ئه‌ڤرۆ:

سه‌رۆك وه‌زیرێن ئیراقێ، مسته‌فا كازمی، ژ بزاڤه‌كا تیرۆركرنێ قورتال دبیت كو ب رێیا فرۆكێن بێ فرۆكه‌ڤان ل سپێده‌یا زوو یا دوهی ئێكشه‌مبی 7 چریا دوویێ 2021 ل سه‌ر جهێ ئاكنجیبوونا وی ل ده‌ڤه‌را كه‌سك ل به‌غدا هاتیه‌ ئه‌نجامدان، هه‌ڤده‌م چو لایه‌نه‌كی به‌رپرسیاره‌تیا خوه‌ ژ ئه‌نجامدانا وێ هێرشێ رانه‌گه‌هاندیه‌.

ئه‌و هێرشا هاتیه‌ ئه‌نجامدان د ده‌مه‌كی دایه‌ ئیراق د ئالۆزیێن سیاسی دا ده‌رباز دبیت ژئه‌گه‌رێ ئه‌نجامێن هه‌لبژارتنێن جڤاتا نوونه‌رێن ئیراقێ ئه‌وێن ل هه‌یڤا بۆری هاتینه‌ كرن كو لایه‌نێن سیاسی یێن نوونه‌راتیا حه‌شدا شه‌عبی دكه‌ن و پشكه‌كن ژ هیچزێن چه‌كدارێن ئیراقی و هه‌ڤپه‌یمانێن ئیرانێ نه‌، نه‌رازیبوونا خوه‌ ژ ئه‌نجامێن هه‌لبژارتنان به‌رچاڤ كریه‌ كو هژمارا كورسیێن وان ب شێوه‌كێ دیار كێم بووینه‌.

فه‌رمانده‌یا ئۆپه‌راسیۆنێن هه‌ڤپشك یێن ئیراقێ د به‌یاننامه‌كێ دا دیاركر كو بزاڤا تیرۆركرنا كازمی ب فرۆكه‌كا بێ فرۆكه‌ڤان یا مینرێژكری هاتیه‌ ئه‌نجامدان و چ زیان ب كازمی نه‌كه‌فتینه‌ و ره‌وشا وی یا باشه‌.

ده‌مێ چه‌ندین رۆژایه‌ خوه‌نیشادان ژلایێ ئه‌ندامێن گرۆپێن ب سه‌ر ئیرانێ ڤه‌ ل ده‌وروبه‌رێن ده‌ڤه‌را كه‌سك ل به‌غدا كو بالیۆزخانا ئه‌مریكا ژی تێدا هه‌یه‌، دهێنه‌ ئه‌نجامدان و تێدا نه‌رازیبوونا خوه‌ ل سه‌ر ئه‌نجامێن هه‌لبژارتنان دیاردكه‌ن كو ل رۆژا ئه‌ینیا بۆری خوه‌نیشاده‌ر روو ب روویێ هێزێن ئه‌منی یێن ئیراقی بوون و دئه‌نجامدا خوه‌نیشاده‌ره‌ك هاته‌ كوشتن.

دهێته‌ زانین ده‌ڤه‌را كه‌سك ل به‌غدا كو جهێ حوكمه‌تێ و پتریا بالیۆزخانه‌یێن بیانی یه‌، هنده‌ك جاران تووشی هێرشێن مووشه‌كی دبیت كو چ لایه‌ن به‌رپرسیاره‌تیا خوه‌ ژ ئه‌نجامدانا وان راناگه‌هینن، به‌لێ ئه‌مریكا پتریا جاران گرۆپێن چه‌كدار یێن ئیراقی ئه‌وێن نێزیكی ئیرانێ ب ئه‌نجامدانا وان هێرشان تۆمه‌تبار دكه‌ت.

سه‌عه‌د مه‌عه‌ن، رێڤه‌به‌رێ راگه‌هاندنا وه‌زاره‌تا ناڤخوه‌یا ئیراقێ ل دۆر وێ هێرشێ گۆت” ئه‌و هێرشا تیرۆرستی ب سێ فرۆكێن بێ فرۆكه‌ڤان هاتیه‌ ئه‌نجامدان كو دو ژ وان هاتینه‌ خستن و فرۆكا سیێ هێرش دژی مالا سه‌رۆك وه‌زیران ئه‌نجامدایه‌ و كازمی ژ وێ هێرشێ قورتال بوویه‌، به‌لێ هنده‌ك كه‌س بریندار بووینه‌ و ل ژێر چاره‌سه‌ریێ دانه‌”.

ژلایێ خوه‌ڤه‌ په‌یڤدارێ وه‌زاره‌تا ده‌رڤه‌ یا ئه‌مریكی (نید برایس) ل دۆر وێ هێرشێ راگه‌هاند” ئه‌مریكا ڤێ هێرشا تیرۆرستی ب توندی ریسوا دكه‌ت و ئه‌م د په‌یوه‌ندیه‌كا به‌رده‌وام داینه‌ ل گه‌ل هێزێن ئه‌منی یێن ئیراقی و مه‌ به‌رهه‌ڤیا خوه‌ بۆ هاریكاریێ د ڤه‌كۆلینان دا ل دۆر وێ هێرشا تیرۆرستی به‌رچاڤ كریه‌”.

ئه‌ڤرۆ:

به‌رپرسه‌كێ رێڤه‌به‌ریا خوه‌سه‌ر یا رۆژئاڤایێ كوردستانێ راگه‌هاند كو ب ناڤبژیڤانیا رۆسیا چه‌ند رۆژن هه‌ڤدیتن د ناڤبه‌را وان و شامێ دا ده‌ستپێكرینه‌ و رۆسیا دڤێت ئاریشێن نها د ناڤبه‌را كوردان و شامێ دا بهێنه‌ چاره‌سه‌ركرن و شانده‌ك ژ رێڤه‌به‌ریا خوه‌سه‌ر ژی نها ل رۆسیا یه‌.

به‌رپرسه‌كێ رێڤه‌به‌ریا خوه‌سه‌ر یا رۆژئاڤایێ كوردستانێ كو نه‌خواستیه‌ ناڤێ وی بهێته‌ ئاشكرا كرن بۆ ئاژانسا سپوتینگ یا رۆسیا دیار كریه‌ كو چه‌ند رۆژن هه‌ڤدیتن د ناڤبه‌را كوردان و شامێ دا ب ناڤبژیڤانیا رۆسیا ده‌ستپێكریه‌ و رۆسیا ده‌ست ب بزاڤه‌كا مه‌زن یا كری، چونكو رۆسیا دڤێت قۆناغه‌كا نوو یا چاره‌سه‌ریا سیاسی ل سووریێ ده‌ستپێ بكه‌ت و ژ به‌ر هندێ ژی نها شانده‌ك ژ كوردێن رۆژئاڤایێ كوردستانێ ژی ل رۆسیا نه‌ و ده‌ست ب هه‌ڤدیتنان كرینه‌ و هه‌روه‌سا نها هه‌ڤدیتنێن د ناڤبه‌را رێڤه‌به‌ریا خوه‌سه‌ر و شامێ دا ژی ب ره‌نگه‌كێ باش برێڤه‌ دچن و گۆت: (رۆسیا دڤێت ئاریشێن هه‌ی ب رێیا دانوستاندنان بهێنه‌ چاره‌سه‌ركرن و ژ به‌ر هندێ ژی رۆسیا داخواز ژ رێڤه‌به‌ریا خوه‌سه‌ر ژی كریه‌ كو هه‌بوونا ده‌ستهه‌لاتا به‌شاری قه‌بوول بكه‌ن و هه‌روه‌سا دڤێت ئالایێ سووریێ ل هه‌موو وان ده‌ڤه‌ران بهێته‌ بلندكرن كو نها د بن كۆنترۆلا هێزێن سووریا دیموكرات دانه‌ و ل هه‌مبه‌ر دا رێڤه‌به‌ریا خوه‌سه‌ر ژی دیار كریه‌ كو دڤێت شام ب فه‌رمی هه‌بوونا رێڤه‌به‌ریا خوه‌سه‌ر قه‌بوول بكه‌ت و شاندێ رۆسیا ژی دیار كرینه‌ كو دڤێت ب رێیا دانوستاندنان ل گه‌ل شامێ هه‌موو پرسێن هه‌ی بهێنه‌ چاره‌سه‌ركرن و ئه‌و یه‌ك ژی پێنگاڤه‌ك گه‌له‌ك باشه‌).

هه‌مان به‌رپرسی ئه‌و یه‌ك ژی دیار كریه‌ كو چه‌ند رۆژن رۆسیا هێزه‌كا مه‌زن ل قامشلۆ و چه‌ندین ده‌ڤه‌رێن دی یێن رۆژئاڤایێ كوردستانێ بجه كریه‌ و هه‌روه‌سا رۆسیا هێزێن نوو ل سه‌ر سنۆرێن د ناڤبه‌را توركیا و سووریێ دا ژی بجه كریه‌ كو ئه‌و یه‌ك گه‌له‌ك باشه‌، چونكو بجهكرنا وان هێزان په‌یامه‌كه‌ بۆ توركیا كو ئه‌و رێ ناده‌ن توركیا ئێرشی رۆژئاڤایێ كوردستانێ و باكوری سووریێ بكه‌ت و گۆت: (شاندێ رۆسیا سۆز دایه‌ كو ئه‌و ناهێلن توركیا ئێرشی رۆژئاڤایێ كوردستانێ بكه‌ت، لێ شاندێ رۆسیا ئه‌و یه‌ك ژی دیار كریه‌ كو دڤێت كورد ژی هه‌موو پرسێن خوه‌ ل گه‌ل شامێ چاره‌سه‌ر بكه‌ن دا چو به‌هانه‌ بۆ توركیا نه‌مینن و ئه‌و ژی بێگومان د ده‌مه‌كێ وه‌سا دا رێ ناده‌ن توركیا ده‌ست ب ئۆپه‌راسیۆنه‌كا نوو بكه‌ت).

هنده‌ك ژ چاڤدێرێن سیاسی ژی دیار دكه‌ن كو ده‌مه‌كه‌ ئیران و رژێما سووریێ فشارێن خوه‌ ل سه‌ر په‌كه‌كێ زێده‌تر لێ كرینه‌ دا كو ده‌ڤه‌رێن نها ل ژێر كۆنترۆلا هێزێن سووریا دیموكرات دا راده‌ستی شامێ بكه‌ن، هه‌روه‌سا ب فه‌رمانا قه‌ندیلی فه‌رماندارێ گشتی یێ هێزێن سووریا دیموكرات ئانكۆ جه‌نه‌رال مه‌زلوم عه‌بدی ژی ژ كاری هاتیه‌ دوورخستن، چونكو گه‌له‌ك تشتێن وی ب دلێ به‌رپرسێن په‌كه‌كێ نه‌بوون و نها ژی بزاڤه‌كا مه‌زن یا هه‌ی دا ده‌ڤه‌رێن ل ژێر ده‌ستێ هێزێن سووریا دیموكرات راده‌ستی شامێ بهێنه‌ كرن و ل هه‌مبه‌ر دا شام و رۆسیا دێ پێكڤه‌ وان ده‌ڤه‌ران پارێزن و رێ ناده‌ن كو توركیا ژی ده‌ست ب ئۆپه‌راسیۆنه‌كا نوو بكه‌ت.

ل ئالیێ دی هاته‌ زانین كو ئه‌مریكا پشته‌ڤانیێ ل دانوستاندنێن د ناڤبه‌را شامێ و رێڤه‌به‌ریا خوه‌سه‌ر دا دكه‌ت، لێ د هه‌مان ده‌می دا ئه‌مریكا بۆ كوردان ژی دیار كریه‌ كو ئه‌و دێ ل سووریێ مینن و د به‌رنامێ وان دا نینه‌ كو هێزێن خوه‌ ژ باكورێ سووریێ و رۆژئاڤایێ كوردستانێ ڤه‌كێشن.

ئه‌ڤرۆ:

سه‌رۆك كۆمارێ ئیرانێ ئیبراهیم ره‌ئیسی راگه‌هاند كو ره‌وشا ئابووری یا ئیرانێ گه‌له‌ك خرابه‌ و ژ به‌ر هندێ ژی نها ئه‌و نه‌شێن ده‌ست ب چو پرۆژێن مه‌زن یێن ئابووری بكه‌ن، چونكو ژ به‌ر سزایێن ئابووری یێن ل سه‌ر ئیرانێ نها ئه‌و نه‌شێن په‌ترۆلێ بفرۆشن و داهاتێن دی یێن ئیرانێ ژی گه‌له‌ك كێم بووینه‌ و ئه‌و یه‌ك ژی بێگومان كارتێكرنا خوه‌ ل هه‌موو وه‌لاتیان كریه‌.

سه‌رۆك كۆمارێ ئیرانێ ئه‌و یه‌ك ژی دیار كر كو وان دڤێت ب رێیا دانوستاندنان وه‌سا بكه‌ن كو هه‌موو سزایێن ئابووری یێن ل سه‌ر ئیرانێ بهێنه‌ راكرن.