ئه‌ڤرۆ:

بریاره‌ ل 9/1/2021 روونشتنا ئێكێ یا خۆلا پێنجێ یا جڤاتا نوونه‌رێن ئیراقێ ب رێڤه‌بچیت، به‌لێ هێشتا ئالیێن سوننی ل سه‌ر پۆستێ سه‌رۆكێ جڤاتا نوونه‌ران ئێكلا نه‌بووینه‌، گرفت د ناڤبه‌را هه‌ڤپه‌یمانیا (عه‌زم) و هه‌ڤپه‌یمانیا (ته‌قه‌دووم) هه‌بوون كو هه‌ر ئێك ژوان دخواست سه‌رۆكێ جڤاتا نوونه‌ران به‌هرا وی بیت.

مه‌شعان جبووری، ئه‌ندامێ هه‌ڤپه‌یمانیا (عه‌زم) و به‌ربژارێ سه‌ركه‌فتی د هه‌لبژارتنێن جڤاتا نوونه‌ران دا گۆت” ب چاڤدێریا سه‌رۆك مه‌سعود بارزانی رێككه‌فتین كو پشته‌ڤانیێ ل محه‌مه‌د حه‌لبووسی بكه‌ین كو جاره‌كادی ببیته‌ سه‌رۆكێ جڤاتا نوونه‌ران”.

مه‌شعانی گۆت ژی” هنده‌ك كه‌س دناڤ هه‌ڤپه‌یمانیا عه‌زم دا دێ ژ وێ رێككه‌فتنێ یاخی بن، د روونشتنا ئێكێ یا خۆلا نوو یا جڤاتا نوونه‌ران دێ خوه‌ به‌ربژار كه‌ن بۆ پۆستێ سه‌رۆكێ جڤاتێ و ئارمانجا وان ده‌نگ ب (حه‌لبووسی) نه‌ده‌ن یان ژی خوه‌ بۆ وی پۆستی به‌ربژار بكه‌ن، ئێك ژوان (سابت عه‌باسی) یه‌”.

د به‌رسڤا وان ئالیێن سه‌ركه‌فتی د هه‌لبژارتنان دا كو داخوازكریه‌ هه‌رسێ سه‌رۆكایه‌تیێن ئیراقێ بهێنه‌ گوهۆرین، ناڤبری ئاماژه‌ كر كو ئه‌و بۆچوونه‌ په‌یوه‌ندی یا ب ناڤمالا سوننی ڤه‌ هه‌ی كا دێ كێ به‌ربژاركه‌ن، ب هه‌مان شێوه‌ هه‌كه‌ ئالیێن شیعی ژی ل سه‌ر كه‌سه‌كی رێكبكه‌ڤن، سوننه‌یان هیچ لاریبوونه‌ك نابیت”.

د ده‌مه‌كی دا بریاره‌ ل رۆژا 9 ڤێ هه‌یڤێ كۆمبوونا ده‌ستپێكی یا خۆلا نوو یا جڤاتا نوونه‌ران بهێته‌ ئه‌نجامدان، هه‌تا نوكه‌ ب فه‌رمی به‌ربژارێ پۆستێ سه‌رۆكێ جڤاتا نوونه‌ران دناڤمالا سووننی دا ب دیاركری ژی د ناڤبه‌را هه‌ردو هه‌ڤپه‌یمانیێن (عه‌زم) ب سه‌رۆكایه‌تیا خه‌میس خه‌نجه‌ر و (ته‌قه‌دووم) ب سه‌رۆكایه‌تیا محه‌مه‌د حه‌لبووسی ئێكلا نه‌بوویه‌، به‌لێ ئه‌گه‌ره‌كێ ب هێ زیێ هه‌ی جاره‌كادی حه‌لبووسی ببیته‌ سه‌رۆكێ جڤاتا نوونه‌ران.

خالد ئه‌لده‌بوونی، په‌یڤدارێ به‌ره‌یێ رزگاری و گه‌شه‌پێدانێ یا سوونی دبێژیت” هه‌تا نوكه‌ ب رۆهنی لێكتێگه‌هشتن دناڤبه‌را هه‌ردو هه‌ڤپه‌یمانیێن عه‌زم و ته‌قه‌دووم نه‌هاتیه‌ راگه‌هاندن، هه‌ردو محه‌مه‌د حه‌لبووسی و خه‌میس خه‌نجه‌ر چه‌ندین جاران یێن كومبووین و وان یا راگه‌هاندی كوی ێن گه‌هشتینه‌ لێكتێگه‌هشتنێ”.

ئه‌حمه‌د مه‌زهه‌ر، ئه‌ندامێ هه‌ڤپه‌یمانیا ته‌قه‌دووم ب سه‌رۆكایه‌تیا محه‌مه‌د حه‌لبووسی و به‌ربژارێ سه‌ركه‌فتی د هه‌لبژارتنێن جڤاتا نوونه‌ران دا راگه‌هاند” پۆستێ سه‌رۆكێ جڤاتا نوونه‌ران یێ ئێكلابووی، ئه‌م ل گه‌ل هه‌ڤپه‌یمانیا (عه‌زم) یێن رێككه‌فتین كو محه‌مه‌د حه‌لبووسی به‌ربژار بیت بۆ پۆستێ سه‌رۆكێ جڤاتا نوونه‌ران ب گۆره‌ی وێ چه‌ندێ كو هه‌ڤپه‌یمانیا (ته‌قه‌دووم) پتریا كورسیێن سوننه‌یان ب ده‌ستڤه‌ئیناینه‌، هه‌روه‌سا خه‌میس خه‌نجه‌ر ژی به‌ربژارێ مه‌یه‌ بۆ پۆستێ جێگرێ سه‌رۆك كۆماری”.

هه‌ڤپه‌یمانیا حه‌لبووسی د هه‌لبژارتنان دا 37 كورسی بده‌ستڤه‌ئینان و زێده‌تر ژ ره‌وتێ سه‌در یێ نێزیكه‌، هه‌ڤپه‌یمانیا خه‌میس خه‌نجه‌ر ژی 14 كورسی ب ده‌ستڤه‌ئیناینه‌ و پتر یێ نێزیكه‌ ژ هێزێن شیعی یێن دناڤ (چارچۆڤێ هه‌ماهه‌نگیێ) دا.

ئه‌ڤرۆ:

به‌ربژارێ سه‌ركه‌فتی د هه‌لبژارتنێن جڤاتا نوونه‌رێن ئیراقێ ژ قه‌زا شنگالێ، مه‌حما خه‌لیل راگه‌هاند، حوكمه‌تا ئیراقێ پاره‌ بۆ ئه‌نجامدانا پرۆژان ل شنگالێ ته‌رخانكریه‌، به‌لێ بزاڤ دهێته‌ كرن ل شوینا ئاڤه‌دانكرنا شنگالێ، تنێ ده‌ڤه‌رێن ئه‌ره‌بنشین و گه‌له‌ك دكێمن، پێ ئاڤه‌دان بكه‌ت ب مه‌به‌ستا ب ئه‌ره‌بكرنێ، ئه‌م ژی وێ چه‌ندێ ب توندی ره‌ت دكه‌ین، چونكه‌ 90% ژ خه‌لكێ شنگالێ كوردێن ئێزدی و موسلمانن و هه‌ژماره‌كا كێم یا ئه‌ره‌بان لێ هه‌یه‌.

مه‌حما خه‌لیل، گۆت” ل سالا بۆری حوكمه‌تا ئیراقێ هیچ پرۆژه‌ك بۆ شنگالێ ئه‌نجام نه‌دایه‌ و نوكه‌ حوكمه‌تا ئیراقێ 28 ملیار دینار بۆ شنگالێ یێن ته‌رخان كرین، كو لژنه‌ك ل مووسلێ یا هاتیه‌ پێكئینان بۆ خه‌رجكرنا پاره‌ی، به‌لێ ئه‌م ژێ د رازی نینین، چونكه‌ ئه‌و پاره‌ زێده‌تر بۆ گوندێن ئه‌ره‌ب هاتیه‌ ته‌رخانكرن، ئه‌ڤه‌ بۆ وێ ئێكێ یه‌ شنگال بهێته‌ ب ئه‌ره‌بكرن و ده‌ڤه‌رێن ئێزدی ژی یێن هاتینه‌ پشت گوه هاڤێتن”.

مه‌حمای گۆت ژی” مه‌ ب توندی مه‌رازیبوونا خوه‌ دیاركریه‌، چونكه‌ سته‌مه‌كا مه‌زنه‌ ل شنگالێ دهێته‌ كرن، كو سه‌ره‌رای وێ چه‌ندێ هیچ بۆ ناهێته‌ كرن، دخوازن ئه‌ره‌با هاورده‌ بكه‌ن و ده‌ڤه‌رێن وان ئاڤه‌دان بكه‌ن ب مه‌ره‌ما ب ئه‌ره‌بكرنێ، د ده‌مه‌كی دا شنگال یا وێران بووی و پاره‌ ژی ب ناڤێ شنگالێ یێن هاتینه‌ مه‌زاختن، له‌وما ب هیچ شێوه‌كی رازی نابین و وێ چه‌ندێ ره‌ت دكه‌ین”.

ئه‌ڤرۆ:

په‌رله‌مانتارێ ئاكپارتیێ یێ باژێرێ باتمانێ ل باكورێ كوردستانێ راگه‌هاند كو ئاكپارتی ل باكورێ كوردستانێ پتر ژ هه‌موو پارتێن دی كورسیێن په‌رله‌مانی هه‌نه‌ و چه‌ندین سالن ئاكپارتی نوونه‌راتیا كوردان ل توركیا دكه‌ت و كورد دێ دیسان ده‌نگێن خوه‌ ده‌نه‌ ئاكپارتیێ.

زیوه‌ر ئۆزده‌میر ئه‌ندامێ په‌رله‌مانێ توركیا سه‌ر ب فراكسیۆنا ئاكپارتیێ راگه‌هاند كو نها پرانیا كورسیێن باكورێ كوردستانێ ل په‌رله‌مانێ توركیا یێ ئاكپارتیێ نه‌ و د هه‌لبژارتنێن هه‌ری دووماهیێ یێ باژێرڤانیان دا ژی ئاكپارتیێ ل باژێرێن كوردی ده‌نگێن خوه‌ زێده‌ كرینه‌ و گۆت: (د راستی دا نها ئاكپارتی نوونه‌راتیا كوردان ل توركیا دكه‌ت، ئه‌و یه‌ك به‌رچاڤانه‌، چونكو ئاكپارتی پتر ژ هه‌ده‌پێ ل باژێرێن كوردی ئه‌ندامێن په‌رله‌مانی هه‌نه‌ و ژ به‌ر هندێ ژی ئه‌ز دبێژم كو ئاكپارتی نوونه‌راتیا كوردان ل توركیا دكه‌ت و هه‌ده‌په‌ تنێ هه‌ڤڕكیا ئاكپارتیێ دكه‌ت و نه‌شیایه‌ ببیته‌ نوونه‌را هه‌موو كوردان ل توركیا).

ناڤهاتی د به‌رده‌وامیا ئاخڤتنا خوه‌ دا ئه‌و یه‌ك ژی دیار كر كو نها هه‌موو پارتێن ئۆپۆزسیۆنێ داخوازا برێڤه‌چوونا هه‌لبژارتنێن پێشوه‌خت ل توركیا دكه‌ن، ئه‌و وه‌سا دبینن هه‌كه‌ هه‌لبژارتن بهێنه‌ كرن دێ شێن ده‌نگێن خوه‌ زێده‌ كه‌ن، لێ وه‌سا نینه‌ و گۆت: (د هه‌لبژارتنێن بهێت یێن په‌رله‌مانێ توركیا دا كورد دێ دیسان ده‌نگێن خوه‌ ده‌نه‌ ئاكپارتیێ، چونكو ئاكپارتیێ د ماوه‌یێ چه‌ندین سالێن بۆری دا گه‌له‌ك خزمه‌ت پێشكێشی ده‌ڤه‌رێن كوردی كرینه‌، به‌ری ئاكپارتیێ چو ده‌ستهه‌لاته‌ك وه‌سا خزمه‌تا كوردان نه‌كریه‌ و ژ به‌ر هندێ ژی وه‌كو ئاكپارتی ئه‌م پشتراستین دێ دیسان كورد ده‌نگێن خوه‌ ده‌نه‌ پارتا مه‌).

په‌رله‌مانتارێ ئاكپارتیێ یێ باژێرێ باتمانێ ئه‌و یه‌ك ژی دیار كر كو نها گه‌له‌ك كه‌س دبێژن دێ كورد ڤێجارێ ده‌نگێن خوه‌ ده‌نه‌ پارتا كۆماریا گه‌ل، چو راستی بۆ هندێ نینن، چونكو كورد باش دزانن كا به‌ری نها پارتا كۆماریا گه‌ل چه‌ند زۆلم ل وان كریه‌، هه‌تا نها ژی پارتا كۆماریا گه‌ل ل دژی په‌روه‌ردا ب زمانێ كوردی یه‌، ئاكپارتیێ د بیاڤێ زمانێ كوردی دا گه‌له‌ك كارێن باش كرینه‌، كورد ژی ڤێ یه‌كێ باش دبینن و گۆت: (هه‌تا نها پارتا كۆماری چو پرۆژه‌یه‌ك باش بۆ پرسا كوردی پێشكێش نه‌كریه‌ و ده‌مێ ئاكپارتیێ كار بۆ چاره‌سه‌ركرنا پرسا كوردی دكر وی ده‌می پارتا كۆماری ئاسته‌نگی ژی دروست دكرن، پارتا كۆماری دڤێت بابه‌تێ پرسا كوردی بۆ كۆمكرنا ده‌نگێن وه‌لاتیێن كورد ل توركیا بكار بینیت و وێ پارتێ چو پرۆژه‌یه‌ك بۆ چاره‌سه‌ركرنا پرسا كوردی هه‌تا نها پێشكێش نه‌كریه‌ و د بنه‌مایێ خوه‌ دا پارتا كۆماری ل دژی مافێن كوردانه‌).

ناڤهاتی د دووماهیا ئاخڤتنا خوه‌ دا ئه‌و یه‌ك ژی دیار كر كو ئاكپارتیێ دڤێت ده‌ست ب قۆناغه‌كا نوو بۆ چاره‌سه‌ركرنا پرسا كوردی بكه‌ت لێ ئاشكرایه‌ كو گه‌له‌ك ئاسته‌نگی ژی هه‌نه‌، لێ هه‌كه‌ دیسان پێدڤی بیت ئاكپارتی دێ ده‌ست ب قۆناغه‌كا نوو كه‌ت و گۆت: (پارتا كۆماری و هه‌ده‌په‌ تنێ ل سه‌ر بنه‌مایێ دژبه‌ریا ئاكپارتیێ پێكڤه‌ كار دكه‌ن، د هه‌لبژارتنێن هه‌ری دووماهیێ یێ باژێرڤانیان دا ژی هه‌ده‌پێ ل چه‌ندین باژێران ل دژی ئاكپارتیێ ده‌نگێ خوه‌ دا پارتا كۆماری، لێ ئه‌و یه‌ك چو ئه‌نجامه‌كا خوه‌ یا باش بۆ كوردان ژی نه‌بوو، چونكو پارتا كۆماری دڤێت پرسا كوردی بۆ كۆمكرنا ده‌نگان بكار بینیت و وێ پارتێ هه‌تا نها چو پرۆژه‌یه‌ك ژی بۆ چاره‌سه‌ركرنا پرسا كوردی پێشكێش نه‌كریه‌).