هه‌ولێر، قائید میرۆ:

رۆژانه‌ ل هه‌رێما كوردستانێ چه‌ندین به‌رهه‌مێن هونه‌ری د هه‌موو بیاڤاندا دهێنه‌ به‌لاڤكرن و ئاستێ هنده‌ك ژ وان به‌رهه‌مێن هونه‌ری زور یێ نزمه‌، هنده‌ك هونه‌رمه‌ند ژی خوه‌ بێگونه‌ه دكه‌ن ژ ئه‌ڤان جوره‌ به‌رهه‌مێن دهێنه‌ به‌لاڤكرن چالاكڤانه‌كا مافێ مرۆڤی ژی ئاشكرا كر، ده‌ستێن ده‌ره‌كی هه‌نه‌ بۆ تێكدانا جڤاكێ كوردستانێ و كار دكه‌ن هێدی هێدی هه‌موو تشته‌ك ببیته‌ ئاسایی ل ده‌ف تاكێ كورد و گۆت: به‌رهه‌مێن هونه‌ری بووینه‌ كاره‌سات بۆ تێكدانا خێزانا كورد.

رۆژگار محسن چالاكڤانا مافێ مرۆڤی دیار كر، به‌رهه‌مێن ناڤخۆیی یێن هونه‌ری كاریگه‌ریێن خراب ل سه‌ر جڤاكی كرینه‌، پێدڤیه‌ وه‌زاره‌تا ره‌وشنبیری و لایه‌نێن به‌رپرس پێداچوونه‌كێ بۆ وان به‌رهه‌مێن هونه‌ری بكه‌ن یێن ل هه‌رێما كوردستانێ دهێنه‌ به‌رهه‌م ئینان و ل ده‌زگه‌هێن راگه‌هاندنێ و سۆشیال میدیایێ دهێنه‌ به‌لاڤكرن و گۆت: (بتایبه‌تی هه‌ر نوكه‌ كاریگه‌ری ل سه‌ر نفشێ نوو زارۆكان ده‌ركه‌فتیه‌ و زمانێ ئاخفتنا خه‌لكی بوویه‌ زمانه‌كێ بازاڕی و په‌یڤێن په‌ككه‌فتی و نه‌ هه‌ژی، كو ل گه‌ل ره‌وشت و تیتالێن كورده‌واری و جڤاكێ مه‌ ناگونجان).

روژگارێ‌ گوتژی: (مه‌ چه‌ندین سه‌ره‌دانێن مه‌یدانی بۆ مالێن وه‌لاتیان ئه‌نجامداینه‌ و تێدا ده‌ركه‌فتیه‌، چه‌ندین په‌یڤێن نه‌ شرین ژلایێ زارۆكان دهێنه‌ گوتن و دوباره‌ كرن، كو ئه‌ز دشێم بێژم كاره‌ساته‌ زارۆك د ئه‌ڤی ژیێ بچووكدا فێری ئه‌ڤان ئاخفتنێن په‌ككه‌فتی ببیت، هه‌روه‌سا ئه‌ركێ‌ و دایك و بابانه‌ چاڤدێریا زارۆكێن خوه‌ بكه‌ن و رێكێ نه‌ده‌نێ‌ به‌رێ خوه‌ بده‌نه‌ هه‌موو به‌رهه‌مه‌كێ هونه‌ری و هه‌ر تشته‌كێ دهێته‌ به‌لاڤكرن، چونكی نموونه‌ ل به‌ر ده‌ست هه‌نه‌ زارۆیه‌كێ 11 سالی به‌رێ خوه‌ دده‌ته‌ فلمێن پۆرن و مالپه‌ڕێن سێكسی، ئه‌ڤه‌ كاره‌ساته‌ ب سه‌ر خه‌لكێ مه‌ دا دهێت و دڤێت بهێته‌ كونترول كرن).

چالاكڤانا مافێ مرۆڤی ئاماژه‌ پێ‌ كر، به‌رهه‌مێن بیانی ژی یێن دهێنه‌ وه‌رگێڕان چو چاڤدێریه‌ك ل سه‌ر نینه‌، بتایبه‌تی درامایێن بیانی هه‌موو  تژی كاره‌ساتن و هه‌ر چیرۆكه‌كا نه‌ هه‌ژیه‌ هاتیه‌ وه‌رگێڕان بۆ سه‌ر زمانێ كوردی، د ژیانا ئاسایی یا وه‌لاتیاندا ئه‌و چیرۆك هه‌موو دبنه‌ راستی و دوباره‌ كرن، مینا خیانه‌تا هه‌ڤژینیێ و گۆت: (ئه‌م د ئاگه‌هدارین چه‌ندین خێزان هاتینه‌ هه‌لوه‌شاندن و ژن و زه‌لام ژێك جودا بووینه‌ لبن كاریگه‌ریا ئه‌ڤان به‌رهه‌مێن بیانی، هه‌كه‌  ئه‌و به‌رهه‌م ل فلته‌رێ وه‌زاره‌تا ره‌وشنبیری ده‌ربازبووینه‌ ئه‌ڤه‌ كاره‌ساته‌ رێك بهێته‌ دان به‌رهه‌مێن وه‌سا نه‌هه‌ژی بهێنه‌ به‌لاڤكرن، به‌رۆڤاژی هه‌كه‌ وه‌زاره‌تێ و لایه‌نێن په‌یوه‌ندیدار هایژ ژ ئه‌ڤان به‌رهه‌مان نینه‌ كو دهێنه‌ به‌لاڤكرن كاره‌سات هێشتا مه‌زنتره‌، چونكی نابیت بێی چاڤدێری و فلته‌ر چو به‌رهه‌مه‌ك بهێته‌ به‌لاڤكرن).

رۆژگار محسن دبێژیت: (ب دیتنا من ده‌سته‌كێ ده‌ره‌كی هه‌یه‌ دخوازیت ب پیلان كار بۆ تێكدانا جڤاكێ مه‌ بكه‌ت و ئه‌ڤ چه‌نده‌ ژی ده‌ركه‌فتیه‌، پیلان وه‌سایه‌ هێدی هێدی به‌رهه‌مێن نه‌گونجای بهێنه‌ به‌لاڤكرن ل گه‌ل ئه‌ڤان هه‌موو كچێن مۆدیل به‌رداینه‌ ناڤا جڤاكی و هه‌ر ئێك ژ وان كاره‌ساته‌كه‌ بۆ ملله‌تێ مه‌، مه‌ره‌م ژ ڤێ‌ هه‌مویێ‌ ئه‌وه‌ هێدی هێدی هه‌موو تشته‌ك ببیته‌ ئاسایی ناڤا جڤاكی، به‌لێ پاشه‌ڕۆژێ دێ جڤاكێ مه‌ به‌ر ب كاره‌ساتێن مه‌ترسیدار به‌ت).

چالاكڤانا مافێ‌ مروڤی گۆت: (نه‌ یا به‌رئاقله‌ كچه‌كا سنێله‌ هه‌موو رۆژان بهێته‌ سه‌ر كه‌نالێن راگه‌هاندنێ و تۆڕێن جڤاكی بێژیت  بهایێ تڕۆمبێلا من هنده‌ ده‌فته‌رێن دۆلارینه‌، ئه‌ڤه‌ هه‌كه‌ ده‌سته‌ك لپشت نه‌بیت خه‌لكه‌ك هێشتا شه‌ڕی بۆ په‌یداكرنا پاریێ نانێ رۆژێ دكه‌ت، ئه‌رێ‌ وان كچێن مۆدیل ئه‌و پاره‌ ژ كیڤه‌ ئینا و كی هه‌یه‌ ئه‌ڤی كوژمێ پاره‌ی دانیت به‌ر وان و ل راگه‌هاندنێ به‌لاڤ بكه‌ن، جڤاك یێ دهێته‌ تێكدان و كه‌س نینه‌ خوه‌ لمه‌ بكه‌ته‌ خودان و بێژیت به‌سه‌ ئێدی، خه‌لك یێ‌ دهێته‌ راكێشان بۆ هه‌ر تشته‌كی، كو به‌ری نوكه‌ دناڤا جڤاكێ دا ئاسایی نه‌بوویه‌، دڤێت وه‌لاتی د هشیار بن ل ئه‌ڤان پیلانێن هه‌ی).