ئه‌ڤرۆ، هه‌رهین محه‌مه‌د:

شێوه‌كارا گه‌نج هێلین سیرۆان كو كچا شێوه‌كار سیروان شاكریی یه‌ د دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ گۆت: كه‌ڤالان ژ هه‌موو جوران چێدكه‌م و مه‌ره‌ما من ئه‌وه‌ هه‌سته‌كێ‌ خوه‌ش بده‌نه‌ چاڤێ‌ مرۆڤی و ل گه‌ل تێكه‌ل كومه‌كا ره‌نگا و پتریا كه‌ڤالێن من  ئاشوپی نه‌، ئانكو دناڤ كه‌ڤالی دا ئاگر و بوركان و گه‌له‌ك تشتێن دی وه‌كو زه‌خره‌فێ‌ تێدا دیاردكه‌ن، به‌لێ‌ هه‌تا نوكه‌ ئێش و ئازارێن من و یێن ژنان و جڤاكی من نه‌كرینه‌ كه‌ڤال، چونكو حه‌زدكه‌م كه‌ڤالێن من خوشیه‌كێ‌ ب گه‌هینن و نه‌خوشیا ناكه‌مه‌ كه‌ڤال دا ئه‌و نه‌خوشیه‌ نه‌هێنه‌ بیرا مرۆڤی جاره‌كا دی.

هێلینی گۆت: بابێ‌ من گه‌له‌ك پشته‌ڤانیا مه‌عنه‌وی بۆ من كریه‌ هه‌تا گه‌هشتیمه‌ ڤی ئاستی و مال هه‌موو كه‌ڤال و ره‌نگ بووینه‌ و هه‌ر ژ زارۆكینیا خوه‌ ژی من حه‌زا وێنه‌چێكرنێ‌ و ره‌نگان هه‌بووویه‌ و ل دووڤ كه‌ڤالی دمینت كا چه‌ند ل سه‌ر كاردكه‌م، چونكو هنده‌ك كه‌ڤال هه‌نه‌ ب ره‌نگێن زه‌یتی دهێنه‌ چێكرن و هه‌تا هشك دبن ژنوو من ب زه‌خره‌فێ‌ ب پێنوسی ل سه‌ر چێكربا و دكه‌ڤالێن خوه‌ دا هه‌موو ره‌نگان ب كاردئینم و من چو ره‌نگێن ده‌ستنیشانكری نینن دكه‌ڤالان دا ب كاربینم و من كه‌ڤالێن خوه‌ ژی فرۆتینه‌  و ئه‌و كه‌ڤالێن من چێكرین هه‌ر وه‌كو من پرته‌كا روحا خوه‌ تێكه‌ل كری و حه‌زدكه‌م ل جهێن گشتی بهێنه‌ هه‌لاویستن و به‌رچاڤكرن.

ئه‌ڤرۆ، كاوین جیهاد ته‌حلاڤی:

پشی ١٠ سالێن بێده‌نگیێ و به‌لاڤنه‌كرنا چ به‌رهه‌مێن هونه‌ری، هونه‌رمه‌ند سه‌لاح ئه‌مین دێ ب به‌رهه‌مه‌كێ نوو ڤه‌گه‌ریته‌ د ناڤ كارێن هونه‌ری دا، سترانا وی یا نوو ژی ناڤه‌رۆكا وێ به‌حسێ چیرۆكێن راست یێن ڤی ده‌می دكه‌ت.

سه‌لاح ئه‌مین دیار دكه‌ت كو سترانا وی یا نوو بابه‌تێ وێ ئه‌ڤینی یه‌ و ژ په‌یڤ و ئاوازێن وی ب خوه‌نه‌ ل تۆن ستودیۆ هاتیه‌ ریكۆردكرن، ئه‌ڤ به‌رهه‌مه‌ ژ ئالیێ كه‌نالێ وار ڤه‌ دهێته‌ به‌رهه‌مئینان و كلیپكرن، كلیپ ژ ده‌رهێنانا، فیراس وه‌عه‌د و ژ وێنه‌گرتنا، خه‌یری خه‌لیله‌، و گۆت: “ڤه‌گه‌ڕیانا من یا ئه‌ڤ جاره‌ دێ ب هێز و تاما به‌رهه‌مێن من یێن جاران بیت”.

هونه‌رمه‌ند سه‌لاح ئه‌مینی ئه‌و ژی دیاركر كو راسته‌ ناڤه‌رۆكا وێ به‌حسێ‌ سه‌ربوور و ئه‌و چیرۆكێن راسته‌ قینه‌ یێن ڤی سه‌رده‌می دكه‌ت كو كچ ل دووڤ كه‌سه‌كێ ده‌وله‌مه‌ند دگه‌ریت، كو وێ هزرێ دكه‌ت دێ ب ته‌مامی ژیانا وێ هێته‌ گوهۆڕین، لێ ده‌مێ وێ پێنگاڤێ د هاڤێژیت وه‌سا ده‌رناكه‌ڤیت، و ل دووماهیێ په‌شیمان دبیت و ل ئه‌ڤینا خوه‌ یا كه‌ڤن ڤه‌دگه‌ریته‌ ڤه‌، و هه‌ر چه‌نده‌ په‌یڤ من ب خوه‌ نڤیساینه‌، لێ ده‌ربرینێ ژ وێ چه‌ندێ ناكه‌ت كو ئه‌وه‌ ئه‌ز به‌حسێ سه‌ربوور و ژیانا خوه‌ بكه‌م، به‌لكو ئه‌ڤه‌ بوویه‌ره‌ ل وه‌لاتێ مه‌ گه‌له‌ك روودده‌ن.

ده‌رباره‌ی بێده‌نگیا خوه‌ سه‌لاحی دیاركر كو ژ به‌ر ئه‌ركێ خوه‌ یێ سه‌ربازی و وان كاودانێن ب سه‌ر هه‌رێما كوردستانێ دا و ب تایبه‌ت شه‌رێ دژی تیرۆرستێن داعشێ بۆ ده‌مه‌كێ‌ درێژ بێده‌نگ مابووم، لێ من ب فه‌ر دیت كو د ڤێ قووناغێ دا و ب پشته‌ڤانیا كه‌نالێ وار دووباره‌ ب دروستكرن و به‌لاڤكرنا ڤی به‌رهه‌می خزمه‌تا هونه‌رێ كوردی و حه‌زژێكه‌رێن ده‌نگێ خوه‌ بكه‌م.

ئه‌ڤرۆ، زنار تۆڤی:

سترانبێژ سه‌رحه‌د شاهین، خه‌لكێ‌ باژێرێ‌ وانێ‌ یه‌ ل باكوورێ‌ كوردستانێ‌ و نوكه‌ ژی ل هه‌مان باژێر دژیت، د دیداره‌كێ‌ دا بۆ رۆژناما ئه‌ڤرۆ دیار كر: ئه‌ڤه‌ ده‌مێ‌ 11 سالانه‌ ئه‌و ب ره‌نگه‌كێ‌ پرۆفشنال د وارێ‌ گۆتنا سترانا كوردی دا كار دكه‌ت، هه‌تا نوكه‌ سێ‌ كلیپ تۆمار كرینه‌ و دووماهی سترانا وی ب ناڤێ‌ ” یه‌مان ” بوویه‌، كو به‌ری هه‌یڤه‌كێ‌ ئه‌و سترانه‌ به‌لاڤ كریه‌، د هه‌مان ده‌م دا ئه‌و گه‌له‌ك حه‌ز ژ سترانێن فولكلۆری دكه‌ت و دیسان وی پشكداری د چه‌ندین به‌رنامێن هونه‌ری ژی دا كریه‌.

سه‌رحه‌د هێشتا دبێژیت ژی: بۆ سالا نوو ژی،چه‌ندین كارێن هونه‌رێن یێن نوو لبه‌ر ده‌ستێ‌ وی هه‌نه‌ و نوكه‌ ئه‌و كار ل سه‌ر وان به‌رهه‌مان دكه‌ت، ئه‌و دێ‌ چه‌ندین سترانێن سینگل و كلیپان ژی به‌لاڤ كه‌ت، هه‌روه‌سا ل باكوورێ‌ كوردستانێ‌ د وارێ‌ مۆزیكا كوردی دا مه‌ هنده‌ك پرسگرێك هه‌نه‌، ئه‌و گه‌نجێن نوو ده‌ركه‌فتین و ئه‌وێن سترانان دبێژن، حه‌ز دكه‌ن تشتێن نوو پێشكێش بكه‌ن و كارێن خو ب رێیا سۆشیال میدیایێ‌ به‌لاڤ دكه‌ن، ئه‌و نه‌شێن وه‌كو پێدڤی هونه‌رێ‌ خوه‌ پێشكێش بكه‌ن و ئه‌و زیانێ‌ دگه‌هیننه‌ هونه‌رێ‌ كوردی، ئه‌ز ره‌خنێ‌ ل وان كه‌سان دگرم، چونكی مه‌ هونه‌ره‌كێ‌ زه‌نگین و پاقژ هه‌یه‌، له‌وما دڤێت ئه‌م ب ره‌نگه‌كێ‌ باش خزمه‌تا وی هونه‌ری بكه‌ین.

ناڤهاتی گۆت: مالباتا من گه‌له‌ك پشته‌ڤانی ل من كریه‌، كو ئه‌ز سترانان بێژم، هه‌روه‌سا هه‌ڤال و كه‌سێن نێزیكی من ژی گه‌له‌ك هاریكاریا من كریه‌، كو ئه‌ز سترانێن كوردی بێژم، من لبه‌ره‌ هه‌تا دووماهیا ژیێ‌ خوه‌ ئه‌ز خزمه‌تا هونه‌رێ‌ كوردی بكه‌م و سترانان بێژم، ئه‌ز حه‌ز  ژ ده‌نگێ‌ هه‌موو هونه‌رمه‌ندێن كورد دكه‌م، لێ‌ ئه‌ز پتر گۆهداریا ده‌نگێ‌ شاكرۆیی و ره‌شۆ و عه‌یشه‌شانێ‌ و مریه‌مخانێ‌ و ئه‌سلیكا قادر و عه‌بدالێ‌ زه‌ینكێ‌ و شڤان په‌روه‌ری و ئایدنی و جوان حاجۆیی و كاراپێتێ‌ خاچۆیی دكه‌م.

سه‌رحه‌د هێشتا دبێژیت ژی: ئه‌ز گه‌له‌ك حه‌ز ژ سترانێن دویت ژی دكه‌م، ئه‌ڤ جۆرێن سترانان ره‌نگێ‌ ده‌نگێ‌ مرۆڤی دیار دكه‌ت، ئه‌ز حه‌ز دكه‌م ل گه‌ل هونه‌رمه‌ندێ‌ كورد شڤان په‌روه‌ری سترانه‌كا دویت بێژم، ئه‌ز هیڤیدارم ئه‌ڤ داخوازیا من بجه بهێت، ئه‌ز دێ‌ ب ڤی كارێ‌ خوه‌ گه‌له‌ك كه‌یف خۆش بم، هه‌روه‌سا نوكه‌ كارتێكرنا ستران و مۆزیكا توركی گه‌له‌ك ل سه‌ر یا كوردی هه‌یه‌ و د هه‌مان ده‌م دا مۆزیكا كوردی ژ ئالیێ‌ توركان ڤه‌ هاتیه‌ دزین، نوكه‌ ژی كارێ‌ دزینا مۆزیكا كوردی ژ ئالیێ‌ سترانبێژێن تورك ڤه‌ یا به‌رده‌وامه‌، دیسان یا ژ هه‌موویێ‌ خرابتر ئه‌وه‌، هنده‌ك سترانبێژێن كورد هه‌نه‌، مۆزیك و سترانێن كوردی د دزن و دكه‌نه‌ توركی و وان سترانان ب زمانێ‌ توركی دبێژن، ئه‌ڤ چه‌نده‌ گه‌له‌ك من د ئێشینیت.

ئه‌و سترانبێژه‌ هێشتا دبێژیت: هه‌كه‌ تورك مۆزیك و سترانێن مه‌ ب دزن و بێژن، ئه‌م دابێژین، ئه‌و توركن و حه‌ز ژ كوردان ناكه‌ن، لێ‌ كورد یێ‌ موزیكا خوه‌ د دزن و ب زمانێ‌ توركی دبێژن، ئه‌ڤ چه‌نده‌ بۆ مه‌ گه‌له‌ك یا نه‌خۆشه‌، ئه‌وێن ڤی كاری ژی دكه‌ن هه‌موو كوردن، ئه‌ڤ چه‌نده‌ جۆره‌كێ‌ خیانه‌تێ‌ یه‌ ل هونه‌رێ‌ كوردی، هه‌روه‌سا هه‌تا نوكه‌ هه‌موو كه‌نالێن كوردی ل باكوورێ‌ كوردسانێ‌ ژ ئالیێ‌ ده‌وله‌تا تورك ڤه‌ هاتینه‌ داخستن و ڤێ‌ چه‌ندێ‌ كارتێكرنه‌كا نه‌رێنی ل سه‌ر هونه‌رێ‌ كوردی كریه‌ و خه‌لك كار و به‌رهه‌مێن مه‌ ل سه‌ر شاشێن تیڤیان نابینن، له‌وما خه‌لكێ‌ مه‌ نه‌چاربوویه‌ گۆهداریا سترانێن توركی بكه‌ن، ب تنێ‌ ئه‌م كارێن خوه‌ ل سه‌ر سۆشیال میدیایێ‌ به‌لاڤ دكه‌ین، دیسان داخوازا من ژ خه‌لكێ‌ مه‌ ئه‌وه‌، كو سترانێن خوه‌ بێژن و گۆهداریا سترانێن كوردی بكه‌ن، چونكی گه‌له‌ك كچ و خۆرتێن مه‌ ل باكوورێ‌ كوردستانێ‌ زمانێ‌ خوه‌ نوزانن و ب زمانێ‌ توركی د ئاخڤن، ئه‌ڤ چه‌نده‌ ژی زیانێ‌ دگه‌هینیته‌ ملله‌تێ‌ مه‌.