فــازل میرانــی
ل دەستپێكێ ب پیرۆزباهیا هەشتێ سالیا حیزبا مە ل هەر ئەندامەك و دۆستەكێ حزبا مە دكەم.
ب ڕێز و نەوازش ڤە گیانێ شەهیدێن مە و گیانێ بارزانی بابێ نەتەوا كورد و ئیدریسێ جانەمەرگ برایێ هەر خەباتگێڕەكی ل بیر دئینم، هەروەسا ئەنییا هەر كەسەكی ماچی دكەم یێ كو ڕێیا ڕزگاركرنا كوردستانێ و پاراستن و بەرزكرنا گەلێ وێ هەلبژارتی.
پەیڤ نكارن دەرهەقێ رێبازا حزبا مە دەربكەڤن و باس لێ بكەن، ئەڤجا چاوا بكارن دەربڕینێ ژ قەبارەیێ قوربانیێن وی و ئەو كار و دەستكەفتیێن مەزن كو بۆ مللەتی بدەستڤە ئیناین؟
مێژوو دێ ل ناڤا هەموو پارچەیێن كوردستانێ تشتەكی بینیت و هەر وەسا ژی ل وەلاتین پەنابەریێ و یێن جهنشیبوونێ، و هەموو وان دەڤەرێن دەربەدەریی یێن كو مللەتێ مە تێدا ژیایین، ژ ئەگەرێ هندێ كو بۆ خۆ ل پەناگەهەكێ ڕزگاربوونێ هەلبژێرن، دێ جه و ئاستێ پێشەنگیا یا شەرەفمەندانە بینیت، ژ راكرن ستەمێ ل سەر گەلێ مە ب خەتیرێن ڕۆناهیێ كو بەر ب چیایان بلندبوویی و بەر ب ڕۆهنكرنا دەشتان ڤە شۆڕبووی.
حزبا هەوە، خویشك و برایێن من، كچ و كوڕێن من، ئەڤ ڕێكخستنە یاكو ب هەبوونا هەوە، ب ئەقلێ هەوە و هەلبژارتنا هەوە و خۆڕاگری و ئیرادەیا و بەردەوامبوونا هەوە ب قوربانیدان و تێكۆشەرێن گەلێ مە ب خەباتێ ل سەر خۆ، بەخشینا هەوە ب رەنجا خۆ و ب خوینا خۆ پێخەمەت وێ، ئاڵایێن خۆی بەرزكری.
مستەفا بارزانی و پارتیا مە ناڤەندا بڕیاردانا نەتەوەیی و نیشتمانپەروەرانە بووینە و هەر ئەو رێباز ژی هەر دێ مینیت ژی، هەر وەسا ڕێگر بووینە ل بەرانبەر ڕوودانێن داخبار و د بەردەوامن ژی ئەگەر ڕووبدەت.
خۆ ل بەرییا كۆنگرەیێ ئێكێ ژی ژ پێش هەشتێ سالان ژی.. گیانێ دامەزراندنا حیزبا مە وەك قەوارەیەكێ ڕێكخستی خۆی دەردئێخست كو هەڤتەریب بیت ل گەل رێرەوێ ڕوودانێن سیاسی ب ئاستی دەولەتەكێ و ب ئاستی بزاڤێن ڕزگاریخواز یێن جیهانی. هزر و تێكۆشانا مستەفا بارزانی ئەو هێزا سەرەتاییانە بوون كو سەرنجا وان دەستهەلاتداران بكێشیت كو جڤاك و خاكێ مە كۆنترۆل دكر ژ ئەوان شاشیێن ل دەهەرقی مە كرین و بۆ ئەوا كو دێ تووش بیتێ چەندی كوراهیێ بهەلبژێرن.
ئەگەر مە نەخشە و بەلگەنامەیێن وێنەدار و فیلمێن دیكیۆمێنتاری یێن كوردستانێ بۆ لێكۆلینێ بەرهەڤكرن د ناڤبەرا دو ڕۆژان ژ و دو سالان كو هەشتێ سال د ناڤبەرێ دا بن، ئێدی جوداهیەكا مەزن دێ د دەستكەفتان دا دیار بیت، كو دێ ب رەنگێ ئاڵایێ كوردستانێ و حزبا مە بیت، ب رەنگێ وێ خوینا ژ مێژە هاتیە رێتن.
ئەگەر ئێمە دویڤداچوونا پێشكەفتنا جڤاكا خۆ بكەین كو شارستانیتر و ئارامتر و لێبۆردەتر بوویە، ب ڕۆهنی هاندانا بارزانی و حزبا خۆ د پەروەردەكرنا ئەڤێ پێشكەوفتنێ دا دێ بینین.
ئەگەر سەرەخۆشیا خۆ ئاراستەی كەسوكارێن قوربانییان بكەین، وەختی تێرا مە نەدكر، و نە دشیایین ب تەمامی ناڤچیێن جوگرافی بگرینە بەر.
ئەگەر ئەم هەر قوربانییەكا كو ل پێناڤی ئازادیێ ژ لایێ گەلێ خۆ و حزبا خۆڤە بەڵگەدار بكەین، دا هینگی خەلك ب مەزناهیا وان سەرسوڕمان مینن. ئەگەر ئەردێ مە شیابا باسێ هەر خەباتكارەكێ گەلێ مە و حزبا مە بكەت، كو پیێ خۆ دانابیت، یان خەندەقەك كۆلا بیت، یان پەنا بۆ شكەفتەكێ بر بیت، یان شەهیدببیت، یان بریندار ببیت، دا ئەو زەحمەت دیار بیت كو دەشت و چیا تێكڤەداینە.
هەر جۆتیارەك و شڤانەك، هەر مامۆستا و دختۆرەك، هەر ژنەك كو نان و شیر ب پێشمەرگێن مە بەخشی بیت، هەر دیلەك د بندیخانەیێ دا و هەر كەسێك كو ل پێناڤی میللەتێ مە ل سێدارێ دا بیت، هەر زارۆیەك كو ل ناڤ ئاوارەیێ و بۆردۆمانێ و هەلمەتا ئەنفالان دا ژناڤچوو بیت- هەموویان هەناسەیەكا بارزانی ل ناڤ هناڤێن خۆ دا هەلگرتنە و بۆ كوردستانێ ژی گەنجینەكا قوربانیدانێ هەلگرتینە.
ئەڤ هەموو قوربانیدانانە، ل گەل قەبارێ دەردەسەریان، ئەو ژ ئەقلێ حاكمەكی هاتیە كو ناهێتە دیتن كو دادپەروەری ب هەژی بیت ل گەل بهێتە جێبەجێكرن.
هەر دیسا سەرەڕای ئەو هەمیا كو ب سەرێ مە هاتی، ئەم ب هێزتر و خۆڕاگرتر بووین و هەروەسا ژی دێ مینینەڤە و زێدەتر، ئیرادەیا مە بۆ بەردەوامبوونێ ل سەر رێبازێ دێ مینیت. هوون كۆڕێن مستەفا بارزانینە، كو ل هەر پارچەكێ خەتیرەك هەلگرتی ڕۆهن كو هەتا ئەڤڕۆ ژی دبرسقیت. حزبا مە زەمینە بۆ هەوە خۆشكریە، بەرسڤا دوژمنی دایە كو وەل میراتگرین دوژمنی كریە حسابەكێ بكەن ژ پێش هندێ وێرەكیێ بدەنە خۆ هێرشكەنە سەر مە. هوون ژی كۆرێن شۆڕشێن ئیلۆن و گوڵانێ، كۆڕێن سەرهلدانێ و خۆراگریان، برایێن دڵسۆن بۆ هەر كەسێ تووشی ئاگرێ دوژمنان بووی و شێوازێن تۆقاندنێ و برسیكرنێ و دوورخستنێ بووین.
هوون ئاڤاكەرێن ئەڤی سەردەمینە، هوونن شانازیێ ببەن كو حزبا هەوە ستەمكاری ناچاركرینە ئەو دەستوورێن كەڤن دەربێخیت كو هەبوونا مە و مافێن مە دسەلمینیت. هوون میراتگرێن ڕێككەفتنا ئادارێنە و بەیاننامەیێن پێشیا وێ ژی كو دان ب مافێن مە دداینە. ب سەبر و خۆڕاگریا هەوە هەموو باهۆز تێپەڕینە و چ و ژ وان نەشیاینە ئیرادەیا مە ژ ڕەهان بیننە دەر.
حزبا هەوە بوویە هێزەك كو هەڤكێشەیا راست دورست دكەت نەكو تەنها ژمارەیەكە تێدا، كو نەزانەك یان كەسەك ب ئەنقەسد ژێ ببەت، یان كێم بكەت.
ڕەه و ڕویشالێن وی یێن ڕێكخستنێ د ناڤ ئەردی دان دچاندینە و چقێن وی ژی ل بەر ئەسمانینە. كوردستان، ب هەوە و ب و هەموو مرۆڤێن چاك، بەردەوامە ل سەر ڕێیا ئاڤاكرنا مرۆڤایەتێی و خاكێ خۆ، دڵسۆز بۆ ئەركێ خۆ، چرایێ بەخشندەیێ و درەوشاوەیێ و چاكیێ ل هەرجهەكی بیت.
هوون نونەرایەتیا ئێك ژ مەزنترین كەسایەتیێن مرۆڤایەتیێ دكەن؛ هوون نوونەرایەتیا مستەفا بارزانی دكەن، ئەو مرۆڤێ بۆ میللەتێ خۆ و گەلێ خۆ ژیایی و وەغەركری.
پیرۆزە ل هەموو ڕێكخستنێن پارتیا مە و پێشمەرگێ مە و سەرجەم ئۆرگانێن وێ دكەین.
هەموو سۆز و شانازی بۆ هەڤالێن حیزبا – و ئەو ژی گەلەكن – و بۆ هەموو لایەنگر و هەڤسۆزێن ل گەل نەتەوا مە.
پیرۆز بیت ئەو تێكۆشانێن كو ژ پێش هەشتێ سالان دەستی پێ كرین و ئەو كادر بەرهەمئیناین كو ژ ڕوویێ سیاسی، سەربازی، ڕێكخراوەیی، میدیا، قانوونی، كارگێڕی، ئەولەهی، هۆشیاری، هونەری و پەیوەندییان ڤە دەرئێخستین.
پیرۆزە ئەم جەژنە یاكو هەژی ئاهەنگ و بیرئیانینێ یە. نویكرنا ئەو كارێ ب ڕاستی و ب زیرەكانە دكەین بۆ هندێ ئاڵایێن مە بەسەركردایەتیا سەرۆكێ مە مەسعوود بارزانی، ل كوردستانا خۆشتڤی، كوردستانا ئازادیێ و دیموكراسی و پێكڤەژیانا ئاشتیانە، ب شانازی ڤە بەردەوام بلند ببن.
وەرگێران: شێرزاد نایف
