پشتی بورینا 16 گەران ژخولا ستێرێن ئیراقێ، دیارە یاری بۆ یاریێ هەڤركییا یانەیێن رێزبەندیێن ئێكێ بهێزتر لێ دهێت، ب تایبەت دناڤبەرا هەر شەش یانەیێن ئێكێ دا، ئەگەر لێكگوهارتنا جهان ڤەكێشیت و بەردەوام بیت ژ ئەگەرێ دەستدانا خالان، دبیت هژمارەكا یانەیێن خوارتر ژی بهێنە دناڤا هەڤركییێ دا و یانەیێن پێشییێ رێزبەندیێن خوە ژبەر نێزیكبوونا خالان ژدەست بدەن، هەرچەندە هژمارەكا یانەیێن دویماهییا لیستا خۆلێ یێن مەترسییا داكەڤتنێ دا ئەگەر زوو چارەسەریەكێ بۆ رەوشا خوە نەبینن، دبیت لڤی وەرزی نەمینە دخولا مەزنان دا، لێ تشتێ دلخوش ئەوە كو تا نها یانەیێن هەرێما كوردستانێ ژبەر وێ ئاستێ باش یێ تا نها پێشكێشكری د مەترسییێ دا نینن، هەردوو یانەیێن پارێزگەهێ دهۆك و زاخۆ یێن د هەڤركییا رێزێن پێشییێ دا، هەولێر و نەورۆز ژی یێن كار بۆ پتر پێشكەڤتنێ دكەن، بدەستڤەئینانا هەر ئێك ژ دهۆك و زاخۆ چار خالان ژ دوو یاریێن خوە یێن ڤێ داوییێ لدەرڤە یاریگەهێن خوە پتر گەشبینی بۆ جەماوەر و حەژێكەرێن خوە پەیداكر، كو دێ شێن د هەردوو مەیدانان دا سەركەڤتنان ئینن، ئەگەر پتر لسەر خوە بن و مفای ژوان دەلیڤەیان بینن یێن كو بۆ پەیدادبن، یا ژمن وەرە دخولا ڤی وەرزی دا هەر چەندە هێشتا هەر یانەیەكێ 22 یاری ماینە و گەلەك زوویە ئەم بەحسێ خودانێ ناسناڤی بكەین، بەلێ ژمن وەرە ئەو یانە دێ شێت گەهیتە هیڤیێن خوە و پشكداریەكا دەولەتی بدەستڤە ئینیت یێن كو ئەڤ ساخلەتە لدەڤ هەبن، یا ئێكێ هێزا پارەی هەبیت و بشێت تا دوویماهییا خولێ بێ ئاستەنگێن دراڤی كارێ خوە برێڤەببەت، یا دووێ پیشەكارێن یانەیان ب تایبەت یێن خودان سەربۆر و بەهرەمەند بەردەوامییێ ب ئاستێ خوە بدرێژاهییا خولێ بدەن، یا سێیێ رەوشا دەستەكێن كارگێریێن یانەیان و یێن راهێنانێ دچێگیر بن، یا چارێ ئەو یانەیا بشێت رەفتارەكا باش دگەل هەموو وان رەوشان بكەن یێن كو دكەڤنە درێكا تیمێن واندا، ژوانا هنگاڤتنێن یاریزانان یێن كو كارتێكرنێ لسەر ئاست و ئەنجامێن تیمێ دكەن، دیسان وان یاریان یێن كو لیاریگەها خوە ئەنجامددەن، ئەگەر ئەم گڤاشتنێن دەرونی یێن كو یاریزان توش دبنێ ژبیر نەكەین یێن كو كارتێكرنێ لسەر ئاستێ یاریزانان دكەن ب تایبەت دیدارێن چارەنڤیسی و ڤەبر دا، یا پێنجی َو ژهەمییا گرنكتر حەژێكەر و پشتەڤانێن تیمێ بەردەوامییێ ب هاندانا تیمێن خوە بدەن و مورالا یاریزانان بلند بكەن داكو بەردەوامییێ ب ئاستێ خوە یێ تەكنیكی بدەن، ئەگەر ئەڤ خالە بجه هاتن، من باوەریەكا تمام یا هەی كو یانەیێن مە دێ شێن بنە هەڤركێن بهێز دخولا ڤی وەرزیدا و دوور نینە بگەهنە هیڤی و ئارمانجێن خوە یێن مەزن.
نووترين نووچه
- سەرۆك بارزانی: عەبدولرەحیم عسمەت وانلی ژیێ خوە بۆ خەباتێ ژ پێخەمەت دۆزا رەوا یا گەلێ كوردستانێ تەرخانكربوو
- مەسرور بارزانی سەرەخوەشیێ ل كەسوكارێن قوربانیێن ئاگرێ دارستانێن كۆریایا باشوور دكەت
- ب سەرپەرشتییا سەرۆك بارزانی كوردێن سووریێ گەهشتنە رێككەفتنەكا دیرۆكی
- پەیاما سەرۆك بارزانی پشتەڤانییەكا ب هێز بوو بۆ گەلێ كورد
- سیپان شێروانی: 100 پەرلەمانتارێن ئیراقی بندیوارن
- هەرێما كوردستانێ و دەولەتا قەتەرێ دوپاتیێ ل سەر ب هێزكرنا پەیوەندییان د وارێ وزێ دا دكەن
- ل هاڤینا ئەڤسالە قونسلخانەیا مەزن یا ئەمریكا ل هەولێرێ دێ هێتە ڤەكرن
- رێكا گەشەپێدانێ د دهۆكێ را دەرباز دبیت
- مەحما خەلیل: مەترسییا دوبارە پێكدادانێ د ناڤبەرا یەپەشێ و لەشكرێ ئیراقێ دا ل شنگالێ یا هەی
- کوردێن رۆژئاڤایێ کوردستانێ بەرهەڤیان بۆ قۆناغەکا دیرۆکی دکەن
ئێحسان حه‌سه‌ن
سالا خواندنێ بدووماهی هات
هه‌موو قوتابی كه‌ڤتنه د بێهنڤه‌دانه‌كا هاڤینی یا درێژ دا بۆ پتر ژ سێ مه‌هان، بێ گۆمان خێزانێن قوتابیان هه‌ر ژ نها هزرا هندێ دكه‌ن كا دێ چه‌وا شێن ده‌مژمێرێن رۆژانه ئه‌وێن زارۆكێن وان ل قوتابخانه‌یان ده‌ربازدكرن پركه‌ن، ژبه‌ر كو قه‌بارێ ده‌مێ ڤالاهییێ یێ مه‌زنه و ده‌لیڤه یه كو ئه‌ڤ بێهنڤه‌دانه ببیته جهێ مفایێ و پێشكه‌ڤتنێ بۆ وان، دیاره هه‌لبژارتنێن زارۆكێن مه پتر د ڤالاهییان دا دیاردبن، هنده‌ك ژوان ده‌مێن خوه لبه‌ر شاشێن تی ڤی یان و تا دره‌نگی شه‌ڤێ دبورینن، هنده‌كێن دی لسه‌ر ته‌له‌فونێ دگه‌ل هه‌ڤالێن خوه هه‌ڤركیێن ئه‌لكترونی ب یاریێن جودا دكه‌ن، تیمه‌كێ دی بارا پتری ده‌مێن خوه لسه‌ر جاده و كولانێن مالا خوه دبورینن، سه‌رباری ڤان ره‌وشان هنده‌ك خێزان هه‌نه ڤی ماوه‌یی بۆ به‌رژوه‌ندییا زارۆكێن خوه بكار دئینن، ئه‌وژی بپشكدارییا وان د به‌رنامه‌یێن وه‌رزشی و هونه‌ری و ره‌وشه‌نبیری و جڤاكی دا، ده‌رباره‌ی چالاكیێن وه‌رزشی ب هه‌موو جورێن خوه‌ڤه ، بێ نه‌ڤێت دهێنه هژمارتن ژوان به‌رنامه‌یان یێن كو دبنه هاریكار بۆ خرڤه‌كرنا گه‌نجان و مفا وه‌رگرتن ژ ده‌مێن ڤالا، ژبه‌ر كو چالاكیێن وه‌رزشی كار دكه‌ن بۆ به‌رفرهكرن و به‌لاڤكرنا ره‌وشه‌نبیریا وه‌رزشی، دیسان بلندكرنا ئاستێ هشیاریێ لدۆر گرنگییا وه‌رزشێ بۆ مرۆڤی ژلایێ ساخله‌مییێ و باشكرنا شیانێن جه‌سته‌یی یێن گشتی، ژبلی وه‌رگرتنا پێزانین و زانیاریان لدۆر كارزانیێن زۆربه‌ی یاریان و رێنمایێن وان، دیسان ده‌لیڤه‌كا زێرینه بۆ دیاركرنا به‌هرمه‌ندان و ئاراسته‌كرنا وان بۆ به‌رده‌وامی دانێ ب به‌هرا خوه ل یانه‌یێن وه‌رزشی، ژبلی هندێ به‌رنامه‌یێن هاڤینێ كارتێكرنه‌كا زوور یا هه‌ی بۆ بجهئینانا ئارمانجێن په‌روه‌رده‌یی وه‌كو فێربوونا گیانێ وه‌رزشی و قه‌بوولكرنا ئه‌نجامان و گیانێ هه‌ڤالینی، پشت به‌ستن لسه‌ر خوه و باوه‌ری بخوه بوون و ساخله‌مییا ده‌رونی و مێشكی و هزری، ل دووماهییێ یا من دڤێت بێژم ما ده‌م به‌رنامه‌یێن وه‌رزشی یێن هاڤینێ ئێكه ژوان به‌رنامه‌یێن كاریگه‌ر ژ بۆ مفا وه‌رگرتنێ ژ ده‌مێن ڤالا د ماوه‌یێ بێهنڤه‌دانا هاڤینی دا و بجهئینانا ئاره‌زویێن قوتابیان، هیڤیا من ئه‌وه وه‌زاره‌تا په‌روه‌ردێ، رێڤه‌به‌ریا گشتی یا وه‌رزشێ، یانه‌یێن وه‌رزشی و بنگه‌هێن لاوان ل هه‌رێما كوردستانێ، بزاڤێن جدی بكه‌ن و به‌رنامه‌یێن خوه یێن وه‌رزشی بۆ زارۆكێن مه پێشكێش بكه‌ن بۆ هندێ مفای ژڤی ده‌مێ ڤالا بینن و وان دووربێخن ژ سه‌قایێ قوتابخانه‌یێ، دا كو ل پاشه‌رۆژێ ببنه مرۆڤێن كاریكه‌ر دناڤ جڤاكی دا، هه‌ر ئه‌ڤه یه ئارمانجا سه‌ره‌كی ئه‌وا وه‌رزش لسه‌ر هاتیه ئاڤاكرن.
خه‌لاتكرنا باشترین جه‌ماوه‌ر
نیڤا سێیێ
خه‌لاتكرنا باشترین جه‌ماوه‌ر
ئێحسان حه‌سه‌ن
كۆمان تێدا نینه كو رۆلێ جه‌ماوه‌ر و پشته‌ڤانێ فوتبۆلێ قه‌د كێمتر نینه ژ رۆلێ راهێنه‌ری یان یاریزانی، هه‌روه‌سا دبێژن جه‌ماوه‌رێ فوتبۆلێ وه‌كو فریزی و ته‌پێ و گۆلێ یه، بێ وان فوتبۆل ئارمانجا خو یا گرنگ به‌رزه‌دكه‌ت، د راستی دا ژی بابه‌تێ پشكداریا جه‌ماوه‌ری دچێكرنا فوتبۆلێ دا هنده‌ك جاران ژبابه‌تێن گرێدا ره‌وشا یاریان و هه‌ڤركییا دناڤبه‌را دوو تیمان دا ده‌ربازبوویه، ژبه‌ر وان ده‌نگ و قێریێن بلند دیسان ئه‌و تابلویێن جوان ئه‌وێن دناڤا یاریگه‌هاندا پێشكێش دكه‌ن، ئه‌ڤ وێنێن هه‌مه‌ره‌نگ هه‌تا كارتێكرنێ و خوشییێ دده‌نه وان بینه‌ران یێن كو لبه‌ر شاشێن تیڤیان ژی ته‌ماشه‌ی یاریان دكه‌ن، ژبه‌ر كو رۆلێ وان بۆ بلندكرنا زاخا یاریزانان مه‌زنتر لێ هاتیه، هه‌تا گه‌هشتییه هندێ كو ئارمانجا وان ژ ئه‌نجامێن یاریێ بهاترلێ بهێت، یا من دڤێت بێژم كو دناڤا یاریگه‌هێن مه دا لڤی وه‌رزی و تا نها دخولا ستێرێن ئیراقێ دا و هه‌تا د خولا كوردستانێ دا ژی، رێژا پشته‌ڤانان ب تایبه‌ت یێن یانه‌یێن كوردستانێ زێده‌تر بوون ژ پێشبینیان، ژبه‌ر ئامادبوونا وان یا به‌رفره چ دیاریكرنێن تیمێن وان دا دناڤا یاریگه‌هێن خوه دا، دیسان ژ ده‌رڤه، ژبلی وان و ێنێن جوان ئه‌وێن دناڤا په‌لوكێن یاریگه‌هێ دا نیشان دده‌ن تا گه‌هشتییه هندێ كو ئه‌وژی ببیته هه‌ڤركییه‌كا دی دناڤبه‌را واندا، به‌لێ جهێ داخی یه ئه‌م دبینین ب تایبه‌ت دڤان گه‌رێن دووماهییێ دا ژخولا ستێرێن ئیراقێ و ژبه‌ر ئه‌نجامان رێژا جه‌ماوه‌ری بۆ هاندنا تیما وان ڤیان لسه‌ر هه‌ی كێمتر لێ هاتیه، هه‌ر چه‌نده نه یا دروست و ره‌ایه حه‌ژێكرنا مه بۆ تیما باژێرێ خوه لسه‌ر ئه‌نجامان بهێته ئاڤا كرن، به‌لكو حه‌ژێكرنا مه پێدڤییه یا گرێدای دلی و گیانی بیت، هه‌رده‌م پالپشتێن سه‌ره‌كی بین بۆ وان نه تنێ د سه‌ركه‌ڤتنان دا، به‌لكو د دۆراندن و ژده‌ستدانا خالان دا ژی به‌رده‌وام بین لسه‌ر پشته‌ڤانییا خوه، ل دووماهییێ هیڤیا من ئه‌وه ئێكه‌تیا كوردستانێ دیسان یا ئیراقێ بۆ وه‌رزێ بهێت پێنگاڤه‌كێ نوو پاڤێژیت، هه‌ڤركییه‌كا دی ڤێ جارێ دناڤبه‌را جه‌ماوه‌رێ یانه‌یان دا په‌یدابكه‌ت، هه‌لسه‌نگاندنێ ژلایێ لژنه‌یه‌كا تایبه‌ت بۆ بكه‌ت و باشترینێ هه‌ر گه‌رێ وه‌كو رێژه‌یا ئامادبوونێ دیاربكه‌ت و ب گۆژمه‌كێ دراڤی خه‌لات بكه‌ت، دیسان ل ده‌مێ ئاهه‌نگا خه‌لاتكرنا سالانه یا سه‌ركه‌ڤتنێن خولێ و دیاركرنا باشترینێن وان ژیاریزان و راهێنه‌ران، خه‌لاته‌كێ تایبه‌ت لژێر ناڤ و نیشانێ باشترین جه‌ماوه‌ر ته‌رخان بكه‌ت، له‌وما دڤێت ئه‌م چاڤه‌رێ بین.
نیڤا سێیێ
پیرۆزه ل پایته‌ختێ نه‌ورۆزێ ناسناڤێ كوردستانێ
ئێحسان حه‌سه‌ن
مافێ خه‌لكێ پایته‌ختێ ئاكرێ یه شانازیێ ب تیما خۆ یا فوتبۆلێ ببه‌ت، ئه‌وا شیای ب سه‌رفه‌رازی و بۆ جارا ئێكێ ددیرۆكا خوه دا ب ناسناڤێ خولا نایابا كوردستانێ بهێته خه‌لاتكرن، سه‌رباری وه‌كهه‌ڤییێ ددیدارا خوه یا گه‌را داوییێ دا دگه‌ل مێڤاندارا خوه یانه‌یا چار قورنه بێ گۆل، ئه‌وا تیما پایته‌ختێ نه‌ورۆزێ بده‌ستڤه‌ئینای سه‌رباری وان كاودانێن نه‌باش ئه‌وێن دكه‌ڤتینه درێكا واندا ب تایبه‌ت د قۆناغا ئێكێ دا دهێته هژمارتن سه‌ركه‌ڤتنه‌كا دیرۆكی و كێم وێنه بۆ كورێن ڤی باژێری یێن كو مفا ژ سه‌ربورێن پێشین دیتین و شیاین پشتی چه‌ند وه‌رزان ب گه‌هشتنێ بۆ خولا مه‌زنێن كوردستانێ بگه‌هنه هیڤی و ئومێدێن خوه، ئاكرێ ناسناڤ دگه‌را دووماهییی دا ئێكلاكر، پشتی هه‌ڤركییه‌كا دژوار دگه‌ل هه‌ر ئێك ژ یانه‌یێن پێشمه‌رگه‌یێ هه‌ولێرێ هه‌لگرا ناسناڤی و یانه‌یا شێروانه كری ئه‌وێن لرێزێن دووێ و سێیێ لدووف ئێك هاتین، شیای 13 سه‌ركه‌ڤتن دگه‌ل 11 وه‌كهه‌ڤییان و شه‌ش دۆراندنان بینیت، 32 گۆلان تۆماربكه‌ت و24 گۆل لسه‌ر بهێنه تۆماركرن، 50 خالان كومبكه‌ت، بێ كومان ئه‌ڤ ده‌ستكه‌ڤتا هاتیه تۆماركرن ب هه‌روه نه‌هاته پێش، به‌لكو ژ ئه‌نجامێ هنده‌ك نهێنیان بوو، یا ئێكێ كارگێریا یانه‌یێ ئه‌وا هه‌ر تشته‌كێ پێدڤی بۆ سه‌ركه‌ڤتنا كاروانێ تیمێ به‌رهه‌ڤركی ژ دانانا كه‌مپێن راهێنانێ و رێكخستنا یاریێن هه‌ڤالینی و نێزیكبوون دگه‌ل ئاریشه‌یێن ده‌سته‌كا راهێنانێ و یاریزان و چارسه‌ركرنا وان دده‌مێن گونجای دا، یا دووێ ئه‌وا پلانا دكمه‌ن ئه‌وا تێدا تیما یانه‌یێ ئارمانجێن خوه د هه‌ر یاریه‌كێ دا ده‌ستنیشانكرین، دگه‌ل دویفچوونا ئه‌نجامێن تیمێن هه‌ڤركیێن خوه وه‌كو ئه‌نجامێن خوه، ئه‌ڤه پتر هاته په‌یروكرن ب تایبه‌ت دیاریێن داویێدا، یا سێیێ هه‌بوونا یه‌ده‌كه‌كێ باش كو قه‌د كێمتر نه‌بوون ژ یاریزانێن سه‌ره‌كی ب تایبه‌ت دیاریێن ڤه‌بر دا، یا چارێ دانا ئه‌ركێ راهێنانێ ب راهێنه‌رێ باژێرێ خوه یێ گه‌نج هه‌ژار سابری ئه‌وێ دنه‌خوشترین ده‌م دا تیم وه‌رگرتی و شیای ب شێواز و ته‌كتیكا خوه یا تایبه‌ت و خواندنا دورست بۆ تیمێن هه‌ڤرك ئه‌نجامێن مه‌زن و دیرۆكی تۆماربكه‌ت ، یا پێنجێ هه‌بوونا جه‌ماوه‌ره‌كێ دلسوز و وه‌فادار ل پشت ڤێ یانه‌یێ ئه‌وێن پشتا خوه نه‌دایه تیمێ دخوش و نه‌خوشییان چ دناڤا یاریگه‌ها خوه دا چ ژده‌رڤه، ژبلی نێزیكبوونا ده‌ستهه‌لاتا ده‌ڤه‌رێ و پشته‌ڤانییا وان ئه‌گه‌ره‌كێ هه‌ره مه‌زنێ ڤێ شانازیێ بوون، یا من دڤێت لدووماهییێ بێژم ئاكرێ ئه‌وا پێدڤی ب جه ئینا، ئه‌ز باوه‌رم پشتی بداوی هاتنا یاریكه‌ها وێ یا نوو ئه‌وا ب پشته‌ڤانییا سه‌رۆكێ حكومه‌تا هه‌رێما كوردستانێ رێزدار مه‌سرور بارزانی هاتیه نووژه‌نكرن، ئه‌ركێ وێ دێ بزحمه‌تر لێ هێت، ژبه‌ر كو پێدڤییه لسه‌ر پاراستنا ڤێ ده‌سكه‌ڤتێ بكه‌ت، چونكو وه‌رزشێ هووسا نیشا مه‌دا یه كو پاراستنا هه‌ر ده‌ستكه‌ڤته‌كێ ب زه‌حمه‌تره ژ گه‌هشتنێ، ژبلی هندێ كار لسه‌ر هنده‌ك خوینێن نوو ژ گه‌نجێن باژێری بۆ وه‌رزێ بهێت بكه‌ت، پیرۆزه ل باژێرێ نێرگزان و خه‌لكێ پارێزگه‌ها دهۆكێ ئه‌ڤ ده‌ستكه‌ڤتا ژ هه‌ژی.
نیڤا سێیێ
ئێحسان حه‌سه‌ن
وه‌رزشڤانێن دێرین ماف یێن لسه‌ر مه هه‌ی، پێدڤییه هه‌رده‌م ل بیرا مه بن و هنده‌ك جاران د هه‌لكه‌ڤتێن وه‌رزشی و كومه‌لایه‌تی دا بهێنه خه‌لاتكرن، ژبه‌ر رۆل و قوربانییا وان یا مه‌زن یا چه‌ندین سالان ئه‌وا پێشكێشی گه‌ل و وه‌لاتێ خوه كرین و بووینه نموونه بۆ به‌ربابێن نها، له‌وما پێدڤییه هه‌موو لایه‌ك بزاڤان بكه‌ن كو به‌رده‌وام فوكسێ بێخنه لسه‌ر وان كه‌سان یێن كو به‌ری پتر ژ 70 سالانه به‌ری بنیاتێ ئێكێ یێ پێشكه‌ڤتنا وه‌رزشێ ل كوردستانێ داناین، سه‌رباری وان ره‌وشێن بزحمه‌ت و دژوار یێن كو ئه‌و تێدا بورین ژنه‌بوونا پشته‌ڤانییێ و كه‌ل و په‌ل و ژێرخانه‌یا وه‌رزشی لسه‌ر ئه‌نجامێ وان سیاساتێن ئێك لدویف ئێك یێن حكومه‌تێن ئیراقێ یێن جودا، ڤان وه‌رزشڤانان به‌رده‌وامی دانه كاروانێ خوه یێ وه‌رزشی و جه‌كێ هه‌ڤركییێ هه‌لگرت، له‌وما پشتی بورینا چه‌ندین سالان و وان ڤه‌ده‌رمه‌ندیا خوه دگه‌ل وه‌رزشێ بداوی ئینای مافێ وانه بهێنه خه‌لاتكرن، هه‌ر چه‌نده ل هه‌رێما كوردستانێ به‌ری چه‌ندین سالان به‌رنامه‌یه‌ك بۆ خه‌لاتكرنا ڤان وه‌رزشڤانان هه‌بوو، به‌لێ ژ ئه‌گه‌رێ تێكلكرنا كه‌سێن وه‌رزشڤان و نه وه‌رزشڤان و زێدبوونا هژمارا وان و ره‌وشا دارایی یا نه‌باش ئه‌ڤ بروسێسه هاته ره‌واستاندن و به‌رده‌وامی پێ نه‌هاته دان، دیاره رێڤه‌به‌ریا گشتی یا وه‌رزشێ ل هه‌رێما كوردستانێ جاره‌كا دی پلانه‌ك دانایه كو ڤێ پروسێسێ ڤه‌گه‌رینته ڤه، شیا لڤێ داویێ هژماره‌كا وه‌رزشڤانێن دێرین ل هه‌موو پارێزگه‌هێن هه‌ریما كوردستانێ خه‌لات بكه‌ت، ئه‌ڤه كێمترین وه‌فادارییه بۆ شیانێن ڤان ستێران كو ببیته پالده‌ره‌ك بۆ نفشێن پاشه‌رۆژێ كو ئه‌وژی لدویف ریچكێ وان بچن، ما ده‌م ئه‌ڤ پێنگاڤه ب سوپاسی ڤه هاته هاڤێتن، ئه‌ز پێشنیار دكه‌م كو رێڤه‌به‌ریا وه‌رزشێ ل كوردستانێ یاسایه‌كێ ده‌ربێخیت بۆ چاڤدێریا وه‌رزشڤانێن دێرین كو تێدا پێدڤیێن وان دیسان كوژمه‌یه‌كێ پاره‌ی یێ هه‌یڤانه بۆ بهێته ته‌رخانكرن و ل رێكێن پشته‌ڤانییێ بۆ ڤێ پێنگاڤێ بگه‌ریێت، ئه‌ڤجا چ ل به‌رله‌مانێ كوردستانێ بیت، یان ل جڤاتا وه‌زیران بهێته‌په‌سه‌ندكرن، ژبلی هندێ ئه‌و كه‌سێن هه‌لسه‌نگاندنا وه‌رزشڤانێن دێرین دكه‌ن و خزمه‌تا وان پێشچاڤ دكه‌ن پێدڤییه ل ئاستێ هیخوازیێ بن، وان وه‌رزشڤانان ده‌ستنیشانبكه‌ن یێن كو ژهه‌ژی خه‌لاتكرنێ بن و ژیێ وان و خه‌باتا وان لبه‌ر چاڤ بهێته وه‌ررگرتن، خوه دوور بێخن ژ هه‌ڤالینییێ و مروڤ مروڤكانێ ورێ نه‌ده‌نه هنده‌ك كه‌سان كو خوه بكه‌نه خودانێن وه‌رزشه‌كێ كو گه‌له‌كا به‌ری وان ژیانا خوه دگه‌ل وێ وه‌رزشێ یا بوراندی، یان ژی ب پێزانین و سیڤیێن خه‌له‌ت یێن كو پێشكێشكرین لسه‌ر حسێبا وه‌رزشڤانێن دێرین یێن راست و دورست به‌ری وان بهێنه خه‌لاتكرن، یا من دڤێت لدووماهییێ ئه‌ز بێژم نها پتر ژ هه‌ر وه‌خته‌كی مه پێدڤی ب دانانا كومه‌له‌كێ یا جڤاته‌كێ بۆ خرڤه‌كرنا ڤان وه‌رزشڤانێن دێرین هه‌یه، كو به‌ره‌ڤانییێ ژ مافێن وان بكه‌ت، لڤێره من دڤێت وه‌كو به‌نگوازییه‌كێ بده‌مه رێڤه‌به‌ریا گشتی یا وه‌رزشێ ل هه‌رێما كوردستانێ و هه‌مو یانه و ئێكه‌تیێن وه‌رزشی و ستێرێن دێرین كو پێشگیریا هزرا دانانا ڤێ كومه‌لێ یان جڤاتێ بكه‌ن و پشته‌ڤانییێ لێ بكه‌ن، د شیان دایه دگه‌ل رۆژنامه‌ڤانێن وه‌رزشی و شاره‌زایێن یاسایێ به‌رنامه‌یه‌كی بۆ دانانا په‌یره‌وێ نافخویی یێ كارێ ڤێ كومه‌لێ بدانن، داكو ببیته چه‌تره‌ك كو هه‌موو وه‌رزشڤانێن دێرین ل دوور خوه كوم بكه‌ت، بشێت ئارمانجا خوه یا دورست بۆ خزمه‌تكرنا ڤێ ته‌خا گرنك یا جڤاكی بجه بینیت.
نیڤا سێیێ
ئێحسان حه‌سه‌ن
دبیت گه‌له‌ك دگه‌ل بووچونا من بن، كو پێدڤییه ده‌سكه‌ڤتێن قاره‌مانێن مه یێن وه‌رزشی لسه‌ر ئاستێن كه‌سوكی یان ژی تیمان ب هه‌موو یاریان وه‌كو به‌لگه‌نامه بێنه تۆماركرن، كو تێدا ده‌ستكه‌ڤتا هه‌ر یاریزانه‌كی یان قاره‌مانه‌كی ب دیرۆكا وی ڤه بهێته نڤێسین، ئه‌فجا چ ده‌ستكه‌ڤتا وی لسه‌ر ئاستێ خومالی بیت یان ژی نێفده‌وله‌تی بیت، ژبه‌ر كو نڤێسین و توماركرنا وێ دێ بیته به‌لگه‌نامه‌یه‌ك بۆ وی یاریزانی یان وی قاره‌مانی ودێ هێته پاراستن بۆ ده‌مه‌كێ دوور، ڤێجا به‌لگه‌نامه ب هه‌ر چ جۆر بیت چ جێوازی نینه یا گرنگ ئه‌وه ده‌ستكه‌ڤتا وی یاریزانی یان وی قاره‌مانی و دیرۆكا وی بێته ئه‌رشیفكرن، ئه‌وا نها ئه‌م تێبینی دكه‌ین و دبینین كو تا نها چ لایه‌نان خوه لڤێ چه‌ندێ نه‌كریه خودان ئه‌گه‌ر هه‌بن ژی پێنگاڤێن شه‌رمین بووینه، ژبه‌ر كو گه‌له‌ك جاران دێ بینین ده‌مێ یاریزانه‌كێ دێرین پێدڤی ب خرڤه‌كرنا هنده‌ك وینه‌یێن خوه یان فێدیویێن یاریێن خوه دبیت، چ تشتێ هوسا بده‌ست ناكه‌ڤن، له‌وما یا پێدڤییه لسه‌ر دام و ده‌زگه‌هێن وه‌رزشی چ یانه بن یان ژی ئێكه‌تیێن وه‌رزشی كو به‌شه‌كێ تایبه‌ت هه‌بیت بۆ خرڤه‌كرنا ده‌ستكه‌ڤتێن وه‌رزشڤانێن خوه و وه‌كو به‌لگه‌نامه لده‌ف خوه ب هه‌لگرن و پارێزن، ژبه‌ر كو مافێ ڤی یاریزانی یه پشتی چه‌ندین سالێن خزمه‌تێ و بده‌ستڤه‌ئینانا ده‌ستكه‌ڤتان، ویژی ئه‌رشیفه‌كێ تایبه‌ت ل وی جهی هه‌بیت ئه‌وێ به‌ره‌ڤانی ژناڤێ وی دكر، ژبه‌ر كو جهێ دلگرانیێ یه كو پشتی چه‌ندین سالێن خزمه‌تێ و ئه‌و ژییێ دگه‌ل وێ وه‌رزشێ بوراندی، هه‌موو ب هه‌روه بچیت یان بێته ژبیركرن، بۆ بجهئینانا ڤێ چه‌ندێ ژی پێدڤییه ل ده‌ستپێكێ ئه‌م گرنگییا به‌لگه‌نامه و ئه‌رشیفكرنێ بزانین، ژبه‌ر كا هه‌تا نها ئه‌م بهایێ وێ یێ دورست نزانین هه‌تا كو چه‌ند سال ب سه‌ر ڤه دچن، ئه‌ز باوه‌رم هه‌ر وه‌رزشڤانه‌كێ دێرین هه‌ست بڤێ چه‌ندێ دگه‌ت و گه‌له‌ك ئاریشه‌یان دبینیت تا كو بشێت به‌لگه‌نامه‌یه‌كێ بچویك بده‌ستخوڤه بینیت و هنده‌ك ژی هه‌ر نابینن، به‌لێ ئه‌گه‌ر بینیت كو بیردانكا وی یا وه‌رزشی یا هاتیه پاراستن یان یا ل جهه‌كێ پاراستی هه‌ی و دێ شێت بینیت، بێ نه‌ڤێت ئه‌ڤ به‌لگه‌نامه دێ ل پاشه رۆژێ بۆ وی وه‌رزشڤانی بنه ژێده‌رك بۆ هه‌بوونا وی، لدووماهییێ یا من دڤێت بێژم هیڤیا من ئه‌وه ئه‌ڤ پێشنیاره ب زویترین ده‌م بگه‌ڤیته وارێ جێبه‌جێكرنێ ب تایبه‌تی ل یانه‌یێن وه‌رزشی، ژبه‌ر كو به‌لگه‌نامه دیرۆكه، بێ ئه‌رشیفكرن ته چ دیرۆك بۆ وه‌رزش و وه‌رزشڤانێن خوه نابن.
نیڤا سێیێ
ئێحسان حه‌سه‌ن
پشتی پشككێشانا قاره‌مانییا كونیفا 2024ێ هاتیه كێشان، ژڤانێ وێ هاتیه دیاركرن كو دێ لدوماهییا هه‌یڤا گولانا بهێت ب پشكدارییا 14 هه‌لبژارتییان ل هه‌رێما كوردستانێ هێته رێكخستن، بێ نه‌ڤێت رێكخه‌رێن ڤێ چالاكییێ دێ كه‌ڤنه لبن به‌رپرسیاره‌تییه‌كا گرنك و مه‌زن دا، وه‌كو داب و نه‌ریته‌ك دیسان چارچووڤه‌یه‌ك یێن كو هه‌موو بسپۆر د كارگێریێن وه‌رزشێ لسه‌ر رێكه‌ڤتین، ئه‌وژی به‌لاڤكرنا ئه‌رك و كارانه برێكا پێكئینانا هژماره‌كا لژنه‌یێن بسپۆر و تایبه‌تمه‌ند داكو ببیته پالده‌ر بۆ سه‌ركه‌ڤتنا هه‌ر قاره‌مانییه‌كا وه‌رزشی، بۆ مێڤاندارییا قاره‌مانییا كونیفایێ ژی، یا گرنگ ئه‌وه كار لسه‌ر ڤان لژنه‌یان بهێته كرن، یا ئێكێ لژنه‌یا رێكخستنێ، پێدڤییه لسه‌ر ڤێ لژنه‌یێ خشتێ یاریان و ژڤانێن وان، ئه‌و یاریگه‌هێن یاریی لسه‌ر دهێنه كرن، هه‌ر لده‌ستپێكێ تا داویێ به‌رهه‌ڤ بكه‌ت، ژبه‌ر كو ئه‌و به‌رپرسێ ئێكێ یه د سه‌ركه‌ڤتنا قاره‌مانییێ دا، یا دووێ لژنه‌یا ته‌كنیكی، بێ گومان ئه‌ڤه بزحمه‌ترین لژنه‌یه ژبه‌ر هه‌ستییاریا كارێ وێ یێ گرێدای رێنمایێن ته‌كنیكی و یاسایی یێن قاره‌مانییێ، دیسان سه‌رپه‌رشتییا وان لسه‌ر ئه‌ركێن دادڤانییێ و رێڤه‌برنا یاریان د قاره‌مانییێ دا، بجهئینانا دادییێ دناڤبه‌را هه‌موو تیمێن پشكدار دا، یا سێیێ لژنه‌یا پێشوازی و مێڤانداریێ، ئه‌ڤ لژنه ژی رۆله‌كێ گرنك دبینیت ژبۆ ئاسوده‌ی و ره‌حه‌تییا هه‌موو پشكداران هه‌ر ژ پێشوازیكرنا مێڤانان ژ فروكخانه‌یان تا كو زڤرینا وان، بو ڤێ ژی پێدڤییه بۆ هه‌ر تیمه‌كێ رێكخه‌ره‌كێ تایبه‌ت هه‌بیت بۆ هندێ نه هێلیت چ ئاسته‌نك بگه‌ڤنه درێكا مێڤانان دا و هه‌موو پێدڤیێن وان چاره‌بكه‌ت، یا چارێ لژنه‌یا راگه‌هاندنێ، كارێ وێ ماركتینكا قاره‌مانییێ بۆ زۆربه‌ی ده‌زگایێن راگه‌هاندنێ برێكا هه‌ڤكارییێ دگه‌ل كه‌نال و مالپه‌رێن جودا و رۆژنامه‌یان، دگه‌ل به‌رهه‌ڤكرنا هه‌ر تشته‌كێ گرێدای بكارێ وان ڤه، دیسان رێكخستنا كونگرێن روژنامه‌ڤانی و هنارتنا راپورتان بۆ ده‌زگه‌هێن راگه‌هاندنێ، یا پێنجێ لژنه‌یا یاریگه‌ه و كه‌ل و په‌لان، كارێ ژی ئه‌وه‌بیت یاریگه‌هان بۆ یاریان دیسان بۆ راهێنانێن تیمان و هه‌ر تشته‌كێ پێدڤی بۆ پشكداران به‌رهه‌ڤبكه‌ت، یا شه‌شێ لژنه‌یا ڤه‌حه‌واندنێ و خوارنێ، پێدڤییه‌جهه‌كێ گونجای یێ ڤه‌حه‌واندنێ بۆ هه‌موو شاندێن پشكدار هه‌بیت، دگه‌ل دابینكرنا خوارنه‌كا ژ هه‌ژی مێڤانداریێ وان دگه‌ل به‌رچاڤكرنا جورێن وان به‌رهه‌ڤبكه‌ت، یا حه‌فتێ لژنه‌یا ڤه‌گوهاستنێ، ئه‌ركێ وان ژی ئه‌وبیت هه‌موو شاندێن تیمان بۆ جهێن ب مه‌به‌ست ڤه‌گوهێزیت، یا نه‌هێ لژنه‌یا نوژداری، ئه‌وژی به‌رهه‌ڤكرنا جهه‌كێ تایبه‌ت یێ نوژداریێ ل یاریگه‌ه و جهێن راهێنانێن تیمان ب هه‌ڤكاری دگه‌ل ده‌زگایێن نوژداریێ دگه‌ل دابینكرنا هه‌ر تشته‌كێ پێدڤی، یا ده‌هێ لژنه‌یا دارایی، كارێ وێ ژی ئه‌وبیت پارێ پێدڤی بۆ قاره‌مانییێ به‌رهه‌ڤ بكه‌ت، برێكا لژنه‌یێن تایبه‌ت ب مه‌زخیت و هویربینیا وان خه‌رجییان بكه‌ت، لدویماهییێ یا من دڤێت بێژم، ژبۆ سه‌ركه‌ڤتنا ڤان لژنه‌یان دڤێت هه‌موو ره‌نگێن هه‌ڤكاریێ و به‌لاڤكرنا ئه‌ركان دناڤبه‌را ئه‌ندامێن ڤان لژنه‌یان هه‌بیت، ئه‌گه‌ر مه وه‌كر ئه‌ز باوه‌رم دێ شێن ئێك ژ جوانترین رێكخستن ئه‌نجامداین، به‌لێ هه‌ر دێ مینیت پێكئینانا لژنه‌یه‌كێ ژ گه‌نجێن خوه به‌خش و تیمه‌ك و كادره‌كێ راهێنانێ یێ ژهه‌ژی درێسێ كوردستانێ دوور ژ ناوچه‌گه‌ری ورازیكرنا ئێك و دوو، كلیلا هه‌ره مه‌زن یا سه‌ركه‌ڤتنا ڤێ قاره‌مانییێ .
نیڤا سێیێ
ئێحسان حه‌سه‌ن
بریارێن ڤه‌بر و مه‌زن د وه‌رزشێ دا بارا پتر ژ ئه‌نجامێ ڤه‌كولینێن زانستی و شرۆڤه‌كرنێن پراكتیكی و لوژیكی و ژلایێ بسپۆر و خودان باوه‌رنامه‌یێن زانستی دهێنه دانان، ژبه‌ر هندێ ده‌مێ بریار لسه‌ر زێده‌كرنا هژمارا یاریزانێن پیشه‌كار دخولا ئیراقێ دا بۆ یانه‌یێن پلا نایاب، یان خولا كوردستانێ هاتیه دان، كو هه‌ر یانه‌یه‌ك دشێت هژماره‌كا پیشه‌كاران ژده‌رڤه‌ی عیراقێ بینته دناڤ رێزێن تیما خۆدا بێ گۆمان وان ئارمانج پێ هه‌یه، ئه‌وژی ئه‌وه كو ئاستێ خۆلێ و هه‌ڤركییێ بهێزتر لێ بهێت، دیسان فوكسا راگه‌هاندنێ ژی پتر بكه‌ڤیته سه‌ر خولێ ب هه‌بوونا ڤێ هژمارا زور یا یاریزانان ژ وه‌لات و كێشوه‌رێن جودا، و ئه‌ز باوه‌رم یێن كو داخوازا ڤێ رێژه‌یا یاریزانان دكه‌ن به‌رێ خۆ دده‌نه ڤێ ره‌وشێ ژ چارچوڤه‌یێ به‌رژوه‌ندییا تیمێن خۆ بێ كو به‌رێ خۆ بده‌نه به‌رژوه‌ندییا یاریكه‌رێ باژێرێ خوه و ئه‌و زیانێن ڤێدكه‌ڤن، ژبلی هندێ چاڤێن وان یێن ل ئه‌نجامێن وه‌ختی ئه‌وێن تیمێن وان بده‌ستڤه دئینن و تۆماركرنا دیرۆكێ ئه‌گه‌ر لسه‌ر بنیاته‌كێ نه‌یێ دروست ژی بیت، یا من تێبینی كری كو به‌رده‌وامی دان ب هه‌بوونا ڤێ رێژه‌یا یاریكه‌رێن بیانی و زێده‌بوونا وان دخولێن مه یێن جودا دا بڤێ ئاستێ ئه‌م نوكه دبینن كو گه‌له‌ك ژوان ژهه‌ژی درێسێ تیمێن مه نینن، تنێ هه‌در دانا پاره‌یه نه زێده‌تر، ژبه‌ركو به‌رده‌وامییا ڤێ پروسێسێ كوشتن و بنبركرنا هیڤیێن یاریزانێ مه یێ كوردستانێ یه، دیسان رێگرتنه به‌رامبه‌ر وان داخوازیێن به‌رده‌وام دهێنه كرن كو پێدڤییه هه‌موو یانه كار لسه‌ر چێكرنا شه‌نگستێ یاریكه‌ران بكه‌ن و ل ژیێن بچوویك ده‌ستپێبكه‌ن و پشته‌ڤانییێ لێ بكه‌ن، هه‌روه‌سا ده‌لیڤه‌یا پشكدارییا لاوێن مه ژی بزه‌حمه‌تر لێدكه‌ت كو جهێ خۆ دناڤا تیما ئێكێ دا بكه‌ن ب هه‌بوونا ڤێ رێژه‌یا مه‌زن یا یاریزانان، ژبه‌ر هندێ یا باشتر ئه‌وه پشتی پتر ژ 20 سالان ژ پشكداریان دخۆلێن مه‌زن دا مه كار لسه‌ر هندێ كربا كا دێ چه‌وا شێین ڤێ رێژێ كێم كه‌ین، وئه‌م گه‌هشتباینه چاره‌سه‌ریه‌كێ هه‌تا لده‌ستپێكێ یا ناڤنجی ژی با، بۆ وه‌رزێن بهێت مه كارێ جدی لسه‌ر كربا و ئه‌م ب ئه‌نجام ده‌ركه‌ڤت باین، بلا ئه‌ڤ پارێ زێده ئه‌وێ دچیته دبه‌ریكێن ڤان یاریزانێن بیانی دا كو گه‌له‌ك ژوان دبێ مفا نه، بۆ چێكرنا یاریگه‌هان و هۆلێن وه‌رزشی یێن وه‌رزشڤانێن ژیێن بچویك هاتبا مه‌زاختن، ئه‌گه‌ر مه وه‌كر هنگی دا بێژین ئه‌م یێ كار ب پلان و به‌رنامه دكه‌ین، نه‌ك كارێ به‌ره‌لایی !.
نيشاندان
WP Facebook Auto Publish Powered By : XYZScripts.com