ئه‌لند مزووری
دلداره\cxfdfffdfddxxxxxx كێ دل شه‌واتم
برینا دلێ من كووره
بێ هیڤی مه بێ ئاواتم
ده‌ردێ گران سه‌ر من زۆره
ده‌ردێ گران عه‌شقا یارێ
ده‌ریایه‌ك مه‌زن و بۆڕه
كه‌تم به‌ر ئاه و زێمارێ
كۆ شه‌نگه یار ژ من دووره
كه‌نگی دێ هێی هه‌مبێزا من
روویی ژ رامۆسانا بكه‌م سۆره
ده‌ستێ خوه بكه ناڤ ده‌ستێ من
ل سه‌یرانا چه‌مێ ژۆره
من خه‌ون و خه‌یال هه‌ر ئه‌وه
زه‌ریه‌ك گۆلی و كه‌زی شۆره
روو هه‌یڤا گه‌ش و به‌ده‌وه
بۆ شه‌ڤا من چرا و نۆره
2021
كورته چیرۆك
لیدیا دێیڤز
و. ژ ئنگلیزی: شه‌ماڵ ئاكره‌یی
گه‌له‌ك ژ خه‌لكی ب رێز و حورمه‌تڤه سه‌ره‌ده‌ریێ ل گه‌ل هه‌ر پێنج هه‌ستێن خوه دكه‌ن. چاڤێن خوه دبه‌نه مۆزه‌خانه‌یان و دفنێن خوه بۆ پێشانگه‌ها گولان، ده‌ستێن خوه بۆ كارگه‌هێن قه‌دیفه و ئارمووشی ، و گوهێن خوه بۆ ل كونسێرتان، ده‌ڤێن خوه ژی بۆ تام و چێژێن خوارنگه‌هان.
لێ پڕانیا خه‌لكی رۆژ ل دووڤ رۆژێ هه‌ستێن خوه ماندی دكه‌ن: ئه‌ی چاڤێن من، بۆ من ڤێ رۆژنامه‌یێ بخوینن!. دفنێ هشیار به و بزانه كا خوارن نه سۆتیه!؟. گوهینه – باش گوهداریێ بكه‌ن كا كه‌س ل ده‌رگه‌هی ناده‌ت!.
هه‌ستێن مرۆڤی هند ئه‌رك هه‌نه و دڤێت پێ ڕاببن و بجه بینن، ل پڕانیا جاران – گوهێن كه‌ڕ ئه‌و ئه‌رك نینه، چاڤێن كۆره ژی ب ڤی جۆرێ ئه‌ركی رانابن.
هنده‌ك جاران، به‌ری رۆژ ب داوی بهێت، هه‌ست ماندی دبن، دبێژن ئه‌ز ئێدی نه‌شێم كار بكه‌م و ئه‌ڤه ئه‌م راوه‌ستیاین و نوكه دێ چینه ژ ده‌رڤه‌ی بازنه‌ی!.
پشتی هنگی، به‌رهه‌ڤبوونا مرۆڤی ژبۆ به‌رهنگاربوونا جیهانێ دێ كێم بیت، و دێ پڕانیا ده‌مێن خوه د مال دا ده‌رباز كه‌ت، بێی كۆ ب هنده‌ك پێدڤیان راببیت، هه‌لبه‌ت هه‌كه وی خواست د ژیانێ دا یێ به‌رده‌وام بیت!.
هه‌كه هه‌موو هه‌ستان ده‌ڤ ده‌ڤ ژ مرۆڤی به‌ردا، مرۆڤ دێ د قورنه‌تا مالێ ڤه ب تنێ مینیت: د تاریێ دا، د بێده‌نگیێ دا، ده‌ستێن وی دێ خاڤ بن و ته‌زن، چ ناچیته د ده‌ڤی دا، و خمخمكێن وی ژی چ ناهه‌لكێشن، و دێ ژ خوه پرسیت: ئه‌رێ ما من سه‌ره‌ده‌ریه‌كا خراب ل گه‌ل هه‌ستێن خوه دكر؟ ما من وه‌كو پێدڤی خوه‌شی نه‌گه‌هانده وان؟
لیدیا دێیڤز Lydia Davis: ل 15ێ ته‌موزا سالا 1947ێ ل ویلایه‌تا ماساشۆسیتس ل ئه‌مریكا هاته سه‌ر دونیایێ. هه‌ر چه‌نده لیدیا دێیڤز رۆمان ژی نڤیسینه و چه‌ند كارێن وه‌رگێرانێ ژی بۆ سه‌ر زمانێ فره‌نسی ئه‌نجامداینه، لێ پتر ب نڤیسینا چیرۆكا گه‌له‌ك كورت ناڤوده‌نگیه‌كا باش وه‌رگرتیه.
دێیڤز، د پێڤاژۆیا خوه یا ئه‌ده‌بی دا، پتر ژ 14 خه‌لاتان وه‌رگرتینه و ژ گرنگترین وان خه‌لاتان، ل سالا 2013ێ خه‌لاتێ بۆكه‌ر ب ده‌سڤه‌ئینایه و ل سالا 2020 ژی خه‌لاتێ په‌نا مالمۆد PEN/Malamud Award وه‌رگرتیه.
ژێده‌ر:
https://anulovechild.tumblr.com/post/16859320572/the-senses-by-lydia-davis-many-people-treat
https://en.wikipedia.org/wiki/Lydia_Davis
دهۆك, شڤان لوقمان:
نۆشداره‌كێ تایبه‌تمه‌ندێ نه‌خۆشیێن هه‌ستی و گه‌هان دیار دكه‌ت ,كه‌سێن دانعه‌مر پتر تووشی نه‌خۆشیا پێتیبوونا هه‌ستیان دبن و د هه‌موو ژییان دا پێدڤیه مرۆڤ رێیا خوارنا ساخله‌م پێدڤیا خوه ژ ژێده‌رێن خوارنێ وه‌ربگریت.
ل دۆر چاوانیا بهێزكرنا هه‌ستیێن له‌شێ مرۆڤی، د.محه‌مد تاهر ره‌سوول, تایبه‌تمه‌ندێ نه‌خۆشیێن هه‌ستی و گه‌هان دیاركر، ل ده‌ستپێكێ كێمكرنا كێشا له‌شی و خوارنا ساخله‌م وه‌كی فێقی و زه‌زره‌وات و خوارنا ماسیان و شیری, هاریكارن كو هه‌ستی بهێز بكه‌ڤیت و گۆت: كه‌سێن قه‌له‌و پێدڤیه شیرێ بێ روین ڤه‌خۆن و ڤه‌خوارنا شیرێ كێم روین مفایێن وێ پترن, ئه‌و رێژا شیرێ روژانه مرۆڤ ڤه‌دخۆت پێدڤیا له‌شی دابین ناكه‌ت, ڤه‌خارنا شیری دگه‌ل چایێ یان قه‌هوێ هیچ مفایه‌ك تێدا نینه.
هه‌روه‌سا دیاركر، پێدڤیا رۆژانه یا له‌شێ مروڤی بو كالسیومی پتره ژ 600ملگم و ڤیتامین (D) پتره ژ 3000ملگم, ژ به‌ر هندێ كالسیوم و ڤیتامین (D)وه‌كو ده‌رمان دهێنه بكارئینان بو نه‌خۆشان داكو پێدڤیا له‌شی َ وان ته‌مام بكه‌ت ژ وه‌رگرتنا كالسیوم و ڤیتامین (D).
د.محه‌مه‌د تاهر ره‌سوول، دیاركركو نه‌خۆش هه‌بووینه سه‌ره‌دانا مه‌كرینه كو رێژا كالسیوم و ڤیتامین (D)گه‌له‌ك كێم بوویه د ناڤا له‌شێ واندا و گۆت: نه‌خۆش هه‌یه سه‌ره‌دانا مه یا كری كو رێژا كالسیومی دناڤا له‌شێ واندا 7بوویه و ڤیتامین (D) 30 بوویه و ئه‌گه‌ر بوهندێ دزڤریت كو له‌شێ مروڤی رێژا پێدڤی به‌رهه‌م نائینت یان له‌ش وه‌ك پێدڤی وه‌رناگریت.
د.محمد تاهر ره‌سوول ئه‌وژی دیاركر, پێدڤیه هه‌ر ژ زاروكینیێ خارن و ڤه‌خوارنێن ساخله‌م مرۆڤ ب كاربینیت داكو هه‌ستیێ مرۆڤی ب هێز بكه‌ڤیت, د ژیێ مه‌زندا مفایێ وان كێمتره، چونكو هه‌ستیێ مرۆڤی گه‌هشتینه قوناغه‌كێ كو پێتی بووینه.
ئاشكه‌راكر پێتیبوونا هه‌ستیان د بێژنێ (نه‌خۆشیا بێده‌نگ )، چونكو چ نیشان نینن، به‌لێ مه‌ترسیا وێ ئه‌وه كو هه‌ر هنگافتنه‌كێ هه‌ستیێن مرۆڤی ب ساناهی د شكێن, پێتیبوونا هه‌ستان د ناڤ كه‌سێن ب ته‌مه‌ن زوور به‌ر به‌لاڤه و بتایبه‌تی كه‌سێن ژیێ وان سه‌ر شێست سالیێ دا.
ئه‌ڤرۆ، به‌رپه‌رێ ساخله‌میێ:
ده‌مێ مرۆڤ تشتا باش نه‌بیت ب شه‌ڤێ دبیته ئه‌گه‌رێ په‌یدابوونا ئاسته‌نگان د ژیانێ دا، ب تایبه‌ت ژی هه‌كه مرۆڤی ل به‌ربیت گه‌شته‌كێ بكه‌ت، یانژی كاره‌كێ ب شه‌ڤێ ئه‌نجام بده‌ت، هه‌روه‌سا ئاریشێن مه‌زن بۆ دیتنێ ژی په‌یدادكه‌ت، له‌ورا پێدڤیه هزر ل چاره‌سه‌ریا وێ بهێته كرن.
فاكته‌رین نه‌دیتنا ب شه‌ڤێ پێكهاتینه ژ گه‌له‌ك خالان ژوانژی:
- چاڤێن كو به‌رئاتافی تیشكا رۆژێ دبن: هه‌كه ب شه‌ڤێ دیتنا چاڤێن ته شێلی دبیت، ره‌نگه ئه‌گه‌ر ئه‌و بیت كو چاڤێن ته گه‌له‌ك به‌رئاتافی تیشكا رۆژێ بووینه، و هه‌كه تو پشتی نیڤرۆیا گه‌له‌ك بچیه به‌ر تیشكا رۆژێ دێ چاڤێن ته شێلی بن و ئه‌ڤ چه‌نده بۆ ده‌مێ دو رۆژا بتنێ ڤه‌دكێشیت، هه‌كه پتر ڤه‌كێشا پێدڤیه شیره‌تا ژ نوشداره‌كی وه‌ربگری، و ب رۆژێ به‌رچاڤكێن دژی تیشكا رۆژێ ب كاربینی داكو راسته‌وخو تاڤ ل چاڤێن ته نه‌ده‌ت.
- ئاڤا سپی: ره‌نگه ئه‌ڤه ئه‌گه‌رێ دوێ بیت كو تو ب شه‌ڤێ باش تشتا نه‌بینی، ئه‌ڤه پتر ل ده‌ڤ كه‌سێن دانعه‌مر و ناڤنجی په‌یدادبیت، دبیته ئه‌گه‌ر وه‌كو شێلیبوونه‌كێ بكه‌ڤیته بن عه‌ده‌سا چاڤی دناڤدا و سپییاتیه‌ك ژێ په‌یدادبیت و عه‌ده‌سێ شێلی دكه‌ت و دبیت ژی مرۆڤ هنده‌ك جارا وه‌كو هنده‌ك خالێن ره‌ش ل به‌رچاڤێن خوه ببینیت و هنده‌ك جارا هه‌ستداری بۆ مرۆڤی ژ روناهیا راسته‌وخو په‌یدادبیت.
- نێزیك بینی: تێكچوونه‌كه د چاڤی دا، ل ده‌ڤ وان كه‌سێن كو تشتێن نێزیك دبینن و ب زه‌حمه‌ته بۆ وان تشتێن دوور ببینن، پشتی ده‌مه‌كی مرۆڤ نه‌شێت هه‌تا مرۆڤ و تشتێن مه‌زن ژی ژ دوورڤه بنیاسیت.
- تێكچوونا شه‌به‌كا چاڤی یا شه‌كرێ: ئه‌وژی ژ ئه‌نجامێ بلندبوونا ئاستێ شه‌كرا ب زیان ل موده‌مارێن خوینێ و شه‌به‌كا چاڤی په‌یدادبیت، سه‌رباركا بۆ چاڤی په‌یدادكه‌ت و دهنده‌ك ده‌مێن دژواردا خوینبه‌ربوون دكه‌ڤیته شه‌به‌كا چاڤی و تشتا ب زەلالی نابینیت و ئه‌م دشێین بێژین كو نه‌خۆشێن شه‌كرێ دگه‌له‌ك ده‌مان دا نه‌خۆشیا خوه ژ رووناهیێ دبینن.
- شقه سه‌ر: هنده‌ك راپۆرت وه‌سا دده‌نه خویاكرن كو تێكچوونا دیتنێ ب شه‌ڤێ ژ ئه‌گه‌رێ نه‌خۆشیا شه‌قه‌سه‌رێ یه، ئه‌ڤ جورێ سه‌رئێشانێ پتریا جاران ل ره‌خه‌كێ سه‌ری په‌یدادبیت و مرۆڤ گه‌له‌ك ئالوزیا خوه ژێ دبینیت و دبیته ئه‌گه‌رێ تێكچوونا دیتنا چاڤی.
- زنك و كێماسیا ڤیتامین ئه‌ی: ره‌نگه پتریا ئاریشێن دیتنێ دچاڤی دا په‌یوه‌ندی ب كێماتیا هنده‌ك ڤیتامینان هه‌بیت، و ئێك ژ پێكهێنه‌رێن سه‌ره‌كی بو په‌یدابوونا دیتنه‌كا باش پێدڤیه مرۆڤ ڤیتامین ئه‌ی وه‌ربگریت، ڤیتامین ئه‌ی دیسا به‌رپرسه ژ كووراتیا شه‌ڤێ و نه‌بوونا ڤان كه‌رستێن خوارنێ دبیته ئه‌گه‌رێ شێلیبوونا چاڤا.
ئه‌ڤه هنده‌ك ژ ئه‌گه‌رێن شێلیبوونا چاڤان بوون ب شه‌ڤێ، دبیت هنده‌ك ئه‌گه‌رێن دی یێن نه‌راسته‌وخو ژی هه‌بن، وه‌كو نه‌خۆشیێن چاڤا و هه‌ودانێن ده‌مارا چاڤی، بۆ چاره‌سه‌ریێ پێدڤیه ئێكه‌م جار ئه‌گه‌ر بهێته زانین و هه‌كه ئاڤا سپی بیت پێدڤیه چاره‌سه‌ریا عه‌ده‌سا چاڤی بهێته كرن و عه‌ده‌سه‌كا دی ل جهێ وێ دناڤ چاڤی دا بهێته دانان.
ئه‌ڤرۆ، به‌رپه‌رێ ساخله‌میێ:
1- روناهیێ ب ڤه‌مرینه و ئه‌ڤه رێیه‌كا كاریگه‌ره بو نڤستنێ، نابیت ل جهه‌كی بنڤی و روناهی هه‌بیت داكو ده‌مژمێر دوێ شه‌ڤێ ژ خه‌و هشیارنه‌بی، ل هاڤینێ په‌ردا بگره داكو تیشكا رۆژێ نه‌هێته ژوور ل سپێده‌هیان و ته ژ خه‌و هشیاربكه‌ت.
2- بێهنا خوه كوور ب هلكێشه، هه‌كه تو ب شه‌ڤ ژ خه‌و رابووی و نه‌شیای بنڤی، راسته‌وخو ل جهێ خوه نه‌رابه‌ڤه و چ كارا نه‌كه، به‌لكو خو ئارام بكه بو ده‌مێ 20 ده‌قیقا و هه‌ول بده هنده‌ك راهێنانێن هه‌ناسێ بكه و گه‌له‌ك گرنگیێ ب هه‌ناسا خوه بده.
3- شێوازێ خوه ب گوهوره، نڤستن ل سه‌ر پشتێ پیسترین شێوێن نڤستنێ یه، چونكو هه‌ناسه و بێهنا مرۆڤی ل راده‌یه‌كی رادوه‌ستینیت و مرۆڤ خره‌خرێ دكه‌ت و هه‌تا هه‌رسكرنا خوارنێ ژی ب زه‌حمه‌ت دئێخیت، به‌لكو نڤستن ل سه‌ر ته‌نشتێ باشتره ژبه‌ركو فشارێ ل سه‌ر دلی كێم دكه‌ت.
4- گه‌له‌ك وه‌ختێ خوه دناڤ جهێ نڤستنێ دا نه‌بوورینه: گه‌له‌ك جارا ره‌نگه تو هزر ل هنده‌ك كاران بكه‌ی لسه‌ر جهێ نڤستنێ به‌ری نڤستنێ، لاپتوپ و موبایلا خوه نه‌به سه‌ر جهێ نڤستنێ، هه‌كه تو گه‌له‌ك وه‌ختێ خو دناڤ جهێ نڤستنێ دا هشیاردمینی، دێ جهێ نڤستنێ بیته یێ هشیاربوونێ و هه‌تا ل ده‌مێن ئاسایی ژی تو نه‌شێی دروست بنڤی.
5- بلا جهێ نڤستنا ته ژ جورێن باش بیت: داكو یێ مرتاح بی، هه‌ر چ نه‌بیت پێدڤیه هه‌ر 10 سالا ب كێماتی جهێ نڤستنا خوه بگوهوری، چونكو هنده‌ك میكروب دناڤ دا په‌یدادبن و حه‌ساسیێ په‌یدادكه‌ن، جهێ نڤستنێ ل دووڤ كێشا له‌شێ مرۆڤی و زه‌وقێ مرۆڤی دهێته گوهارتن، به‌لێ نڤینێن چێكری ژ (فیسكوزێن مه‌تاتی) گه‌له‌ك دباشن هه‌ر كێشا له‌شێ ته چه‌ندبیت نابیته ئاریشه.
6- ده‌مه‌كێ زوو خوارنێ بخوو: خوارنێن نشه‌وی باوه‌شكا زێده‌دكه‌ن له‌ورا بو نڤستنێ دباشن، به‌لێ پرۆتین مرۆڤی هشیاردهێلن له‌ورا باشتره سپێده‌هیان بهێنه خوارن، به‌لێ هه‌ر چاوا بیت هشیاربه دره‌نگی شه‌ڤ خوارنێ نه‌خوو چونكو هه‌رسكرن ب زه‌حمه‌ت دكه‌ڤیت و دێ هه‌ست ب وه‌ستیانێ كه‌ی.
7- یێ چالاك به: ئه‌نجامدانا وه‌رزشێ هاریكاریا هه‌موو مرۆڤان ناكه‌ت كو بنڤن، به‌لێ وه‌رزش ب شێوه‌یه‌كێ رێكخستی هاریكاره بو باشكرنا جورێ نڤستنا مرۆڤی، هه‌ول بده حه‌فتیانه سێ جاران وه‌رزشی بكه و باشتره ل ده‌مژمێر حه‌فتێ ئێڤاری بیت.
8- نڤستنا نیڤرۆیان ده‌ستنیشان بكه: باشتره ده‌مێن نڤستنا نیرڤرۆیان رێكبێخی و گه‌له‌ك نه‌نڤی داكو هه‌ست ب وه‌ستیان و سه‌رئێشانێ نه‌كه‌ی پشتی نیڤرۆ، هه‌ول بده پتر ده‌مژمێره‌كێ نیڤرۆیان نه‌نڤه.
دهۆك، هه‌رهین محه‌مه‌د:
حسین تتمی، په‌یامنێرێ كه‌نالێ دهۆك تیڤی، د دیداره‌كێ دا بۆ رۆژناما ئه‌ڤرۆ گۆت: من په‌یمانگه‌ه و كولیژا رۆژنامه ڤانی ب دووماهی ئیناینه و ئه‌ڤه پێشه‌یا منه ژبه‌ر داهات و به‌رنیاس بوونێ ڤی كاری ناكه‌م و باوه‌ردكه‌م ب رێیا په‌یامنێریێ دێ خزمه‌تا خه‌لكی كه‌م و دبیت گه‌له‌ك كارێن دی هه‌بن بكه‌م، به‌لێ ژبه‌ركو كارێ رۆژنامه‌ڤانی تایبه‌تمه‌ندیا منه و خۆشترین تشت بۆ راگه‌هاندكاری ئه‌وه ده‌مێ خوه ل كێشه‌كێ دكه‌ته خودان و به‌رهه‌مێ وێ د بینت ئه‌و ژی ده‌مێ جهێن شۆله‌ژێ ل دووف دهێن و چاره دكه‌ن و په‌یامنێرێ راست و دروست ئه‌وه یێ بێ لایه‌ن بیت، ب تایبه‌ت ل ده‌مێ ئاریشه‌كێ دگه‌هینته جهێن شوله‌ژێ.
زێده‌تر گۆت: هه‌تا راده‌كی ژ ئاستی َخوه یێ په‌یامنێریێ یێ رازی مه، چونكو ئه‌كادیمی مه و چه‌ندین خول ل سه‌ر ئاستێ دهۆك و هه‌ولێرێ من وه‌رگرتینه و كارێ رۆژنامه‌ڤانی به‌رده‌وام دپێشڤه چوونێ دایه و به‌رده‌وام ژی خوه پێش دئێخین كو د به‌رده‌وام بین و هه‌كه من كارێ راگه‌هاندنێ َنه‌كربا من حه‌ز ل سه‌ر كارێ ئاگرڤه‌مراندنێ هه‌بوو، ژبه‌ركو ئه‌و كه‌سێن ژیانا خوه دئێخنه مه‌ترسیێ دا ژ بۆ ژیانا خه‌لكی د سه‌ركه‌فتی نه و دكاری َخوه یێ په‌یامنێریێ دا وێنه‌گریی َو مونتاژێ و په‌یامنێریێ ل گه‌ل ئێك دكه‌م و بۆ من جهێ شانازێ یه و رۆژانه هزرێن نوو بۆ من دهێن.
دهۆك، شاكر ئه‌تروشی:
دیزاینه‌ر (هاریوان سه‌باح محه‌مه‌د) كو ژدایكبوویێ سالا 1987 یه و نێزیكێ ده‌ه سالانه دوارێ دیزاین گرافیكێ دا كار دكه‌ت و نڤیسینگه‌هه‌كا تایبه‌ت ب كارێ خوه ڤه هه‌یه، د دیداره‌كێ دا بۆ رۆژناما ئه‌ڤرۆ گۆت: ئه‌ز ده‌رچوویێ په‌یمانگه‌ها هونه‌رێن جوان/ پشكا شێوه‌كاری تایێ دیزاینێ مه، به‌ری بچمه په‌یمانگه‌هێ من ئه‌و حه‌ز هه‌بوو، لێ پشتی من په‌یمانگه‌ه ب دووماهی ئینای ئه‌ز باشتر فێربووم و من بۆ خوه نڤیسنگه‌هه‌ك ڤه‌كر و كارێ ئه‌ز دكه‌م پتر یێ بازرگانی یه، ئانكو بۆ كۆمپانیانه، كو ئه‌و ژی چێكرنا لۆگ و كه‌ته‌لۆك و ئارم و ریكلامێن بازرگانی یه، لێ د هه‌مان ده‌مدا بۆ هه‌لكه‌فتێن نه‌ته‌وه‌یی ژی من بێ به‌رامبه‌ر كاركریه و ب سه‌دان یۆسته‌ر ل دۆر رێنمایێن خوه پاراستنێ ژ ڤایرۆسێ كۆرۆنایێ چێكرینه، هه‌روه‌سا هه‌ر ده‌مه‌كێ رێڤه‌به‌ریا ره‌وشه‌نبیری و هونه‌ری ژمن داخوازكری من بێ به‌رامبه‌ر كاركریه و دووماهی كارێ من دیزاینا كه‌ته‌لۆكا ڤیسته‌ڤالا ئێكێ یا گه‌شتیاری بوو كو به‌ری ده‌مه‌كی ل دهۆكێ هاتبوو گێڕان.
هاریوان، كو نوكه فه‌رمانبه‌ره‌كێ چالاكه ل پشكا راگه‌هاندنێ ل رێڤه‌به‌ریا پولیسێن هاتن و چوونێ ل دهۆكێ، هێشتا گۆت: كارێ من ل رێڤه‌به‌ریێ فۆتۆگرافه‌ره، لێ ئه‌ز دیزاینێ ژی دكه‌م و ب سه‌دان پۆسته‌ر و وێنه من بۆ وان ژی چێكرینه و هه‌رده‌م ئه‌ز دبێژم دیزاین و فۆتۆ هه‌ر دو تمامكه‌ێن ئێكن و هه‌كه پشته‌ڤانیا مه بهێته كرن مه كوردان دیزاینه‌رێن باش هه‌نه ل ئاستێ یێن ئۆرۆپی نه، و ئه‌ز گه‌له‌ك سوپاسیا هه‌ردو دیزاینه‌رێن چه‌له‌نگ ره‌هوان پیرۆمه‌ری و سالم سه‌لیم دكه‌م كو گه‌له‌ك هاریكاریا من كرینه.
دهۆك، زنار تۆڤی:
سترانبێژ مزگین ئۆزده‌میر، كو خه‌لكا باژێرێ باتمانێ یه ل باكۆرێ كوردستانێ و نوكه ل وه‌لاتێ دانیمارك دژیت، د دیداره‌كێ دا بۆ رۆژناما ئه‌ڤرۆ دیاركر كو ئه‌ڤه پتری 27 سالانه ئه‌و سترانان دبێژیت، و هه‌تا نوكه سێ ئه‌لبۆم و هژماره‌كا كلیپان ژی به‌لاڤكرینه و ئامیرێ سازێ ژی دژه‌نیت.
ناڤهاتیێ گۆت: د ئه‌ڤ ساله دا من ل گه‌ل دو مۆزیكژه‌نێن دی دو هزار زارۆیێن كورد و بیانی فێری مۆزیكا كوردی كرینه و نوكه ژی ب به‌رده‌وامی مۆزیكێ نیشا وان زارۆیان دده‌ین و ئه‌ڤ جارا ئێكێ یه ئه‌ڤ كاره ل سه‌رانسه‌ری وه‌لاتێ دانیمارك دهێته كرن، د هه‌مان ده‌مدا زمان و كلتۆرێ كوردان ژی بۆ وان زارۆیان د ده‌ینه دیاركرن، هه‌روه‌سا من هژماره‌كا كۆنسێرتان ژی ل وه‌لاتێ دانیمارك گێڕاینه و
ئه‌ز حه‌زدكه‌م ئه‌لبۆمه‌كێ چیكه‌م، كو ژ چه‌ند سترانێن هونه‌رمه‌ندێ نه‌مر محه‌مه‌د شێخۆی پێك دهێت، من ل به‌ره به‌ری سالا نوو به‌لاڤ بكه‌م، هه‌روه‌سا من كۆمه‌كا هونه‌ری ژی ب ناڤێ كۆما مزگین چێكریه و چه‌ندین مۆزیكژه‌نێن بیانی ژی دناڤ دا هه‌نه، و ب دیتنا من نوكه مۆزیكا كوردی د ئاسته‌كێ باش دایه و ئه‌ز حه‌ز دكه‌م ب ده‌نگ و سازا خوه خزمه‌تا هونه‌رێ كوردی بكه‌م.
هه‌له‌بجه، عه‌زیز هه‌ورامی:
خانما ده‌ست ره‌نگین (سوزان شه‌عبان) د دیداره‌كێ دا بۆ رۆژناما ئه‌ڤرۆ دیاركر كو دژیه‌كێ بچووك دا وێ حه‌ز ژ چێكرنا كارێن ده‌ستی دكر و ل 2005 ب پشته‌ڤانیا خێزانێ ب دروستی ده‌ستپێكر و هه‌تا نوكه یا به‌رده‌وامه و ب به‌رهه‌مێن ده‌ستێ خوه داهاته‌كی بۆ مالباتێ ب ده‌ستڤه دئینیت.
زێده‌تر گۆت: ئه‌و ده‌ستپێك ل باژێرێ هه‌ولێرێ بوو من پشكداری د خوله‌كا دروارێ دا كر و دوێ خولێ دا من ماموستا سامان نیاسی، كو كارێ وی خرڤه‌كرنا كه‌رستێن فولكلۆری بوو، وی ماموستای گه‌له‌ك هاریكاریا من كر و ل وێرێ من كولاڤه‌كێ ده‌ڤه‌را هه‌ورامان بۆ چێكر گه‌له‌ك كه‌یفا وی پێ هات و ده‌ست خۆشی ل من كر، له‌ورا هه‌تا نوكه ئه‌ز یا به‌رده‌وامم و ئه‌و به‌رهه‌مێن ئه‌ز چێدكه‌م د فرۆشم و داهاته‌ك بۆ من ژێ دهێت، بۆ زانین نه به‌س ئه‌ز به‌لكو گه‌له‌ك كچ و ژن ل ده‌ڤه‌را هه‌ورامان ڤی كاردكه‌ن، ئانكو كولاڤ و كراس و مێخه‌ك و گه‌له‌ك تشتێن دی چێ دكه‌ن، و ئه‌و تشتێ ئه‌ز چێ دكه‌م ب ریێا ئۆنلاین نیشا دده‌م و گه‌له‌ك داخوازی ل پتریا باژێران هه‌تا ل ئۆرۆپا ژی ل سه‌ر به‌رهه‌مێن من یێن ده‌ستی هه‌نه.
له‌زگین جوقی
به‌رپرسێ لیژنا پارتی ل زوممار دیاركر راگه‌هاند، هێزه‌كا هه‌ڤپشك دناڤبه‌را پێشمه‌رگه‌ی و له‌شكرێ ئیراقێ دا بۆ پركرنا ڤالاهیا ئه‌منی ل ناحیا زومار دهێته پێك ئێنان و ل ده‌مه‌كێ نێزیك دێ هێته مه‌شقدان و پاشی ده‌ست بكاربیت.
حه‌سه‌ن خه‌لو, به‌رپرسێ لژنا پارتێ ل زومار گۆت” هه‌موو به‌رهه‌ڤی هاتینه كرن بۆ پێك ئێنانا هێزه‌كا هه‌ڤپشك دناڤبه‌را پێشمه‌رگه‌ی وله‌شكرێ ئیراقێ دا بۆ پركرنا ڤالاهیا ئه‌منی ل زومار كو هزار و 500 پێشمه‌رگه و سه‌ربازێن ئیراقێ بخوه‌ڤه دگریت”.
زێده‌تر گۆت” ئه‌ڤ هێزا هه‌ڤپشك 750 پێشمه‌رگه و750 سه‌ربازێن ئیراقێ نه وهه‌موو ودێ پاراستنا ئێمناهیێ ل سنورێ ناحیا زومار هه‌ر ژ ده‌ستپێكا به‌نداڤا مووسل هه‌تا دگه‌هیته نێزیكی كولات ل سنورێ دناڤبه‌را زومار و شنگالێ دا هه‌موو كو ئه‌و ده‌ڤه‌ر دێ هێته كونترولكرن ژلایێ وێ هێزێ ڤه”.
ئاماژه‌كر” ڤالاهیا ئه‌منی ل زومار یا هه‌ی ڤالاهیا ئه‌منی ب ده‌لیڤه ببینن وكریارێن تیرۆرستی ئه‌نجام بده‌ن چونكو ل چیایێن ب سه‌ر زومار ڤه شانه‌یێن تیرۆرستێن داعشێ یێن هه‌ین ومفای ژ سنورێ دناڤبه‌را ئیراقێ و سووریێ دا دبینن “.
به‌رپرسێ لژنا پارتێ ل زومار خویاكر”هه‌ر ده‌مێ هێزا هه‌ڤپشك هاته زومار دێ پرۆسا ب ئه‌ره‌بكرنێ هێته بنبركرن ونامینیت ودێ ته‌ناهی په‌یدابیت وخه‌لك ژی دێ زڤرنه سه‌ر مالێن خوه ل ب تایبه‌تی ژی گوندێن كوردان یێن دبن ده‌ستهه‌لاتا حه‌شدا شه‌عبی ڤه كو هه‌تا نوكه خه‌لكێ وان نه‌شێن ڤه‌گه‌رنه سه‌ر جهێن خوه ودێ زالگه‌هێن هه‌ڤپشك هێته پێك ئێنان ویدێ كونترۆل ل سه‌ر ره‌وشا زومار هێته كرن”.
ئه‌وژی ئاشكه‌را كركو پشتی خیانه‌تا 16 ئوكتۆبه‌را 2017 ێ هه‌تا ئه‌ڤرۆكه ژی هیشتا هنده‌ك گوندێن كوردان ل ژێر داگیركرنێ دانه وه‌كو گوندێن (حه‌مه‌د ئاغا و به‌ردیه رۆژئاڤا و به‌ردیه رۆژهه‌لات و كه‌ڤری سبی) و هێشتا خه‌لكێ وان نه‌شیاینه ڤه‌گه‌رن وچاڤه‌رێی پێكئێنانا هێزا هه‌ڤپشك دكه‌ن وهه‌رده‌مێ پێشمه‌رگێ كوردستانێ زڤری زومار، دێ باوه‌ری بۆ خه‌لكێ دروست بیت ودێ زڤرنه سه‌ر مالێن خوه”.
ل دووماهیێ گۆت” ئه‌نجامێن هه‌لبژارتنان ره‌وشا زومار گوهارتیه ب تایبه‌تی ژی پشتی به‌ربژارێن پارتی ل زومار سه‌ركه‌فتن بده‌ستڤه‌ئینای و خه‌لكێ زومار ئه‌و باوه‌ری دایه پارتی بزڤریته زومار ئومیده‌ك مه‌زن بۆ خه‌لكێ وێ دروست بوویه كو ته‌ناهی په‌یدابیت “.
ژلایێ خوه‌ڤه ئیبراهیم محه‌مه‌د قه‌بۆ میرانی, به‌ربژارێ سه‌ركه‌فتیێ پارتی ل ناحیا زومار گۆت” سنورێ دناڤبه‌را ئیراقێ و سووریێ دا ب تایبه‌تی ژی ل ده‌ڤه‌را شنگال بن كونترولا هێزێن نه‌قانوونی و چه‌كدار دایه وئه‌ڤه ئه‌گه‌رێ سه‌ره‌كیێ تێكدانا ئارامیا هه‌موو پارێزگه‌هێن ئیراقێ یه نه‌خاسمه نه‌ینه‌وا وهه‌ر ده‌مێ هێزه‌كا قانونی ل وێرێ نه‌بیت بۆ كونترولكرنا سنورێ دێ ده‌ستێ لایه‌یه‌نێن ده‌ركی كه‌فته تێدا دێ وبۆ مه‌ره‌مێن خوه بكارئینن”.
گۆت ژی” پێدڤیه حوكمه‌تا ئیراقێ كونترۆلا سنورێ بكه‌ت ورێ نه‌هێته دان گرۆپێن نه‌قانوونی و چه‌كدار ل شنگالێ بمینن وهاتنوچوونێ ل ده‌ڤه‌رێ بكه‌ن چونكو ئه‌و گرۆپ ئه‌گه‌رێ تێكدانا ره‌وشا شنگالێ وهه‌موو ده‌ڤه‌رێن دێ یێن سه‌ر ب پارێزگه‌ها نه‌ینه‌وا ڤه‌یه و هه‌تا نوكه ژی هنده‌ك ژ خه‌لكێ زمار نه‌شیایه بزڤریته سه‌ر جهێن خوه”.
نيشاندان