سۆران ، ره‌مه‌زان زه‌كه‌ریا:
سالح ئیبراهیم یوسف برادۆستی، خودانێ تۆمارگه‌ها (ئیخلاس) ددیداره‌كێ دا بۆ رۆژناما ئه‌ڤرۆ گۆت: سالا 1970 من ئه‌ڤ تۆمارگه‌هه ل سۆران ڤه‌كریه و پشتی بۆرینا سێ سالان مووله‌تا كاركرنێ وه‌رگرت و به‌ری ڤه‌كرنا تۆمارگه‌هێ ژی من هه‌موو ئامیرێن تۆمارگه‌هێ ل مال هه‌بوون.
سالحی گۆت: به‌رێ گوهدارێن سترانان پتر بوون و رۆژانه خه‌لكه‌كێ زۆر بۆ كڕینا كاسێتان سه‌ره‌دانا تۆمارگه‌هێ دكرن، ب تایبه‌تی كاسیتێن سترانێن فۆكلۆری، نوكه خواست هه‌ر مایه به‌لێ ژبه‌ر ئه‌نته‌رنێتێ خواست ل سه‌ر كڕینا كاسێتان كێم بوویه و وه‌ك جاران نه‌مایه، به‌لێ نوكه ژی هونه‌رمه‌ندێن ناڤدارێن فۆكلۆرێ كوردی هه‌ر جه‌ماوه‌رێ خوه مایه، نوكه ئه‌رشیفه‌كێ گه‌له‌ك مه‌زن یێ سترانان ل ده‌ف من هه‌یه، ره‌نگه هنده‌ك ژوان ل چو جهان نه مابیت، پشكه‌كا ئامیرێن سالێن 1960 یه، هنده‌ك كاسێت ده‌ف من ماینه ژیێ وان 35 سالن، هنده‌ك ئامیره ب پاره‌كێ باش دهێنه فرۆتن، به‌لێ ئه‌ز نافرۆشم و من وه‌ك بیرهاتن هه‌لگرتینه، ئه‌ز ب خوه گه‌له‌ك حه‌ز ژ ده‌نگێ هونه‌رمه‌ندێ مه‌زن (محه‌ممه‌د عارفێ جزیری) دكه‌م و رۆژانه گوهداریا سترانێن وی دكه‌م، بۆ زانین به‌ری شه‌ڕێ دژی داعش رۆژانه هه‌تا 200 دۆلاران داهات هه‌بوو، نوكه كێم بوویه به‌لێ هه‌ر ده‌بارا خوه پێ دكه‌ین، من وه‌سیه‌ت كریه ئه‌گه‌ر بمرم ژی زارۆیێن من ل سه‌ر هه‌مان كار د به‌رده‌وام بن بۆ پاراستنا سترانێن ره‌سه‌ن یێن كوردی.
نيشاندان