئەوبیت كو هێشتا ئەم نەگەهشتینە قۆناغا هەڤركییا دژوار، هەروەسا خوە گونجاندنا یاریزانێن پیشەكار یێن كو بۆ جارا ئێكێ دناڤا تیمێن خوە یێن نوو دا دكەن یا خراب نەبوو، ژبەر كو هژمارەكا وان ئەڤە بۆ جارا ئێكێ یە یاریەكا فەرمی دگەل راهێنەرێ خوە یێ نوو دكەن، ئەڤەژی دكەڤیتە دخانەیا هندێ دا كو ئاستێ هزرا پیشەكاریێ یێ ڤان یاریزانان دگەل یێن خۆمالی بەرەف باشتر چوویە، مفا وەرگرتن ژ تەپێن ژكووراتییێ دیسان شاشیێن هێلا بەرگیریێ و گۆلپارێزان وەكر چ یاری ب وەكهەڤ بداوی نەهێن، دگەل باوەریا مە كو خوشییا فوتبۆلێ دتۆماركرنا گۆلان دایە، براستی من هەموو یاری نەدیتن تنێ یاریێن هەر چار یانەیێن كوردستانێ، بەلێ ئەز دشێم بێژم كو دهۆك ب شاشییا گۆلپارێزی و نە پشكدارییا داینەمویێ تیمێ، دیسان نەبوونا هێرشبەرەكێ گۆلكەر هاتە دۆراندن، یانەیا زاخۆ پشتی پاشكەڤتنێ ب گۆلەكێ دنیڤا ئێكێ دا، خوە ئێخستە لبن گڤاشتنێ و ژلەزاتییێ نەشیا ڤەگەرێتە سەقایێ یاریێ، بەلێ هەر دێ مینیت رێژەیا نە ئامادەبوونا پشتەڤانان لیاریگەهان خالا لاۆازا ڤێ گەرێ، خالا هەرا باش ژی هەلویستێ پشتەڤانێن دهۆكێ بوون یێن كو پێشوازیەكا گەرم و گور ل هەردوو یانەیێن برا نەورۆز و هەولێرێ كرین، هەر ئەڤەیە یا مە ژ یانەیێن كوردستانێ بەری ئەنجامان  دڤێت، ب هیڤیا هندێ دگەرێن بهێت دا باشیێن خولێ پترلێ بهێن، لەوما دڤێت ئەم چاڤەرێ بین.