عەلی حاجی:

بڕیاره‌ ئه‌ڤرۆ ل ده‌مژمێر پێنجێ ئێڤاری تیما یانه‌یا زاخۆ دناڤ ئه‌رد و جه‌ماوه‌رێ خوه‌ دا مێڤاندارییا یانه‌یا حه‌شد ئه‌لشه‌عبی یا به‌غدایی بكه‌ت ئه‌وا دێ ژ چارچووڤه‌یێ هه‌ڤڕكیێ گه‌ڕا 15ێ یا خولا پیشه‌كارێن ئیراقێ ل هۆلا گرتییا بنگه‌هێ وه‌رزش و لاوێن زاخۆ هێته‌ كرن.
تیما كوڕێن خابووری ب كۆمكرنا 22 خالان رێزا شه‌شێ دهێت ژ هه‌شت سه‌ركه‌فتن و شه‌ش خوساره‌تییان، د به‌رانبه‌ر دا یانه‌یا حه‌شد ل رێزا سێیێ دهێت ب كۆمكرنا 23 خالان، ئه‌ڤ یارییه‌ بۆ هه‌ردو یانه‌یان یا گرنگه‌ تایبه‌ت بۆ زاخۆییان ئه‌وێن هه‌موو هیڤی و ئارمانجا وان رێزێن پێشیێ یه‌.
ل دۆر دووماهی به‌رهه‌ڤێن تیا زاخۆ موراد عه‌لی كاپتنێ سه‌ره‌كی بۆ رۆژنامه‌یا ئه‌ڤرۆ گۆت: یارییا به‌رانبه‌ر حه‌شد ئه‌لشه‌عبی بۆ مه‌ گه‌له‌ك گرنگه‌ و هه‌موو یاری ب هێزن، دێ پشت گه‌رمی ب جه‌ماوه‌رێ خوه‌ یێ دلسۆز كه‌ین و هه‌موو یاریزان به‌رهه‌ڤن بۆ سه‌ركه‌فتنێ، دبیت ئه‌ركێ مه‌ ب سانه‌هی نه‌بیت لێ رژدین ژبۆ ئارمانجا خوه‌، تیما مێڤان ژی خودا شیانن و رێزبه‌ندییا وێ به‌لگه‌یه‌، له‌وما دێ یارییه‌كا بهێز بیت.
هه‌روه‌سان ناڤهاتی گۆت : هه‌ر ژ ده‌ستپێكا وەرزێ ئەڤ سالە ل سەر شێوەیەکێ ڕاست و دروست مە شیایه‌ ئاستێ خوە بلندتر بکەین ژبەرکو تیما مە د قوناغا ئاڤاکرنێ دا بوو و ئەم پێدڤی دەمی بوین هەتا کو مە شیایی هەماهەنگیێ دناڤبەرا یاریزانێن نوو و یێن کەڤن دا دروست بکەین،د نوکە دا تیما مە ل سەر ڕێیەکا دروست دچیت و من شیا ڤێ چەندێ ب دەلیڤە ببینم، ئارمانجا مە دڤێت کارەکێ باش بکەین و هەڤرکییا ناسناڤێ خولێ بکەین ژبەرکو ئەو شیاینە لدەف تیما مە هەنە.

د داخویانیەكێ‌ دا ئەندامێ‌ فدراسیۆنا فوتبۆلا ئیراقێ‌ دیار كر ئەوان داخواز ژ وەزارەتا دارایی یا حوكمەتا ناڤەندییا ئیراقێ‌ كرییە شایستەیێن داریی یێن هەموو یانەیێن پشكدار د خولا ستێرێن ئیراقێ‌ بهێتە دان و بێ‌ جوداهی یێن یانەیێن كوردستانی ژی بهێتە دان.
غالب ئەلزاملی گۆت: ب نڤێسارەكا فەرمی مە داخواڤ ژ وەزارەتا دارایی یا ئیراقێ‌ كرییە زووترین دەم دا شایستەیێن دارایی یێن حوكمەتا ئیراقێ‌ بۆ یانەیان تەرخانكری بهێنە دان ژبەركو پرانییا ئەوان یانەیێن پشكدار د خولا ستێرێن ئیراقێ‌ دا تووشی ئالۆزیێن داریی بووینە و پێدڤی ب شایستەیانە ژبۆ دانا قستێن یاریزانان و بڕێڤەبرنا كاروبارێن خوە و كرییا ڤەگۆهاستنێ‌ و ئۆتێل و دانا قەرێن خوە، هەكە زووترین دەم نە هێتە دان دوور نینە كارتیكرنێ‌ ل سەر خولێ‌ بهێتە كرن و یانە هەبن ئێدی ئەو شیانێن پشكداریێ‌ نەبن.
ژلایەكێ‌ دیڤە ناڤهاتی ئەوچەندە گۆت: شایستەیێن دارایی بۆ هەموو یانەیێن پشكدار دڤێت بهێتە دان و دڤێت یێن یانەیێن كوردستانی ژی بۆ بهێنە دان ئەوێن دخولا ستێرێن ئیراقێ‌ و ناچێیت جوداهی هەبیت، یا دروست ئەوە و دڤێت وەرزشێ‌ ژ هەر تشتەكێ‌ دی دوور بكەن و تێكەلی ئێك نە كەن.
بۆ زانین بەری ماوەیەكی لژنەیا دارایی ل ئەنجوومەنی نوونەرانی ئیراقی لژنەیەكا تایبەت پێكئینایە ژبۆ دۆڤچوونا شایستەیێن دارایی یێن یانەیێن كوردستانی ل سالێن 2024 و 2025ێ‌ ئەوێن پشكدار د خولا ستێرێن ئیراقێ‌ دا.

چاڤەڕێ‌ دهێتە كرن ئەڤرۆ ژی سێ‌ یاریێن دی ژ هەڤڕكیێن گەڕا 14ێ‌ یا خولا ستێرێن ئیراقێ‌ یا فوتبۆلێ‌ بهێنە ئەنجامدان، هەڤڕكیێن دژوار دێ‌ د ناڤبەرا یانەیێن پێشیێ‌ یێن جەماوەری هێتە كرن ژبۆ پاراستن و ئارمانج رێزێن ئێكێ‌ هێتە كرن.
دهۆك بەرانبەر خودانا سەرێ‌ لیستێ‌ د گرنترین یاری دا
ئەڤرۆ ل دەمژمێر 7:30 شەڤ جەماوەرێ‌ وەرزشی یێ‌ یانەیا دهۆك دێ‌ چاڤەڕێ‌ گرنگترین یارییا تیما خوە بن كو دهێـتە هژمارتن كۆپیتكا یاریێن گەڕا 14ێ‌ یا خولێ‌ دەمێ‌ ل یاریگەها خوە مێڤاندارییا یانەیا جەوییە یا بەغدایی دكەت، ئەلهۆیێن چیا د دەمكێ‌ باش دەربازدكەن تایبەت پشتی ئەنجامێن باش و شیایین ل رێزێن بەری دووماهیێ‌ پێشڤە بهێنە رێزا شەشێ‌ ب كۆمكرنا 21 خالان ژ شەش سەركەفتنان، سێ‌ وەكهەڤی هەنە دبەرانبەر دا چار خوسارەتی ژی هەنە، لێ‌ یارییا ئەڤرۆ یا ب سانەهی نابیت ژبەركو دێ‌ بەرانبەر تیمەكێ‌ كەن ل سەرێ‌ لیستا خولێ‌ نە ب كۆمكرنا 28 خالان كو هەشت سەركەفتن و چار وەكهەڤی هەنە بتنێ‌ ئێك خوسارەتی هەیە، بۆ ڤێ‌ یاریێ‌ ئەلهۆیێن چیا دێ‌ پشت گەرمییا وان ب پشتەڤانییا جەماوەر و ئەردێ‌ خوە بیت.
ستێرا یانەیا دهۆك گەشبینە و ڕژدن بۆ ئەنجامەكێ‌ باش
ل دۆر بەرهەڤیێن تیما دهۆكێ‌ بۆ ڤێ‌ یاریێ‌ هارۆن ئەحمەد كاپتنێ‌ تیمێ‌ بۆ رۆژنامەیا ئەڤرۆ گۆت: پێنەڤێت یاری بەرانبەر خودانا سەرێ‌ لیستێ‌ و ئێك ژ تیمێن مەزن و خودان شیان ب سانەهی نابیت، هەموو یاریزان بەرهەڤن، ڕاهێنەرێ‌ تیمێ‌ بۆ چەند رۆژە د یەكەیێن ڕاهێنانێ‌ دا پلانێن باش داناینە، هەكە یاریزانەك هەبیت شیانێن پشكداریێ‌ نەبیت ڕاهێنەری كار ل سەر كرییە ژبۆ پێگوهۆڕێ‌ سەركەفتی، ئەم رژدین بەردەوامیێ‌ بدەینە ئاست و ئەنجامێن خوە یێن باش، یاری دناڤ ئەرد و جەماوەرێ‌ مە دایە و دێ‌ پشت گەرمیێ‌ ب پشتەڤانێن خوە كەین.
راهێنەرێ‌ جەوییە: مە كێماسیێن هەین و بەرانبەر دهۆكێ‌ ئەركێ‌ مە بزەحمەتە
ژلایێ‌ خوەڤە لوئەی سەلاح ڕاهێنەرێ‌ یانەیا جەوییە ئەركێ‌ تیما خوە بەرانبەر یانەیا دهۆك ب سانەهی نابینیت و گۆت: ئەو دەمێ‌ مە تیم وەرگریتی چەند كێماسی هەبووینە و هێشتا ماینە، لێ‌ ئەم هەموو بزاڤان دكەین بۆ هەر یارییەكێ‌ باشتر بین، هێشتا گەلەك یاری ماینە و كاروانێ‌ درێژە، یارییا بەرانبەر دهۆكێ‌ ب ئەركەكێ‌ ب زەحمەت دانینە زانین.
گۆلكەرێن تیما دهۆكێ‌ كینە؟
بۆ زانین حەفت یاریزانان پشكداری د تۆمار كرنا 17 گۆلان دا هەیە بۆ یانەیا دهۆكێ‌ و بڤی ڕەنگی، پاشەنگ عەبدوللا چپێنج گۆل، پیتەر گۆرگیس چار گۆل، هەر ئێك ژ كەریم دەرویش و شەرقی ئەلبەحری دو گۆل هەنە، هەروەسان هەر ئێك ژ بەیار ئەبۆ بەكر، یانیك زاكێری، و كێلبرت كۆمسۆن گۆلەك تۆماركرینە، گۆلەك بۆ یاریزانەكێ‌ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر
شورتە چاڤ ل خوسارەتییا جەوییە یە
هەر ژ یاریێن ئەڤرۆ تیما یانەیا شورتە خودانا رێزا دویێ‌ ب 26 خالان دێ‌ ل یاریگەها شەعب مێڤاندارییا یانەیا نەفت میسان كەت ئەوا 21 خال كۆمكرین ل رێزا هەشتێ‌ دهێت ئەڤ یارییە دەمژمێر پێنجێ‌ ئێڤاری هێتەكرن، شورتە دێ‌ بزاڤێن سەركەفتنێ‌ كەت و چاڤ دێ‌ ل خوسارەتییا جەوییە بن ژبۆ وەرگرتنا سەرێ‌ لیستێ‌.
نەورۆز دێ‌ بزاڤێن ڤەگەڕاندنا هێزا خوە كەت
ژلایێ‌ خوەڤە تیما یانەیا نەورۆز ل یاریگەها خوە مێڤاندارییا یانەیا كەرخ ب هیڤیێن ڤەگەڕاندنا ئاست و ئەنجامێن خوە یێن باش ئەوا د نوكە د ابتنێ‌ 14 خال كۆمكرین ل رێزا 17ێ‌ دهێت كو جهەكێ‌ مەترسیدارە بۆ پاشڤەچوونا پلا نایاب، دبەرانبەردا كاودانێن كەرخێ‌ ژی د باش نینن ئەو ابتنێ‌ 12 خال كۆمكرین رێزەكێ‌ كێمترە ژ نەورۆز، ل دەستپێكا خولێ‌ هەردو یانە ب هێز هاتبوونە دناڤ خولێ‌ دا و هەتا بۆرینا حەفت گەڕان ژی ریزێن پێشیێ‌ بوون، لێ‌ یاریێن ڤێ‌ دووماهیێ‌ ب خوسارەتییان پاشڤە برنە رێزێن دووماهیێ‌، ئەڤ یاریە دێ‌ ل دەمژمێر دویێ‌ پشتی نیڤرۆ هێتە كرن.
.
هەلوەستێ‌ گشتی یێ‌ رێزبەندییا خولێ‌ بەری دەستپێكرنا یاریێن گەڕا 14ێ‌ بڤی رەنگی یە.
1- جەوییە 27 خال.
2- شورتە 26 خال.
3- زاخۆ 25 خال.
4- زەورا 25 خال.
5- نەفت 23 خال.
6- دهۆك 21 خال.
7- تەلەبە 21 خال.
8- نەفت ئەلمیسان 21 خال.
9- هەولێر 19 خال.
10- نەجەف 18 خال.
11- ئەلكەرمە 16 خال.
12- ئەلمینا 16 خال.
13- كارەبا 15 خال.
14- ئەلقاسم 15 خال.
15- كەربەلا 15 خال.
16- نەفت ئەلبەسرا 14 خال.
17- نەورۆز 14 خال.
18- ئەلكەرخ 12 خال.
19- دیالا چار خال.
20- ئەلحدود سێ‌ خال.