ئه‌ڤرۆ، هه‌رهین محه‌مه‌د:

هه‌لبه‌ستڤان سه‌لمان شێخ مه‌می، د دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ گۆت: هزرێن من و هونه‌رمه‌ند (بلند ئیبراهیم) گه‌له‌ك نێزیكی ئێكین و ئه‌ز و بلند نه‌ماینه‌ وه‌كو هه‌لبه‌ستڤان و سترانبێژ ئه‌م یێن ماین وه‌كو برایێن ئێك وه‌كو خێزانه‌ك و ژیانا من وی یا پێكڤه‌ گرێدایه‌ و خوه‌ هه‌كه‌ هه‌لبه‌ستێن من نه‌بێژیت ژی هه‌ر برایێ‌ منه‌ و چو جاران من نه‌گۆتیه‌ بلندی دڤێت فلان هه‌لبه‌ستا من بێژی وی كیژ هه‌لبه‌ستا من دڤێت دێ‌ بێژیت هه‌لبه‌ستێن من ده‌مێ‌ چێدكه‌م گه‌له‌ك ده‌م پێنه‌ ڤێت و هه‌لبه‌ستا (كا یارا من) ئه‌وا بلند ئیبراهم گۆتی نه‌بوونه‌ پێنج چركه‌ كو من چێكری، چونكو هه‌موو هه‌لبه‌ستێن من چیرۆكا وان ژ راستیێ‌ هاتینه‌ و چو جاران هه‌لبه‌ستێن خه‌یالی چێناكه‌م.

سه‌لمانی زێده‌تر گۆت ژی: هه‌ر جهه‌كێ‌ هاریكاریا من بكه‌ت نوكه‌ نێزیكی شه‌ش به‌رهه‌م هه‌نه‌ و بتنێ‌ دێ‌ هێنه‌ چاپكرن هه‌ریێ‌ به‌رده‌وامم ل گه‌ل چێكرنا هه‌لبه‌ستان چ رۆژانه‌ ئێكێ‌ چێكه‌م، یان هه‌ر سێ‌ رۆژان ئێكێ‌ و هنده‌ك جاران ژی د رۆژی َدا سێ‌ هه‌لبه‌ستان دنڤیسم و ئه‌ز زۆریێ‌ ل خوه‌ ناكه‌م و به‌ری چه‌ند سالان دساله‌كێ‌ دا بتنێ‌ من  سێ‌ هه‌لبه‌ست نڤیسی بوون و ئه‌ڤه‌ د ساله‌كێ‌ دا من دو دیوان نڤیسینه‌ و هه‌لبه‌ستێن من ل سه‌ر وان كاودانا نه‌ یێن ئه‌ز تێدا دژیم و كا چ ب سه‌رێ‌ من هاتیه‌ و هنده‌ك جاران ب نڤیسینا هه‌لبه‌ستێ‌ دلێ‌ من ئارام بیت چ ئه‌و هه‌لبه‌سته‌ ره‌خنه‌یی بیا، یان ئه‌ڤینی بیت، به‌لێ‌ ب تایبه‌ت دلێ‌ من ب هه‌لبه‌ستێن ئه‌ڤینێ‌ ئارام دبیت، چ به‌ركو هه‌لبه‌ستا ئه‌ڤینی یا نه‌مره‌ و گه‌نج گه‌له‌ك حه‌زژێدكه‌ن ب تایبه‌ت ئه‌و هه‌لبه‌ستێن دبنه‌ ستران، ئانكو سه‌رپشكا هه‌موو هه‌لبه‌ستان هه‌لبه‌ستا ئه‌ڤینی یه‌ و بۆ هه‌موو كه‌سان ژی یا خوه‌شه‌.

ئه‌ڤرۆ، رێوار محه‌مه‌د ره‌شید:

میدیا حه‌سۆ، سترانبێژه‌كا رۆژئاڤایێ‌ كوردستانێ‌ یه‌ كو نوكه‌ ل پارێزگه‌ها دهۆكێ‌ دژیت د دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ دیار كر كو بۆ ده‌مێ‌ هه‌شت سالانه‌ وێ‌ ده‌ست ب كارێ‌ سترانگۆتنێ‌ كریه‌ و هه‌تا نوكه‌ چه‌ندین ستران تۆماركرینه‌ و چار كلیپ ژی چێكرینه‌، به‌لێ‌ وێ‌ هزر د چێكرنا چو ئه‌لبۆمان دا نه‌كریه‌، ژ به‌ر كو ب دیتنا وێ‌ كلیپه‌كا باش جهێ‌ ئه‌لبۆمه‌كێ‌ دگڕیت و ل دووڤ گۆتنێن وێ‌ خه‌لك نوكه‌ نه‌شێت گوهداریا هه‌موو تراكێن ئه‌لبۆمان بكه‌ت.

ناڤهاتیێ‌ ئاماژه‌ دا وێ‌ چه‌ندێ‌ كو نوكه‌ وێ‌ دو سترانێن نوو تۆماركرینه‌ كو بابه‌تێ‌ ئێك ژوان ل دۆر هه‌ر چار پارچێن كوردستانێ‌ یه‌ و بابه‌تێ‌ یا دی ژی ل دۆر ئه‌ڤینیێ‌ یه‌ و گۆت: “مخابن ئه‌ڤه‌ بۆ ده‌مه‌كێ‌ درێژه‌ من ئه‌ڤ هه‌ر دو سترانه‌ تۆماركرین، به‌لێ‌ ژ به‌ر نه‌بوونا چو سپۆنسه‌ران و پشته‌ڤانیێ‌ ژ لایێ‌ جهێن په‌یوه‌ندیدار ڤه‌ ئه‌ز نه‌شیایمه‌ كلیپ بكه‌م، ئه‌ڤه‌ دده‌مه‌كی دایه‌ چه‌ندین جاران كه‌نالێ‌ (وار) یێ‌ ئاسمانی سۆز دایه‌ من سترانه‌كێ‌ ژوان بۆ من كلیپ بكه‌ن، به‌لێ‌ مخابن هه‌تا نوكه‌ سۆزا خوه‌ بجه نه‌ئینایه‌ و هه‌تا راده‌یه‌كی ئه‌ز ژێ‌ بێ‌ هیڤی بوویمه‌”.

میدیایێ‌ خویا كر كو ژ به‌ر هنده‌ك كاودانێن تایبه‌ت وێ‌ د شه‌ڤا سه‌رێ‌ سالا نوو دا پشكداری د چو ئاهه‌نگان دا نه‌كربوو و گۆ: “هه‌كه‌ پشته‌ڤانیا من بهێته‌كرن كارێن باش یێن هونه‌ری ل به‌ر ده‌ستێن من هه‌نه‌ ئه‌نجام بده‌م، ئه‌ڤه‌ دده‌مه‌كی دایه‌ نوكه‌ ئه‌ز نه‌شێن ژیانا خوه‌ ب رێیا كارێ‌ هونه‌ری ببورینم ژ به‌ر ڤێ‌ چه‌ندێ‌ نه‌چاربوویمه‌ كار ل جوانكاریه‌كا ئافره‌تان بكه‌م”.

ل دووماهیێ‌ ناڤهاتیێ‌ دیار كر كو ئه‌و حه‌ز ژ گۆتنا سترانێن هونه‌رمه‌ندێ‌ وه‌غه‌ركری (محه‌مه‌د شێخو)ی دكه‌ت و گۆت: “هه‌تا نوكه‌ من چه‌ندین سترانێن دوقۆلی ژی گۆتینه‌، به‌لێ‌ نوزانم چو ئامیرێن مۆزیكێ‌ بژه‌نم”.

ئه‌ڤرۆ:

فلمێ‌ سینه‌مایی (ئه‌زموون) یێ‌ ده‌رهێنه‌رێ‌ ناڤدارێ‌ كورد (شه‌وكه‌ت ئه‌مین كوركی) ل فلمه‌ فیسته‌ڤالا گوا یا نێڤده‌وله‌تی یا 52 یێ‌ ل هندستانێ‌ و فلمه‌ فیسته‌ڤالا تێفلیس یا نێڤده‌وله‌تی یا 22 ل جورجیا و فلمه‌ فیسته‌ڤالا ده‌ریا سۆر یا ئێكێ‌ ل وه‌لاتێ‌ سعودیه‌ پشكداربوو.

فلمێ‌ سینه‌مایی (ئه‌زموون) یێ‌ ده‌رهێنه‌رێ‌ ناڤدارێ‌ كورد (شه‌وكه‌ت ئه‌مین كوركی) ژ به‌رهه‌مئینانا (مه‌مه‌د ئه‌كتاشه‌) و به‌رهه‌مێ‌ هه‌ڤپشكێ‌ هه‌رێما كوردستانێ‌ و وه‌لاتێ‌ ئه‌لمانیا و قه‌ته‌ره‌، د نووترین پشكداریا خوه‌ دا ل پشكا پانۆراما جیهانی ل فلمه‌ فیسته‌ڤالا گوا یا نێڤده‌وله‌تی یا 52 یێ‌ ل هندستانێ‌ هاته‌ نیشادان، ل پشكا ئاسۆكان ل فلمه‌ فیسته‌ڤالا تێفلیس یا نێڤده‌وله‌تی یا 22 ل جورجیا و فلمه‌ فیسته‌ڤالا ده‌ریا سۆر یا ئێكێ‌ ل وه‌لاتێ‌ سعودیه‌ ژی هاته‌ نیشادان، رووداو به‌لاڤكریه‌ كو (ئه‌زموون) به‌رهه‌مێ‌ كۆمپانیا میتۆس فلمه‌ ل به‌رلینێ‌ و كۆمپانیا مه‌ست یا فلمانه‌ ل سلێمانیێ‌ كو ب پشته‌ڤانیا وه‌زاره‌تا ره‌وشه‌نبیری و لاوان یا حكومه‌تا هه‌رێما كوردستانێ‌ هاتیه‌ به‌رهه‌مئینان و ژ لایێ‌ كۆمپانیا ئه‌لمانی (ئاڕت هوود) ل جیهانێ‌ دهێته‌ به‌لاڤكرن.

ئه‌ڤرۆ، هه‌رهین:

سترانبێژێ‌ گه‌نج سالح عه‌بدلواحد دیاركركو نوكه‌ ئه‌و مژوولی به‌رهه‌مه‌كێ‌ شه‌ش تراكیه‌ و   و سترانه‌ك ژی ب زمانێ‌ توركی هاتیه‌ توماركرن و كلیپه‌ك ژی ب دووماهی ئینایه‌ و هه‌تا نوكه‌ به‌لاڤنه‌بووینه‌ ژ ئه‌گه‌رێ‌ نه‌بوونا سپونسه‌را ئه‌و دێ‌ سپونسه‌ریا خوه‌ كه‌ت هه‌ردیسان به‌ری پێنج سالان وی ئه‌لبۆمه‌كا نه‌ه تراكی تۆماركریه‌ ب ناڤێ‌ (دل ئاسن) و ب مخابنی ڤه‌ هه‌تا نوكه‌ به‌لاڤنه‌بوویه‌ ئه‌و ژی ژ ئه‌گه‌رێ‌ نه‌بوونا سپونسه‌ران.

ناڤهاتی دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ گۆت: راسته‌ بۆ ده‌مه‌كێ‌ درێژه‌ ژ ستران گۆتنێ‌ دوور كه‌فتیم و ئه‌گه‌ر ژی دیارن و و جوداهی گه‌له‌ك یاهه‌ی دناڤبه‌را سترانبێژان دا و ئه‌ڤ تشته‌ ژی گه‌له‌ك ل وه‌لاتێ‌ مه‌ هه‌یه‌ و ب  هه‌ر ره‌نگه‌كی هاریكاریا من نه‌هاتیه‌كرن و ب ڤی ره‌نگی گێۆلێ‌ من دێ‌ ژ ستران گۆتنێ‌ شكێت و هه‌ر به‌رهه‌مه‌كێ‌ ئه‌ز چێكه‌م و بمینته‌ دژوورڤه‌ به‌لاڤ نه‌بیت ما دێ‌ چه‌وا شێم كاركه‌م و نوكه‌ ژی ل وه‌لاتێ‌ توركیامه‌ ل ئه‌نقه‌ره‌ و گه‌له‌ك پلان یێن د سه‌رێ‌ من دا و نه‌شێم ده‌ستا ژ سترانگۆتنێ‌ به‌رده‌م و ئه‌ز ژ مالباته‌كا هونه‌ری مه‌ و نوكه‌ ئه‌ز خودان خێزان و زارۆكم و پێدڤیه‌ نانێ‌ رۆژانه‌ بۆ په‌یداكه‌م و ب هونه‌ری مرۆڤ نه‌شێت مالا خوه‌ بخودان بكه‌ت.

هه‌روه‌سا ناڤهاتی گۆت: چو جاران رێبازا برایێ‌ خوه‌ یێ‌ ره‌حمه‌تی عه‌بدلواحدی به‌رناده‌م، چونكو ب ناڤێ‌ وی هاتیمه‌ دمه‌یدانا سترانگۆتنێ‌ دا و هه‌ر به‌رهه‌مه‌كێ‌ ئه‌ز چێكه‌م سترانێن وی هه‌ر دێ‌ ل گه‌ل بن ده‌ستخوه‌شیێ‌ ل وان هه‌موو گه‌نجان دكه‌م یێن حه‌ز ژ عه‌بدولواحدی دكه‌ن و سترانێن وی دبێژن، به‌لێ‌ نه‌ ل گه‌ل هندێ‌ مه‌ مۆزیكێ‌ و په‌یڤا ب گوهۆڕن و په‌یڤێن وان گه‌لك دخوه‌ش و بهێزن.

ل دووماهیێ‌ سالحی گۆت: گه‌له‌ك جارا داخوازا سترانا دوقۆلی ژ من هاتیه‌ كرن و دئه‌لبوما خوه‌ دا من و سترانبێژه‌كا باكوور ب ناڤێ‌ دلبه‌ر مه‌ سترانه‌ك پێكڤه‌ گۆتیه‌ و ئه‌و سترانه‌ ل سه‌ر دایكێ‌ یه‌.