زاخۆ، عه‌لی حاجی:

شێوه‌كارا گه‌نج (هێلین نه‌وفه‌ل حسێن) د دیداره‌كێ‌ دا بۆ رۆژناما ئه‌ڤرۆ دیاركر كو به‌ری چه‌ندین سالان حه‌زا چێكرنا وێنا ل ده‌ف وێ‌ هه‌بوو، لێ‌ ژبه‌ركو خودان زارۆك بوو ده‌لیڤا كاركرنێ‌ بۆ وێ‌ یا ب زه‌حمه‌ت بوو هه‌تا سالا 2015 ب دروستی ده‌ستپێكر و نوكه‌ پرانیا كارێ‌ وێ‌ ل دووف داخوازیانه‌.

هێلینێ‌ گۆت: د ژیه‌كێ‌ بچووك دا من هه‌ستپێكر كو به‌هره‌یه‌ك ل ده‌ف من هه‌یه‌، ئه‌وژی چێكرنا وێنێن مرۆڤان كو ئه‌م دبێژینێ‌ (پۆرترێت) لێ‌ ب راستی كاودانان ده‌لیڤه‌ نه‌دا ئه‌ز ده‌ست پێبكه‌م، دووڤدا من شووكر و ئه‌ز بوومه‌ خودان زارۆ هێشتا ب زه‌حمه‌تر لێ‌ هات، هه‌تا سالا 2015 ئه‌م هاتینه‌ زاخۆ زارۆیێن من مه‌زن بوون من دیت وانژی حه‌زا چێكرنا وێنا هه‌یه‌، له‌ورا گه‌له‌ك جاران من و وان پێكڤه‌ وێنه‌ دمالێ‌ دا چێدكرن و من خوه‌ دیت دێ‌ شێم باشتر كاركه‌م له‌ورا ب دروستی من ده‌ستپێكر و نوكه‌ ل دووف داخوازیان كاردكه‌م، ئانكو هنده‌ك كه‌س داخواز دكه‌ن وێنێ‌ وان چێكه‌م ئه‌ز بۆ وان چێدكه‌م، هه‌روه‌سا گه‌له‌ك جاران كه‌ڤالێن شێوه‌كاری ژی چێدكه‌م و من پشكداری د دو پێشانگه‌هێن هه‌ڤپشك دا كریه‌ ل دهۆك و زاخۆ و نوكه‌ ژی من چه‌ندین كه‌ڤال هه‌نه‌.

ناڤهاتیێ‌ گۆت: ده‌مێ‌ ئه‌م ل مووسل ژبه‌ر كاودانان من نه‌شیا خواندنا خوه‌ ب دووماهی بینم، لێ‌ من ل به‌ره‌ ل سالا بهێت بچمه‌ زانكۆیا دهۆك پشكا شێوه‌كاری ب خووینم و دێ‌ بزاڤێ‌ كه‌م داهێنانێ‌ بكه‌م هه‌تا دبمه‌ شێوه‌كاره‌كا باش ل سه‌ر ئاستێ‌ كوردستانێ‌.

دهۆك، شاكر ئه‌تروشی:

شیار ئالیانی، ئه‌كته‌ر و هه‌لبه‌ستڤانێ‌ به‌رنیاسێ‌ رۆژئاڤایێ‌ كوردستانێ‌، كو خه‌لكێ‌ گوندێ‌ دێرۆنا ئاغێ‌ یه‌، سه‌ر ب دێركا حه‌مۆی ڤه‌، د دیداره‌كێ‌ دا بۆ رۆژناما ئه‌ڤرۆ گۆت: ئه‌ز ئێك ژ دامه‌زرێنه‌رێن كۆما نارین یا فولكلۆری مه‌، كو ل سالا 1982 ل باژێرێ‌ قامیشلۆ هاتیه‌ دانان و ڤێ‌ كۆمێ‌ گه‌له‌ك خزمه‌تا چاند و هونه‌رێ‌ كوردی كریه‌، هه‌روه‌سا به‌ری وێ‌ كۆمێ‌ ئه‌ز ئه‌كته‌ر بووم و من پشكداری د چه‌ند شانۆگه‌ریان دا كریه‌ و من چه‌ند ده‌قێن شانۆیێ‌ ژی نڤیسی نه‌، هه‌روه‌سا من چه‌ند كه‌ڤالێن شێوه‌كاری ژی چێكرینه‌ و ل گۆڤارێن (الحریه‌ و الهدف) به‌لاڤ بووینه‌، زێده‌باری نڤیسینا هه‌لبه‌ستان ب زمانێن كوردی و عه‌ره‌بی و نوكه‌ سێ‌ دیوان د به‌رهه‌ڤن بۆ چاپێ‌ و ئه‌ز یێ‌ بزاڤێ‌ دكه‌م دئه‌ڤ ساله‌دا ئێكێ‌ چاپ بكه‌م.

ناڤبری، كو ل شواتا سالا 2015 وه‌ره‌ وه‌ك ئاواره‌ ل كه‌مپا گه‌ویلان ل سنۆرێ‌ قه‌زا به‌رده‌ره‌ش دژیت، هێشتا گۆت: گه‌له‌ك هه‌لبه‌ستێن من بووینه‌ ستران و ب ده‌نگێ‌ (مه‌ده‌نی جه‌میل و شڤان جزیری و كۆما نارین و كۆما زێوه‌ و كۆما یه‌كێتی) و چه‌ند سترانبێژێن دی هاتینه‌ گۆتن و نوكه‌ ژی چه‌ند سترانێژ مژوولی تۆماركرنا هنده‌ك سترانانه‌ كو ئه‌وژی ژ په‌یڤێن منن و به‌ری نوكه‌ من پشكداری د چه‌ند كۆرێن هه‌لبه‌ستخواندنێ‌ دا كرینه‌، ب تایبه‌ت ل سه‌ر ده‌مێ‌ ریفراندۆمێ‌ و هه‌كه‌ هاریكاریا من بهێته‌ كرن من چه‌ندین پرۆژێن هونه‌ری و ئه‌ده‌بی هه‌نه‌ دێ‌ شێم بجه ئینم.

دهۆك، هه‌رهین محه‌مه‌د:

ئه‌كته‌رێ‌ كۆمێدی (سه‌عید حه‌سه‌ن) د دیداره‌كی َدا بۆ ئه‌ڤرۆ گۆت: راسته‌ ئه‌ڤه‌ ده‌مه‌كه‌ ژ زارڤه‌كرنێ‌ دوور كه‌فتیم و هه‌ڤالێن من یێن كۆما (په‌یام) نوكه‌ كاردكه‌ن، به‌لێ‌ ژبلی كارێ‌ هونه‌ری كاره‌كێ‌ دی ژی یێ‌ حكومه‌تێ‌ دكه‌م و هه‌كه‌ به‌س ده‌م ب گونجیت یێ‌ ئاماده‌مه‌ ل گه‌ل وان كاربكه‌م، چونكو ئه‌م ل گه‌ل ئێك دجوانین و د نوكه‌ دا پتریا زارڤه‌كه‌ران كارێ‌ ریكلامێن جهێن جودا جودا دكه‌ن و گه‌له‌ك جهان ژی داخواز ژ من كرینه‌ ریكلاما وان بكه‌م، به‌لی َمن نه‌ڤێت خوه‌ ب كارێ‌ ریكلامان ڤه‌ بكه‌م.

سه‌عیدی گۆت: رۆلێ‌ كه‌سێن دین من ب باشی گێراینه‌ و دهێته‌ هژمارتن ژ رۆلێن ب زه‌حمه‌ت و هه‌ڤالێن من ژی یێن زارڤه‌كه‌ر دشێن رۆلێن كه‌سێن دین ب گێرن، لێ‌ پتر ل گه‌ل كه‌سایه‌تیا من دگونجن و رۆلێن تراژیدی ژی من گێراینه‌ دۆفلمێ‌ (نه‌خش) دا دیسان ل سالا 1983 ل فیسته‌ڤالا شانۆیێ‌ من شانۆگه‌ری ژی گێراینه‌، به‌لێ‌ سالانه‌ فلمه‌ فیسته‌ڤالا دهۆكێ‌ دهێته‌ گێران و مه‌ داخواز ناكه‌ن و ئه‌ز به‌رپرسێ‌ كۆما په‌یامم ل ئامێدیێ‌ و سالانه‌ ل په‌یمانگه‌ها هونه‌رێن جوان گه‌له‌ك قوتابی ژ پشكا شانۆیێ‌ ده‌رچن بۆچی هه‌تا نوكه‌ كه‌سێ‌ جهێ‌ مه‌ نه‌گرتیه‌ و دیاره‌ ئه‌م د ئاستێ‌ وی كاری دا نینن.

ل دووماهیێ‌ گۆت: هونه‌ر نوكه‌ بۆ هونه‌رمه‌ندان وه‌كو خارنێ‌ یه‌ و نه‌شێن بێ‌ هونه‌ر بژین، به‌لێ‌ د نوكه‌ دا هونه‌رمه‌ند نه‌شێت خوه‌ ب كارێ‌ هونه‌ری خوه‌ خودان بكه‌ت و هه‌كه‌ ئه‌ز ب هیڤیا كارێ‌ خوه‌ یێ‌ حكومی ڤه‌ نه‌بام دا ل نانی گه‌رم، به‌لێ‌ زارڤه‌كرنێ‌ بینه‌ره‌كێ‌ مه‌زن دایه‌ من و رێزێ‌ ل من و كارێ‌ من دگرن و چو ژ من نه‌ وه‌رگرتیه‌.

خانكێ‌، دلڤین ره‌شید:

رۆژنامه‌ڤان (به‌ختیار قادر ئوسمان) د دیداره‌كێ‌ دا بۆ رۆژناما ئه‌ڤرۆ دیاركر، ئه‌و ده‌رچویێ په‌یمانگه‌ها ته‌كنیكی كارگێری/دهۆك پشكا رۆژنامه‌ڤانی ل سالا 2011 ب دووماهی  ئینایه‌، ئه‌ڤه‌ ده‌ه ساله‌ دوارێ‌ راگه‌هاندنێ‌ دا كاردكه‌ت، وه‌كو په‌یامنێر ل رۆژناما ده‌نگێ لالش و كۆڤارا سنێله‌ و ئه‌ندامێ ده‌سته‌یا نڤیسینێ ل سایتێ تۆرا لالش و ئێزدیخان نیۆز كاركریه‌ و هه‌تا نوكه‌ بێ‌ به‌رده‌وامه‌.

ناڤهاتی گۆت: راگه‌هاندن ل ده‌ستپێكێ وه‌كو پێدڤیه‌كا ژیانێ بوو بۆ من، به‌لێ پشتی ل پشكا رۆژنامه‌ڤانی ل په‌یمانگه‌هێ هاتیمه‌ وه‌رگرتن حه‌زا كاركركرنێ‌ زێده‌تر لێ‌ هات و  بێگۆمان هه‌ر كاره‌كێ مرۆڤ ل ده‌ستپێكێ ئه‌نجام بده‌ت چ پێ نه‌ڤێت دێ هنده‌ك ئاسته‌نگ هه‌بن هه‌تا كو بگه‌هیته‌ ئارمانجا خوه‌، دیسان دڤێت مرۆڤ قوربانیێ بده‌ت هه‌تا تشتێ بڤێت ب ده‌ستڤه‌ بینیت، له‌ورا ئه‌ز ژی د كاری دا تووشی گه‌له‌ك تشتێن ب زه‌حمه‌ت بوویمه‌ به‌لێ ب باوه‌ری خوه‌ بوونێ و پلانێن رێكخستی من كاری د سه‌ردا زالببم، هه‌روه‌سا ماموستا و هه‌ڤال و بنه‌مالا من گه‌له‌ك پشته‌ڤانی ل من كرینه‌ و پشته‌ڤانێ‌ پتر هێزێ دده‌ته‌ مرۆڤی كو ب وێره‌كانه‌ بكه‌فته‌ دمه‌یدانا كاری دا و هه‌كه‌ ئه‌ز  رۆژنامه‌ڤان نه‌بابم من دخواست ببمه‌ ماموستا.

ل دووماهیێ‌ گوت: پێدڤیه‌ كه‌سێن دوارێ‌ راگه‌هاندنێ‌ دا كاردكه‌ن ب پیشه‌یی كارێ خوه‌ بكه‌ن و ئه‌ته‌كێتێن رۆژنامه‌ڤانیێ‌ ل به‌رچاڤ وه‌ربگرن، چنكو راگه‌هاندكار پره‌كه‌ دناڤبه‌را ده‌سه‌لاتێ و خه‌لكی دا، هه‌روه‌سا پتر خوه‌ ل كێشێن خه‌لكی بكه‌نه‌ خودان و ژێده‌ر و پێزانینێن باوه‌رپێكری وه‌ربگرن دا تشتێ‌ راست و دروست بگه‌هیننه‌ خه‌لكی، هه‌روه‌سا ئه‌و بابه‌تێن دبنه‌ ئه‌گه‌رێ تێكدانێ‌ و ئێشاندنا جڤاكی نه‌ ئازرینن و پتر ده‌نگێ خه‌لكی بگه‌هینن و خوه‌ نێزیكی ژین و ژیارا رۆژانه‌ یا خه‌لكی بكه‌ن.

هه‌له‌بجه‌، عه‌زیز هه‌ورامی:

ژیان به‌رزان، دیزاینه‌ره‌كا جلكێن كوردی یێن ژنایه‌ ل پارێزگه‌ها هه‌له‌بجه‌ و ب كارێ‌ خوه‌ شیایه‌ هه‌تا راده‌كی هاریكاریا مالا خوه‌ بكه‌ت، هه‌روه‌سا ده‌لیڤا كاركرنێ‌ بۆ چه‌ند كچ و ژنێن دی دیتیه‌.

ژیان بۆ ئه‌ڤرۆ دبێژیت: د ژیه‌كێ‌ بچووك دا من حه‌ز ژ كارێ‌ دروینێ‌ و دیزاینكرنا جلكێن كوردی یێن ژنان دكر، له‌ورا هه‌ر زوو من خوه‌ فێر و سوپاس بۆ خودێ‌ من نوكه‌ ناڤێ‌ خوه‌ یه‌ و خه‌لكه‌كێ‌ زۆر جلكێن خوه‌ دئینه‌ ده‌ف من و نوكه‌ ئه‌ز جلكێن زارۆیان ژی دروم و هنده‌ك دیزاین هه‌نه‌ من ب خوه‌ چێكرینه‌ ئانكو ژ داهێنانا منن و دێ‌ به‌رده‌وام كاركه‌م دیزاینێن نوو چێكه‌م، هه‌روه‌سا تشتێ‌ گه‌له‌ك كه‌یفا من پێ‌ دهێت نوكه‌ ب ده‌هان كچ و ژنێن هه‌له‌بجه‌ دناڤ بازاری و دوكان و كافیتریا و مۆلان دا كاردكه‌ن و هنده‌ك ژوان جها هه‌ر ئه‌و ب خوه‌ ب رێڤه‌دبه‌ن.

دهۆك، زنار تۆڤی:

عسمه‌ت ئاواز، سترانبێژه‌كێ‌ خه‌لكێ‌ جزیرا بۆتا یه‌ ل باكورێ‌ كوردستانێ‌، د دیداره‌كێ‌ دا بۆ رۆژناما ئه‌ڤرۆ دیاركر كو ل چه‌ند رۆژێن بۆری وی سترانه‌كا نوو ب ناڤێ‌ (زام هات) به‌لاڤ كریه‌، و ژ په‌یڤ و ئاوازێن وی ب خوه‌نه‌ و كلیپ ژی كریه‌، كارێ‌ ده‌رهێنانا وێ‌ كلیپێ‌ یه‌ ژ لایێ‌ ده‌رهێنه‌ر جه‌مالی ڤه‌ بۆ هاتییه‌ كرن.

ناڤهاتی گۆت: ئه‌ز نوكه‌ یێ‌ به‌رهه‌ڤیان دكه‌م، ژ بۆ تۆماركرنا ئه‌لبۆمه‌كا نوو یا سترانان و د ئه‌ڤ ساله‌ دائه‌ز دێ‌ به‌لاڤ كه‌م، هه‌تا نوكه‌ من نه‌ه كلیپ و سێ‌ ئه‌لبۆمێن سترانان به‌لاڤ كرینه‌، هه‌روه‌سا ژبه‌ر گۆتنا سترانان چه‌ندین جاران ئه‌ز ژلایێ‌ ده‌وله‌تا تورك ڤه‌ هاتیمه‌ زیندانكرن، لێ‌ هه‌ر من ده‌ست ژ سترانگۆتنێ‌ نه‌ به‌ردایه‌ و  ئێدی گرتن و زیندانكرن ژی نه‌شێت هونه‌رێ‌ من ب راوه‌ستینیت. و ئه‌ز هه‌رده‌م گۆهداریا سترانێن شڤان په‌روه‌ری و محه‌مه‌د شێخۆیی و ئارامێ‌ تیگران دكه‌م، چنكو ل به‌ر ده‌نگێ‌ وان مه‌زن بوویمه‌، و ژیه‌ركو نوكه‌ پرانییا ده‌زگه‌هێن راگه‌هاندنێ‌ یێن كوردی ل توركیا هاتینه‌ قه‌ده‌غه‌كرن، له‌وما ئه‌ز سترانێن حزو ل سه‌ر سۆشیال میدیایێ‌ به‌لاڤ دكه‌م.