NO IORG
نووترين نووچه
Authors Posts by naci bedel

naci bedel

15011 POSTS 0 COMMENTS

14

ئه‌ڤرۆ،

د داخویانیه‌كێدا سه‌رۆكێ‌ یانا گاره‌ یا وه‌رزشی بۆ رۆژناما ئه‌ڤرۆ دیاركر كو بۆ وه‌رزێ‌ نوو یێ‌ خولا پلا ئێكا كوردستانێ‌ تیما ته‌پا پێی لدووڤ شیانا به‌رهه‌ڤیێن خوه‌ كرینه‌ و ئارمانجا كارگێریێ‌ مانه‌ د خولێ‌ دا لێ‌ كادرێ‌ راهێنانێ‌ بۆ هه‌ڤڕكیێ‌ د رژدن.

زێده‌تر شێروان بشار گوت: هه‌رچه‌نده‌ هیڤی و ئۆمێدن هه‌ر یانه‌كێ‌ یه‌ هه‌ڤڕكیێ‌ بوو ناسناڤێ‌ قاره‌مانیێ‌ بكه‌ت و ئه‌م خوه‌ ره‌شبین نابینین لێ‌ ژبه‌ركو كاودانێن مه‌ یێن دارایی د باش نینن و شیان نینن هه‌ڤڕكیێ‌ بۆ پلا نایاب بكه‌ین به‌روڤاژی وێ‌ كادرێ‌ راهێنانێن ب هیڤیێن مه‌زن رژدن نه‌ بتنێ‌ پشكداربن به‌لكو هه‌ڤڕكیێ‌ ژی بكه‌ن، له‌ورا وه‌كو كارگێری دێ‌ پشته‌ڤانبین و یا دشیان دا بیت بۆ به‌رهه‌ڤكه‌ین ژبه‌ركو یا گرنگ بوومه‌ مانا تیمێ‌ یه‌ د پلا ئێك دا و هه‌كه‌ مه‌ پشكداری نه‌كربا ژلایێ‌ ئێكه‌تیا ته‌پاپێی یا كوردستانێ‌ تیما مه‌ دا پاشڤه‌ چیته‌ پلا دو.

بۆ زانین 19 یانه‌ پشكداری وه‌رزێ‌ نوو یێ‌ پلا ئێك بووینه‌ و هاتینه‌ به‌لاڤكرن لسه‌ر دو كۆمان، قاره‌مانێ‌ هه‌ر كۆمه‌كێ‌ دێ‌ ده‌ربازبیته‌ پلا نایاب و تیما دووماهیێ‌ یا هه‌ر كۆمه‌كێ‌ پاشڤه‌چیته‌ پلا دو، چار یانێن پارێزگه‌هێ‌ د كۆما ئێكێ‌ دا پشكدارن، یاریا ئێكێ‌ ل ده‌ستپێكا هه‌یڤا بهێت بڤی ره‌نگی هێنه‌ كرن، شورجه‌- گاره‌، ئاكرێ‌- برۆسك، پێشه‌سازی- سێمێل، به‌رده‌ره‌ش- خاك، ئالتۆن كوپری چاڤه‌ڕێ‌ بیت.

16

ئه‌ڤرۆ، رێوار محه‌مه‌د ره‌شید:

به‌رپرسێ‌ به‌شێ‌ راگه‌هاندنێ‌ ل گه‌ڕا هه‌شتێ‌ یا فلمه‌ فیسته‌ڤالا دهۆك یا نێڤده‌وله‌تی بۆ رۆژناما ئه‌ڤرۆ دیار كر كو هه‌موو به‌رهه‌ڤی بۆ گێڕانا گه‌ڕا هه‌شتێ‌ یا فلمه‌ فیسته‌ڤالا دهۆك یا نێڤده‌وله‌تی هاتینه‌كرن یا كو ژڤانه‌ ل رۆژا 11/11/2021 هه‌تا 18/11/2021 یا به‌رده‌وام بیت و گۆت” فلمچێكه‌رێن سینه‌ما یا نێڤده‌وله‌تی و ناڤخۆیی و خودانێن خه‌لاتێن پر بها د بیاڤێ سینه‌مایێ دا دێ‌ بنه‌ سه‌رۆكێن(Jury)  یا فلمه‌ فیسته‌ڤالا ناڤهاتی.

حه‌سه‌ن عارف، به‌رپرسێ‌ به‌شێ‌ راگه‌هاندنێ‌ ل گه‌ڕا هه‌شتێ‌ یا فلمه‌ فیسته‌ڤالا دهۆك یا نێڤده‌وله‌تی دیار كر كو ب شێوه‌كێ گشتی د بیاڤێ هه‌لسه‌نگاندنا فلمان دا وه‌كو كارپێكری د گه‌رێن چووی دا (چار) لژنه‌ هه‌نه‌ بۆ هه‌لسه‌نگاندنا فلمێن كوردی و یێن بیانی، د ڤێ گه‌رێ دا هنده‌ك ناڤێن بالكێش و خودان پێگه‌هـ د سینه‌مایا كوردی و بیانی دا هاتینه‌ ده‌ستنیشانكرن.

ده‌رهێنه‌رێ ئه‌فغانی یێ ناڤدار (سه‌دیق به‌رمه‌ك) دێ سه‌رۆكاتیا (Jury) یا فلمێن درێژ یێن بیانی د پشكا نێڤده‌وله‌تی دا كه‌تن، به‌رمه‌ك دهێته‌ هژمارتن ژ ده‌رهێنه‌رێن گه‌له‌ك باش یێن جیهانی و دگه‌رێن ده‌ربازبووی دا یێن فلمه‌ فیسته‌ڤالا دهۆك یا نێڤده‌وله‌تی دا پشكداری هه‌بوویه‌، ئه‌وی گه‌له‌ك به‌رهه‌م هه‌نه‌ د بیاڤێ نڤیسین و ده‌رهێنانێ دا وه‌كو كورته‌ فلم و فلمێن درێژ و به‌لگه‌فلم، فلمێ وی یێ درێژ (ئوسامه‌ 2004) گه‌له‌ك خه‌لاتێن جیهانی بده‌ستخوه‌ڤه‌ ئیناینه‌ و بۆ گه‌له‌كا ژی هاتبوو به‌ربژاركرن، و باشترین خه‌لاتێ ب ده‌ستخۆڤه‌ ئینای خه‌لاتێ (Golden Globe)  وه‌كو باشترین فلمێ بیانی ل سه‌رانسه‌رێ جیهانێ هه‌ر دیسان ل فیسته‌ڤالا (كان) دا خه‌لاتێ    (Cannes Junior2003)بده‌ستخوه‌ڤه‌ ئینایه‌ هه‌ر دیسان د فیسته‌ڤالا بوسان دا خه‌لاتێ بینه‌ری بده‌ستخۆڤه‌ ئینایه‌ دگه‌ل چه‌ندین خه‌لاتێن دی.

ناڤهاتی خویا كر كو د پشكا فلمێن كوردی یێن درێژ دا نڤیسه‌ر و به‌رهه‌مهێنه‌ر و ده‌رهێنه‌رێ كورد (حسێن تاباك) سه‌رۆكاتیا (Jury) یا ڤێ‌ پشكا گرنگ دكه‌ت، ناڤهاتی ژدایكبوویێ سالا 1981ێ یه‌ ل وه‌لاتێ ئه‌لمانیا و د بنیاتێ‌ خوه‌ دا كورده‌، د خه‌باتا خوه‌ یا دبیاڤێ سینه‌مایێ دا گه‌له‌ك ده‌سكه‌فتێن سه‌رنجراكێش بده‌ستخوه‌ڤه‌ ئیناینه‌، ئه‌وی خه‌باتاخوه‌ یا سینه‌مایێ ل ئه‌كادمیا سینه‌مایێ ل نه‌مسا ده‌سپێكریه‌ ئه‌وی سینه‌ما ل سه‌ر ده‌ستێ ده‌رهێنه‌رێ ناڤدار (مایكل هانیكی) خواندیه‌، فلمی وی یێ نه‌خری ب ناڤێ (Beauty is Worthless) (جوانی یێ چو بوها نینن) شه‌ش خه‌لاتێن توركی بده‌ستڤه‌ئیناینه‌ ل سالا 2021ێ، هه‌ر دیسان ل نه‌مسا چار خه‌لات ب هه‌مان فلم بده‌ستڤه‌ئیناینه‌ وه‌كو باشترین ده‌رهێنان و باشترین فلمێ ئێكێ، و فلمێ وی یێ دی ب ناڤێ (Gipsy Queen) (شاها قه‌ره‌چا) د هۆلێن سینه‌مایا دا هاتیه‌ نمایشكرن و خه‌لاتێ فیسته‌ڤالا تالین بده‌ستخوه‌ڤه‌ ئینایه‌، هه‌ر دیسان گرێبه‌ست دگه‌ل هاتیه‌ كرن دگه‌ل (NETFLIX)، هه‌ر دیسان به‌لگه‌ فلمێ وی یێ درێژ ب ناڤێ (the legend of the Ugly King) (ئافسانه‌یا شاهێ كرێت) ل سه‌ر ژیانا ده‌رهێنه‌ر و بابێ روحی یێ سینه‌ما كوردی (یلماز گونای) دو خه‌لاتێن باش بده‌ستخوڤه‌ ئینان د فیسته‌ڤالا هوف دا باشترین به‌لگه‌فلم 2017 و فیسته‌ڤالا نورمبرغ یا نێڤده‌وله‌تی توركیا-المانیا 2018، هه‌ر دیسان فلمێ وی یێ ب ناڤێ (Oskars Dress)(فیستانێ ئوسكارێ) ئه‌وێ ژلایێ كۆمپانیا WB یا ئه‌مریكی یا ب ناڤ و ده‌نگ دهێته‌ به‌رهه‌مئینان د قوناغێن (Post Prudection) دایه‌.

به‌رپرسێ‌ به‌شێ‌ راگه‌هاندنێ‌ ل گه‌ڕا هه‌شتێ‌ یا فلمه‌ فیسته‌ڤالا دهۆك یا نێڤده‌وله‌تی ئاشكرا كر كو بۆ سه‌رۆكاتیا (Jury) یا پشكا به‌لگه‌فلمان ده‌رهێنه‌رێ كورد (ته‌لال دێركی) دێ ڤێ به‌رپرساتیێ وه‌رگریت، ئه‌و ده‌رهێنه‌ر و به‌رهه‌مهێنه‌ر و سیناریسته‌ ژ دایك بوویێ سالا 1977 ل دیمه‌شقێ پایته‌ختێ وه‌لاتێ سوریا، ده‌رهێنانا سینه‌مایێ ل ئینستتیوتا ستافاراكو یا جیهانی ل ئه‌سینا خاندیه‌، به‌رهه‌مێن وی وه‌كو كورته‌ فلم و به‌لگه‌فلم چه‌ندین خه‌لاتێن باش د ناڤ فلمه‌فیستیڤالێن جیهانی دا وه‌رگرتینه‌، گرنگی یه‌كا پێ دهێته‌ دان ب تایبه‌تی پشتی هاتیه‌ به‌ربژاركرن بۆ بده‌ستڤه‌ئینانا خه‌لاتێ‌ ئوسكارێ 2019 د ناڤ پشكا باشترین به‌لگه‌فلمێن درێژ دا ب ناڤێ  (Fathers and Sons)(باب و كوڕ) هه‌مان فلم ل سالا 2017ێ چه‌ندین خه‌لاتێن جیهانی بده‌ستخوه‌ڤه‌ئیناینه‌ و گۆت: “ل پشكا كورته‌ فلمان كو سه‌رۆكاتیا (Jury) یا ڤێ پشكێ‌ دێ (كامیلا لارسون) رێڤه‌به‌را فوندێ غوتبرغ بۆ پشته‌ڤانیكرنا سینه‌مایێ بیت. زێده‌باری كو ئه‌و پروگرامه‌را فیسته‌ڤالا غوتبرغ یا سینه‌مایی یه‌ گه‌له‌ك یا ب ناڤ و ده‌نگه‌ وه‌كو ره‌خنه‌گره‌كا سینه‌مایی دیسان ئه‌زموون هه‌یه‌ د ده‌رهێنانا سینه‌مایی دا، كو ب كارێ ده‌رهێنانا دو فلمێن كورت رابوویه‌ هه‌ر دیسان پشكدار بوویه‌ د به‌رهه‌مئینان و ئه‌كته‌ریا چه‌ندین فلمان دا، یا گرنگ ئاماژه‌ پێ بهێته‌ دان كو فوندێ غوتبرغ یا پشته‌ڤانیكرنا سینه‌مایێ ئه‌وێ ژ لایێ خانما ناڤهاتی ڤه‌ دهێته‌ برێڤه‌برن ئارمانجا وێ د گه‌را خو یا سالا 2021ێ دا فلمچێكه‌رێن وه‌لاتێن كوردستان و به‌رازیل و ئوكرانیا و سودان بوون”.

33

ئه‌ڤرۆ، ته‌حلاڤی:

مه‌مه‌ت ئاتلی، كو خودان ته‌رز و ستایله‌كێ گه‌له‌ك جودایه‌، و كێم جار ل سه‌ر شاشه‌ و د ڤیدیۆ كلیپان دا ده‌ردكه‌ڤیت، و تا وی راده‌یی ژی حه‌ز ژێكه‌ره‌كێ گه‌له‌ك تایبه‌ت هه‌یه‌، لێ گه‌له‌ك گرنگیێ ب پێشێخستنا سترانا كوردی دده‌ت، ل سه‌ر ستایلێن نوو.

هونه‌رمه‌ند، مه‌مه‌ت ئاتلی كو خه‌لكێ باژارێ ئامه‌دێ یه‌ ل باكوورێ كوردستانێ، پشتی كو بۆ جارا ئێكێ سه‌ره‌ده‌نا هه‌رێما كوردستانێ و باژێرێ‌ دهۆكێ كری، ناڤهاتی دیاركریه‌ كو حه‌ز دكه‌ت هه‌ر چو نه‌بیت وه‌رزانه‌ كۆنسێرته‌كێ ل باژێرێن كوردستانێ سازبكه‌ت.

مه‌مه‌ت ئاتلی دیاركر كو، تا نوكه‌ وی ل چه‌ندین وه‌لاتێن ئورۆپی كۆنسێرت سازكرینه‌، و بۆ جارا ئێكێ یه‌ دهێته‌ هه‌رێما كوردستانێ، لێ دخوازیت ئه‌و ده‌رفه‌ت هه‌بیت هه‌رچو نه‌بیت سالانه‌ ل هه‌ر وه‌رزه‌كی كۆنسێرتان ل هه‌رێمێ‌ سازبكه‌ت، چونكو تاتلی دبێژیت گه‌له‌ك ژ حه‌ژێكه‌رێن ده‌نگێ وی ل كوردستانێ و ب تایبه‌ت ل باژێرێ‌ دهۆكێ هه‌نه‌.

ئاتلی، خۆدانێ شه‌ش ئه‌لبۆمێن سترانایه‌، ل سالا ١٩٩٥ێ ئه‌لبۆما خوه‌ یا ئێكێ‌ به‌لاڤكریه‌ و دووماهی ئه‌لبۆم ب ناڤێ، موری جانه‌ كو ژ دوازده‌ تراكان پێك دهات و ئێك ژ تراكێن ئه‌لبۆما ناڤهاتی یا ب ناڤێ، پسمامۆ ب شێوه‌یێ ڤیدیۆ كلیپ به‌لاڤكریه‌.

26

ئه‌ڤرۆ:

جێگرێ سه‌رۆكێ پارتی دیموكراتی كوردستان، نێچیرڤان بارزانی، د هه‌وا هه‌لبژارتنێن پارتی بۆ هه‌لبژارتنێن جڤاتا نوونه‌رێن ئیراقێ، ب لایه‌نگرێن پارتی ل سنوورێ پارێزگه‌ها نه‌ینه‌وا راگه‌هاند، به‌رده‌وام ل گه‌ل نڤیسینگه‌ها ئازادكرنا ره‌ڤاندیێن ئێزدی د په‌یوه‌ندیێ داینه‌ كو كاردكه‌ن بۆ ئازادكرنا ئه‌و خوشك و برایێن ئێزدی ئه‌وێن د ده‌ستێ داعشێ دا ماین و نابیت خه‌لكێ شنگالێ وه‌كو كه‌ره‌سته‌ك د ململانێیا سیاسی دا بهێنه‌ بكارئینان.

د چارچۆڤێ ب هێزكرنا هه‌وا هه‌لبژارتنێن پارتی دیموكراتی كوردستان، دوهی ئێكشه‌مبی 3/10/2021، نێچیرڤان بارزانی، جێگرێ سه‌رۆكێ پارتی دیموكراتی كوردستان ل دهۆكێ ل گه‌ل كادر و پشكه‌ك ژ ئه‌ندامێن پارتی ل سنوورێ پارێزگه‌ها نه‌ینه‌وا كۆمبوو.

نێچیرڤان بارزانی د گۆتاره‌كێ دا ئاماژه‌ ب وێ چه‌ندێ كر” دیدارا من ئه‌ڤرۆ ل گه‌ل هه‌وه‌یێن هێژا ل سنوورێ شنگالێ و مووسلێ بۆ من گه‌له‌ك یا تایبه‌ت بوو.. چونكه‌ ئێوه‌ نوونه‌راتیا ده‌ڤه‌ره‌كا گه‌له‌ك ره‌نگین یا پێكڤه‌ژیانا ئایینی و نه‌ته‌وی دكه‌ن”.

جێگرێ سه‌رۆكێ پارتی گۆت ژی” پارێزگه‌ها نه‌ینه‌وا ژ روویێ نه‌ته‌وی و ئایینی ژی ڤه‌ یا فره‌ ره‌نگه‌، كورد و عه‌ره‌ب، شه‌به‌ك، ئاشووری، سریان، كلدان، توركمان، موسلمان، ئێزدی، كریستیان، كاكه‌یی، سوننه‌ و شیعه‌ پێكڤه‌ ل ڤی سنووری یێن هه‌ین و پێكڤه‌ دژین، ئه‌ڤه‌ ئه‌و تابلۆیا جوان و ره‌نگینا پێكڤه‌ژیانێ یه‌ ل هه‌رێما كوردستانێ، ل پارتی و هه‌وه‌ پیرۆز بیت، ئه‌ڤه‌ زه‌نگینیه‌كا گه‌له‌ك مه‌زن و بهاداره‌ و جهێ شانازیێ و رێز و پێزانینا مه‌ و جیهانێ ژی یه‌”.

نێچیرڤان بارزانی زێده‌تر گۆت” د هه‌لبژارتنێن سالا 2018 ێ دا پشكه‌كا مه‌زن ژ ئه‌ندام و لایه‌نگرێن پارت یكو دناڤ مووسلێ و ده‌وروبه‌رێن وێ دا بوون نه‌شیان ده‌نگێن خوه‌ بده‌ن، پشكه‌ك ژی كو ئاواره‌بوون ل سنوورێ پارێزگه‌ها دهۆكێ ده‌نگێن وان هاتنه‌ سوتن، به‌لێ ڤێجارێ پارتی هه‌م دناڤ مووسلێ دا هه‌وا هه‌لبژارتنان یا خوه‌ دكه‌ت، هه‌م رێكارێن كۆمسیۆنا هه‌لبژارتنان ب شێوه‌كی یه‌ كو ئاواره‌ دشێن ده‌نگێن خوه‌ بده‌ن و ده‌نگێن وان وه‌كو جارا بۆری ناهێنه‌ سوتن”.

گۆت ژی” د هه‌لبژارتنێن بۆری دا پارتی دیموكراتی كوردستان ل سنوورێ پارێزگه‌ها نه‌ینه‌وا شیا 149 هزار ده‌نگان بده‌ستڤه‌بینیت، پارتی پێشبینیا وێ چه‌ندێ دكه‌ت كو دڤان هه‌لبژارتنان دا ده‌نگێن خوه‌ زێده‌ بكه‌ت، بۆ ڤان هه‌لبژارتنان ژی ل هه‌ر هه‌شت بازنێن هه‌لبژارتنان یێن ڤێ پارێزگه‌هێ پارتی 14 به‌ربژار یێن هه‌ین”.

د پشكه‌كا دی یا ئاخڤتنێن خوه‌ دا، نێچیرڤان بارزانی جێگرێ سه‌رۆكێ پارتی، گۆت” راسته‌ ژ ئه‌گه‌رێ گۆرۆنایێ مه‌ ژمێژه‌ هه‌ڤدوو نه‌دیتیه‌، به‌لێ باوه‌ر بكه‌ن هه‌موو پێكهاتێن نه‌ته‌وی و ئایینی یێن وی سنووری ب تایبه‌تی كۆمه‌لكوژیا شنگالێ، خوشك و دایك و برایێن ره‌ڤاندی یێن نه‌هاتینه‌ ئازادكرن، وێرانیا ده‌ڤه‌را شنگالێ، ره‌وشا ده‌شتا نه‌ینه‌واو مووسلێ، به‌رده‌وام پشكه‌ك بوو ژ دانوستاندنێن مه‌ ل كوردستانێ و ل گه‌ل به‌رپرس و سه‌ركردێن جیهانێ ژی، به‌رده‌وام ئه‌و بابه‌تێ سه‌ره‌كیێ دانوستاندنێن مه‌بوو”.

ل دۆر وێ هێرشا داعشێ كو ل 3/8/2014 كریه‌ سه‌ر شنگالێ و بۆ ئه‌گه‌رێ ئاواره‌بوونا ب سه‌دان هزار و ره‌ڤاندن هزاران ئێزدیان، نێچیرڤان بارزانی گۆت” هه‌موو جیهان دزانیت داعش چه‌ند یا درنده‌یه‌، به‌لێ درنده‌ییا داعشێ به‌رامبه‌ر هه‌وه‌، به‌رامبه‌ر خه‌لكێ خوه‌شتڤیێ شنگالێ یا بێ وێنه‌ بوو، خودێ هاریكارێ هه‌وه‌ و هه‌موویان بیت بۆ ئازادكرنا ئه‌و ره‌ڤاندیێن هێشتا ئازاد نه‌بووین، هه‌روه‌سا خودێ هاریكار بیت بۆ ئاڤه‌دانكرنا شنگالێ و ئه‌و جهێن هاتینه‌ تێكدان”.

 

40

ئه‌ڤرۆ:

په‌یڤدارێ پارتی دیموكراتی كوردستان راگه‌هاند، راسته‌ ئه‌و ل گه‌ل ئێكه‌تیێ دو هێزێن هه‌ڤركن، به‌لێ سویند خوارن و گه‌فێن قوباد تاله‌بانی دووره‌ ژ هه‌ڤركیێ و نه‌دبوو بچیته‌ بن هه‌ژموونا هنده‌ك خه‌لكی دی.

مه‌حموود محه‌مه‌د، په‌یڤدار و ئه‌ندامێ لژنا بلند یا هه‌وا هه‌لبژارتنێن پارتی گۆت” راسته‌ ئه‌م دو حزبێن هه‌ڤركین، ل ده‌ستپێكێ ئێكه‌تی بۆ هه‌ڤركیا پارتی هاته‌ دامه‌زراندن، به‌لێ گه‌ف و سویندێن قوبادی تشته‌كێ دووره‌ ژ ركابه‌ریێ، پێدڤی بوو ب وی شێوه‌ی نه‌ ئاخڤتبا”.

مه‌حموود محه‌مه‌د ب پێدڤی دزانیت هه‌ڤركیا وان ل سه‌ر وێ بیت كا مه‌ چ هه‌یه‌ بۆ گوهۆرین و پێشكه‌فتنا ڤی جڤاكی ژ روویێ ئابوروی، سیاسی، جڤاكی و خزمه‌تگوزاری، ل سه‌ر پرۆژێن مه‌ بیت، كیش مه‌ زێده‌تر ل گه‌ل واقعێ ڤی وه‌لتی دگونجیت و خزمه‌تا ڤی وه‌لاتی دكه‌ین؟ ئه‌گه‌ر ل سه‌ر وان كارایه‌ فه‌رموو بلا ل سه‌ر وێ چه‌ندێ بهێته‌ پیڤه‌ر كرن”.

گۆت ژی” گه‌له‌ك باشه‌ ئه‌م هه‌ڤرك بین و مه‌ هه‌موویان ژی باوه‌ری ب هه‌ڤركیێ یا هه‌ی، به‌لێ مه‌ باوه‌ری ب گه‌ف و ده‌ست هاڤێتن و سویند خوارنێ نینه‌ كو دناڤ هه‌وا هه‌لبژارتنان دا هه‌بیت”.

ل رۆژا 29/9/2021 قوباد تاله‌بانی سه‌رۆكێ لیستا هه‌ڤپه‌یمانیا كوردستانی د هه‌وا هه‌لبژارتنێن ئێكه‌تیێ دا گۆتبوو” قه‌سه‌م ب خودێ پارتی وێ رۆژێ ب چاڤێ خوه‌ نابینیت ب تنێ حوكمرانیا كوردستانێ بكه‌ت”.

په‌یڤدارێ پارتی ئاماژه‌ ب وێ چه‌ندێ دده‌ت كو ئه‌و د وێ باوه‌ریێ دا نه‌بوون ئه‌و ب وی شێوه‌ی باخڤیت و مه‌ دناڤ پارتی دا نه‌ كوێخا ونه‌ ئاغا هه‌یه‌، ئه‌م كوێخا و ئاغا و كاركه‌رێن، ئه‌م نوونه‌راتیا هه‌موو ته‌خ و چینێن دناڤ جڤاكێ كوردستانی دا دكه‌ین.

گۆت ژی” كه‌سه‌كێ وه‌كو قوبادی كو ژیانا وی ل وه‌لاتێن پێشكه‌فتی بوو، پێدڤی بوو نه‌چیته‌ بن هه‌ژموونا هنده‌ك خه‌لكی دی، كو ل ده‌مێ خوه‌ دبن ده‌ستێ وان دنالین”.

16

ئه‌ڤرۆ:

هژماره‌ك ژ نڤیسه‌ر، چاڤدێرێن سیاسی یێن توركیا ل باژێرێ ئامه‌دێ كۆمبوون و د كۆمبوونێ دا ره‌وشا توركیا و پرسا كوردی هاته‌ گه‌نگه‌شه‌كرن و چاڤدێران دیار كرن كو نه‌ حوكمه‌تێ و نه‌ ژی پارتێن ئۆپۆزسیۆنێ چو پرۆژه‌ بۆ چاره‌سه‌ركرنا پرسا كوردی نینن.

ل باژێرێ ئامه‌دێ یێ باكورێ كوردستانێ ب پشكداریا هژماره‌ك به‌رچاڤ ژ چاڤدێرێن سیاسی، رۆژنامه‌ڤان، نڤیسه‌ر و ره‌وشه‌نبیرێن توركیا كۆمبوونه‌ك برێڤه‌ چوو و تێدا پشكداربوویێن كۆمبوونێ دیار كرن كو حوكمه‌تا توركیا چو پرۆژه‌ بۆ چاره‌سه‌ركرنا پرسا كوردی نینن و حوكمه‌تا نها ب هه‌لوه‌ست و كریارێن خوه‌ ئاسته‌نگیێ ل هه‌مبه‌ر چاره‌سه‌ركرنا پرسا كوردی ل توركیا دروست دكه‌ت و هه‌روه‌سا پارتێن ئۆپۆزسیۆنێ ژی تنێ بۆ بده‌ستڤه‌ئینانا ده‌نگێن كوردان داخۆیانیان دده‌ن و وان ژی چو پرۆژه‌ بۆ چاره‌سه‌ركرنا پرسا كوردی نینن.

ل گۆر نێرینا پشكداربوویێن كۆمبوونا ئامه‌دێ پرسا كوردی ئێكه‌ ژ پرسێن سه‌ره‌كی یێن توركیا و دڤێت ل په‌رله‌مانێ توركیا بهێته‌ چاره‌سه‌ركرن، ژ بۆ چاره‌سه‌ركرنا پرسا كوردی ژی دڤێت به‌ری هه‌ر تشته‌كێ شه‌رێ نها ل توركیا بهێته‌ راگرتن، چونكو هه‌تا شه‌ر هه‌بیت زه‌مینه‌ بۆ دانوستاندنان ژی دروست نابیت و دڤێت د پێنگاڤا ئێكێ دا شه‌رێ نها بهێته‌ راگرتن دا زه‌مینه‌ بۆ دانوستاندنان خوه‌ش ببیت، چونكو ب سالانه‌ ژ به‌ر شه‌رێ ل توركیا پرسا كوردی نه‌هاتیه‌ چاره‌سه‌ركرن و حوكمه‌تا نها ژی دڤێت وه‌كو حوكمه‌تێن به‌ری نها ب رێیا سه‌ربازی پرسا كوردی چاره‌سه‌ر بكه‌ت كو ئه‌و یه‌ك ژی چو ئه‌نجامێن خوه‌ نابن و دێ توركیا پتر تووشی ئالۆزیان بیت.

هژماره‌ك ژ پشكداربوویێن كۆمبوونێ داخواز ژ حوكمه‌تا توركیا ژی كرن كو ده‌ستان ژ سیاسه‌تا خوه‌ یا شه‌رخوازی ل سووریێ و لیبیا به‌رده‌ت و راگه‌هاندن كو دڤێت به‌ری هه‌ر تشته‌كێ توركیا پرسێن خوه‌ چاره‌سه‌ر بكه‌ت، چونكو پرسا كوردی و پرسا ئابووریێ نها بووینه‌ ئاریشێن گه‌له‌ك مه‌زن بۆ توركیا و هه‌كه‌ حوكمه‌تێ بڤێت توركیا ژ قه‌یرانا نها قورتال بكه‌ت دڤێت به‌ری هه‌ر تشته‌كێ پرسا كوردی بهێته‌ چاره‌سه‌ركرن دا زه‌مینه‌ بۆ باشتركرنا بارێ ئابووری یێ توركیا ژی خوه‌ش بیت.

پشكداربوویێن كۆمبوونێ به‌حسێ هه‌لوه‌ستێ پارتا كۆماریا گه‌ل یا بۆ چاره‌سه‌ركرنا پرسا كوردی ل په‌رله‌مانێ توركیا ژی كرن و راگه‌هاند كو بێگومان دڤێت پرسا كوردی ل په‌رله‌مانێ توركیا بهێته‌ چاره‌سه‌ركرن، لێ مخابن پارتا كۆماری ژی چو پرۆژه‌ بۆ چاره‌سه‌ركرنا پرسا كوردی پێشكێش نه‌كرینه‌ و پارتا كۆماری به‌ری چه‌ندین سالان ل دژی په‌روه‌ردا ب زمانێ كوردی بوو، هه‌لوه‌ستێ نها یێ پارتا كۆماری پتر بۆ بده‌ستڤه‌ئینانا ده‌نگێن كوردانه‌ و ئه‌و یه‌ك ژی د خزمه‌تا چاره‌سه‌ریا پرسا كوردی دا نینه‌ و دڤێت پارتا كۆماریا گه‌ل ب فه‌رمی پرۆژێ خوه‌ یێ بۆ چاره‌سه‌ركرنا پرسا كوردی راگه‌هینیت.

پشكداربوویێن كۆمبوونێ ره‌خنێن دژوار ل داخۆیانیێن به‌ری چه‌ند رۆژان یێن ئه‌ردۆغانی ژی گرتن كو دیار كربوو ل توركیا چو پرسه‌ك ب ناڤێ پرسا كوردی نه‌مایه‌، چونكو وان به‌ری نها پرسا كوردی چاره‌سه‌ر كرینه‌ و دیار كرن كو هه‌لوه‌ستێ ئه‌ردۆغانی د جهێ خوه‌ دا نینه‌، چونكو ل توركیا پرسا كوردی هه‌یه‌ و دڤێت بهێته‌ چاره‌سه‌ركرن، هه‌كه‌ حوكمه‌تێ چو پرۆژه‌ بۆ چاره‌سه‌ركرنا پرسا كوردی نه‌بیت بلا ب فه‌رمی بۆ رایا گشتی ئاشكرا بكه‌ت، چونكو بۆ هه‌ر كه‌سه‌كێ ئاشكرایه‌ كو ژ به‌ر هه‌بوونا پرسا كوردی توركیا تووشی گه‌له‌ك قه‌یرانان بوویه‌ و دڤێت حوكمه‌ت كار بۆ چاره‌سه‌ركرنا پرسا كوردی بكه‌ت.

 

15

ئه‌ڤرۆ:

وه‌زاره‌تا ده‌رڤه‌ یا ئه‌لمانیا راگه‌هاند كو قه‌یرانا لیبیا دێ كارتێكرنا خوه‌ ل گه‌له‌ك وه‌لاتێن دی ژی كه‌ت و ژ به‌ر هندێ ژی دڤێت هه‌موو ئالی پێكڤه‌ كار بۆ چاره‌سه‌ركرنا قه‌یرانا نها ل لیبیا بكه‌ن، چونكو دڤێت به‌ری هه‌ر تشته‌كێ هه‌موو هێزێن بیانی ژ لیبیا ده‌ركه‌ڤن، ژ به‌ر كو هه‌بوونا هێزێن بیانی ل لیبیا بوویه‌ ئاسته‌نگیه‌كا مه‌زن ل هه‌مبه‌ر چاره‌سه‌ریا سیاسی.

وه‌زاره‌تا ده‌رڤه‌ یا ئه‌لمانیا هه‌روه‌سا راگه‌هاند كو دڤێت خه‌لكێ لیبیا بخوه‌ بریارێ ل دۆر پاشه‌رۆژا خوه‌ بده‌ن، هنده‌ك وه‌لاتێن جیهانێ ب به‌هانێن جودا جودا دخوازن ره‌وشا لیبیا ئالۆز بكه‌ن، ئه‌و یه‌ك ب چو ره‌نگه‌كێ ناهێته‌ قه‌بوول كرن، چونكو ژ بلی خه‌لكێ لیبیا چو هێزه‌ك نه‌شێت پرسا وی وه‌لاتی چاره‌سه‌ر بكه‌ت، دڤێت هه‌موو وه‌لاتێن جیهانێ هاریكاریا هێزێن سیاسی یێن لیبیا بكه‌ن دا ئه‌و ژی بشێن پێكڤه‌ چاره‌سه‌ریه‌كا گونجای بۆ قه‌یرانا نها ل لیبیا په‌یدا بكه‌ن، ره‌وشا نها ل لیبیا گه‌له‌ك خرابه‌ و مخابن هه‌بوونا هێزێن بیانی ژی ره‌وش ئالۆزتر كریه‌ و دڤێت هه‌موو ئالی رێزێ ل داخوازیێن گه‌لێن لیبیا بگرن، ژ به‌ر هندێ ژی د پێنگاڤا ئێكێ دا دڤێت هه‌موو هێزێن بیانی ژ ئاخا لیبیا ده‌ركه‌ڤن.

وه‌زاره‌تا ده‌رڤه‌ یا ئه‌لمانیا ئه‌و یه‌ك ژی دیار كریه‌ كو به‌ری نها شانده‌ك ژ وه‌زاره‌تا ده‌رڤه‌ یا لیبیا سه‌ره‌دانا ئه‌لمانیا كرینه‌ و ل گه‌ل به‌رپرسێن وه‌زاره‌تا ده‌رڤه‌ یا ئه‌لمانیا كۆمبووینه‌ و د كۆمبوونێ دا ئه‌لمانیا ب فه‌رمی پشته‌ڤانیا خوه‌ بۆ حوكمه‌تا نها یا لیبیا دیار كریه‌ و راگه‌هاندیه‌ كو دڤێت هه‌موو هێزێن سیاسی یێن لیبیا پشته‌ڤانیێ ل حوكمه‌تا نها یا لیبیا بكه‌ن، چونكو ره‌وشا لیبیا گه‌له‌ك ئالۆزه‌ و دڤێت ب رێیا هه‌لبژارتنان هه‌موو پرسێن هه‌ی بهێنه‌ چاره‌سه‌ركرن، ژ به‌ر هندێ ژی دڤێت هه‌موو وه‌لاتێن جیهانێ رێزێ ل داخوازیێن گه‌لێ لیبیا بگرن و د پێنگاڤا ئێكێ دا ژی دڤێت هه‌موو هێزێن بیانی ژ لیبیا ده‌ركه‌ڤن.

ئه‌و یه‌ك د ده‌مه‌كێ دایه‌ كو به‌ری نها سكرتێرێ گشتی یێ نه‌ته‌وه‌یێن ئێكگرتی ژی راگه‌هاند كو دڤێت هه‌موو هێزێن بیانی ژ ئاخا لیبیا ده‌ركه‌ڤن، چونكو هه‌بوونا چه‌كدارێن بیانی ئاسته‌نگیێن مه‌زن ل هه‌مبه‌ر چاره‌سه‌ریا سیاسی ل لیبیا دروست دكه‌ت.

26

دهۆك، هه‌یفا دوسكی:

كه‌سانێن بو ئه‌ڤرو ئاخفتین دبێژن: قوناغێن هه‌لبژارتنان دبنه‌ ئه‌گه‌رێ‌ تێكه‌ل كرنا سیاسه‌تێ‌ دناڤ خێزانێن مه‌ دا هه‌تا وی راده‌ی كو ئه‌م هه‌ست ب هه‌بوونا خوه‌ ناكه‌ین و مه‌ ئارامی نینه‌، چونكی ته‌كنولژیا شه‌ره‌كێ‌ ده‌روونی یێ‌ مه‌زن ل گه‌ل خێزانان دكه‌ن. ئه‌ڤه‌ دبیته‌ ئه‌گه‌رێ‌ تێكدانا په‌یوه‌ندیێن مرۆڤانی.

شه‌ریفا موسا دایكه‌ و خۆدان شه‌ش زارویه‌ سه‌باره‌ت بابه‌تی گۆت: (ئه‌م نه‌شێین سه‌ره‌ده‌ریێ‌ ل گه‌ل ته‌كنولوژیایێ‌ بكه‌ین، چونكی د قوناغا هه‌لبژارتنان دا ره‌وشا مه‌ د خێزانێ‌ دا گه‌له‌ك یا ئالوز بووی هه‌تا جاران ئه‌م شه‌را دكه‌ین، ژبه‌ركو هه‌ر هنده‌ك ژ مه‌ لایه‌نێن جودانه‌ و هه‌تا وی راده‌ی ئه‌م دلێن ئێكدو دهێلین و زارویێن مه‌ تووشی گڤاشتنێن ده‌روونی دبن.

هشیار به‌هجه‌ت سه‌میانێ‌ خێزانێ‌ یه‌ سه‌باره‌ت بابه‌تی ئاماژه‌ ب خاله‌كا سه‌ره‌كی كر و گۆت: (ده‌مێ‌ كاندید دهێنه‌ مالا مه‌ جاران ئه‌م شه‌ره‌ده‌ڤا دكه‌ین و هه‌تا دناڤ مالێ‌ دا زاوریێن بچووك ژی خوه‌ تێكه‌لی سیاسه‌تێ‌ دكه‌ن و به‌حسێ‌ هه‌لبژارتنان دكه‌ن، زێده‌باری زارویێن مه‌ گه‌له‌ك مایێ‌ خوه‌ د بابه‌تێن سیاسی دكه‌ن و دكه‌ڤنه‌ به‌ر هێرشێن ته‌كنولۆژیایێ‌ و ئه‌و د ئه‌كوانتێن خوه‌دا گه‌له‌ك گڤاشتنێ دئێخنه‌ سه‌ر كاندیدێن پارتی و ریكلامێ‌ بو وان دكه‌ن، به‌لێ‌ لایه‌نێن دی شه‌رێ‌ ده‌روونی ل گه‌ل مه‌ دكه‌ن و زارویێن من هند پێ‌ توره‌ دبن جاران ئه‌م ئامیرێن ته‌نكولژیایێ‌ دشكێنن).

هه‌ژار عه‌لی به‌رۆشكی ئێك ژ چالاكڤانایه‌ و ماموستایێ‌ زانكویێ‌ یه‌ ل دوور بابه‌تی گۆت: (گه‌له‌ك یا گرنگه‌ د قوناغا هه‌لبژارتنان دا ئه‌م خێزانێن خوه‌ پارێزین ژ هه‌ر گڤاشتنه‌كا ده‌روونی و سیاسی، ژبه‌ر بابه‌ت گرێدایی كه‌سانێن ل سه‌ر ژیێ‌ 18 سالی دایه‌ و نه‌ یا پێدڤیه‌ ئه‌م زارویێن سنێله‌ و ساڤا تێكه‌لی ڤان بابه‌تا بكه‌ین، چونكی ئه‌و هێشتا نه‌گه‌هشتینه‌ وی ژیێ‌ ده‌ست نیشان كری یێ كو خوه‌ تێكه‌لی ڤان بابه‌تا بكه‌ن، ژبه‌ركو گڤاشتنێن ده‌روونی پتر كارتێكرنێ‌ ل خێزانێ‌ دكه‌ن ده‌مێ‌ سیاسه‌ت دبیته‌ بابه‌تی سه‌ره‌كی یێ‌ خێزانێ‌.

ژلایه‌كێ‌ دیڤه‌ چنار رێكانی ره‌وشه‌نبیره‌ ئاماژه‌ پێ‌ كر كو  سیاسه‌ت و خێزان دوو بابه‌تێن ژێكجودانه‌ و راسته‌ هه‌ر كه‌سه‌ك ژ مه‌ ده‌مێ‌ دچیته‌ دناڤ كاری دا ژ خێزانێن خوه‌ ده‌ردكه‌ڤین، به‌لێ‌ زارو جیهانه‌كا بێ‌ گۆنه‌ه و ساده‌نه‌ و گۆت: (یا پێدڤیه‌ ئه‌م خوه‌ پارێزین ژ هه‌ر شه‌ره‌كێ‌ سیاسی و ب تایبه‌ت ئه‌و په‌یچ و كه‌نالێن هه‌ڤدژ یێن جڤاكی دئێخنه‌ سه‌ر گڤاشتنێن ده‌روونی و سیاسی، ئانكو هه‌ر پێنگاڤه‌كا ئه‌م د هاڤێژین یا پێدڤیه‌ زارو و خێزان دوور بن ژ هه‌ر كاودانه‌كێ‌ نه‌ چاڤه‌رێكری، به‌رۆڤاژی جاران سیاسه‌ت دبیته‌ ئه‌گه‌رێ‌ پتر ئالوزی و ئاستنه‌گێن ژیانێ‌، نه‌خاسمه‌ ئه‌و كه‌سێن نه‌ ره‌وشه‌نبیر یێن یاریا ب مێشكێ‌ جڤاكی دكه‌ن و خێزانان بێزار دكه‌ن، به‌لكو دڤێت دڤان كاودانان دا دایك و باب د هشیار بن و خێزانا خوه‌ ژ ڤان كه‌س و په‌یچ و ئه‌كاوانتان بپارێزن دا خێزانێن وان د پاراستی بن ژ هه‌ر شه‌ره‌كێ‌ ده‌روونی و سیاسی، چونكی جهێ‌ داخێ‌ یه‌ هنده‌ك لایه‌ن یێن هه‌ین دلوڤانیێ‌ ب جڤاكی نابه‌ن و خێزانێ‌ دئێخنه‌ به‌ر گڤاشتن و ئاریشێن مه‌زن.

21

ئه‌ڤرۆ:

نێچیرڤان بارزانی، جێگرێ‌ سه‌رۆكێ‌ پارتی دیموكراتی كوردستان د كه‌رنه‌ڤالێ‌ جه‌ماوه‌ریێ پارتا خوه‌ دا بۆ سه‌رئێخستنا به‌ربژارێن پارتی بۆ هه‌لبژارتنێن جڤاتا نوونه‌رێن ئیراقێ، ل دهۆكێ‌ گۆتاره‌ك بۆ ئه‌ندام و ئالیگرێن پارتی دیمۆكراتی كوردستان پێشكێش كر و گۆت: “پارتی ل ڤێ‌ ده‌ڤه‌رێ‌ گه‌شه‌ یا كری و پارتی و دهۆك هه‌رده‌م ته‌مامكه‌رێن هه‌ڤدو بووینه‌”.

جێگرێ‌ سه‌رۆكێ‌ پارتی دیموكراتی كوردستان د ده‌ستپێكا گۆتارا خوه‌ دا سلاڤ و رێز و ڤیانا سه‌رۆك بارزانی گه‌هاندنه‌ كه‌سوكارێن شه‌هیدان و پێشمه‌رگێن قه‌هره‌مان، هه‌موو ئه‌ندام و لایه‌نگرێن پارتی و هه‌موو خه‌لكێ‌ ده‌ڤه‌را دهۆكێ‌، دیسا سه‌ره‌خوشیێن خوه‌ گه‌هاندنه‌ هه‌موو وان مالباتێن عه‌زیزێن خوه‌ ژ ئه‌گه‌رێ‌ كۆرۆنایێ‌ ژ ده‌ست داین و هیڤیا زوو ساخبوونێ‌ ژی بۆ نه‌خوشان خواست و گۆت: “ئه‌ز خوشخالم ل گه‌ل جه‌ماوه‌رێ‌ پارتی ل دهۆكێ‌، هوونێن خوشتڤی كه‌سوكارێن مه‌نه‌ عه‌زیزێن مه‌نه‌، ئه‌گه‌ر هنده‌ك جاران هه‌ڤدو ژی نه‌بینین، لێ‌ هوون هه‌رده‌م ل به‌ر دلێ‌ مه‌نه‌ و هه‌رده‌م دهزرا مه‌ ژی دانه‌”.

نێچیرڤان بارزانی، جێگرێ‌ سه‌رۆكێ‌ پارتی دیموكراتی كوردستان د وی كه‌رنه‌ڤالێ‌ جه‌ماوه‌ریێ‌ هه‌وا هه‌لبژارتنان دا ل دهۆكێ‌ گۆت: “پارتی و دهۆك ته‌مامكه‌رێن هه‌ڤدونه‌ و نه‌ پارتی بێی دهۆكێ‌ دژیت و نه‌ دهۆكێ‌ ژی بێی پارتی خودانه‌كێ‌ دلسۆز هه‌یه‌، په‌یوه‌ندیا دهۆكێ‌ و پارتی عه‌شقه‌كا ئه‌فسۆنایی یه‌، هه‌رده‌ما پارتی بهێزبووی دهۆكا یا گه‌ش بووی و هه‌رده‌ما دهۆك گه‌شبووی پارتی یا بهێزبووی و ئه‌ڤ دو تشته‌ پێكڤه‌ دگرێداینه‌”.

جێگرێ‌ سه‌رۆكێ‌ پارتی دیموكراتی كوردستان هه‌ر د گۆتارا خوه‌ دا خویا كر كو پارتی و ده‌ڤه‌را دهۆكێ‌ مێژوویه‌كا دوور و درێژ د گه‌ل ئێدا یا هه‌ی و گۆت: “پارتی ل ڤێ‌ ده‌ڤه‌رێ‌ گه‌شه‌ یا كری و پارتی د خوازیت دهۆك زێده‌تر پێش بكه‌ڤیت، ئه‌م كێشه‌ و پێدڤیێن دهۆكێ‌، گله‌ و گازندێن ده‌ڤه‌را به‌هدینان دزانین، حوكمه‌تا هه‌رێما كوردستانێ‌ ژی هه‌ژماره‌كا به‌رنامه‌ و پلانان بۆ پتر خزمه‌تكرنا دهۆكێ‌ یێن هه‌ین، لێ‌ شه‌ڕێ‌ داعشێ‌ و بڕینا بودجه‌ی بوونه‌ رێگر”.

جێگرێ‌ سه‌رۆكێ‌ پارتی دیموكراتی كوردستان ئاشكرا ژی كر كو پشكه‌ك ژ خه‌لكێ‌ ڤان ده‌ڤه‌ران ژ به‌ر هێزا چه‌كدارێن په‌كه‌كێ‌ د مه‌ترسیێ‌ دانه‌، له‌ورا دێ‌ بزاڤان كه‌ین ڤێ‌ ره‌وشێ‌ ده‌رباز بكه‌ین و وه‌لاتیان ڤه‌گه‌ڕینینه‌ سه‌ر جه و وارێن وان و گۆت: “مه‌ چه‌ندین جاران راگه‌هاندیه‌ و گۆتیه‌ وان ژی: ده‌ستان ژ كوردستانێ‌ به‌رده‌ن و مه‌ترسیێ‌ بۆ وه‌لاتیان دروست نه‌كه‌ن”.

نێچیرڤان بارزانی د پشكه‌كا دی یا گۆتارا خوه‌ دا گۆت: “ئه‌ڤ هه‌لبژارتنه‌ بۆ پارتی گه‌له‌ك د گرنگن و پێدڤی ب ده‌نگێ‌ هه‌موویان هه‌یه‌، چونكو بهێزبوونا پارتی ل به‌غدا، كوردستان دێ‌ یا بهێز و ئاڤه‌دان بیت و پاشه‌رۆژه‌كا گه‌شتر هه‌بیت، له‌ورا ده‌نگی بده‌نه‌ پارتی دیمۆكراتی كوردستان”.

44

دیدار، دلڤین ره‌شید:

د. ماجد شنگالی به‌ربژێرێ‌ پارتی یێ‌ هه‌ژماره‌ 30 بازنێ‌ شنگال د دیداره‌كێ‌ دا بۆ رۆژناما ئه‌ڤرۆ به‌حس ل كار و به‌رنامێ‌ خوه‌ یێ‌ داهاتی دكه‌ت و دده‌ته‌ زانین كو دێ‌ پشته‌ڤانیا كه‌رتێ‌ چاندنێ‌ كه‌ت و وی كه‌رتی ل شنگال به‌ر ب پێش به‌ن.

ئه‌ڤرۆ: ماجد حه‌مو كی یه‌

د. ماجد شنگالی: ئه‌ز ماجد حه‌مو شنگالی ژ دایكبوویێ‌ سالا 1973ێ‌ ل قه‌زا شنگال ده‌رچویێ‌ كولیژا مووسل ل سالا 1996 – 1997 من گه‌له‌ك كار یێن كرین ل سنورێن ساخله‌میا پارێزگه‌ها نه‌ینه‌وا، هه‌تا سالا 2014 ئه‌ز بوومه‌ ئه‌ندامێ‌ جڤاتا نوونه‌رێن عیراقێ‌ یه‌ خۆلا سیێ‌ و پاشی ئه‌ز وه‌كو خانه‌نشین مام و نوكه‌ ژی ئه‌ز به‌ربژێری (پ.د.ك) یێ‌ خۆلا پێنجێ‌ بۆ جڤاتا نوونه‌رێن عیراقێ‌ مه‌ هه‌ژمارا من 30 ل سه‌ر بازنێ‌ (3) یێ‌ شنگال پارێزگه‌ها نه‌ینه‌وایه‌.

ئه‌ڤرۆ: مه‌ره‌ما ته‌ ژ چوونا به‌غدا وه‌كو نوونه‌ره‌ك د جڤاتا نوونه‌ران دا چیه‌؟

د. ماجد شنگالی: ئه‌ز وه‌كو به‌ربژێرێ‌ پارتی دیموكراتی كوردستان ل شنگالێ‌ مه‌ره‌ما من یا سه‌ره‌كی ئه‌وه‌ ئه‌م بشێین، ئاواره‌یێن خوه‌ ڤه‌گه‌رینین و كار ل سه‌ر ئاڤاكرنا شنگال ب گشتی و رێڤه‌به‌ریێن ساخله‌می و په‌روه‌ردێ‌… هتد بكه‌ین. ئێك ژخالێن گرنگ ئجهئینانا ماددێ‌ 140 ئه‌ركه‌ ل سه‌ر هه‌ر نوونه‌ره‌كی كار ل سه‌ر ڤی مادده‌یی بكه‌ت، چونكو ئه‌ڤه‌ ئاریشه‌كا سه‌ره‌كی یه‌ د ناڤبه‌را هه‌رێما كوردستانێ‌ و حوكمه‌تا عیراقێ‌ دا، پێدڤی بوو ل سالا 2007ێ‌ هاتبایه‌ بجهئینان، به‌لێ‌ مخابن دوژمن و نه‌حه‌زان نه‌هێلا بهێته‌ بجهئینان. سه‌ره‌رایی هندێ‌ مادده‌كێ‌ دستووریه‌.

ئه‌ڤرۆ: به‌رنامێ‌ ته‌ یێ‌ پاشه‌رۆژێ‌ چیه‌ هه‌كه‌ هات و خه‌لكی باوه‌ری دا ته‌؟

د. ماجد شنگالی: ژ به‌ر شنگال ده‌رڤه‌ره‌كا چاندنێ‌ یه‌ ئه‌م دێ‌ هه‌موو بزاڤێن خوه‌ كه‌ین كو پشته‌ڤانیا كه‌رتێ‌ چاندنێ‌ ل شنگال بكه‌ین و ڤی كه‌رتی به‌رفره بكه‌ین، چونكو پرانیا خه‌لكێ‌ شنگال جوتیارن و ژیانا وان ل سه‌ر چاندنێ یه‌ و خودان كرنا ته‌رش و ته‌والی یه‌. ئه‌ڤ ژی دێ‌ بیته‌ ئه‌گه‌ر كو ده‌لیڤێن كاری به‌رفره‌هتر لێ‌ بهێن د ناڤا شنگال دا.

خالا دویێ‌؛ ژ به‌ر كو شنگال نێزیكی 450 هزار كه‌سان لێ‌ دژین و قه‌زایه‌كا مه‌زنه‌، ئه‌م دێ‌ بزاڤێ‌ كه‌ین بۆ پاشه‌رۆژا وان گرنگیێ‌ ب كه‌رتێ‌ زانستی ژی بده‌ین و زانكۆ و په‌یمانگه‌هان ل وێ‌ ده‌ڤه‌رێ‌ بدانین.

هه‌روه‌سان دێ‌ گرنگیێ‌ ب كه‌رتێ‌ وه‌رزشی ده‌ین و پشته‌ڤانیا یانێن وه‌رزشی یێن شنگال كه‌ین. مه‌ گه‌نجێن خودان شیان و وه‌رزشڤان یێن هه‌ین. گرنگی دان ب پرسێن ژنێ‌ ژی ئێك ژ به‌رنامێن منه‌ ژ به‌ر كو ژن نیڤا جڤاكی یه‌.

ئه‌ڤرۆ: پێشبینیێن ته‌ بۆ عیراقا داهاتی چنه‌؟

د. ماجد شنگالی: هه‌كه‌ ئه‌ڤ پارتێن سیاسی یێن پشتی سالا 2003 هاتین گوهۆڕینێ‌ د سیاستا خوه‌ دا نه‌كه‌ن، عیراق دێ‌ به‌ره‌ڤ نه‌مانێ‌ ڤه‌ چیت چونكو گه‌نده‌لیه‌كا مه‌زن د عیراقێ‌ دا هه‌یه‌ نه‌ رێكه‌ڤتنه‌كا مه‌زن ژی د ناڤبه‌را وان حزب و لایه‌نێن سیاسی د عیراقێ‌ دا هه‌یه‌.

ئه‌ڤرۆ: باشترین چاره‌سه‌ری بۆ ره‌وشا نها یا ل عیراقێ‌ هه‌یی چیه‌؟

د. ماجد شنگال: پێك ئینانا حوكمه‌ته‌كا ب هێز جڤاته‌كا نوونه‌ران یا كارا و خودان ئێك بڕیار د به‌رژه‌وه‌ندا هه‌موو پارت و نه‌وته‌وه‌ و پێكهاتنان دا بیت بێ‌ جوداهی چ سونه‌ یان شیعه‌ یان كورد داكوكیێ‌ ل مافێ‌ وان بهێته‌ كرن.

ئه‌ڤرۆ: دووماهی تشت ته‌ دڤێت چ بێژی؟

د. ماجد شنگالی: داخوازا من ژ خه‌لكێ‌ شنگال ئه‌وه‌ رۆژا ده‌نگدانێ‌ بچنه‌ سه‌ر سندوقێن ده‌نگدانێ‌، ده‌نگێ‌ خوه‌ بده‌نه‌ لیستا پارتی دیموكراتی كوردستان چونكو ب تێ‌ ئه‌و پارتا باوه‌ریێ‌ یه‌. ئه‌ز وه‌ك به‌ربژێره‌كێ‌ پارتی داخوازێ‌ ژ ده‌نگده‌رێن خوه‌ دكه‌م ده‌نگێ‌ خوه‌ بده‌نه‌ من ئه‌ز وه‌كو دكتور ماجد خه‌له‌ف حه‌مو شنگالی به‌ربژێرێ‌ ژمارا 30 ل سه‌ر پارێزگه‌ها نه‌ینه‌وا بازنا (3) ل شنگال.

نيشاندان1...1,0001,1531,1541,155...1,502زێده‌تر لاپه‌ر 1,154 ژ 1,502
مالپه‌رێ فه‌رمى یێ رۆژناما ئه‌ڤرۆ یه‌ .
ئاگــــــه‌هــــــداری نـــــوویـــــــاتیـــــــان ببــــه‌ .
په‌یوه‌ندی : [email protected]
website security
© Copyright 2021 - Rojnameya Evro - Powered by Kurdo Plus
800 queries in 0.699 seconds.
WP Facebook Auto Publish Powered By : XYZScripts.com